Iyona inonanga kudari: ‘Ukavona murombo ecixuphwa mu nyika, ururami no bzokudikana zveciphambaniswa, ucaxamiswa: ndiani ari nyezuru, ano umwe wakamupinda anomurindira; no panyezuru po vovaviri pano vamwenibze vakuru kupinda ivona.’—Mucumaeri 5:7.

Mu mavonero o vandhu, vhesi iyi iri kunasa kusanangura vandhu vano simba vari kutonga. Asi tikanasa kurangarijisisa kamare, iyona ingatonangavo cokwadi ngo pamusoro pa Jehovha, cokwadi cokuti cinodikana kutivangisa kamare.

Mucumaeri 5:7 iri kunangira mutongi anoshupha varombo no kutama kuita zvakarungama. Mutongi uu, anoceukija kuti ari kuvoniwa ngo mundhu umweni wakakhwirira kana kuti ano simba guru kupinda iyena. Zvokadi kamare, zvingaita inga kuti kuno vamweni vano simba guru kupinda ivona. Zvinosuruvarisa ngo zvokuti, mu utongi hwo vandhu, vatongi vese avathembeki zve vandhu vese vari kutambujika ngo ndava yo kutama kurungama kondhoko.

Asi, pikija zviro pazvinovoneka inga kuti azviripi ushoni, tingaembezehwa ngo kuziva kuti Jehovha ari ‘kurinda’ vatongi vese. Tingakumbira besero kuna Mwari no kuthura muthwaro yedu kwaari. (Nduyo 55:23; VaFilipi 4:6, 7) Tinoziva kuti “majiso a Tenji Mwari, anovona nyika yese, kuti avangise vaya vanomugonda ngo mwoyo yavo yese.”—2 Kronike 16:9.

Ngokudaro, Mucumaeri 5:7, inoticeukija ngo pamusoro po mugariro uri kuvoneka mu nyika nyamasi uno no kuziva kuti nguva jese pano mundhu ano simba guru kupinda vatongi vo nyika ino. Kusiyapo zvese izvi, vhesi iyi ingatibesera kuvona kuti Jehovha ndiyena mukuru-kuru, hina Mutongi Anosimba Rakakura. Iyena wari ari kutonga ecishandisa Mwanake, Jesu Kristu, Mambo wo Umambo hwake. Wo Masimba-ese, uwo anokwanisa kuvona zvese no vese, wakarungama pa zvese kubatanijavo no Mwanake wakadarovo.