1. Ngenyi tinobongesera ngo Bhaibheri?

 TINOBONGESERA maningi Jehovha ngo kutipa kwake Bhaibheri. Mu Bhaibheri tingawana ndhundamiriro jo ungwaru jingatibesera kuti tihwisane no zvineso zvatinosongana nazvo nyamasi uno. Irona rinotipazve vetero inodakajisa maningi yo kumbeji. Cinosisira maningi ngo cokuti Jehovha anoshandisazve Bhaibheri kuti atijijise zviro zvakawanda ngo pamusoro po undhu hwake. Kurangarijisisa ngo mugariro jake jinoshamaisa, zvinobaya mwoyo wedu zvoita kuti tide kuva no ushamwari wo phedo naye.—Nduyo 25:14.

2. Jehovha wakashandisenyi kuti vandhu vamuzive?

² Jehovha anoda kuti vandhu vamuzive. Mu nguva jokare, Jehovha wakabesera vandhu kuti vamuzive ecishandisa zvivoniso, hope no ngirozi. (Bziverengo 12:6; Mabasa o Vapostori 10:3, 4) Itusu aticaizokwanisepi kujija ngo pamusoro po zvivoniso, hope no zvainangwari ngo ngirozi kudari no zvicizivi kutahwa. Izvi ndizvona zvakaitisa kuti Jehovha ashandise vanarume kuti ‘vatare mu bhuku’ zviro zvaaida kuti itusu tizojija ngo pamusoro pazvo. (Jeremia 30:2) Itusu tingava no cokwadi cokuti manera akasanari Jehovha kuti abhuye na itusu ngo aushoni maningi, ngokuti “makwanja a Mwari akarungama.”—Nduyo 18:31.

3. Jehovha wakaitisa kudini kuti Bhaibheri riwanike mbhera nyamasi uno? (Isaia 40:8)

³ Verenganyi Isaia 40:8. Ko makore akawanda, uzivi unowanika mu Bhaibheri uri kubesera vanarume no vanakaji vakagondeka. Izvi zviri kukwanirisika kudini? Uwu muvhunjo waushoni, ngokuti Bhaibheri rakatanga kutahwa kare kamare pa muphukutu jicizivi kuvanga maningi, ndiyo ndava muphukutu jakatahwaro ajicawaniki nyamasi uno. Asi Jehovha wakaita kuti vandhu vaite makhopi o muphukutu iji. Ngo zvokadi kuti  vandhu vaikhopari vainga vacizivi kukwana, asi vaingwarira maningi pavaingaro vecikhopa izvi. Inga muezaniso, muzivi umweni wo Bhaibheri wakatara kudari ngo pamusoro po Matahwa o Cihebheru: “Zvinganangwa no cokwadi cese kuti akuna zviro zvimweni zvakatahwa kareko zvakanasa kujeka kupinda Bhaibheri.” Itusu tingava no cokwadi co kuti masoko atinoverenga mu Bhaibheri anovonesa murangariro jo Mune waro Jehovha.

4. Ngo zvapi zvatiri kuda kuvona mu cijijo cino?

⁴ Jehovha ndi Mune wo “cipo cese cakanaka no cipo cese cakakwana.” (Jakobo 1:17) Bhaibheri i cipo cakanakisisa maningi catakapuwa ndi Jehovha. Tinganasa kuzwisisa kuti mundhu anonasa kutiziva ushoni ngo cipo caanotipa. Tinganangavo zvondhozvo no Bhaibheri. Cipo ici cinotijijisa zvakawanda ngo pamusoro pa Jehovha. Tecishandisa Bhaibheri tinokwanisa kuvona kuti iyena anonasa kutiziva no kuzivazve zvatinoda. Mu cijijo cino, tiri kuda kuvona mugariro mutatu jinonangwa mu Bhaibheri jina Jehovha: Uzivi, urungami no rudo. Pakutanga tiri kuda kuvona kuti Bhaibheri rinosanangurisa kudini uzivi huna Mwari.

5. Bhaibheri rinosanangurisa kudini uzivi hwa Mwari?

⁵ Jehovha anonasa kuziva kuti itusu tinoda mazano ake aushoni. Cipo caakatipari co Bhaibheri, cakazara ngo uzivi hwake. Mu Bhaibheri muno ndhungamiriro jakanaka maningi kuitira vandhu vese. Irona rinocinja upenyu hwo vandhu. Paakatahwa mabhuku okutanga o Bhaibheri, Mosi wakavhunja Vaiziraeri kuti: “Asipi izwi ricina xwiro komuri; ngo kusiana ndirona uhomi hwenyu.” (Deuteronòmio 32:47) Vaya vanozwira zvinonangwa ngo Bhaibheri vanova no upenyu unodakajisa. (Nduyo 1:2, 3) Pikija kuti Soko ra Mwari rakatahwa kare, irona ricindori no simba ro kucinja upenyu hwo vandhu. Inga muezaniso, mu jw.org munowanika musoro jimweni jinonanga kuti: “Bhaibheri Rinochinja Upenyu.” Mondhomo mungatowana muezaniso jinopindirija 50 jo zviitiko zvo upenyu zvinokhombija kuti Bhaibheri rino simba ro ‘kucinja . . . vatendi.’—1 Vatesaronika 2:13.

6. Ngenyi tingananga kuti Bhaibheri rakasiyana no mabhuku amweni?

⁶ Apana bhuku rakaezana no Bhaibheri. Ngenyi? Ngokuti Mune waro ndi Jehovha Mwari, wo masimba ese, acikaperi no ano uzivi ucikaezaniswi. Mabhuku mazinji, anoguma pa kuzivika maningi no kuva anosisira kupinda mune wao. Ngo divi rimweni, mazano anowanika mu mabhuku amweni awo aazoshandizve pakufamba ko nguva. Ngo kudaro, ndhungamiriro ja ushoni jinowanika mu Bhaibheri ngo jo kuenda no kuenda. Ijona jiri kubesera vandhu vakawanda kuvhira kare mbhera wari. Patinoverenga bhuku iri rakacena no kurangarijisisa zvatinonga taverenga mondhomo, Jehovha anoshandisa mujimu wake mucena kuti atibesere kuvona manera atingashandisa ndhungamiriro iji mu upenyu hwedu. (Nduyo 119:27; Malakia 3:16; Vahebheru 4:12) Pacina kukana-kana, Mune wo Bhaibheri Jehovha anoda maningi kutibebesera. Zvondhozvo zvinotivangisa kuti tiverenge Bhaibheri mukuvo wese.

7. Bhaibheri rakabeseresa kudini vandhu va Mwari kuti varambe vakabatana mu nguva yo kare?

⁷ Pano ciro cimweni cinovonesa kuti Bhaibheri rino uzivi hwa Mwari, ciro condhoco ngo cokuti Bhaibheri riri kubesera vandhu va Mwari kuti varambe vakabatana. Vaiziraeri pavakanghwina mu Nyika yo Cipikihwa ivona vakagara mu ndau jakasiyana-siyana. Vamweni vakaita basa ro kutanda, ro kurera  zvinyama no kurima. Zvaizoreruka maningi kuti Vaiziraeri vaigara kundharaundha imweni vaneseke no Vaiziraeri vaigara kudivi rimweni ro nyika. Asi Jehovha wakaita nasiriro kuti Vaiziraeri vese vasongane pamwepo ko vhaza jakasiyana-siyana kuti vazwe kuverengwa ko mutemo no kusananguhwa kwawo. (Deuteronòmio 31:10-13; Neemia 8:2, 8, 18) Amborangariranyi kuti mu Iziraeri waijizwa kudini paaiguma Jerusarema wovona zviuru no zviuru zvo va Iziraeri doni vecinamata Jehovha vecivha kundau jakasiyana-siyana jo nyika. Ngo njira imweni Jehovha wainga ecibesera vandhu vake kuti vaenderere mberi vakabatana. Pakufamba ko nguva, ungano yo Cikristu yainga yakaumbhwa ngo vanarume no vanakaji vaibhuya ndumi jakasiyana-siyana, vamweni vaivoniwa kuva vanosisira maningi kuveni vamweni vaivoniwa kuva vacikasisiri. Vamweni vainga vakakhupuka vamweni vainga varombo. Zvecivoneka kuti ivona vaida maningi Soko ra Mwari, ivona vainga vakabatana vecinamata Mwari wokadi. Vaya vanonangwa kuti vatendi vanokwanisa kuzwisisa Soko ra Mwari ngo besero ro vamweni no kuva pamwepo pa musongano.—Mabasa o Vapostori 2:42; 8:30, 31.

8. Bhaibheri rinobatanijisa kudini vandhu va Jehovha nyamasi uno?

⁸ Mwari wedu ano uzivi arikuendera mberi ecijijisa no kubatanija vandhu vake ecishandisa Bhaibheri. Bhaibheri rino zvokadi zvese ngo pamusoro pa Jehovha zvatinodikana  kuziva. Mukuvo wese tinosongana pamwepo pa musongano jedu jo ungano, magungano o ndharaundha no o mutundhu kuti tizwe vhesi jeciverengwa, jecisananguhwa no kuzwa mahurukuro anonga eciithwa. Ngo kudaro, Bhaibheri i thurusi rinosisira maningi rinoshandiswa ndi Jehovha kuti abesere vandhu vake kuti ‘vamushandire ngo mwoyo umwe basi.’—Sofonia 3:9.

9. Ngowapi mugariro watinodikana kuva nawo patinozwisisa masoko atinowana mu Bhaibheri? (Ruka 10:21)

⁹ Ngatende tivone zviro zvimweni zvinovonesa uzivi huna Jehovha. Iyena wakaita kuti mativi mazinji o Bhaibheri atahwe munjira yokuti anase kuzwisisika ngo vandhu vacikazivi maningi. (Verenganyi Ruka 10:21.) Vandhu mu nyika yese vanoverenga Bhaibheri. Muzivi umweni anojija ngo zvo Bhaibheri wakananga kuti: “Vandhu vakawanda vanoverenga Bhaibheri kupinda bhuku rimweni.” Pavanonga veciita kudaro vanonasa kungwarira kupinda zvavaizoita pavanonga veciverenga bhuku rimweni. Asi vandhu vanojidodokesa ndivona basi vanorizwisisa no kushandisa zvarinonanga.—2 Vakorinte 3:15, 16.

10. Ngoyapi njira imweni inovonesa uzivi huna Jehovha hunowanika mu Bhaibheri?

¹⁰ Tinokwanisazve kuvona uzivi una Jehovha mu Bhaibheri ngo njira imweni. Jehovha aashandisi basi Bhaibheri kuti ajijise vandhu vake inga cikwata. Asi anojijisa no kuembezera umwe nga umwe wedu. Patinoverenga Bhaibheri tinokwanisa kuvona kuti Jehovha anoneseka nga umwe na umwe wedu. (Isaia 30:21) Pamunosongana no zvineso, kangana pamunoenda kobata Bhaibheri moverenga vhesi yamunovona kuti yakatarihwa imwimwi? Bhaibheri rakatahwa kuti rinase kuzwisiswa ngo vandhu vakawanda maningi. Pikija Bhaibheri rakatahwa kare kuitisa kudini irona rinomasoko amunoda kamare wari uno? Izvi zvinokwanisika ngokuti Mune wo Bhaibheri ndi mundhu ano uzivi hwakakura maningi mu nyika yese no kudenga.—2 Timoti 3:16, 17.

11. Jehovha wakakhombijisa kudini kutama kuva no mukheto Bhaibheri parainga recitahwa?

¹¹ Mugariro umweni una Jehovha ndi ururami. (Deuteronòmio 32:4) Mundhu wakarurama kazinji aakheti, Jehovha ndi mundhu acikakheti. (Mabasa o Vapostori 10:34, 35; Varoma 2:11) Tinokwanisa kuvona kutama kwake mukheto ngo ndumi yakashandiswa pakutahwa ko Bhaibheri. Mabhuku anokwana kuita makumatatu na mapfumbamwe okutanga anowanika mu Bhaibheri, akatahwa ngo Cihebheru, ndumi yainasa kuzwisiswa ngo vandhu va Mwari pa nguva yondhoyo. Asi muzana rokutanga ro makore, Cigiriki ndicona caiverekethwa maningi. Ngo kudaro, mabhuku anokwana kuita makumaviri na manomwe okupejisira anowanika mu Bhaibheri akatahwa ngo ndumi yondhoyo. Jehovha aazivi kuita kuti Bhaibheri riwanike mu ndumi imwe basi. Nyamasi uno vandhu vanokhwedera kuita mabhiriyoni masere kutenderera pasi pese vanobhuya ndumi jakasiyana-siyana. Zvingaitisa kudini kuti vandhu vese ava vajije ngo pamusoro pa Jehovha?

12. Munjira yapi zvinowanika pana Danieli 12:4, zviri kukwanirisika mu njiku jino jo kupejisira?

¹² Ecishandisa muporofita Dhanyeri, Jehovha wakagondesa kuti “mumukuvo wokupejisira” uzivi hwokadi hunowanika mu Bhaibheri ‘hwaizoengejeka.’ Vazinji vaizouzwisisa. (Verenganyi Danieli 12:4.) Ciro cimwe ciri kubesera vandhu vakawanda kuti vazwisise Bhaibheri ngo cokuti Bhaibheri no mabhuku amweni akacijikira mu Bhaibheri ari kusandujwa, kubudiswa no kukovaniswa kuno vandhu vakawanda. Ma Bhaibheri akasandujwa  ngo vandhu vanoita basa ro kuita nyagoso, nguva jimweni anodhura maningi. Vandhu va Jehovha vari kusanduja Soko ra Mwari, rese kana divi raro mu ndumi jinopindirija 240, ari wese angakwanisa kuriwana acikapagari. Inga muviyo, vandhu vo nyika jese vari kudavira kuzwa “masoko akanaka o Umambo” mugumo ucito waviya. (Mateu 24:14) Mwari wedu wakarungama anoda kupa vandhu vakawanda mukana wo kumuziva ngo kuverenga Soko rake Bhaibheri. Iyena anoita zvondhozvo ngokuti anotida maningi.

13. Ngenyi tingananga kuti Bhaibheri rinovonesa rudo una Jehovha? (Johani 21:25)

¹³ Bhaibheri rinotibesera kuzwisisa kuti mugariro mukuru una Jehovha ndi rudo. (1 Johani 4:8) Ngatende tivone kuti ngozvapi Jehovha zvaakadira mu Bhaibheri no zvaacikazivi kudira. Iyena wakadira mu Bhaibheri zviro zvinotibesera kuti tive no ushamwari na iyena, zvinotiita kuti tive no upenyu unodakajisa wari uno no kuzowana upenyu ucikaperi. Asi, zvecivoneka kuti Jehovha anotida, iyena aazivi kutipekeja masoko okuti aacaizotibesera patinonga tecimushandira.—Verenganyi Johani 21:25.

14. Kuitisa kudini zvatinowana mu Bhaibheri zvinovonesa kuti iyena anotida?

¹⁴ Jehovha anokhombijazve rudo hwake kwatiri, ngo kubhuya nesu ngo njira yo nderemejo. Mu Bhaibheri Jehovha aatipi munda-nda-nda wo mutemo, ecitivhunja zvatinodikana kuita no zvaticikadikani kuita mu upenyu hwedu. Kusiyapo zvondhozvo, iyena anoshandisa zvinoitika mu upenyu, zviporofita no mazano anonasa kushanda kamare, kuti atibesere kuti titeme zvivaringo zvaushoni.  Ngo kudaro, Soko ra Mwari rinotiita kuti timude no kumuzwira ngo mwoyo wese.

15. (a) Bhaibheri rinovonesa kudini kuti Jehovha anotaja vaya vanoriverenga? (b) Inga zvatiri kuvona pa foto, cimusikane ici, hama iri wari mujaha no hambzaji yaamusharuka vari kurangarijisisa ngo pamusoro po vandhu vapi vanowanika mu Bhaibheri? (Genesi 39:1, 10-12; 2 Majimambo 5:1-3; Ruka 2:25-38)

¹⁵ Bhaibheri rinovonesa kuti Jehovha anoneseka maningi na itusu. Kuitisa kudini? Soko rake rakazara ngo zviitiko zvinovonesa mazwiro o vandhu. Itusu tingazwisisa mazwiro o vandhu anowanika mu Bhaibheri, ngokuti ivona vainga no “mazwiro akaezana no edu.” (Jakobo 5:17) Cinosisira maningi ngocokuti, kuvona manera Jehovha anotaja vandhu vakadari inga itusu, zvinozotirerukira kuzwisisa kuti “Jehovha wakazara ngo pena no usizi.”—Jakobo 5:11.

16. Tinojijenyi ngo pamusoro pa Jehovha tikaverenga mu Bhaibheri ngo pamusoro po vandhu vakamushaishira? (Isaia 55:7)

¹⁶ Bhaibheri rinovonesa rudo hwa Jehovha kwatiri ngo njira imweni. Matahwa anotigondesa kuti Mwari wedu narini aazotisii pikija paya patinomuposera. Pikija Vaiziraeri vakaposera Jehovha kakawanda, pavaikhauya ngo mwoyo wese Jehovha waivaregerera. (Verenganyi Isaia 55:7.) Makristu o muzana ro kutanga o makore, vaiziva kuti Jehovha waivada maningi. Mupostori Pauro ngo kufemehwa wakangwaja Makristu doni ake kuti ‘aregerere ngo mwoyo wese no kutondhoja’ mundhu waita cishaishi cikuru asi wokhauya. (2 Vakorinte 2:6, 7; 1 Vakorinte 5:1-5) Zvinodakajisa manigi kuvona kuti Jehovha aazivi kuramba vashandiri vake ngokuti vainga vakaposa. Kusiyapo zvondhozvo, iyena wakavabesera, wakapangira no kuvakoka kuti vavezve shamwari jake. Nyamasi uno, iyena anoitavo zvakafanana kuno vashaishi vanokhauya.—Jakobo 4:8-10.

17. Ngenyi Bhaibheri i cipo cinosisira?

¹⁷ Jehovha wakatipekeja cipo caushoni maningi. Ngenyi Soko ra Mwari rinosisira? Inga zvatavona, Bhaibheri rinovonesa uzivi hwa Mwari, ururami hwake pomwe no rudo hwaanahwo. Bhuku iri rinovonesa kuti Jehovha anoda kuti timuzive. Cimwenizve, anoda kuti itusu tive shamwari jake.

18. Tingakhombijisa kudini kubongesera Jehovha ngo ‘cipo cakanaka’ co Bhaibheri?

¹⁸ Narini atidikani kukanganwa kuti Soko ra Mwari ndi ‘cipo cakanaka’. (Jakobo 1:17) Ngatienderere mberi tecivonesa kubongesera kwedu. Tingaita zvondhozvo ngo kuriverenga no kurangarijisisa zvatinoverengaro. Patinonga teciita zvondhozvo ngative no cokwadi cokuti ‘tinozozwisisa kuthya Mwari.’—Mazwi Akangwara 2:5.