1. Kurangarijisisa ngo pamusoro po cigondiso ca Jehovha co kuzorarama no kucikaperi kunotibeseresa kudini?

 JEHOVHA anogondesa kuti vaya vanomuzwira vanozowana “upenyu hucikaperi.” (Varoma 6:23) Patinorangarijisisa ngo zvese zvatinopuwa ndi Jehovha, rudo hwedu kwaari hunovanga maningi. Amborangariranyi izvi basi: Baba wedu vo kudenga vanotida maningi zvokuti apana cingakwanisa kutiparajanisa na ivona.

2. Cigondiso cokuzorarama no kucikaperi cinotibeseresa kudini?

² Cigondiso ca Jehovha co kupona no kucikaperi cinotibesera kuti ticungirire patinosongana no zvineso. Pikija vavengi vedu vakananga kuti vanoda kutiuraya, itusu atizosiyi kushandira Jehovha. Ngenyi? Thangwe rimwe ngo rokuti, itusu tinoziva kuti kudari tikafa takagondeka kuna Jehovha iyena anozotimusa no vetero yo kuzopona no kucikaperi ticikafi. (Johani 5:28, 29; 1 Vakorinte 15:55-58; Vahebheru 2:15) Ngenyi tingava no cokwadi cokuti tinozorarama no kucikaperi? Ngatende tivone mathangwe manganani.

3. Ngenyi tingava no cokwadi co kuti Jehovha anokwanisa kutiita kuti tirarame no kucikaperi? (Nduyo 102:13, 25, 28)

³ Itusu tinoziva kuti Jehovha anokwanisa kuita kuti tipone no kucikaperi ngo kuti iyena ndi cinyuke co upenyu nokutizve anorarama no kucikaperi. (Nduyo 36:10) Ngativone vhesi nganani jo mu Bhaibheri jinovonesa kuti Jehovha waindonga ariyo nokutizve anozoramba ariyo. Nduyo 90:2 inonanga kuti Jehovha ariyo “kubvira kare, mbhera narini.” Nduyo 102 inonangavo zvakafanana. (Verenganyi Nduyo 102:13, 25, 28.) Muporofita Abhakuki wakatara kudari ngo pamusoro pa Baba wedu vo kudenga: “Tenji, amuripi imwimwi, kubvira pa  kuamba, Mwari wangu, mucena wangu? [Amuzofi].”—Habakuki 1:12.

4. Kureva kuti tinodikana kuthimwa-thimwa kudari tikatama kuzwisisa ushoni kuti Jehovha andoriyo kuvhira kare? Sananguranyi.

⁴ Munovona kuti zvinonesa kutenda kuti Jehovha wainga andoriyo ‘kuvhira kare’? (Isaia 40:28) Vandhu vazinji vanonesehwa kuzvitenda izvi. Erihu wakati ngo pamusoro pa Mwari: “Uwandu hwo makore ake ahuverengeki.” (Jobe 36:26) Zviro zvimweni zvinonesa kuzwisisa asi azvirevi kuti asipi zvokadi. Inga muezaniso, zvingaita kuti itusu atinasi kuzwisisa kuti magezi anoshandisa kudini. Asi izvo azvirevi kuti aako. Munjira yakafananavo, Jehovha andoriyo nokutizve anoramba ariyo. Izvi ngo zvokadi. Azvinenyi dangani tinozvizwisisa kana atizvizwisisi. (Varoma 11:33-36) Jehovha waindonga ariyo kuvhira kare nyika icito ikaruhwa kubatanijavo no zuva pomwe no ndhondho. Bhaibheri rinotigondesa kuti Jehovha “ndiyena wakarura nyika ngo simba rake.” Iyena waindonga ariyo, acito ‘akawaja denga.’ (Jeremia 51:15; Mabasa o Vapostori 17:24) Ngorapi thangwe rimweni rinotiita kuti tive no cokwadi cokuti zvinokwanisika kurarama no kucikaperi?

5. Ngoyapi vetero yainga no varovorani vokutanga?

⁵ Zviro zvese zvakasikwa ndi Jehovha pasi pano zvaizofa, kusiyapo vandhu basi. Iyena wakavapa vetero yokupona kwenda no kwenda vacikafi. Asi Jehovha wakati kuna Adhamu: “Ucaha mucero wo muti wo uzivi hwo bzakanaka no bzakaxata, ngokuti pa njiku yo unozouha unozofa.” (Genesi 2:17) Kudari Adhamu na Evha no vakazwira Jehovha, ivona avacaizofepi. Zvingaita kuti pakufamba ko nguva Jehovha waizovatendera kuti ivona vahe “muti wo uhomi.” Izvi zvaizoreva kuti ivona ‘vaizorarama njiku jese.’ b—Genesi 3:22.

6-7. (a) Ngozvapi zvinokhombija kuti vandhu avazivi kusikwa kuti vafe? (b) Ngozvapi zvamunozoda kuita mu nyika imbza? (Vonanyi foto.)

⁶ Vapsakisisi vamweni vakavona zviro zvinovonesa kuti uruzvi hwedu unokwanisa kuviga masoko akawanda maningi mu upenyu hwedu hwese. Mu gore ra 2010 revhista imweni yo Amerika inobhuya ngo zvo uruzvi, yakananga kuti uruzvi hwo mundhu unokwanisa kuviga masoko anokwana kuita 2.5 o zviuru zvo gigabyte, anokwedeja nguva jinokwana kuita zviuru zvitatu kana (makore anokwana 300) ecigaravhahwi muterevhizau. Zvakanangwari zvinovonesa kamare  kuti uruzvi hwedu hunokwanisa kuviga masoko akawanda maningi kupinda anangwari. Izvi zvinokhombija kuti Jehovha wakaita uruzvi hwedu munjira yokuti iwona unokwanisa kuviga masoko akawanda maningi kupinda basi atinokwanisa kuviga pa makore anodarika 70 kana 80.—Nduyo 90:10.

⁷ Jehovha wakasika vandhu no cido kuda kupona kwenda no kwenda. Bhaibheri rinonanga kuti Jehovha wakadira mu ‘mwoyo mo vandhu’ cido co kuda kupona no kucikaperi. (Mucumaeri 3:11) Iri ndi rimwe tangwe rinotiita kuti tivone rufu inga muvengi. (1 Vakorinte 15:26) Patinonga tecihwaja maningi, kunanga kuti tinogara ticikaiti ciri cese atee kugumira kufa? Haiwa. Kazinji itusu tinoenda kushipitari no kushandisa mutombo kuti tivange. Zvokadi kamare, tinoita zvese zvatinokwanisa kuti titame kufa. Mundhu watinoda paanofa, azvinenyi dangani iyena waadhodha kana mwana mudoko, tinohwajihwa maningi pa mukuvo wakareba. (Johani 11:32, 33) Tingakwanisa kuenderera mberi tecijija zvakawanda no kucikaperi. Cimwenizve, tino cido cakavanga co kupona no kucikaperi ngokuti Musiki wedu ano rudo, wakatiita ngo njira iyi. Zvakajeka kamare kuti iyena anokwanisa kutiita kuti tipone kwenda no kwenda. Asi kuno mathangwe akawanda anotiita kuti itusu titende kuti tingararama no kucikaperi. Ngatende tivone zviro zvimweni zvakaitwa ndi Jehovha kare no zvaari kuita wari, zvinovonesa kuti iyena aazivi kucinja zvaaida kuvhira pakutanga.

8. Isaia 55:11, inotijijisenyi ngo pamusoro po zvaanoda Jehovha kwatiri?

⁸ Pikija Adhamu na Evha vakashaisha, voviisa rufu ku vana vavo, Jehovha aazivi kucinja  kuda kwake. (Verenganyi Isaia 55:11.) Zvaanoda ngo zvokuti vandhu vakagondeka vapone no kucikaperi. Tinoziva izvi ngo ndava yo zviro zvakaita Jehovha kareko no zvaari kuita wari uno, kuti akwanirise kuda kwake.

9. Jehovha wakagondesenyi? (Danieli 12:2, 13)

⁹ Jehovha wakagondesa kumusa vakafa no kuita kuti ivona vapone no kucikaperi. (Mabasa o Vapostori 24:15; Tito 1:1, 2) Jobe mundhu wainga wakagondeka, wainga no cokwadi cokuti Jehovha anoda kumusa vese vaya vakafa. (Jobe 14:14, 15) Muporofita Dhanyeri waiziva kuti vandhu vaizomuswa vova no mukana wo kupona no kucikaperi. (Nduyo 37:29; verenganyi Danieli 12:2, 13.) Vajudha vo mu njiku ja Jesu vaiziva kuti Jehovha waizopekeja vashandiri vake “upenyu hucikaperi.” (Ruka 10:25; 18:18) Jesu wakabhuya ngo cigondiso ici ko vhaza jakawanda nokutizve iyena wakamuswa ndi Baba wake.—Mateu 19:29; 22:31, 32; Ruka 18:30; Johani 11:25.

10. Rumuko wakaitwa kare unokhombijenyi? (Vonanyi foto.)

¹⁰ Jehovha ndiyena cinyuke co upenyu nokutizve ano simba ro kumusa vaya vakafa. Iyena wakapa simba muporofita Eriya kuti amuse mwana wo noni yo Sarefaa. (1 Majimambo 17:21-23) Pakufamba ko nguva, ngo besero ra Jehovha muporofita Erizeu wakakwanisa kumusa mwana wo mwanakaji mu Shunamita. (2 Majimambo 4:18-20, 34-37) Rumuko uhu no umweni, unovonesa kuti Jehovha ano simba ro kumusa vandhu vakafa. Paainga pasi pano, Jesu wakavonesa kuti Baba wake vainga vakamupa simba ro kumusa vakafa. (Johani 11:23-25, 43, 44) Wari Jesu ari kumatenga. Iyena wakapuwa “simba rese mudenga no pasi.” Ngo kudaro, anozokwanirisa cigondiso cokuti “vese vari mu makuva anoceukijwa” vanozomuswa kuti vararame no kucikaperi.—Mateu 28:18; Johani 5:25-29.

11. Kuitisa kudini muripo unokwanisa kutiita kuti tipone no kucikaperi?

¹¹ Ngenyi Jehovha wakatendera kuti Mwana wake anodiwa afe ngo njira inohwaja? Jesu wakadavira muvhunjo uwu, paakananga kudari: “Mwari wakadisa vandhu vo nyika ino, ngo kudaro, wakavapa Mwana wake, wakabahwa ari ega, kuti vese vanomutenda vatame kuparajwa, asi vawane upenyu hucikaperi.” (Johani 3:16) Mwari ngo kupa kwake Mwana wake inga muripo kuti aregerere zvishaishi zvedu, wakaita kuti tese tizokwanise kuashira upenyu ucikaperi. (Mateu 20:28) Mupostori Pauro wakadurujira divi iri rinosisira ro cigondiso ca Mwari, paakati: “Zvecivoneka kuti kufa kwakaviya ngo mundhu umwe, kumuswa ko vakafa kwakaviyavo ngo mundhu umwe. Vandhu vese vari kufa ngo ndava ya Adhamu, vandhu vese vanozomuswavo ngo ndava ya Kristu.”—1 Vakorinte 15:21, 22.

12. Umambo unozobesera kudini pa kukwanirisa kuda ka Jehovha kwatiri?

¹² Jesu wakajijisa vajiji vake kuti vakumbire ngo kuviya ko Umambo hwa Mwari no kuti kuda kwake kuithwe pasi pano. (Mateu 6:9, 10) Cimwe co cigondiso ca Mwari ngo cokuti vandhu vararame pasi pano kuenda no kuenda. Kuti akwanirise izvi, Jehovha wakagaja Mwana wake inga Mambo wo Umambo hwake. Mwari ari kubatanija vandhu vanokwana kuita 144.000 pa nyika kuti vashande na Jesu pakukwanirisa kuda kwake.—Apokaripsi 5:9, 10.

13. Ngozvapi zviri kuitwa ndi Jehovha wari, ngozvapi zvamunodikanavo kuita?

¹³ Jehovha ari kuunganija “vandhu vakawanda maningi vacikaverengeki” no kuvajijisa kuti vazwire Umambo hwake. (Apokaripsi 7: 9, 10; Jakobo 2:8) Pikija vandhu nyamasi uno vakaparajana ngo ndava yo zviro zviri kuitika zvakadari inga hondo no kuzondana, vandhu vakawanda maningi vacikaverengeki vari kushanda ngo simba kuti vapeje kuzondana uku. Ivona vari kukhombija ngo zviito zvavo kuti vari kucinja mapanga avo ngo kumaita mapaja. (MIKEYA 4:3) Kusiyapo kubatikana pa hondo inouraya vandhu vakawanda, ivona vari kubesera vandhu kuti vawane “upenyu hwokadi” no kuvajijisa ngo pamusoro pa Mwari no zvigondiso zvake. (1 Timoti 6:19) Vandhu vo pa mbhuri imwe vanganyenyana no kuruza mare ngo kubesera Umambo hwa Mwari, asi Jehovha anoeja kuva no cokwadi cokuti vano zvese zvavanoda. (Mateu 6:25, 30-33; Ruka 18:29, 30) Izvi zvinotikhohwesa kuti Umambo hwa Mwari ngo wokadi nokutizve unozoenderera mberi ucikwanirisa zvigondiso zvake.

14-15. Jehovha anozoitisa kudini kuti akwanirise cigondiso cake co kuparaja rufu?

¹⁴ Wari Jesu ndi Mambo wo kumatenga iyena wakanasiririka kuti akwanirise zvigondiso zvese zvakaitwa ndi Jehovha. (2 Vakorinte 1:20) Kuvhira mu gore ra 1914, Jesu ari kutonga vavengi vake. (Nduyo 110:1, 2) Sambiri pano, iyena na vaya vaanozotonga navo vanozoparaja vandhu vese vakashata.—Apokaripsi 6:2.

 ¹⁵ Pakutonga ko Ciuru co Makore kwa Kristu, Jesu anozomusa vakafa no kubesera vandhu vese vanozwira kuti vave vakakwana. Pasure po muejo wo kupejisira, vese vaya vanozonangwa ndi Jehovha kuti vakarurama “vanozoita veno vo nyika, vanozogaremo mbhera narini.” (Nduyo 37:10, 11, 29) Pejisire, “Rufu, muvengi wo kupejisira, hunozoparajwa.”—1 Vakorinte 15:26.

16. Ngocapi ciro cokutanga no cinosisira maningi cinotiita kuti tide kushandira Jehovha?

¹⁶ Inga zvatavona pa jijo iyi, vetero yedu yo kupona kuenda no kuenda, yakacijikira mu Bhaibheri. Vetero iyi ingatibesera kuti tikwanise kuenderera mberi takagondeka kuna Jehovha mu njiku jino jokupejisira jiri kunesa. Kuti tidakajise Jehovha atidikani kumushandira basi ngokuti tinoda kuva no upenyu ucikaperi. Ciro cokutanga no cinosisira cinotiita kuti tienderere mberi takagondeka kuna Jehovha no kuna Jesu ndi rudo watinawo na ivona. (2 Vakorinte 5:14, 15) Rudo wondhowo unozotibesera kuti titevejere mugariro ja Jehovha no ja Jesu mu basa redu ro kucumaera. (Varoma 10:13-15) Patinojijira kuva vandhu vacikarangariri ngo pamusoro pedu basi, tova vandhu vanokova, Jehovha anozoda kuva shamwari yedu kuenda no kuenda.—Vahebheru 13:16.

17. Ngozvapi zvinodikana kusanwa ngo mundhu umwe nga umwe? (Mateu 7:13, 14)

¹⁷ Kunanga kuti itusu tiri pakati po vaya vanozopona kuenda no kuenda? Jehovha ari kutipa mukana wondhowo. Ngo kudaro, tinodikana kusana wari kamare dangani tinoda kuenderera mberi tecifamba mugwanja rinoendesa ku upenyu. (Verenganyi Mateu 7:13, 14.) Upenyu unozova wakadini kudari tikapona no kucikaperi? Tinozowana mupinguro wo muvhunjo uwu pa jijo inotevera.