1. Kazinji Jehovha anodavirisa kudini mukumbiro jo vashandiri vake?

 MAIZVIZIVA kuti Jehovha angamushandisa kuti adavire mukumbiro waizwa ngo ariwese? Iyena angakwanisa kumushandisa kamare, azvinenyi kuti muri mukuru, mubeseri wo ungano, piyona, mucumaeri. Dangani muri mujaha, musikane, hama kana kuti hambzaji. Mundhu anoda Jehovha paanokumbira besero rake, kazinji Jehovha anoshandisa vakuru no vashandiri vamweni vakagondeka “kuti vakwanise kumunyaraja.” (Vakorose 4:11) Pacina kukana-kana, ndi mudakaro mukuru kamare kushandira Jehovha no hama no hambzaji jedu! Mu njira iyi, tingakwanisa kubesera hama no hambzaji jedu paya panoitika mutungu, ngozi kana kuteverehwa.

2. Ngenyi zvinganesa kubesera vamweni panonga peciitika mutungu?

² Zvinganesa maningi kubesera vamweni panonga peciitika mutungu. Inga muezaniso, itusu tinoda maningi kuvhakacira shamwari jedu, asi azvizivi kujiviririka kuita izvi. Kangaije tinoda kukoka ariwese ari kusongana no zvineso zvo mare kuti vaviye kuzoha ciricese na itusu. Zvingaita kuti itusu tinotoda kamare kubesera ariwese, asi izvi azvizivi kureruka kudari umwe wo pa mbhuri yedu ari kusongana no zvineso. Pikija zvakadaro, itusu tinoda maningi kubesera hama jedu, Jehovha anodakara maningi patinoita zvese zvatinokwanisa kuti tivabesere. (Mazwi Akangwara 3:27; 19:17) Ngo zvapi zvatingaita kuti tibesere?

3. Ngozvapi zvatinojija kuvha ku vakuru vo ungano ya hambzaji Dheizi? (Jeremia 23:4)

³ Vakuru vangaitenyi? Kudari muri mukuru, vangisiranyi kuti munase kuziva ushoni hama no hambzaji jo mu ungano menyu. (Verenganyi Jeremia 23:4.) Hambzaji Dheizi vakanagwaya pacijijo cakaperaya, vakati: “Vakuru vomucikwata cangu cokubuda  mubasa rokucumaera mukuvo wese vaindocumaera na inini no hama jimweni no kubhuisana na itusu pamukuvo umweni.” b Ngokuita kudaro, zvakarerukira maningi vakuru kuti vakwanise kubesera hambzaji Dheizi pa mukuvo wo mutungu no pamukuvo wokuti ivona vakafihwa ngo ukama hwavo ngo ndava yo korona vhiru.

4. Ngenyi vakuru vakakwanisa kubesera hambzaji Dheizi, vakuru vangajijenyi?

⁴ Hambzaji Dheizi vakananga kudari: “Zvecivoneka kuti ndainga ndaano ushamwari wakavanga no vakuru, zvakandirerukira maningi kuvavhunja manera andaijizwa no zvineso zvandaihwisana nazvo.” Vakuru vanojijenyi? Kudari muri mukuru beseranyi no kuvangisa hama no hambzaji jenyu vacito vakasongana no zvineso. Ivanyi no ushamwari navo. Pakambhera ngokuitika mutungu mokonehwa kuenda kumuzi kwavo, endereranyi mberi mecibhuya navo mecishandisa njira jimweni. Hambzaji Dheizi vakaenderera mberi vecinanga kudari: “Mukuvo umweni vakuru vazinji vaindifonera no kunditarira mesajhi mu njiku imweyo kamare. Mavhesi avakandiverengera akandibesera maningi pikija mavhesiwo ndecitonasa kumaziva.”

5. Vakuru vangazvizivisa kudini zviri kudiwa ngo hama no manera avangavabesera?

⁵ Njira imwe yatingashandisa kuti tivone zvinodiwa ngo hama jedu, ngo yo kuvaita muvhunjo jicingavasii vecinyowejeka. (Mazwi Akangwara 20:5) Kunanga kuti ivona vanozvokuha zvakakwana? Kunanga kuti ivona vanapo pokugara no basa? Kunanga kuti ivona vanoda besero ririrese kuti vakwanise kupuwa zvokuha ngo utongi? Hambzaji Dheizi vakaashira besero raivha ku hama. Asi zvakavabesera kamare pa mukuvo uwu wainesa ndi besero ravakaashira recivha ku vakuru ro zvokuha zvokumujimu. Ivona vakananga kudari: “Vakuru vaiita mukumbiro pamwepo na inini. Andiripi kuceukija zvavakananga asi ndiri kuceukija mazwiro andakava nawo. Ndakamuka kuzwa Jehovha ecindivhunja kuti ‘iwewe auripi wega.’”—Isaia 41:10, 13.

6. Hama no hambzaji jo mu ungano jingabeseresa kudini vamweni? (Vonanyi foto.)

⁶ Vamweni vangaitenyi? Itusu tinovetera kuti vakuru vataje hama no hambzaji mu ungano. Asi Jehovha anoda kuti tivangisevo vamweni no kuvabesera. (Vagaratiya 6:10) Pikija tikaita zviro zvishoma kuti tibesere ariwese arikuhwaja, zvondhozvo zvinovangisa maningi.  Mwana mudoko angadhezenyari cinyama kana kutumira karata ku hama kuti aidakajise. Kudari hama iriyese kana kuti hambzaji yo mu ungano ikada besero majaha angazvipira kuti abesere ngo zvinodiwaro kutenga-tenga no zvimweni. Asi zvakajeka kuti panopera kuitika mutungu hama no hambzaji jese jinoda besero. Kangaije panonga papera musongano tomboima padoko kuti timbobhuya no hama no hambzaji, zvingaita mecitovonana kana ngo interneti kamare. Vakuru vanodavo kuvangiswa. Hama no hambzaji jimweni jinoita kutumira karata jo kubongesera vakuru, pasure po kuitika mutungu ngokuti vanonga vakabatikana maningi. Ngo zvaushoni maningi ‘kugara tecivangisana no kubesana ngo cedu’!—1 Vatesaronika 5:11.

7. Kuitisa kudini ngozi ingapsasa upenyu wo ariwese?

⁷ Ngozi ingaguma pakucinja upenyu wo mundhu mu kukopira kumwe ko jiso. Vandhu vamweni vangaguma pakuruza zvavanazvo, mundhu wavanoda no muzi wavo. Zvinosuruvarisa ngo zvokuti zviro zvakadari zvingaguma pakuitikiravo hama jedu. Ngozvapi zvatingaita kuti tivabesere?

8. Vakuru vo ungano no musoro jo mbhuri vangaitisa kudini kuti vave vakanasiririka kuitira ngozi jinozoitika?

⁸ Vakuru vangaitenyi? Vakuru vanobesera hama no hambzaji kuti jigare jakanasirira kuitira ngozi jinozoitika. Ivona vanovhunja hama no hambzaji jese mu ungano kuti ngo zvapi zvavanodikana kuita kuti vagare vakajiviririka no kuramba vecibhuisana no vakuru. Pa cijijo cakapera pakabhuiwa ngo pamusoro pa hambzaji Margareti, ivona vakananga kudari: “Pamusongano padivi ro zvinodiwa zvo ungano, vakuru vakazivisa kuti mu mutundhu mataigararo kupsa ko makwasha kwainga kucito kwapera. Ivona vakanangazve kuti kudari utongi ukananga kuti munodikana kubuda pamuzi kana kuti zviro zvikanesa maningi taidikana kubuda pamukuvo wonawo kamare.” Ngwajo iyi yakaguma panguva kwayo kamare ngokuti pakandopera masumana mashanu makwasha akatanga kupsa. Pakunamata ko mbhuri ungava mukana waushoni wo kubhuisana kuti ngozvapi zvingaitwa nga umwe na umwe pakazoitika zviro zvakadari. Kudari imwimwi no vana venyu mukava makanasiririka zvinozomubesera kuti mukwanise kugara makagajana panozoitika zviro zvakadari.

9. Vakuru vanganasiririsa kudini panonga pacito paitika ngozi no painopera kuitika?

⁹ Kudari imwimwi muri mutungamiriri wocikwata ciricese, ivanyi no rista ino numero jo hama jese jo pacikwata cenyu. Mucavetera kuti zviro izvi zvizoitika mucina no numero jo hama. Ngo kudaro, ngozi painozoitika imwimwi munonga muno numero jo hama jese kuti muzokwanisa kuziva zvavanonga vecida. Ngokukasika munozokwanisa kutumira masoko ku murongi wo dare ro vakuru vo ungano, iyena anozobhuisana no muvonereri wo ndharaundha ngo pamusoro pazvo. Kushanda pamwepo takabatana inga hama no hama kunobesera maningi. Pasure pokupsa uku, muvonereri wo ndharaundha wa hambzaji Margareti, wakapeja nguva jinokwana kuita 36 akabatikana basi pakunasirira mabasa ovakuru vo ungano, ivona pavainga vecieja kufonerana no hama nokutaja hama jinokwana kuita 450 jainga jakasiya muzi javo ngo ndava yokupsa uku. (2 Vakorinte 11:27) Ngo kudaro, vese vainga vacina pokugara vakakwanisa kupawana.

10. Ngenyi kutaja hama no hambzaji iciro cinosisira cinodika kuizwa ngo vakuru vo ungano? (Johani 21:15)

¹⁰ Kubesera vandhu kuti vanamate Jehovha no kuvabesera kuti vave no mazwiro aushoni zvinoitavo divi ro basa ro vakuru. (1 Pedhru 5:2) Panoitika ngozi, zviro zvokutanga zvinoita vakuru ngo zvokupsaka kuziva kuti hama jakajiviririka, jino zvokuha, nguvo no pokugara.  Asi pasure pa izvi pa mweji jinozotevera, hama jinozoda kuvangiswa no kubesehwa kudivi ro kumujimu. (Verenganyi Johani 21:15.) Hama Harold vanoshanda ku Komisau yo Firiyari vakasongana no hama zinji no hambzaji jakambosongana no ngozi, vakananga kudari: “Zvinotora mukuvo wakareba kuti zviro zviite nane. Padoko ngo padoko hama jinotangazve kuva no upenyu uri nane. Asi zviro zvimweni zvinganesa kukanganwa, zvakadari inga kutamikihwa ngo mundhu wavaida, zviro zvo mbhuri yavo zvakaruzika no kugara vecirangarira kuti vakadofa. Izvi izviro zvokuti vangatopeja mukuvo wakareba vecindozviceukija basi. Kuva no mazwiro aya asipi kutama rutendo izviro zvinotoitika kamare.”

11. Pasure pokuitika ngozi ibesero rapi ringadiwa ngo mbhuri?

¹¹ Vakuru zwiranyi ndhungamiriro iri pana varoma inoti, “cemanyi no vanocema.” (Varoma 12:15) Nyarajanyi hama no hambzaji jakasongana no zvineso no kujiceukija kuti Jehovha anojida maningi pamwepo no hama no hambzaji. Vakuru vanodikana kubeseravo mbhuri javo kuti jienderere mberi jecivangisa umujimu hwajo ngo kuita jijo yo mbhuri, jijo yo mundhu ega, kuenda kumusongano no kuenda kocumaera. Kunja kwa zvondhozvo, vangisanyi majibaba kuti anyaraje vana vavo no kuvabesera. Majibaba beseranyi vana venyu kuti vabatikane pa zviro zvicikaruziki paya panoitika ngozi no kuceukija vana venyu kuti Jehovha mukuvo wese anozoramba ari Shamwari yavo mbhera na rini. Vasanangurirenyivo kuti ivona vangawana besero ro hama no hambzaji kutenderera pasi pese vanozoita zvese zvavanokwanisa kuti vavabesere.—1 Pedhru 2:17.

12. Vamweni vangaitenyi kuti vabesere panonga paitika ngozi? (Vonanyi foto.)

¹² Vamweni vangaitenyi? Kudari kukaitika ngozi kwamunogararo vhunjisanyi vakuru kuti ngo zvapi zvamungaita kuti mubesere. Kangaije mungatopa pokugara vanongaya vavha kwaitika ngozi no hama jinoshanda pa basa ro kuvaka. Cimwenizve, imwimwi mungabesera ngo zvokuha kana ngo zvimwenivo zvavanonga vecida. Ngozvapi zvamungaita kuti mubesere hama jenyu panonga paitika ngozi ndhambo no kwamunogararo? Imwimwi mungatoita mukumbiro kuitira vaya vanonga vawihwa ngo ngozi. (2 Vakorinte 1:8-11) Mungabeserazve ngokuita mupiro kuitira kubesera hama jenyu kutenderera pasi pese. (2 Vakorinte 8:2-5) Kudari imwimwi mecikwanisa kuita hwendo kuenda kobesera vawihwa ngo ngozi tanganyi mavhunjisa vakuru vo ungano kuti ngo zvapi zvamunodikana kuti  muite. Ngo kudaro, kudari vakuru vakatendera ivona vanozomujijisa manera amungazoita kuti muzobesera.

13. Zvineso zvapi zviri kuhwisana no hama jedu ku ndau yo kuti basa redu riri kurambijwa?

¹³ Kundau kokuti basa redu riri kurambijwa, upenyu wo hama jedu unonga wecinesa maningi. Kunja kokuteverehwa basi ivona vari kuhwisanazve no zvineso zvakadari inga kuhwaja no kufihwa ngo mundhu wavanoda. Ngo ndava yo kuteverehwa konako, zvingaita kuti vakuru avaripi kukwanisa kufambira hama no kutovafonera kuti vavangise. Izvi ndizvona zvakaitika na hama Andireya vakanangwaya pa cijijo cakapera. Hambzaji vomucikwata cavo vainga no cineso cokutama mare. Zvakazonyanyisa pavakaita asidhenti no karu. Ivona vakadikana kuitwa operasau jakawanda zvoita kuti vamboima kubata basa. Pikija no mutungu no kuteverehwa, vakuru vakaita zvavaikwanisa kuti vabesere. Jehovha waivona zvese zvaivaitikirari.

14. Vakuru vangakhombijisa kudini muezaniso wakanaka ngo kuthemba Jehovha?

¹⁴ Vakuru vangaitenyi? Hama Andireya vakaita mukumbiro nokuita zviro zvavaikwanisa. Jehovha wakajidavirisa kudini? Iyena wakashandisa hama no hambzaji jo mu ungano jakasiyana-siyana kuti jibesere hambzaji iyana. Hama jimweni jakatora hambzaji iyi kuenda nayo ka medhiko. Vamweni vakavabesera ngo mare. Jehovha wavangisa hama iji kuti jiite zviya zvajaikwanisa. Jehovha wakakomborera kubatana kwavainga nako no kuvangisira kwavaiita. (Vahebheru 13:16) Vakuru, kudari kwamunogararo basa riri kurambijwa, kumbiranyi besero kuvamweni. (Jeremia 36:5, 6) Zivanyi kuti cinosisira maningi ikuthemba Jehovha iyena anozomubesera kuti mutaje hama no hambzaji.

15. Tingaitisa kudini kuti tienderere mberi takabatana pikija patinonga teciteverehwa?

¹⁵ Vamweni vangaitenyi? Patinonga teciteverehwa kangaije tingadikana kuita musongano tiri zvikwata zvidokowane. Ngo kudaro, cinosisira kuenderera mberi tino runyararo no hama jedu. Ngokuti itusu atiripi kuhwisana no hama jedu, asi tiri kuhwisana na Sathana. Mucavetera kuti hama jenyu jive jakakwana, kudari ari wese wamuitira zvakashata, bhuisananyi naye ngokukasika. (Mazwi Akangwara 19:11; Vaefeso 4:26) Ivanyi no cido cokutanga kubesera vamweni. (Tito 3:14) Kubesera kwaitwa hambzaji iyana ngo hama jiya, kwakakhombija rudo hwakakura maningi. Cikwata cavo cakaenderera  mberi cakabatana pamwepo inga mbhuri imwe.—Nduyo 133:1.

16. Mukuzwirana na Vakorose 4:3, 18, tingaitisa kudini kuti tibesere hama no hambzaji jedu jiri kuteverehwa?

¹⁶ Hama jedu no hambzaji zinji jiri kuenderera mberi jecishandira Jehovha pikija jeciteverehwa. Vamweni vari kuguma pakungwiniswa mukadheya ngo ndava yo rutendo hwavo. Tingaitira mukumbiro ivona no mbhuri javo, no kutoitazve mukumbiro ngo pamusoro pavayana vanodira upenyu hwavo pa ngozi kuti vaende kovabesera kudivi rokunyama, rokumujimu no ku divi ro zvomutemo. c (Verenganyi Vakorose 4:3, 18.) Mucakanganwa kuti mukumbiro jenyu jiri kubesera maningi hama jenyu!—2 Vatesaronika 3:1, 2; 1 Timoti 2:1, 2.

17. Mungaitisa kudini kuti munasirire wari kuitira pamunozoteverehwa?

¹⁷ Imwimwi no mbhuri yenyu tanganyi wari kunasirira kuitira pamunozoteverehwa. (Mabasa o Vapostori 14:22) Mucadoeja kurangarijira kana kuti kugara mecithimwa-thimwa ngo pamusoro po zviro zvinozoitika. Kusiyapo zvondhozvo, vangisanyi ushamwari hwenyu na Jehovha no kubesera vana venyu kuti vaitevo zvonazvo. Kudari mukagara mecithimwa-thimwa itanyi mukumbiro kuna Jehovha. (Nduyo 62:8, 9) Inga mbhuri bhuisananyi ngo pamusoro po mathangwe anomuitisa kuti muthembe Jehovha. d Ngo pamusoro po ngozi, kuthemba kwamunoita Jehovha no kunasirira ushoni zvinoita kuti vana venyu vave no cicunge pomwe no runyararo.

18. Ngo zvapi zvatiri kuvetera kumbejiyo?

¹⁸ Runyararo hwa Mwari unotiita kuti tijizwe takajiviririka. (Vafiripi 4:6, 7) Jehovha anotipa runyararo uwu nyamasi uno kuti anyaraje mwoyo wedu pa zviro zviri kutiitikira zvakadari inga, ngozi, kuhwaja no kuteverehwa. Jehovha anoshandisa vakuru vanoshanda ngo simba kuti vatibesere. Iyena anotipekeja mukana wokuti tibesane umwe no umweni. Runyararo watinawo unozotibesera kuti tihwisane no zvineso zvakakura zvatinosongana nazvo nyamasi uno no zvatinozosongana nazvo kumbejiyo pa “dambujiko guru.” (Mateu 24:21) Izvi pazvinozoitika tinozodikana kuenderera mberi tino runyararo no kubesera vamweni kuti vazoitavo zvonazvo. Pasure po dambujiko guru, zvineso zvese zvinozonga zvapera. Ngokuti tinozonga tina zvese zvatinoda inga zvaakatigondesa Jehovha, runyararo ucikaperi mbhera narini.—Isaia 26:3, 4.