PAMUNODA kuziva nguva, munoitisa kudini? Kangaije munosota roroji yenyu. Mungavona kuti jinonga jiri nguva imwe no 30 o museswa jo masikati. Maizodavira kudini kudari shamwari yenyu ikamubvunjisa kudari: “Wari i nguvenyi?”

Izvi zvinofira ku ndau yamunogararo. Inga muezaniso, mungananga kuti “wari i nguva 1:30” kana “wari i 13:30.” Ku ndau jimweni mungatonanga kuti “pasara meya nguva kuti tende pa nguva mbiri” kuda kunanga pari kucota 30 o museswa kuti jikwane nguva mbiri jo masikati.

Mu nguva jo Bhaibheri vandhu vainangisa kudini nguva? Ivona vaingavo no manera akawanda o kunanga nguva. Mu Matahwa o ciGiriki munoshandiswa magama akadari inga ‘mangwanani,’ ‘masikati,’ zve ‘majisa.’ (Genesi 8:11; 19:27; 43:16, Shanduro yeNyika Itsva; Deuteronòmio 28:29 Shanduro yeNyika Itsva; 1 Majimambo 18:26, Shanduro yeNyika Itsva) Asi nguva jimweni Bhaibheri rinoshandisa magama akajeka kamare.

Mu Iziraeri yo kare, tinovona kuti kwainga no varindiri, maningi-ningi mu nguva yo usiku. VaIziraeri vaipaura nguva jo usiku katatu, vojidanija ‘nguva jo kurinda.’ (Nduyo 63:6, Shanduro yeNyika Itsva) Pana Vatongi 7:19, tinoverenga ngo pamusoro po “mahungu, mukuvo wo kucicana ko varindi.” Mu mukuvo wakabahwa Jesu, vaJudha vaipaura usiku ngo nguva murongomuna jo kurinda, inga zvaiita vaGiriki no vaRoma.

MaVhangeri anobhuya kakawanda ngo pamusoro po nguva iji jo kurinda jo usiku. Inga muezaniso, pa “ngari yocirongomuna yo usiku,” Jesu wakafamba pasezuru po kumwa ecienda kwainga no vajiji vake. (Mateu 14:25) Zve Jesu wakananga mufananijo uwu: “Kudari muno wo muzi noaiziva nguva yo kuguma mbava usiku, waizorinda, aacaizoregerepi kuti nyumba yake iphwanyiwe.”—Mateu 24:43.

Jesu wakananga mushovo murongomuna wo nguva jo kurinda, paakabvunja vajiji vake kuti varambe vakarinda ngokuti avazivi “ngari yo kuzovia muno wo nyumba: Dangani madeko, nokuti mahungu, nokutibze jongwe rikarira, dangani zambakwaeja.” (Marco 13:35) Kurinda ko kutanga kwainga “madeko,” kwaitanga kubvira kubira ko zuva mbhera nguva nvumbamwe jo usiku. Kurinda ko cipiri, kwainga “mahungu,” kwaitanga nguva nvumbamwe jo usiku mbhera pakati po usiku. Kurinda ko citatu kwainga “jongwe rikarira,” kwaitanga pakati po usiku mbhera nguva ndhatu jo mangwanani. Kangaije ndiyona nguva yakarira jongwe pa usiku hwakasungwaya Jesu. (Marco 14:72) Kurinda ko cirongomuna kwainga, “zambakwaeja,” kwaitanga pa nguva ndhatu jo mangwanani mbhera kubuda ko zuva.

Ngo kudaro, pikija mu nguva yo kare vandhu avacainga no rorojho inga jatinajo wari nyamasi, ivona vainga no manera o kunanga kuti jainga nguvenyi.