1. Ngozvapi zvakananga Jesu kuno vajiji vake ngo pamusoro po kupera ko nyika ino? Ngoyapi ngwajo yaakavapa?

 PA NJIKU nganani Jesu acito afa, vajiji varongomuna vakamuvhunjisa kudari: “Ngocapi citatijo . . . cokupera ko nyika ino?” (Mateu 24:3) Zvingaita kuti vajiji ava vainga vecivhunjisa kuti tinozvizivisa kudini kuti themberi no Jerusarema zvinozoparajwa. Pa mupinguro wake, Jesu aazivi kunanga basi ngo kuparajwa ko themberi no Jerusarema. Asi wakatonangavo ngo ‘kupera ko nyika’ yatiri kuponari. Ecibhuya ngo mukuvo wokupejisira, Jesu wakati: “Ngo pamusoro po njiku yondhoyo kana nguva, apana anozviziva, nee ngirozi jo kudenga nee Mwana, asi Baba ndivona vanozviziva.” Perapo iyena wakangwaja vajiji vake kuti, “ngwariranyi” no “kugara makarinda.”—Marko 13:32-37.

2. Ngenyi zvaisisira maningi ku Makristu o muzana ro kutanga ro makore kuti vaenderere mberi vakarinda?

² Makristu o muzana ro kutanga ro makore, vaidikana kungwarira, kuti ivona vakwanise kupona zvaifira pa kuita zvondhozvo. Jesu wakavhunja vateveri vake manera avaizoziva kuti kuparajwa ko themberi no Jerusarema kwainga kwaaphedo. Iyena wakati: “Pamunozovona Jerusarema rakatendenejwa ngo zvikwata zvo masoca, zivanyi kuti kuparajwa kwaro kwaaphedo.” Pa mukuvo wondhowo, vaidikana kuzwira zvakanangwa ndi Jesu ‘votizira ku matundhu.’ (Ruka 21:20, 21) Vaya vakazwira zvakanangwa ndi Jesu vakapona Varoma povakaparaja Jerusarema.

3. Ngozvapi zvatiri kuda kuvona pa jijo iyi?

 ³ Nyamasi uno tiri kupona mu mukuvo wo kupera ko nyika ino. Ngo kudaro, tinodikanavo kuva vandhu vakarinda no vanongwarira. Pa jijo iyi, tinoda kuvona kuti ngozvapi zvatingaita kuti tive vandhu vakaezanana patinonga tecivona zviro zviri kuitikari mu nyika, manera atinodikana kubhasopa no kunasa kushandisa ushoni nguva yasarari.

4. Ngenyi tinodikana kudakarira kuvona kuti zviro zviri kuitikari mu nyika ino zviri kukwanirisa zviporofita zvo Bhaibheri?

⁴ Itusu tino mathangwe akanaka anotiita kuti tineseke ngo zviro zviri kuitika mu nyika iyi, ngokuti zviri kukwanirisa zviporofita zvo Bhaibheri. Inga muezaniso, Jesu wakananga ngo zviro zvimweni zvaizoitika zvinozotibesera kuziva kuti kupera ko nyika ino kwaaphedo. (Mateu 24:3-14) Mupostori Pedhru wakativangisa kuti tigare takangwara tecisotesesa kukwanirisika ko zviporofita. Tikaita kudaro rutendo hwedu hunozoenderera mberi wakavanga. (2 Pedhru 1:19-21) Bhuku ro kupejisira ro mu Bhaibheri rinotanga ngo magama aya: “Izvi ndizvona zvakavonesa Jesu Kristu, iyena wakazvipuwa ndi Mwari, kuti avonese varanda vake zviro zvinoda kuitika ngo kukasika.” (Apokaripsi 1:1) Itusu tinodakara maningi ngo zviro zviri kuitikari mu nyika nyamasi uno no kuziva kuti izvona zviri kukwanirisa kudini zviporofita zvo mu Bhaibheri. Ngo kudaro, tingakwanisa kubhuya no vamweni ngo ndava yo zviri kuitikari.

5. Ngozvapi zvatinodikana kungwarira kuti titame kuzviita asi ngozvapi zvatinodikana kuita? (Vonanyi foto.)

⁵ Patinobhuya no vamweni ngo pamusoro po zviporofita zvo mu Bhaibheri, atidikani kufiningira zviro zvinoda kuitika. Ngenyi? Ngokuti itusu atidi kubhuya zviri zvese zvinozoita kuti tiparajane mu ungano. Inga muezaniso, tingatozwa vatungamiriri vo nyika vecinanga manera avangapeja zvineso zviri kubahwa ngo hondo no kuviisa runyararo no rugarisiko. Kusiyapo kugara tecinanga kuti zviri kunangwari ngo vatungamiriri ava zviri kukwanirisa ciporofita cinowanika pana 1 Vatesaronika 5:3, tinodikana kuziva kuti ngozvapi zvavha kunangwa wari. Mabhuyo akambhera ngo kucijikira pa zviro zvakabudiswa ngo sangano ra Jehovha, tinobesera kuti ungano ienderere mberi yakabatana mu ‘mavonero atinoita zviro.’—1 Vakorinte 1:10; 4:6.

6. Ngozvapi zvatinojija kuvha mu bhuku ra 2 Pedhru 3:11-13?

⁶ Verenganyi 2 Pedhru 3:11-13. Mupostori Pedhru wakatibesera kuti tinodikana kuva vandhu vakaezanana patinopopora zviporofita zvo mu Bhaibheri. Iyena wakativangisa kuti tinase “kuziva kuguma ko njiku ya Jehovha.” Ngenyi? Asipi kuti itusu tinoda maningi kuziva “njiku no nguva” yo kuti Jehovha anozoviisa Armagedhoni. Asi tinoda kushandisa nguva yasarari tino ‘mufambiro wakacena teciita mabasa o kujipira kuna Mwari.’ (Mateu 24:36; Ruka 12:40) Ngo magama amweni, itusu tinoda kuva vandhu vano mufambiro yakacena no kuva no cokwadi cokuti basa ratiri kuitira Jehovha rinotatija rudo hwatinahwo kwaari. Kuti tienderere mberi takadaro, tinodikana kubhasopa maningi pazvatinoita.

7. Tingakhombijisa kudini kuti tiri vandhu vanobhasopa? (Ruka 21:34)

⁷ Jesu wakavhunja vajiji vake kuti vanodikana kuva vandhu vanobhasopa. Izvi azvirevi kubhasopa pa zviro zviri kuitika mu nyika asi kuva vandhu vanobhasopa pa zviya zvavanoita. Izvi zvakanasa kujekeswa ngo zvatinowana  pana Ruka 21:34. (Verenganyi.) Jesu wakati: “Bhasopanyi.” Mundhu anoita zviro ngo ubhasopa, anongwarira kuti atame kuita zviro zvinozokhuvaza ushamwari hwake na Jehovha. Ngo kuita kudaro, iyena anoramba ari mu rudo hwa Mwari.—Mazwi Akangwara 22:3; Judha 20, 21.

8. Ngozvapi zvakananga mupostori Pauro kuno Makristu o ku Efeso?

⁸ Mupostori Pauro wakangwaja makristu kuti anodikana kuva vandhu vanobhasopa pa zviro zvavanoita. Inga muezaniso, iyena wakananga kudari kuno Makristu o Efeso: “Ngo kudaro, ngwariranyi kuti mutame kufamba inga mapenji, asi muve vakangwara.” (Vaefeso 5:15, 16) Sathana ari kueja kupeja ushamwari hwedu na Jehovha. Ngo kudaro, Bhaibheri rinotivhunja kudari: “Endereranyi mberi mecizwisisa zvinoda Jehovha” kuti tikwanise kucungirira pa zvineso zvese zvatinosongana nazvo.—Vaefeso 5:17.

9. Tingaitisa kudini kuti tizwisise zvinoda Jehovha kwatiri?

⁹ Bhaibheri arinangi zvese zvaizophwanya ushamwari hwedu na Jehovha. Kazinji tinodikana kunasa kutema zvivaringo ngo pamusoro po shwiro yokuti mu Bhaibheri ainasi kujekeswa ushoni. Kuti titeme zvivaringo ngo ungwaru, tinodikana kuzwisisa “zvinoda Jehovha.” Tingakwanisa kuita zvondhozvo ngo kujija Soko ra Mwari mukuvo wese no kurirangarijisisa. Patinozwisisa kuda ka Jehovha no kueja ‘kurangarira inga ndi Kristu,’ tinozofamba inga vandhu ‘vakangwara’ pikija pacina mutemo unorambija zvonazvo. (1 Vakorinte 2:14-16) Nguva jimweni zvakareruka maningi kuzwisisa kuti atidikani kuita zviro zvimweni, asi nguva jimweni azvizivi kureruka.

10. Ngozvapi zviro zvimweni zvaticikadikani kuita?

¹⁰ Zviro zvimweni zvakashatisisa zvaticikadini kuita nga izvi: kutamba no mundhu inga kuti tinomuda, kumwa maningi doro, kukasika kunyangajwa, kubhuya magama anotuka, kuvona mafirimi okutakana, kuvona zvo umitu-mitu no zvimwenivo zvakadaro. (Nduyo 101:3) Muvengi wedu Sathana Dhiabhu, ari kundopsaka mukana kuti tiphwanye ushamwari hwedu na Jehovha. (1 Pedhru 5:8) Kudari tikatama kungwarira, Sathana angasima mu murangariro no mu mwoyo mwedu mbeu yoshishatihwa, kunyenyana, kutama kugondeka, kujikuja no kuviga bundu. (Vagaratiya 5:19-21) Pa kutanga zviro izvi zvinoita inga zvakavanga maningi. Kudari tikatama kuvhita miji iji ngo kukasika, ijona jinozokura jotibarira zvineso, joita inga sakuro rinouraya mbeu.—Jakobo 1:14, 15.

11. Ngoyapi ngozi icikanyanyi kuvoneka yatinodikana kutiza, ngenyi?

¹¹ Ngozi imweni icikanyanyi kuvoneka ndi ushamwari Amborangariranyi izvi basi. Imwimwi muri kushanda no mundhu wokuti asipi Capupu ca Jehovha. Imwimwi munoda kuti iyena arangarire zviro zvaushoni ngo pamusoro po Zvapupu zva Jehovha. Ngo kudaro, munova mundhu wakanaka mwoyo no anoda kubesera. Nguva jimweni munototendera kucenga-cenga zviri zvese no mundhu endhowo. Pa kufamba ko nguva munotanga kuita izvi nguva jese. Nguva jimweni, mundhuwo anototanga kubhuya zviro zvinonyoweja, pakutanga amuzvidakariri izvi. Pa kufamba ko nguva, munorovejana no mabhuyo ondhowo motoguma pa kutama kunyangajwa ndizvona. Perapo iyena anotomukoka kuti muende komwa zviri zvese pasure po kupeja basa renyu, imwimwi mototendera. Tevere, munototanga kurangarira inga manera anorangarira mudoni wenyu wiya. Ndizvona kuti tinoda kuva vandhu vakanaka mwoyo no kureremeja vese. Asi tinodikana kuceukija  kuti tinopsaswa maningi no vandhu vatinopejaya maningi nguva navo. (1 Vakorinte 15:33) Tikava vandhu vanobhasopa inga zvakananga Jesu, atizoshamwarijani no vaya vacikaponi mukuzwirana no ndhungamiriro ja Jehovha. (2 Vakorinte 6:15) Tinozokwanisa kuvona ngozi iripo no kuitiza.

12. Zvicinyi zvaidikana kuithwa ngo vajiji va Jesu pavainga veciimira kupera ko nyika ino?

¹² Jesu waida kuti vajiji vake vagare vakabatikana pavanonga veciimira kupera ko nyika ino. Jesu wakavapa basa kuti vaite. Iyena wakavavhunja kuti vacumaere masoko akanaka “mu Jerusarema, mu Judheya mwese no mu Samariya, mbhera ku ndau jiri ndhambo jo pasi pano.” (Mabasa o Vapostori 1:6-8) Basa rakapuwari vajiji rainga rakakura maningi. Ngo kuita zvese zvavaikwanisa kuti vacumaere vamweni, vainga vecinasa kushandisa ushoni nguva yavo.

13. Ngenyi tinodikana kunasa kushandisa ushoni nguva yedu? (Vakorose 4:5)

¹³ Verenganyi Vakorose 4:5. Kuti tive vandhu vanobhasopa, tinodikana kuvona manera atiri kushandisa nguva yedu. “Bzakanaka no bzakaxata” zvinowira vandhu vese. (Mucumaeri 9:11) Tinozviziva kuti pa nguva iri yese tinofa.

14-15. Tingashandisa kudini ushoni nguva yedu? (Vahebheru 6:11, 12) (Vonanyi foto.)

 ¹⁴ Itusu tingashandisa ushoni nguva yedu ngo kuita zvinoda Jehovha no kuvangisa ushamwari hwedu naye. (Johani 14:21) Tinodikana ‘kuvanga ticikacukunuki, tova takabatikana mukuvo wese mu basa ra Mambo.’ (1 Vakorinte 15:58) Mugumo paunozoguma, azvinenyi dangani mugumo wo nyika ino kana kutofa kwedu kamare, narini atizozvindembi.—Mateu 24:13; Varoma 14:8.

¹⁵ Nyamasi uno, Jesu ari kwenderera mberi ecitungamirira vajiji vake pavanonga vecicumaera masoko o Umambo hwa Mwari pasi pese. Iyena ari kukwanirisa zvaakagondesa. Ecishandisa sangano ra Jehovha, Jesu ari kutijijisa manera okucumaera no kutipa zvese zvatinoda kuti tiite basa iri. (Mateu 28:18-20) Kuti tikwanirise zvakananga Jesu, tinodikana kushanda ngo simba mu basa ro kucumaera no kujijisa, no kuramba takarinda patinonga tecivetera kuti Jehovha aparaje nyika ino. Ngo kushandisa mbhangiro yatinowana pana Vahebheru 6:11, 12, tinozobatisisa vetero yedu “mbhera kumagumo.”—Verenganyi.

16. Tinodikana kutema civaringo co kuitenyi?

¹⁶ Jehovha ano njiku no nguva yaakagaja kuti aparaje nyika ino ya Sathana. Njiku iyi ikaguma, Jehovha anozokwanirisa zviporofita zvese zvakatahwa mu Soko rake. Asi nguva jimweni, tingatorangarira kuti mukuvo uwu auzogumi ngo kukasika. Asi njiku ya Jehovha ‘aizononoki.’ (Habakuki 2:3) Ngo kudaro, ngatiteme civaringo co kuramba ‘tecisota Tenji, tecivetera Mwari wo ruponeso hwedu.’—Mikeya 7:7.