1. Ngopapi panganesa maningi kushandira Jehovha?

NGOPAPI pamunorangarira kuti zvinonesa maningi kushandira Jehovha? Pamunosangana no zvineso kana pamunovonaya kuti muno runyararo mu upenyu? Patinonga tino zvineso zvinotirerukira maningi kukasika kuthemba Jehovha. Asi ngozvapi zvatinoita patinonga tino runyararo? Kunanga kuti tinokanganwa kushandira Jehovha here? Jehovha wakavhunja Vaiziraeri kuti izvi zvingatoiitika.—Deuteronòmio 6:10-12.

2. Mambo Aza wakatigajira muezaniso wapi?

² Mambo Aza imuezaniso waushoni maningi wo mundhu wakakhombija ungwaru ngo kuthemba kamare Jehovha. Iyena wakashandira Jehovha pa mukuvo wakashata no pa mukuvo wo runyararo. Kuvhira paudoko, “mwoyo wese wa Asa wakatevera Tenji, mu kurarama kwake kwese.” (1 Majimambo 15:14) Aza wakakhombija kuti wakashandira Jehovha ngo mwoyo wake wese ngo kupeja manamatiro o kunyepa Mujudha. Bhaibheri rakananga kuti: “Wakapeja madandiro o vonyikanja, no ndau jakakhwira, wakagura-gura mapuwe no njiki jo kupira.” (2 Kronike 14:2, 4) Iyena wakatovhisa mbiya wake Maakaa pa kuva vahosi. Ngenyi? Ngokuti ivona vaivangisa vandhu kuti vanamate zvithombi.—1 Majimambo 15:11-13.

3. Zvicinyi zvatinozovona pa musoro uwu?

³ Iyena wakaita zvizinji kusiyapo basi kupeja manamatiro okunyepa. Iyena wakamusijira kunamata kwakacena, wobesera vandhu kuti vatangezve kunamata Jehovha. Jehovha wakakomborera  Aza no vandhu vo Judha pa nguva iyi yo runyararo. * Pa gumi ro makore o kutonga ka Aza, “nyika yaigarisika.” (2 Kronike 13:23; 14:3,5) Pa musoro uwu, tinozovona kuti Aza wakashandisa kudini mukuvo uwu wo runyararo. Tevere, tinozovona muezaniso wo Makristu o muzana rokutanga, avo vakatevejera muezaniso wa Aza ngo kushandisa ushoni mukuvo wo runyararo. Pejisire, tinozodavira muvhunjo uwu: Kudari muri kurarama mu nyika yokuti utongi unotendera Zvapupu zva Jehovha zvinamate zvakasujunuka, mungashandisa kudini mukuvo uwu wo runyararo?

4. Mukuzwirana na 2 Kronike 14:1, 5, 6, Aza wakashandisa kudini mukuvo wo runyararo?

⁴ Verenganyi 2 Kronike 14:1, 5, 6. Aza wakavhunja vandhu kuti Jehovha wainga ‘wakavazoroja.’ Aza, aazivi kuvona mukuvo uwu wo runyararo inga mukuvo wokutogara hake. Mukusiyana iyena wakatanga kuvaka dhorobha, mufimbiji, nyumba jakareba pomwe no musuvo. Iyena wakananga kudari kuno vaJudha: “Nyika iciri yedu.” Aza waida kunangenyi? Iyena waida kunanga kuti vandhu vaizokwanisa kuva vakasujunuka mu nyika yavakapuwari ndi Mwari no kuvaka pacina vavengi vanovateverera. Iyena wakangwaja vandhu kuti vanase kushandisa mukuvo uwu wo runyararo.

5. Ngenyi Aza wakavangisa masoca ake?

⁵ Aza wakashandisavo mukuvo wo runyararo kuti avangise masoca ake. (2 Kronike 14:7) Izvi zvaireva kuti Aza aacaithemba Jehovha here? Haiwa. Aza waiziva kuti wainga muthwaro wa mambo kunasirira vandhu kuitira mukuvo wokunesa wo vaizosongana nawo kumbejiyo. Aza waizivazve kuti mukuvo wo runyararo waingaro no Vajudha aucaizova wo kwenda no kwenda zve izvo zvainga izvonadi kamare.

6. Makristu o muzana rokutanga akashandisa kudini mukuvo wo runyararo?

⁶ Pikija Makristu o muzana ro kutanga ro makore aiteverehwa, iwona akavavo mukuvo wo runyararo. Vajiji ava vakashandisa kudini mukana uwu? Vanarume no vanakaji ava vakagondeka vaicumaera masoko akanaka no kuvangisira kwese zve vaibatikana pa kushandira Jehovha. Ngo kuita kwavo kudaro, vandhu vaishandira Jehovha vakaengejeka. Izvi zvakakhombija kamare kuti Jehovha wainga ecikomborera kuvangisira kwavo pa kucumaera pa mukuvo wo runyararo.—Maitiro o Vapostori 9:26-31.

7-8. Pauro no vamweni vakaitenyi pavainga no mukana? Sananguranyi.

⁷ Vajiji vo muzana ro kutanga vakashandisa mukana wese wavainga nawo kuti vakwanise kucumaera masoko akanaka. Inga muezaniso, mupostori Pauro wakakwanisa kuvona kuti wainga wakafununguka musuvo mukuru kuitira iyena, ku Efeso. Ngo kudaro, iyena wakashandisa mukana wondhowo kuti aende kocumaera no kuita kuti vandhu vave vajiji mu dhorobha rondhoro.—1 VaKorinto 16:8, 9.

⁸ Pauro no Makristu amweni vakakwanisavo kucumaera ku vandhu vazinji mu gore ro 49, vapostori no vakuru ku Jerusarema pavakatema civaringo ngo pamusoro po shwiro yo ku sokwa. (Maitiro o Vapostori 15:23-29) Pauro no vamweni pavakavhunja ungano civaringo cainga catemwa ivona vese vakashanda ngo simba kuti ‘vatokotese izwi ra Tenji.’ (Maitiro o Vapostori 15:30-35) Ngowapi wakava muviyo? Bhaibheri rinoti: “Magungano aivangiswa mu kutenda, oengejehwa vatendi, mazuva ese.”—Maitiro o Vapostori 16:4, 5.

9. Ngowapi mugariro uri mu nyika zinji nyamasi uno zve tinodikana kujivhunjisenyi?

⁹ Mu nyika zinji nyamasi uno, tingakwanisa kucumaera takasujunuka. Muri kurarama mu nyika ino rusujunuko here? Kudari ndizvona jivhunjisenyi kudari: ‘Ndiri kushandisa kudini rusujunuko uwu?’ Mazuva ano okupejisira ari kuva anodakajisa ku vandhu va Jehovha ngokuti ivona vari kubatikana kamare pa kucumaera no kujijisa vandhu kwese kwavanovawana. (Marco 13:10) Kuno zviro zvizinji zvatingaita mu basa iri.

10. 2 Timoti 4:2 inotivangisa kuti tiitenyi?

¹⁰ Muri kushandisa kudini mukuvo wo runyararo? (Verenganyi 2 Timoti 4:2.) Ngenyi amusotesesi mugariro wenyu no kuvona kuti dangani imwimwi kana mundhu umweni wo pa mbhuri yenyu angakwanisa kuengejera basa rake ro kucumaera kangaije ngo kushanda inga piyona? Wari asipi nguva yo kuda kuva mundhu wakakhupuka kana kuunganija zviro zvo kunyama, zviro zvokuti azvizopokonyoki pa dambujiko guru.—Mazwi Akangwara 11:4; Mateu 6:31-33; 1 Johani 2:15-17.

11. Zvicinyi zviri kuita vacumaeri vamweni kuti vakwanise kucumaera masoko akanaka kuno vandhu vakawanda?

¹¹ Vacumaeri vazinji vari kujijira ndumi imbza, ngo kudaro ivona vangakwanisa kucumaera no kujijisa. Sangano ra Jehovha riri kubesera vandhu ava, ngo kubudisa mabhuku akacijikira mu Bhaibheri mu ndumi jakawanda maningi. Inga muezaniso, mu gore ro 2010 mabhuku edu aiwanika mu ndumi jinokwana kuita 500. Asi nyamasi uno, civerengero ici caengejeka ngokuti iwona anowanika mu ndumi jinodarika 1000.

12. Vandhu vari kubesereka kudini ngo kuzwa masoko o Umambo mu ndumi yavo? Ipanyi muezaniso.

¹² Vandhu vanojizwa kudini pavanozwa ngo pamusoro pa Jehovha mu ndumi yavo? Vonanyi muezaniso wo hambzaji yakabesereka pa gungano ro ndharaundha rakaithwa ku Memphis,  Tennessee, U.S.A. Gungano iri rakaithwa ngo ndumi yo Cikinyarwanda ndumi inobhuiwa pokutanga ku Ruanda, Khongo (Kinshasa) no Uganda. Pakupera kuizwa gungano iri, hambzaji yaibhuyari Cikinyarwanda yakati: “Iyi ndi vhaza yokutanga yandakwanisa kuzwa urongwa hwese wo kumujimu mu ndumi yangu, cingo ndakathutha ndoenda kogara ku Estadhus Unidhus ko gumi na manomwe o makore akapera.” Zvakajeka kuti hambzaji iyi yakabaiwa mwoyo kamare ngo urongwa oyakazwa ngo ndumi yayo yo cibarihwe. Kudari mugariro wenyu wecitendera mungakwanisa kujijira ndumi imweni kuti mubesere vamweni mu ndumi yenyu here? Zvingava zviro zvinodakajisa ngokuti mu ndima yo ungano yenyu kangaije kuno vamweni vanodakarira kubhuya ndumi imweni. Kushanda kwenyu ngo simba kungamuviisira mudakaro mukuru.

13. Hama jedu ku Rusia jakashandisa kudini mukuvo wo runyararo?

¹³ Asipi hama jese jiri kukwanisa kucumaera jakasujunuka. Mu nyika jimweni hama jedu ajiripi kuita zvondhozvo ngokuti utongi uri kurambisa basa redu ro kucumaera. Inga muezaniso, vonanyi basi zviri kuitika no hama jedu ku Rusia. Ko mazana o makore veciteverehwa ivona vakatendehwa kuti vaite basa redu kuvhira mu gore ro 1991 mu mweji wa Março. Pa mukuvo wondhowo ku Rusia kwainga kuno vacumaeri vo Umambo vaikhwedera kuita 16.000. No padarika makumaviri o makore, civerengero condhoco cakaengejeka mu njira inoshamaisa, kwakava no vacumaeri vanokwana kuita 160.000! Zvakajeka kuti hama jedu jakashandisa mukuvo wo runyararo kuti jikwanise kucumaera masoko akanaka. Mukuvo uwu wo runyararo auzivi kuva wo kwenda no kwenda. Asi pikija zviro zvakacinja mu nyika iyi, hama jedu jiri kwenderera mberi jecicumaera no kuvangisira kwese. Ijona jiri kuenderera mberi jecishandira Jehovha ngo kushandisa zvese zvavanazvo.

14-15. Jehovha wakashandisa kudini simba rake kuti abesere Aza?

¹⁴ Mu njiku ja Aza, mukuvo wo runyararo wakazopera. Masoca akavanga aipindirija miriao umwe akaviya ecivha ngo Etiyopia. Mutungamiriri waidanwa Zera waithemba kuti iyena no masoca ake, vaizokwanisa kunyisa Vajudha. Asi mambo Aza, aacaithemba masoca akawanda asi waithemba Mwari wake, Jehovha. Iyena wakakumbira kudari: “Tenji Mwari, apana wakaezana na imwimwi kuti mubesere vavangi no varembi. Tibeserenyi, Tenji Mwari wedu! Ndimwi wo tinogonda, ngo zina renyu tinoenda koambana no uzinji hwo vandhu ava.”—2 Kronike 14:10.

¹⁵ Pikija Vaetiyopia vainga no masoca akawanda maningi, Aza waiziva kuti Jehovha wainga no simba maningi zve waizokwanisa kubesera vandhu Vake. Zve Jehovha aazivi kunyangajisa vandhu vake. Masoca o Etiyopia akanyowejwa kamare ngokuti akanyiswa.—2 Kronike 14:7-12.

16. Tinozvizivisa kudini kuti mukuvo wo runyararo asipi wo kwenda no kwenda?

¹⁶ Itusu atizivi kamare kuti zvicinyi zvinozoitika ku umwe na umwe wedu kumbejiyo, asi catinoziva ngo cokuti, runyararo uno vashandiri va Jehovha nyamasi uno asipi wo kwenda no kwenda. Zvokadi kamare, Jesu wakananga kuti mu njiku jo kupejisira vajiji vake ‘vaizozondwa ngo vandhu vese.’ (Mateu 24:9) Mukufananavo, mupostori Pauro wakananga kuti: “Vese avo vanoda kurarama vecidisisa Kristu Jesu, vanozoteverehwa.” (2 Timoti 3:12) Sathana, “wakazara ngo runya,” zve taizozvicengeja pacedu kudari tikarangarira kuti atizopsaswi ngo runya hwake.—Apokalipsi 12:12.

17. Rutendo hwedu hungaejeswa kudini kumbeji kwatiri kwendari?

¹⁷ Kumbeji kwatiri kwendari, tese tinozoejwa kugondeka kwedu. Sambiri pano, nyika inozowanana no “matambujiko makuru, acito akambowanika kubvira pakutanga ko nyika, aacazowanikibze.” (Mateu 24:21) Pa mukuvo uwu, vandhu vo pa mbhuri yedu kangaije vangatotihwisa zve basa redu ringatorambijwa. (Mateu 10:35, 36) Kunanga kuti umwe nga umwe wedu anozova inga ndi Aza, tothemba kuti Jehovha anozotibesera no kutijivirira here?

18. Mukuzwirana na Vaheberi 10:38, 39, zvicinyi zvinozotibesera kuti tive takanasiririka, runyararo hwedu paunozopera?

¹⁸ Jehovha ari kutinasirira wari ku divi ro kumujimu  kuti tive no rutendo hwakavanga. Iyena ari kutungamirira “muranda wakagondeka no wakangwara” kuti utipe “bzokuha [zvo kumujimu] ngo nguva kwayo.” Ngo kudaro, zvinotibesera kuramba tino rutendo hwakavanga. (Mateu 24:45) Asi tinodikana kuita divi redu ngo kuita zvese zvatinokwanisa kuti tive no rutendo kuna Jehovha.—Verenganyi Vaheberi 10:38, 39.

19-20. Inga zvatavona pana 1 Kronike 28:9, muvhunjo japi jatinodikana kujiita zve ngenyi tinodikana kujiita muvhunjo jondhojo?

¹⁹ Inga ndi Mambo Aza, tinodikana ‘kupsaka Tenji Mwari.’ (2 Kronike 14:3; 15:1, 2) Tinotanga kupsaka Jehovha patinojija ngo pamusoro pake no kubhabhatijwa. Tinoita zvese zvatinokwanisa kuti tivangise rudo hwedu naye. Kuti tivone kuti dangani tiri kuita ushoni pa divi iri, ngatijivhunjise kudari: ‘Ndiri kwenda nguva jese ku musongano here?’ Patinoenda ku musongano, tinowana simba ro kuenderera mberi tecishandira Jehovha no kuwana vangiso inovha ku hama no hambzaji jedu. (Mateu 11:28) Ngatijivhunjisezve kudari: ‘Ndino cirovejeso co kuita jijo yo mundhu ega here? Kudari munogara no mbhuri yenyu muri kuita kunamata ko mbhuri sumana jese here? Kudari munogara moga muri kuita zvese zvamunokwanisa kuti mujije Bhaibheri inga mutori no mbhuri here? Cimwenizve, kunanga kuti muri kuita zvese zvamunokwanisa kuti mucumaere no kuita basa ro kuita vajiji here?’

²⁰ Ngenyi tinodikana kujiita muvhunjo iji? Bhaibheri rinotivhunja kuti Jehovha anokwanisa kupopora murangariro jedu no kuvona zviri mu mwoyo jedu. Ngo kudaro, itusu tinodikanavo kuita zvakafanana. (Verenganyi 1 Kronike 28:9.) Kudari tikavona kuti tinodikana kuita cinjo iri yese pa zvido zvedu no murangariro, tinodikana kukumbira besero ra Jehovha kuti tiite cinjo jondhojo. Wari inguva kamare yo kujinasirira pacedu kuitira muejo jatinozosongana najo kumbejiyo. Ticadotendera kuti ciri cese citiite kuti titame kushandisa ngo ungwaru mukuvo wo runyararo!