Rangariranyi Mazwiro o Vamweni no Kunaka Mwoyo Mukutevejera Jehovha
‘Anodakara mundhu anorangarira ngo zvo mundhu wakaderera.’—NDUYO 41:1, Shanduro yeNyika Itsva.
1. Vanamati va Jehovha vanokhombijisa kudini kuti vanodisana?
VANAMATI va Jehovha pasi pese vanotora rutivi hwo mbhuri imwe basi. Ivona ndi hama no hambzaji jinodisana. (1 Johani 4:16, 21) Nguva jimweni ivona vanojipira kuitira hama javo, asi kazinji vanokhombija rudo hwavo ngo kuitirana zviro zvidoko. Inga muezaniso, ivona vangananga ciro cinodakajisa hama kana kuikhombijira kunaka mwoyo. Patinorangariravo mazwiro o vamweni, tinotevejera Baba wedu vo mugore.—VaEfeso 5:1.
2. Jesu wakatevejeresa kudini rudo hwa Baba wake?
2 Jesu wakatevejera Baba wake ngo maitiro akaperera. Nguva jese waitaja vamweni ngo kunaka mwoyo. Iyena wakati: “Izanyi kondiri mwese makaremba, munoremehwa kukuru. Inini ndinozomuzoroja.” (Mateu 11:28, 29) Patinotevejera Jesu zve ‘torangariravo ngo zvo vakaderera,’ tinozodakajisa Jehovha zve tinozodakaravo. (Nduyo 41:1, Shanduro yeNyika Itsva) Pa musoro uno, tinozovona njira jatingakhombija ndijona kuti tinorangariravo mazwiro o vo pa mbhuri yedu, hama no hambzaji jedu pomwe na vaya vatinosongana navo mu mushando.
RANGARIRANYI MAZWIRO O VO PA MBHURI
3. Mwamuna angatajisa kudini mazwiro o mukaji wake? (Vonanyi pikica yo kutanga.)
3 Majimwamuna anodikana kugaja muezaniso zve okhombijira kuti anotaja maningi mbhuri yao. (VaEfeso 5:25; 6:4) Bhaibheri rinonanga kuti majimwamuna anodikana kurangarira no kuzwisisa zvinodiwa zvo vakaji vao. (1 Pedru 3:7) Mwamuna anozwisisa, anoziva kuti pikija iyena wakasiyana no mukaji wake ngo maitiro akawanda, iyena aazivi kunaka maningi kupinda mukaji wake. (Genesi 2:18) Iyena anorangarira mazwiro o mukaji wake zve anomutaja ngo nderemejo. Mwanakaji umweni wo ku Kanadhaa, wakananga kudari ngo pamusoro po mwamuna wake: “Iyena aazivi kumbohwisana no mazwiro angu kana kunanga kudari: ‘Audikani kujizwa kudaro.’ Iyena ndi mupurutani waushoni. Paanondibesera kurungamisa mavonero angu ngo pamusoro po shwiro iri yese, anozviita ngo kunaka mwoyo.”
Mwamuna anoramba akagondeka kuno mukaji wake ngo kuti anomuda zve anonyenya zvakashata
4. Mwamuna angakhombijisa kudini kuti anorangarira mazwiro o mukaji wake pa matajire aanoita mwanakaji umweni?
4 Mwamuna anorangarira mazwiro o mukaji wake aazotambi no mwanakaji umweni eciita inga anomuda kana kukhombijira kudakarira kwakashata kuno mwanakaji umweni, azvinenyi ku mundhu, mu zvinofambisa masoko kana ngo mu interneti. (Jobe 31:1) Aazoshandisi interneti kuti atambe no vanakaji vamweni eciita inga anovada zve aazovoni masaiti akashata. Hina, iyena anoramba akagondeka kuno mukaji wake, ngokuti anomuda zve ngokuti anoda Jehovha no kunyenya zvakashata.—Verenganyi Nduyo 19:14; 97:10.
5. Mukaji angatajisa kudini mazwiro o mwamuna wake?
5 Mwamuna paanotevejera muezaniso wo rudo wa Jesu Kristu, musoro wake, zvinozoreruka maningi kuti mukaji wake akhombije ‘nderemejo huru’ kwaari. (VaEfeso 5:22-25, 33, Shanduro yeNyika Itsva) Zve mukaji paanoreremeja mwamuna wake, anozovangisira kumuzwisisa no kumutaja no kunaka mwoyo paanonga akabatikana ngo shwiro jo ku ungano kana paanonga ecihwisana no zvineso zvimweni. Mwamuna umweni wo ku Britheni wakananga kudari: ‘Nguva jimweni, mukaji wangu anozozwisisa macinjire anoita mazwiro angu ngo ndava yo ciri cese cinonga cecindinyangaja. Nguva jimweni anotovetera nguva kwayo kuti ashandise ciambi ciri pana Mazwi Akangwara 20:5 zve anokwanisa kuziva zvandiri kurangarira, kudari iri shwiro inoita kuti ndimubvunjevo.’
6. Tese tingavangisa kudini vana vadoko kuti varangarirevo ngo vamweni no kuva vakanaka mwoyo zve vanozobesereka kudini ndizvona?
6 Vabari pavanotaja vamweni mu njira yo kuvarangarira, vanogaja muezaniso wakanaka kuno vana vavo. Vanodikanavo kujijisa vana vavo kuti varangarirevo ngo zvo vamweni no kuva vakanaka mwoyo. Inga muezaniso, vabari vangajijisa vana vavo kuti vatame kugogoma-gogoma pa Nyumba yo Umambo. Kana pavanonga vari pa mabungaijo no vamweni, vangajijisa vana vavo kuti vavetere madhodha kuti ambotange ndiwona kutora zvokuha. Izvokadi kuti vese mu ungano vangabeseravo vabari. Ngo kudaro, tinodikana kusimba mwana mudoko paanoita ciro co hwiru, cakadari inga kutifunungurira musuvo. Izvi zvinozoita kuti mwana ajizwe ushoni zve zvinomubesera kujijira kuti “anodakara anopa, kupinda wiya anopuwa.”—Maitiro o Vapostori 20:35.
RANGARIRANYI MAZWIRO O VO MU UNGANO
7. Jesu wakarangarira kudini ngo mazwiro o mwanarume wainga no mandondo zve tingajijenyi ngo muezaniso wake?
7 Njiku imweni, Jesu wainga ku mutundhu waidanijwa Dakapori, vandhu “vakamuzisira mbeveve nyamandondo.” (Marco 7:31-35) Jesu wakamurapa, haiwa pamberi po vamweni. Ngenyi? Zvecivoneka kuti mwanarume wiya wainga no mandondo, kangaije aacaizojizwa ushoni pamberi po vandhu vakawanda. Jesu wakazwisisa mazwiro ake zve “wakamutora kuenda pa kareya” ku ndau icainga no vandhu vakatendeneja, womurapa. Zvokadi, itusu atiiti mushamaiso, asi tinodikana kurangarira ngo pamusoro po zvinodiwa no mazwiro o hama jedu no kujikhombijira kunaka mwoyo. Mupostori Pauro wakatara kudari: “Ngatirindisane umwe no umweni, pa basa ro kudisana no kuita bziro bzakanaka.” (Vaheberi 10:24) Jesu wakazwisisa mazwiro o mwanarume waingaya no mandondo, womutaja ngo kunaka mwoyo. Uwu, muezaniso wakanaka kwatiri!
Rudo unotiita kuti tiite zvese zvatinokwanisa kuti tibesere hama no hambzaji jedu jaavasharuka kana jiri zvirema
8, 9. Tingakhombijisa kudini kuti tinotaja vasharuka no vari zvirema? (Ipanyi muezaniso.)
8 Rangariranyi ngo zvo vasharuka no vaya vari zvirema. Mugariro unosisira maningi mu ungano yo ciKristu i rudo, haiwa kukwanisa kuita zviro. (Johani 13:34, 35) Rudo unotiita kuti tikwanise kuita zvese zvatinokwanisa kuti tibesere hama no hambzaji jedu jaavasharuka kana jiri zvirema kuti jigume pa musongano no koocumaera. Tinojibesera pikija zvikava zvecinesa kwatiri kana ticikakwanisi kuita zvizinji. (Mateu 13:23) Michael, anofamba ngo cikarinya, anobonga maningi ngo besero raanowana pa ukama hwake no ku hama jo ungano yake. Iyena wakananga kudari: “Ngo ndava yo besero ravo vese, ndiri kukwanisa kwenda ku musongano muzinji no kuendavo mu basa ro mu munda. Maningi-ningi rakadari inga ro ucapupu hwo pambhene.”
9 Mu maBheteri mazinji, muno hama no hambzaji jakagondeka jaavasharuka kana jiri zvirema. Vavonereri vakanaka mwoyo, vanokhombijira rudo kovari ngo kuita nasiriro kuti vacumaere vecishandisa karata no foni. Hama Bill, vaano 86 o makore o kubahwa zve vanocumaera ngo karata kuno vandhu vo mutundhu jo ndhambo, vakati: “Tinobonga maningi ngo cidakajiso co kukwanisa kutara karata.” Hambzaji Nancy, vari kukhwedera ku 90 o makore o kubahwa, vakananga kudari: “Karata andiivoni inga ciro co kuzaja nviropi basi. I basa ro munda. Vandhu vanodikana kuziva cokwadi!” Hambzaji Ethel, vakabahwa mu gore ro 1921, vakananga kudari: “Kuhwajihwa i divi ro maponero angu. Njiku jimweni ndinonesehwa ngo kuda kusimira basi.” Pikija zvakadaro, ivona vari kudakajihwa ngo kucumaera vecishandisa foni zve vano hwiririro jakanaka maningi. Hambzaji Barbara, vano 85 o makore o kubahwa, vakasanangura kudari: “Ngo ndava yo uhomi hwangu hwakaremba, kucumaera nguva jese, kunondinesera maningi. Asi kucumaera ngo foni kunondiita kuti ndikwanise kubhuya no vamweni. Jehovha, ndinobonga!” Pa mukuvo ucikadariki gore, cikwata co vasharuka vanosisira cakapeja nguva jinokwana 1.228 mu basa ro kucumaera, vakatara karata jinokwana kuita 6.265, vakafona bvaza jinokwana kuita 2.000 zve vakakovanisa mabhuku anokwana 6.315. Tingava no cokwadi co kuti kuvangisira uku kuri kudakajisa maningi Jehovha!—Mazwi Akangwara 27:11.
10. Tingabesera kudini hama jedu kuti jive no muviyo kamare pa musongano?
10 Rangariranyi ngo zvo vamweni pa musongano jo ciKristu. Patinorangarira ngo zvo vamweni, tinobesera hama kuti jive no muviyo pa musongano. Kuitisa kudini? Njira imwe ngo yo kuguma nguva iciripo kuitira kuti titame kujiphingaija. Nguva jimweni, zviro zvaticikaveteri zvinoitika, zvotiita kuti tinonoke. Asi kudari tinononoka kazinji, tinodikana kurangarira ngo mapsasire azviri kuita hama zve tovona zvatingaita kuti ticinje kuitira kuti tikhombije kuti tinotaja hama jedu. Ceujanyivo kuti Jehovha no Mwana wake ngovanotikoka kuti tiende ku musongano. (Mateu 18:20) Zvokadi, tinodikana kukhombija nderemejo kuna ivona ngo kuguma nguva iciripo!
11. Ngenyi hama jinoita mativi pa musongano jinodikana kuteverera ndhungamiriro iri pana 1 VaKorinto 14:40?
11 Kudari tinorangarira mazwiro o hama jedu, tinozotevejera ndhungamiriro yo Bhaibheri inonanga kudari: “Kaveta bzese ngabziitike ngo kureremejana no kuzwirana.” (1 VaKorinto 14:40) Hama jinoita mativi pa musongano jinotevejera ndhungamiriro iyi ngo kupeja mativi avo pa nguva kwayo. Ngo maitiro aya, ijona jinorangarira haiwa basi mazwiro o mundhu anonga ecida kuita divi rinotevera, asi jinonga jecirangarira ngo mazwiro o vese mu ungano. Rangariranyi kuti vamweni vanozozwa kudini kudari musongano ukanonoka kupera. Hama jimweni jinodikana kufambisa karu mumango wakareba kuhwirira ku muzi. Vamweni vanodikana kwenda koopsaka mashibhomba kuti vapinde ndiwona. Zve vamweni vakacadha no vandhu vaciripi Zvapupu zve vanovetehwa kuti vagume pa muzi pa nguva yakati kuti.
12. Ngenyi vakuru vanofanera kureremejwa no kudiwa? (Vonanyi bhokiso rinoti: “ Rangariranyi Mazwiro o Vaya Vanotungamirira.”)
12 Vakuru vanoshanda ngo simba mu ungano no mu mushando, ngo kudaro vanofanera kureremejwa no kudiwa. (Verenganyi 1 VaTesalònika 5:12, 13.) I zvokadi kuti imwimwi munobonga maningi ngo zvese zvaanomuitira. Mungakhombijazve zvondhozvo ngo kuvazwira ngo mwoyo wese no kuvabesera ngo kuti “ivona vanopsanga basi kugarisika kwenyu, vecibziziva kuti vanozodavira ndava kuna Mwari.”—Vaheberi 13:7, 17.
RANGARIRANYI MAZWIRO O VAMUNOWANA MU MUSHANDO
13. Tingajijenyi ngo matajire aiita Jesu vandhu?
13 Mu ciporofita ngo pamusoro pa Jesu, Isaia wakati: “Aazogurisi njanga yakaphwanyiwa, aazojimi mwenje unopfukuta usi.” (Isaia 42:3) Rudo hwainga na Jesu kuno vandhu waiita kuti ave no pena. Iyena waizwisisa mazwiro o vaya vainga vakacamwa no kuremba inga “njanga yakaphwanyiwa” kana “mwenje unopfukuta usi,” ngo kudaro waivataja ngo kunaka mwoyo no kusengerera. Pikija vana vadoko vaida kugara na Jesu. (Marco 10:14) I zvokadi kuti atingakwanisi kuzwisisa kana kujijisa vandhu inga manera aiita Jesu kamare. Asi tingakhombija kuti tinorangarira ngo zvo vaya vari mu ndima yatinocumaera ngo mabhuire atinoita naivona, ngari yotinobhuya navo zve mukuvo watinopeja tecigara navo.
Magama atinobhuya no izwi redu zvinodikana kukhombija vandhu kuti takanaka mwoyo zve tinovataja
14. Ngenyi tinodikana kurangarira mabhuire atinoita no vandhu?
14 Tinodikana kubhuisa kudini no vandhu? Nyamasi uno, mamirioni o vandhu ‘vari kutajwa ngo maitiro acizivi kunaka zve vari kubarariswa’ ngo vatengesi vanoda kubirana zve vakashata, vo zvo matongehwe o nyika no vatungamiriri o zviara vo nyika ino. (Mateu 9:36, Shanduro yeNyika Itsva) Inga muviyo, vazinji avacathembi mundhu nee avacina vetero. Ngo iyo ndava, magama atinobhuya no izwi redu rinodikana kuvakhombija kuti takanaka mwoyo zve tinovataja! Vandhu vazinji vanoda kupurukira masoko edu, haiwa basi ngo kuti tinoshandisa ushoni Bhaibheri asi ngo kuti tinovadakarira zve tinovareremeja ngo mwoyo wese.
15. Ngo japi njira jimweni jatingakhombija ndijona kuti tinorangarira mazwiro o vandhu vo ndima yedu?
15 Kuno njira zinji jatingavonesa ndijona kuti tinorangariravo mazwiro o vari mu ndima yedu. Tinodikana kuita mubvunjo, ngo manera o kunaka mwoyo zve no nderemejo. Piyona umweni wakashanda mu ndima yo kuti vazinji vainga no nyowa, ngo kudaro iyena aacaiita mubvunjo jaiivaita kuti vapseruke pavaikonehwa mupinguro wokadi. Iyena acaiita mubvunjo jakadari inga iji: “Munoriziva zina ra Mwari here?” kana “Munozviziva kuti Umambo hwa Mwari i cinyi here?” Kusiyapo zvondhozvo, iyena waiita mubvunjo jakadari inga uwu: “Ndakajija mu Bhaibheri kuti Mwari ano zina. Ndingamukhombijavo kuti ngorapi here?” Maitiro aya aashandi kwese, ngo kuti vandhu vano magariro akasiyana. Asi nguva jese tinodikana kutaja vandhu vo mu ndima yedu ngo kunaka mwoyo no nderemejo. Kuti tizviite, tinodikana kuguma pa kunasa kuvaziva.
16, 17. Tingakhombijisa kudini kunaka mwoyo patinotema civaringo co kuti (a) ngari yapi yatinodikana kugumira vandhu? (b) tinodikana kupeja mukuvo wakadini tecibhuya navo?
16 Ngari yapi yatinodikana kugumira vandhu? Patinocumaera nyumba ngo nyumba, vandhu vanonga vacikativeteri ngo kuti vanonga vacizivi kutikoka. Ngo kudaro, zvinosisira maningi kuti tivagumire pa mukuvo wo kuti kangaije vanonga vecida kubhuya. (Mateu 7:12) Inga muezaniso, kunanga kuti mu ndima yenyu vandhu vanononoka kumuka mukupera ko bviki here? Kana zvakadaro, imwimwi mungatanga basa renyu ngo kucumaera mu zvitaka, mu ndau jakazara vandhu, kana kuita hwiririro kuno vandhu vamunoziva kuti vanonga vakanasiririka kuti vabhuye.
17 Tinodikana kupeja mukuvo wakadini? Vandhu vazinji vakabatikana maningi, ngo kudaro, zvaizova zvakanaka kupeja nguva shomani, maningi-ningi pa kutanga. Zviri nani kuita mabhuyo okukasika kuciripi kugara maningi. (1 VaKorinto 9:20-23) Vandhu pavanovona kuti tinozwisisa kuti ivona vakabatikana, vanodakarira kubhuya nesu pa bvaza imweni yatinozosongana navo. Kudari tikatevejera mugariro jinoviiswa ngo mujimu wa Mwari, zvokadi tinozova “vabeseri va Mwari.” Jehovha angatotishandisa kuti tibesere ari wese kujija cokwadi!—1 VaKorinto 3:6, 7, 9.
18. Patinorangarira mazwiro o vamweni, makomborero api atingavetera kuashira?
18 Ngo kudaro, ngatiite zvese zvatinokwanisa kuti tikhombije kuti tinorangariravo mazwiro o vo pa mbhuri yedu, hama no hambzaji jedu no avaya vatinosongana navo mu mushando. Tikadaro, tinozova no makomborero akawanda maningi, wari zve kumbejiyo. Inga zvinonangwa pa Nduyo 41:1, 2, Shanduro yeNyika Itsva: ‘Anodakara mundhu anorangarira ngo zvo mundhu wakaderera; Jehovha anozomuponesa pa njiku yo dambujiko. Jehovha anozomungwarira no kumujivirira kuti arambe ari penye. Iyena anozonangwa kuti mundhu wakadakara mu nyika.’
