1-2. Mucumaeri 11:6, yakabatana papi no basa ro kucumaera?

MU NYIKA jimweni, vandhu vazinji vanoda kujija zvakawanda pavanoashira masoko akanaka. Zvinodari inga kuti ivona vaitomavetera! Mu ndau jimweni, vandhu avadakariri kuzwa ngo pamusoro po masoko a Mwari kana zvinonangwa mu Bhaibheri. Ngozvapi zvamunovona kwamunogararo? Azvinenyi no zvavanodavira, Jehovha anoda kuti tienderere mberi tecicumaira mbhera wonanga kuti zvakwana.

² Nguva yakagajwa ndi Jehovha ikaguma, basa ro kucumaera rinozopera zve “kunozoviya kupejwa ko bzese.” (Mateu 24:14, 36) Asi icito yaguma nguva iyi, tingaitisa kudini kuti tizwire magama okuti “nyara jako jitame kuzorora”? *—Verenganyi Mucumaeri 11:6.

3. Zvicinyi zvatinozovona pa musoro uno?

³ Musoro wakaperaya, wakabhuya ngo zviro zvirongomuna zvatinodikana kuita kuti tikwanise kubudirira inga “vatandi vo vandhu.” (Mateu 4:19) Pa musoro uu, tinozobhuya ngo zviro zvitatu zvingavangisa cido cedu co kucumaera, azvinenyi no zvineso zvatinosongana nazvo. Tinozojijira kuti ngenyi zvinosisira (1) kudira basa ro kucumaera pakutanga mu upenyu hwedu, (2) kuva vandhu vanosengerera no (3) kuva no rutendo hwakavanga.

4. Ngenyi tinodikana kubatikana pa basa ratakapuwa ndi Jehovha kuti tiite?

⁴ Jesu wakananga zviitiko no mugariro jinovonesa kuti tiri kupona mu njiku jo kupejisira. Iyena waizviziva kuti zviro izvi zvaizokangaija vashandiri vake mu basa ro kucumaera. Ngo kudaro,  iyena wakavhunja vajiji vake kudari: “Rindanyi.” (Mateu 24:42) Mu njiku ja Nowa, kwainga no zviro zvakawanda zvaiphingaija vandhu kuti vatame kupurukira ngwajo yavaipuwa. Zviro zvakafanana, zvingatiphingaijavo nyamasi uno. (Mateu 24:37-39; 2 Pedru 2:5) Ngo kudaro, tinoda kubatikana pa basa ratakapuwa ndi Jehovha kuti tiite.

5. Mukuzwirana no Maitiro o Vapostori 1:6-8, basa ro kucumaera raizogumira kwapi?

⁵ Nyamasi uno, tinodikana kuenderera mberi takabatikana maningi pa basa ro kucumaera masoko akanaka o Umambo. Jesu wakananga kuti vateveri vake, vaizoenderera mberi vecicumaera pasure po kufa kwake no kuita mabasa mazinji kupinda aakaita paainga ecipona. (Johani 14:12) Jesu paakafa, vateveri vake vamweni vakahwirirazve kotanda. Paakamuswa, wakabesera vamwe vo vajiji vake kuti vabate hove jakawanda. Iyena wakashandisa mukana uu, kuti akhombije kuti basa ravo ro kuva vatandi vo vandhu rinosisira maningi kupinda basa riri rese haro. (Johani 21:15-17) Nguva shomani Jesu acito aenda mugore, wakazivisa vajiji vake kuti basa ro kucumaera, raainga atanga, aricaizoperera basi mu nyika ro Iziraeri, asi raizoguma ndhambo. (Verenganyi Maitiro o Vapostori 1:6-8.) Makore akazotevera, Jesu wakaita kuti mupostori Johani ave no civoniso co zviro zvaizoitika “mu njiku ya Mwari.” * Cimwe co zviro zvakavona Johani, caishamaisa: ‘Vhangeri ricikaperi’ recitungamirihwa ngo ngirozi, recicumaehwa “ku vandhu vese, nyika, majinja, ndimi no mabvumbo ese.” (Apokalipsi 1:10; 14:6) Izvi zvinovonesa pambhene zvinoda Jehovha kuti tiite nyamasi uno: Kucumaera masoko akanaka mbhera iyena anange kuti zvakwana.

6. Tingaitisa kudini kuti tienderere mberi tecidira basa ro kucumaera pakutanga?

⁶ Tingaenderera mberi takabatikana mu basa ro kucumaera, kudari tikarangarijisisa ngo pamusoro po zvese zvatiri kuitihwa ndi Jehovha kuti atibesere. Inga muezaniso, tino mabhuku  okudhindwa no atingashandisa mu zvimucini, inga mu foni no mu komputadhori. Tinazve zvokurijwa zvakapera kugaravhahwi no mavhidhiyo, kubatanijavo no mabhrodhikasti. Izvi zvinokhombija kuti iyena ari kutipa zvokuha zvakawanda zvokumujimu. Amborangariranyi basi ngo zvinowanika mu saiti yedu, imona muno masoko anowanika mu ndumi jinopindirija ciuru. (Mateu 24:45-47) Vandhu mu nyika, avazivi kubatana ngokuti ivona vanobesera mazano anonangwa ngo vanotonga nyika. Cimwenizve, ngokuti vanoenda mu zviyara zvakasiyana zve vamweni vakakhupuka kuveni vamweni varombo. Asi vashandiri va Jehovha vanopindirija zviuru zvisere vakabatana kutenderera pasi pese. Inga muezaniso, ngo mucishanu njiku 19 ya Abril wo 2019, Zvapupu zva Jehovha kutenderera pasi pese zvainga zvakabatana ngokuti vese vakakwanisa kuvona vhidhiyo yaibhuya ngo pamusoro po vhesi yo njiku. Pa usiku wakhona, vandhu vanopindirija 20.919.041 vakabatana pondhopo kuti vaceukije Cirangarijo co kufa ka Jesu. Tinoda kuramba takabatikana pa basa ro kucumaera Umambo, patinorangarira ngo cidakajiso catinaco co kuvona no kuvavo pa ciitiko cakadari inga ici.

7. Muezaniso wa Jesu unotibeseresa kudini kuti tirambe tecidira Umambo pa kutanga?

⁷ Njira imweni ingatiita kuti tienderere mberi tecidira pakutanga basa ro kucumaera, ngo yokutevejera muezaniso wa Jesu. Iyena aazivi kutendera ciri cese kuti cimuphingaije pa kuita ucapupu wo cokwadi. (Johani 18:37) Sathana paakamupa “umambo hwese hwo nyika no goja rahwo,” Jesu aazivi kuwira mu murau wondhowo. Aazivizve kutendera, vamweni povakaeja kumuita mambo. (Mateu 4:8, 9; Johani 6:15) Iyena aazivi kukwevehwavo ngo cido co kuva no zviro zvizinji zvo kunyama. Aazivizve kutendera kujamiswa ngo kuthisijihwa ngo vandhu vaimuteverera. (Luka 9:58; Johani 8:59) Rutendo hwedu paunova pa muejo, tingaramba takabatisisa kudari tikaceukija mbhangiro yo mupostori Pauro. Iyena wakavangisa Makristu kuti ateveje muezaniso wa Jesu, vakadaro, ‘avazoruzi simba nokuti kuremba!’—Vaheberi 12:3.

8. Icinyi kusengerera zve ngenyi kunosisira kuva nako wari?

⁸ Kusengerera ikukwanisa kuva takathiva mbhera mugarirowo ucinje. Tinoda kusengerera pa mugariro jakasiyana-siyana. Kangaije tingada kuti zviro zvakashata zvipere kana kuti, tingatovetera zviro zvaushoni ko mukuvo wakareba. Muporofita Habhakuki, waivetera kupera ko zviro zvakashata zvaiitika mu nyika yo Judha. (Habakuki 1:2) Vajiji va Jesu, vaivetera kuti Umambo “hwainga hoda kuguma” uvasujunure pa kushupwa kovaiitwa ngo utongi hwo Roma. (Luka 19:11) Itusu tinoda kuti Umambo hwa Mwari uvhise zvineso no kuviisa nyika imbza ino runyararo. (2 Pedru 3:13) Ngokudaro, tinodikana kuva vanosengerera no kuvetera mukuvo wakatema Jehovha kuti azviite. Vonanyi njira jinoshandisa Jehovha kuti atibesere kuva vanosengerera.

9. Muezaniso japi jinokhombija kusengerera ka Jehovha?

⁹ Jehovha wakagaja muezaniso waushoni wo kusengerera. Iyena wakapa Nowa mukuvo wakakwana kuti akwanise kuvaka arka no kushanda inga ‘mucumaeri wo ururami.’ (2 Pedru 2:5, Baiberi Mazwi Akacena aMwari; 1 Pedru 3:20) Abhirahama paakaita muvhunjo jakawanda ngo pamusoro po kuparajwa ko vandhu vakashata vaigara Sodhoma no Gomora, Jehovha wakamupurukira ngo kusengerera. (Genesi 18:20-33) Ko makore akawanda, Jehovha wakakhombija kusengerera kunoshamaisa maningi ku jinja ricizivi kugondeka ro Iziraeri. (Neemia 9:30, 31) Nyamasi uno, tinovonazve kusengerera kwake ngo kupa kwake vandhu vakawanda mukana wokuti “vaphinduke mwoyo.” (2 Pedru 3:9; Johani 6:44; 1 Timoti 2:3, 4) Muezaniso wa  Jehovha unotiitavo kuti tive vandhu vanosengerera patinoenderera mberi tecicumaera no kujijisa. Iyena anotijijisazve kuva vanosengerera ngo muezaniso unowanika mu Soko rake.

10. Tinojijenyi ngo muezaniso watinowana pana Jakobo 5:7, 8?

¹⁰ Verenganyi Jakobo 5:7, 8. Muezaniso wo murimi ari kuvetera zvirimwa zvake zvikure, unotijijisa zvakawanda ngo pamusoro po kuva vandhu vanosengerera. Zvokadi kamare, muti jimweni jinokasika kukura. Asi muti muzinji, maningi-ningi jiya jinobara mucero, jinotora nguva yakawanda kuti jikure. Mu Iziraeri yo kare, zvirimwa kuti zvikure zvaitora mweji mutandhatu. Murimi waikwanisa kusima mbeu jake nguva iciripo, nvura yokutanga kamare zve waivhisa mbeu jake pa nvura yokupejisira. (Marco 4:28) Zvaizova zvo ungwaru kudari tikateveja muezaniso wo murimi. Asi nguva jimweni azvizivi kureruka.

11. Kuitisa kudini kusengerera kunotibesera mu mushando wedu?

¹¹ Kazinji vandhu vacizivi kukwana vanoda kuvona muviyo wo basa ravo pavanoperaro kuriita. Hina, kudari tecida zvirimwa zvedu zvibare ngo kukasika, tinodikana kuita zvese zvinodiwa, zvakadari inga kuphanda kana kutipura, kusima, kusakura no kudirijira. Basa ro kuita vajiji rinodavo kuvangisira maningi. Zvinodavo nguva yakawanda kuti tikwanise kubesera vajiji vedu vo Bhaibheri kuti vajijire kuva vandhu vano rudo no vacina mukheto. Kusengerera kwedu, kunozotibesera kuti titame kuremba patinosongana no zvineso. Vandhu pavanokhombija kutipurukira no kujija Bhaibheri na itusu, tinodikana kuenderera mberi teciva vandhu vanosengerera. Atidikani kuvangirija vajiji vo Bhaibheri kuti vave no rutendo hwakavanga. Nguva jimweni vajiji va Jesu vaitonesehwavo kuzwisisa revo yo zvese zvaaijijisa. (Johani 14:9) Tinodikana kuceukija kuti itusu tinosima no kudirijira asi anorebesa ndi Mwari.—1 VaKorinto 3:6.

12. Tingakhombijisa kudini kusengerera patinonga tecicumaera vo pa ukama wedu vacikaripi Zvapupu?

¹² Zvinonesa maningi kuva vandhu vanosengerera patinonga tecicumaera ukama hwedu  ucikaripi Zvapupu zva Jehovha. Asi ndhungamiro inowanika pana Mucumaeri 3:1, 7, ingabesera maningi. Iyona inoti: Kuno “mukuvo wo kunyarara, no mukuvo wo kuvereketa.” Mufambiro wedu waushoni ungakwanisa kubesera ukama ucikaripi Zvapupu zva Jehovha kuti ude kuzwa masoko akanaka. Pa nguva yondhoyo, tinodikana kuva takanasiririka kuti tivavhunje cokwadi ngo pamusoro pa Jehovha. (1 Pedru 3:1, 2) Tinodikana kuva vanosengerera ku vandhu vese kubatanijavo ukama hwedu, patinocumaera no kujijisa.

13-14. Ngojapi muezaniso munganani jokusengerera jatingatevejera?

¹³ Tingajijira kuva vandhu vanosengerera no kujijira ngo muezaniso jo vandhu vakagondeka vanonangwa mu Bhaibheri no vo mu nguva jedu jino. Habhakuki waida kuti ushati upere, asi wakakhombija kuva anosengerera ngo kunanga kudari: “Ndinozoima pa ndau yangu yo kurindira.” (Habakuki 2:1) Mupostori Pauro wakananga kuti waida “kupeja” mushando wake. Hina, iyena wakaenderera mberi eciita ‘ufakazi wo masoko akanaka.’—Maitiro o Vapostori 20:24.

¹⁴ Vonanyi muezaniso wo varovorani vakagradhuwahwi ku cikora co Giriyadhi, vogajwa ku nyika ino Zvapupu zvishoma zve vandhu vazinji asipi Makristu. Vandhu vazinji avacaidakarira kujija Bhaibheri. Mukusiyana, vadoni vovakajija navo ku cikora co Giriyadhi vakatumihwa kwenda nyika jimweni, vaitumira ripoti vecinanga kuti vakakwanisa kuita jijo jakawanda no kuvabesera kuti vave Zvapupu. Asi varovorani ava ngo kusengerera kwese vakakwanisa kuenderera mberi pikija vazinji mu ndima mwavo avacaidakarira kuvapurukira. Pakapera makore masere vecicumaera mu ndima yaivonekaya icikabudiriri, vakava no mudakaro wo kuvona umwe wo vajiji vavo ecibhabhatijwa. Tinojijenyi ngo muezaniso jo kare no jo mu njiku jedu jino jataperari kuvona? Vashandiri ava vakagondeka avazivi kuremba pa kuvangisira kwavo kana kuti avazivi kusiya kuti nyara javo jizorore zve Jehovha wakavakomborera ngo kusengerera kwavo. ‘Tingatevejera vaya vanonakira utaka hwakagondeswa.’—Vaheberi 6:10-12.

15. Ngoyapi njira yo kutanga inokhombija kuti rutendo ungavangisa cisungo cedu co kucumaera?

¹⁵ Itusu tinotenda masoko atinocumaera, ngokudaro tinoda kubhuya no vandhu vakawanda ngo pamusoro pao. Tinothemba zvigondiso zvinowanika mu Soko ra Mwari. (Nduyo 119:42; Isaia 40:8) Tiri kuvona zviporofita zvo mu Bhaibheri zviri kukwanirisika mu njiku jedu jino. Tiri kuvona vandhu vacicinja upenyu hwavo pavanotanga kushandisa mbhangiro jo Bhaibheri. Zvese zviri kuitikari zvinotiita kuti titende kuti masoko akanaka o Umambo imasoko anodikana ku vandhu vese.

16. Mukuzwirana na Nduyo 46:2-4, kuitisa kudini kukhombija rutendo kuna Jehovha na Jesu kunovangisa cisungo cedu co kucumaera?

¹⁶ Tinodikanazve kukhombija rutendo hwedu kuna Jehovha, uwo ari Cinyuke co masoko atinocumaera no kukhombija rutendo hwedu kuna wiya waakagaja inga Mambo hwo Umambo hwake, Jesu. (Johani 14:1) Azvinenyi zvinoitika kwatiri, Jehovha nguva jese anozova citiziro cedu no vangiso. (Verenganyi Nduyo 46:2-4.) Mukuengejera, tinothemba kuti Jesu ari kutungamirira basa ro kucumaera kuvhira mugore. Ecishandisa simba no utongi hwaakapuwa ndi Jehovha.—Mateu 28:18-20.

17. Ipanyi muezaniso unovonesa dikano yo kuenderera mberi tecicumaera.

¹⁷ Rutendo unotiita kuti tithembe kamare kuti Jehovha anozokomborera kuvangisira kwedu, nguva jimweni mu njira joticaivetera. (Mucumaeri 11:6) Inga muezaniso, njiku jese mamirioni o vandhu, vanodarika vecivona mabhuku edu atinonga tadira pakarinya yo kuita ucapupu hwo pambhene. Kunanga kuti manera aya o kucumaera  ari kubudirira here? Ngozvokadi kuti hina! Mushando Wedu wo Umambo wa Novembro wo 2014, wakananga kuti musikane umweni waijija ku univhersidhadhe waida kutara masoko ake ngo pamusoro po Zvapupu zva Jehovha. Iyena aazivi kukwanisa kuwana Nyumba yo Umambo, asi wakawana mabhuku edu akadihwa pa karinya mu ruvanje wo univherisidhadhiyo zve wakawana masoko aaida kushandisa. Pa kufamba ko nguva, wakabhabhatijwa, wari ari kushanda inga piyona wo nguva jese. Ciitiko ici, cinotiita kuti tienderere mberi tecicumaera. Ngokuti kucino vandhu vanoda kuwana no kuzwa masoko o Umambo.

18. Ngenyi tino cokwadi co basa ro kucumaera Umambo rinozoguma kumagumo inga zvinoda Jehovha?

¹⁸ Tingava no cokwadi cokuti basa ro kucumaera Umambo, rinozopera pa nguva yakagajwa. Vonanyi zvakaitika mu njiku ja Nowa. Jehovha wakakwanisa kukhombija kuti anokwanisa kuita zviro pa nguva kwayo. 120 o makore Ndambi icito yaitika, Jehovha wainga wakagaja nguva yaizoitika Ndambi. Nopapera makore akati kuti, Jehovha wakavhunja Nowa kuti avake arka. Kangaije pa makumarongomuna kana makumashanu o makore icito yaguma Ndambi, Nowa wakaenderera mberi ecishanda ngo simba. Pikija vandhu avacaipurukira zvaainangaro, iyena wakaenderera mberi ecicumaera masoko o ngwajo mbhera Jehovha wonanga kuti yaguma nguva yo kungwinisa zvinyama mu arka. Nguva poyakaguma, “Mwari wakafunga musuvo ngo kunja.”—Genesi 6:3; 7:1, 2, 16.

19. Zvicinyi zvatingavetera kumbejiyo kudari tikatama kutendera kuti nyara jedu jizorore?

¹⁹ Sambiri pano, Jehovha anozonanga kuti basa ro kucumaera masoko o Umambo, raguma kumbhiri. Pondhopo, iyena anozoparaja nyika ino ya Sathana, woviisa nyika imbza inozozara ngo vandhu vanozwira Mwari. Asi zvicito zvaitika, ngatitevejere muezaniso wa Nowa, Habhakuki no wo vamweni vacikazivi kutendera kuti nyara javo jizorore. Tinodikana kuenderera mberi takabatikana, kuva vandhu vanosengerera no kuramba tino rutendo hwakavanga kuna Jehovha no ku zvigondiso zvake.