1, 2. (a) Jehovha wakatajisa kudini vandhu mu njira jakasiana no matajire anoita vandhu vano simba? (b) Tinozobhuisana ngenyi pa musoro uno?

VANDHU VANO SIMBA, kazinji vanobzinyirira vamweni. (Mateu 20:25; Mucumaeri 8:9) Asi Jehovha narini aaiti kudaro. Pikija hake ndi wo Masimba ese, Mundhu ano simba rakakura mudenga no pasi, iyena anonasa kurangarira mazwiro o vandhu vacikazivi kukwana. Iyena wakanaka mwoyo zve anotaja mazwiro edu no zvinodiwa zvedu. Anoceukija kuti atizivi kukwana zve anoziva patinogumira, ngokudaro aatikumbiri kupinda zvatinokwanisa kuita.—Nduyo 103:13, 14.

² Mu Bhaibheri, tinojija kuti Jehovha wakarangarira kudini mazwiro o vandhu vake. Ngatibhuyenyi ngo muezaniso mutatu: Wokutanga, mabesere akaita Jehovha mujaha Samueri kuti azivise masoko o rutongeso ku Mupiri Mukuru Eri. Wocipiri, kusengerera kwakava na Jehovha, Mosi paakava no mazwiro o kuti aacaizokwanisa kuita kuti vaIziraeri vabude mu Ejipita. Zve wocitatu, Jehovha wakatajisa kudini mazwiro o vaIziraeri  pavakabuda ku Ejipita. Tinojijenyi ngo pamusoro pa Jehovha kubvira pa muezaniso iji zve tingamutevejeresa kudini?

3. Ngocapi ciro cinoshamaisa cakaitikira mujaha Samueri pa usiku umweni zve ngowapi mubvunjo watingazviita? (Vonanyi pikica yo kutanga.)

³ Samueri wakatanga kushandira Jehovha ku tabherinakeri paainga cimujaha kamare. (1 Samueli 3:1) Pa usiku umweni, paakaenda koovata, pakaitika ciro cinoshamaisa cicikazivi kumboitikazve. * (Vonanyi masoko o pasi.) (Verenganyi 1 Samueli 3:2-10.) Iyena wakazwa mundhu acimudanija. Samueri wairangarira kuti ndi Mupiri Mukuru Eri, wainga waamusharuka. Ngo kudaro, iyena wakamuka wogogoma kwenda ka Eri, woti: “Ndiri pano, ngokuti mandidana.” Asi Eri wakati: “Andizivi kukudana.” Zviro izvi no zvaitika kunodarika ruviri, Eri wakazwisisa kuti wainga Mwari waidanijaro Samueri. Ngokudaro, Eri wakabvunja Samueri zvaaidikana kunanga pa bvaza inotevera zve Samueri wakazwira. Ngenyi Jehovha aazivi kubvunja Samueri pa kutanga kuti wainga iyena waimudanijaro? Bhaibheri arinangi. Asi, zvingaita kuti Jehovha wakaita zviro mu njira iyi ngokuti waitaja mazwiro a Samueri.

4, 5. (a) Samueri wakaitenyi Jehovha paakamupa masoko kuti aende komazivisa Eri? (b) Ciitiko ici cinotijijisenyi ngo pamusoro pa Jehovha?

⁴ Verenganyi 1 Samueli 3:11-18. Mutemo wa Jehovha unobvunja vana kuti vanodikana kureremeja vasharuka, maningi-ningi vaya vano mutoro. (Exodo 22:28; VaLevi 19:32) Ngokudaro, zvaizonesa maningi kuna mujaha Samueri, kwenda kuna Eri comangwanani zve acingathyi womubvunja masoko akavanga o rutongeso. Bhaibheri rinotibvunja kuti Samueri “waithya kuverengera Eli mazwi aainga akazwa.” Asi, Mwari wakaita kuti zvijeke kuna Eri, kuti wainga Iyena waidanijaya Samueri. Inga muviyo, Eri wakakumbira kuti Samueri atame kuviga ciri cese cakananga Mwari. Samueri wakazwira Eri ‘womuverengera bzese.’

⁵ Masoko aya aacaingepi mapsa. Ngokuti pakutanga ‘mundhu wa Mwari’ wainga wakapa Eri masoko akafanana. (1 Samueli 2:27-36) Ciitiko ici cinotikhombija kamare kuti Jehovha wakangwara zve anorangarira mazwiro o vamweni.

6. Tingajijenyi kubvira mu njira yakabesera Mwari mujaha Samueri?

⁶ Uri mujaha kana musikane here? Ngokudaro, zvakaitikari no mujaha Samueri zvinovonesa kuti Jehovha anozwisisa zvineso zvako no mazwiro ako. Kangaije una nyowa zve zvinokunesera kucumaera vandhu vakura kana vano mupira wakasiana no wako. Ungava no cokwadi co kuti Jehovha anoda kukubesera. Ngokudaro, itai mukumbiro zve mubvunjei mazwiro ako. (Nduyo 62:9) Nasai kurangarira ngo muezaniso jo majaha o mu Bhaibheri akadari inga ndi Samueri.  Zve bhuyai no hama no hambzaji jo mupira wako kana jaavasharuka kuti vakanyisisa kudini zvineso zvakadari inga zvako. Ivona vangatokubvunja ngo pamusoro po mabesere o vakaithwa ndi Jehovha, kangaije mu njira yovacaivetera.

7, 8. Jehovha wakatatijisa kudini kuti wairangarira maningi mazwiro a Mosi?

⁷ Mosi paainga no 80 o makore okubahwa, Jehovha wakamupa basa rinonesa maningi: Kuti asujunure jinja ro Iziraeri kubva mu uranda ku Ejipita. (Exodo 3:10) Basa iri kangaije rakakaruja Mosi, ngokuti iyena wainga waa muhavisi ku Midhiani ko 40 o makore. Mosi wakati: “Ndiri ani inini, kuti ndiende kuna Faro kobudisa vaIsraeli mu Ejipiti?” Jehovha wakamugondisa kudari: “Inini ndinozova newe.” (Exodo 3:11, 12) Jehovha wakamugondisazve kuti vakuru vo Iziraeri ‘vaizopurukira izwi rake.’ Pikija zvakadaro, Mosi wakati: “Kaveta vanozoramba kunditendera no kundizwira.” (Exodo 3:18; 4:1) Zvokadi kamare, Mosi wainga ecinanga kuti Jehovha waiposa! Asi, Jehovha wakava anosengerera na Mosi. Iyena wakamupa simba kuti aite mushamaiso. Zvokadi kamare, Mosi wainga mundhu wokutanga anonangwa mu Bhaibheri kuti wakava no simba iri.—Exodo 4:2-9, 21.

⁸ Pikija no zvese izvi, Mosi wakapsaka thangwe rimweni ro kujiinikira ndirona. Iyena wakananga kuti aacaikwanisa kuvereketa ushoni. Ngo kudaro, Mwari wakamubvunja kudari: “Ndinozova pa muromo pako no kukujijisa bzo unozodikana kunanga.” Kureva kuti Mosi wakazvithemba here? Haiwa, iyena wakakumbira kuti Mwari atume mundhu umweni! Jehovha wakanyangajwa maningi. Asi, iyena wakarangarira mazwiro a Mosi, ngokudaro wakatuma Aroni kuti averekete pa cinyau ca Mosi.—Exodo 4:10-16.

9. Kuitisa kudini kusengerera no kunaka mwoyo ka Jehovha kwakabesera Mosi kuti ave mutungamiriri waushoni?

⁹ Ciitiko ici, cinotijijisenyi ngo pamusoro  pa Jehovha? Ngokuti Jehovha ngo wo Masimba ese, waizokwanisa kushandisa simba rake kuti athyisijire Mosi no kumuita kuti azwire. Kunja kwa Izvi, Jehovha wakasengerera, wakakhombija kunaka mwoyo, wakagondisa mushandiri wake waitendera zvaari zve waijidodokesa, kuti waizova naye. Izvi zvakashanda here? Hina, zvakashanda! Mosi wakava mutungamiriri mukuru wo vandhu va Mwari. Iyena wakaeja kuva wakapfava zve anorangarira mazwiro o vamweni, inga zvakaita Jehovha naye.—Bziverengo 12:3.

10. Tinobesereka kudini tikava vanorangarira mazwiro o vamweni inga zvinoita Jehovha?

¹⁰ Tinojijenyi nyamasi uno kubvira ku ciitiko ici? Kudari muri mwamuna, mubari kana mukuru, imwimwi muno simba rakati kuti ro kutonga vamweni. Ngo iyo ndava, zvinosisira maningi kwamuri, kutevejera Jehovha ngo kuva anorangarira mazwiro o vamweni, kuva wakanaka mwoyo zve anosengerera ku mukaji wenyu, vana venyu no vaya vari mu ungano. (VaKolosi 3:19-21; 1 Pedru 5:1-3) Kudari mukatevejera Jehovha Mwari na Jesu Kristu, Mosi Mukuru, munozoita kuti vamweni varerukihwe kuviya kobhuya nemwi zve munozovavangisa. (Mateu 11:28, 29) Munozovavo muezaniso waushoni kwavari.—Vaheberi 13:7.

11, 12. Jehovha wakaitisa kudini kuti vaIziraeri vajizwe vakangwaririka no kugarisika pavakabuda ku Ejipita?

¹¹ Kangaije painga no zviuru zvinodarika zvitatu zvo vaIziraeri vakabva ku Ejipita mu gore ro 1513 Kristu acito aviya. Pa cikwata condhoco, painga no vana, vasharuka, kangaije vamweni vainga vari kuhwaja kana vatori zvirema. Cikwata cakakura kudari co vandhu caida Mutungamiriri anozwisisika zve anotaja mazwiro aco. Zve ndizvona zvakaita Jehovha, ecishandisa Mosi. Inga muviyo, vaIziraeri vaijizwa vakangwaririka pikija vainga vasia nyumba javo.—Nduyo 78:52, 53.

¹² Jehovha wakaitisa kudini kuti vandhu vake vajizwe vakangwaririka no kugarisika? Iyena wakaronga jinja ro vaIziraeri kuti ‘rijangatire bzijito bzo hondo’ pavakabuda ku Ejipita. (Exodo 13:18) Ngokuti ivona vainga vakarongeka mu njira iyi, vaizova no cokwadi co kuti Mwari wavo wainga ecivonerera zvese. Jehovha wakavapazve “gwiti” raivaseseja co masikati no “ruveneko hwo muriro” co usiku kuitira kuvaceukija kuti  iyena wainga navo, ecivatungamirira no kuvangwarira. (Nduyo 78:14) Zve jinja ro vaIziraeri raida kuva no cokwadi ngo ndava yo zvakazoitika tevere.

13, 14. (a) Jehovha wakangwaririsa kudini vaIziraeri pa Jombe ro Kupsuka? (b) Jehovha wakatatijisa kudini kuti iyena ano simba rakakura kupinda vaEjipita?

¹³ Verenganyi Exodo 14:19-22. Rangariranyi kuti muri pondhopo no vaIziraeri. Makafungihwa. Masoca o ku Ejipita ari sure kwenyu zve Jombe ro Kupsuka riri kumbeji kwenyu. Perapo Mwari woita ciri cese. Gwiti raianjaya kugara pambeji penyu roviya sure kwenyu, roparajanisa imwimwi no vaEjipita. Wari ivona vari mu cidima, asi, ku divi renyu kwazara ngo ruvheneko unoshamaisa! Perapo movona Mosi ecitambanuja nyara yake mu jombe zve kova no mbhepo huru ecibva ngo kumabvazuva, yofunungura gwanja ro kwenda mombera mo jombe. Ngokudaro, imwimwi, mbhuri yenyu no zvinyama zvenyu zvese mofamba pasi pakaoma mu njira yakarongeka no vandhu vamweni vese. Muri kushamaisika ngo kuti pasi apana matope nee aparipi kusejemuka. Pakaoma zve pakavangira, ngo iyo ndava panofambika. Inga muviyo, pikija vaya vacikakwanisi kufambisira vari kutokwanisa kuguma mombera vakangwaririka.

¹⁴ Verenganyi Exodo 14:23, 26-30. Pazvainga zveciitika, Faro, uwo waizvikuja zve wokutama ungwaru, wotanga kutevera imwimwi no vaIziraeri vamweni. Perapo Mosi wotambanuja nyara yake zve jombe robatanazve. Kumwa yoboboja Faro no masoca ake. Vopera kufa vese!—Exodo 15:8-10.

15. Ciitiko ici cinomujijisenyi ngo pamusoro pa Jehovha?

 ¹⁵ Ciitiko ici, cinotijijisazve zvimweni ngo pamusoro pa Jehovha. Iyena ndi Mwari wakarongeka zve mugariro uwu unotibesera kuti tijizwe takangwaririka zve takagarisika. (1 VaKorinto 14:33) Inga muhavisi, uwo ano rudo zve ano haraka no mabvuta ake, Jehovha anotaja vandhu vake mu njira jinoshanda. Iyena anoramba ecivangwarira ku vavengi vavo. Izvi zvinotivangisa zve zvinotitondhoja patinonga tecikhwedera phedo no kupera ko mugariro uno.—Mazwi Akangwara 1:33.

16. Tingabesereka kudini kudari tikaeja kuzwisisa njira yakashandisa Jehovha kuti aponese vaIziraeri?

¹⁶ Nyamasi uno, Jehovha aciri kundotaja vandhu vake inga cikwata. Iyena anovabesera kuti varambe vano ushamwari hwaushoni naye zve anovangwarira ku vavengi vavo. Zve anozoramba ecindozviita pa dambujiko guru riri kuviyari sasambi. (Apokalipsi 7:9, 10) Azvinenyi dangani vadoko kana vasharuka, vano uhomi hwaushoni kana zvirema, vandhu va Jehovha avadotami cokuita kana kuthyia pakati po dambujiko guru. * (Vonanyi masoko o pasi.) Zvokadi, ivona vanozozondwa kamare! Ivona vanozoceukija magama a Jesu o kuti: “Vangiriranyi, musanyi musoro; ngokuti ruponeso huri kuguma.” (Luka 21:28) Pikija pavanonga vacihwiswa ndi Gogi, cimwe cikwata cinosimba maningi kupinda Faro, vandhu va Mwari vanozothemba kuti vanozongwaririhwa ndi Jehovha. (Ezekieli 38:2, 14-16) Ngenyi? Ngokuti ivona vanozviziva kuti Jehovha aacinji. Anozokhombijazve kuti iyena ndi Muponesi ano rudo zve anotaja vandhu vake.—Isaia 26:3, 20.

17. (a) Tingabesereka kudini patinojija ndhorovondho jo mu Bhaibheri ngo pamusoro po matajire akaita Jehovha vandhu vake? (b) Tinozobhuyenyi pa musoro unotevera?

¹⁷ Pa musoro uno, takwanisa kuvona muezaniso munganani jo kuti Jehovha anorangarira mazwiro o vamweni zve wakanaka mwoyo paanotaja, kutungamirira no kuponesa vandhu vake. Kudari mukarangarijisisa zviitiko izvi, ejanyi kujija ciro cipsa ngo pamusoro pa Jehovha ngo kusotesesa zvese pikija ciro cidoko camainga mucito makacisotesesa. Pamunondoramba mucijija ngo mugariro jakaseja ja Jehovha, rudo no rutendo hwenyu hunozoguma pa kuvanga. Pa musoro unotevera, tinozojija ngo njira jatingatevejera Jehovha ngo kuva vanorangarira mazwiro o vo pa mbhuri yedu, mu ungano no vo mu mushando wedu.