1. Jesu acito afa ngozvapi zvaakavhunja mbavha yaainga akakohomehwa nayo? (Ruka 23:39-43)

 JESU no mbavha mbiri jaainga akakhohomehwa najo vainga vecihwajihwa maning ngo kutambujwa kwavaiizwa. (Ruka 23:32, 33) Mbavha jainga jakakohomehwa na Jesu jaibhuya magama okumutuka no kumushora, izvi zvaivonesa kuti ivona avacainga vajiji vake. (Mateu 27:44; Marko 15:32) Umwe wakona wakacinja marangarire ake. Iyena wakananga kudari: “Jesu ucandikanganwa paunozonghwina mu Umambo hwako.” Jesu wakati kwaari: “Zvokadi ndinokuvhunja nyamasi kuti: iwewe unozova na inini mu Paradhiso.” (Verenganyi Ruka 23:39-43.) Apana zvinokhombija kuti mbavha iyi yainga yatendera masoko akacumaehwa ndi Jesu paainga pasi pano ngo pamusoro po ‘Umambo wokudenga.’ Jesu wainga acizivi kumbonanga kuti mwanarume uwu waizoenda ku Umambo wo mugore. (Mateu 4: 17) Iyena wainga ecinangira ngo paradhiso pasi pano. Ngenyi tingananga kudaro?

2. Ngozvapi zvinokhombija kuti mbavha iyi yainga Mujudha?

² Zvingaita kuti mbavha yaingaya yakhauya yainga Mujudha. Mbavha iyi yakananga kudari kuno imweni: “Iwewe authyi Mwari kani? Wari uri kuwana matambujiko akaezana no ake.” (Ruka 23:40) Vajudha vainamata Mwari umwe basi, asi vandhu vo majinja vainamata zvimwari zvizinji. (Exodo 20:2, 3; 1 Vakorinte 8:5, 6) Kudari mbavha jiya na jainga vandhu vo majinja, mbavha yakakhauyaya yaizoita muvhunjo wakadari inga uwu: “Iwewe authyi zvimwari?” Jesu wainga acizivi kutumwa ku vandhu vo majinja, asi wainga ‘akatumwa ku mavhuta akasvejeka o nyumba ya Iziraeri.’ (Mateu 15:24) Mwari wakavhunja Vaiziraeri kuti iyena waizomusa vandhu vakafa. Zvingaita kuti mbavha yaingaya yakhauya yaizviziva izvi. Tinozvivona ngo magama ayo okuti iwona aivonesa kuti Jehovha waizomusa Jesu kuti  ave mambo wo umambo hwa Mwari. Zvingatoita kuti mwanarume uwu wainga no vetero yokuti Mwari waizomumusavo.

3. Ngozvapi kangaije zvakarangarihwa ngo mbavha iyana Jesu paakananga ngo pamusoro po Paradhiso? Sananguranyi. (Genesi 2:15)

³ Zvecivoneka kuti mbavha yaingaya yakhauya yainga Mujudha, zvingaita kuti iyena waiziva ngo pamusoro pa Adhamu na Evha no po paradhiso yovainga vakapuwa ndi Jehovha. Zvingaita kuti mbavha iyi yaiziva ngo pamusoro po paradhiso inga zvainga zvakanangwa ndi Jesu kuti yaizova no maruva akaseja maningi pa nyika.—Verenganyi Genesi 2:15.

4. Masoko a Jesu kuno umwe wo mbavha jiya anotiita kuti tirangarirenyi?

⁴ Magama a Jesu kuno mbavha yaingaya yakhauya anotiita kuti itusu tirangarire kuti upenyu unozova wakadini mu paradhiso. Tingakwanisa kujijira zvizinji ngo Paradhiso ngo kuvona runyararo waiwanika mu utongi wa Mambo Soromona. Bhaibheri rinonanga kuti Jesu mukuru kupinda Mambo Soromona. Tingavetera kuti Jesu no vaya vaanozotonga navo vanozocinja nyika ino kuti ive paradhiso yakaseja. (Mateu 12:42) Zvakajeka kuti vo “mavhuta amweni” vano zvavanodikana kuziva kuti vazokwanise kupona kwenda no kwenda mu paradhiso pasi pano—Johani 10:16.

5. Munorangarira kuti upenyu unozova wakadini mu Paradhiso?

⁵ Ngozvapi zvinoviya mumurangariro wenyu pamunorangarira ngo pamusoro po upenyu mu Paradhiso? Kangaije imwimwi munorangarira ndau yakaseja inga munda wo Edheni. (Genesi 2:7-9) Kangaije imwimwi muri kuceukija ciporofita ca Mikeya cokuti vandhu va Mwari vanozogara pasi po “munvuri wo muuva, no wo mukuyu.” (MIKEYA 4:3, 4) Cimwenizve, imwimwi mungaceukija mavhesi o mu Bhaibheri anonanga kuti mu paradhiso munozova no zvokuha zvakawanda. (Nduyo 72:16; Isaia 65:21, 22) Kangaije imwimwi muri kurangarira makagara pa jhardhim yakaseja, inozvokuha zvakawanda maningi. Kangaije murikurangarijira mecizwa kunuhira ko mafirori akawanda no anodakajisa. Kangaije mungazwa kuseka ko ukama no vamweni vamunoziva vanonga vamuswa vecidakara pamwepo. Uku asipi kurangarijiravo hako, zvese izvi zvinozoitikadi kamare. Pacina kukana-kana, mu Paradhiso munozova no basa rinodakajisa maningi.

6. Ngozvapi zvatinozodikana kuita mu Paradhiso? (Vonanyi foto.)

⁶ Jehovha wakatisika mujira yo kuti tikwanise kuita basa no kudakajihwa ndirona. (Mucumaeri 2:24) Mukati mo Ciuru co Makore co Kutonga kwa Kristu tinozova no basa rakawanda maningi ro kuita. Vese vaya vanozopona pa dambujiko guru no zviuru zvo vandhu vanozomuswa vanozoda nguvo, zvokuha no ndau yo kugara. Izvi zvinoreva kuti tinozodikana  kushanda maningi, basa rondhoro rinozotipa mudakaro. Jehovha wakavhunja Adhamu na Evha kuti varime munda wo Edheni kuti ukure. Mukuezanavo tinozova no mudakaro wokucinja nyika kuti ive Paradhiso. Rangariranyi manera azvinozodakajisa kujijisa zviuru no zviuru zvo vandhu vanozomuswa, kuti vajije ngo pamusoro pa Jehovha no zvaanoda. Rangariranyizve ngo manera azvinozodakajisa kuvhunja vashandiri vakagondeka va Jehovha zviro zvakazoitika pasure po kufa kwavo.

7. Tingava no cokwadi cenyi? Ngenyi?

⁷ Tingava no cokwadi co kuti mu Paradhiso tinozova no runyararo, upenyu hwakarongeka no zvese zvatinoda. Ngenyi? Ngokuti Jehovha wakatatija manera unozova upenyu mu Paradhiso, ecishandisa utongi hwa mambo Soromona.

8. Masoko akatahwa pana Nduyo 37:10, 11, 29, akakwanirisika kudini mu nguva jo kare? (Vonanyi “Muvhunjo Jo Vaverengi” jinowanika pa Murindiri uwu.)

⁸ Mambo Dhavhidhi wakafemehwa kuti atare kuti upenyu hwaizova wakadini paanozotanga kutonga mambo anouzivi no wakagondeka. (Verenganyi Nduyo 37:10, 11, 29.) Kazinji tinoverenga bhuku ra Nduyo 37:11 patinobhuya no vamweni ngo pamusoro po Paradhiso. Tino thangwe raushoni ro kuita zvondhozvo ngokuti Jesu wakananga magama ava pa hurukuro yake yo pa dundhu ecitajija kuti zvaizokwanirisikazve kumbejivo. (Mateu 5:5) Asi zvakanangari Davhidhi zvaivonesavo kuti upenyu hwaizova wakadini mu nkiju ja mambo Soromona. Soromona paakava mambo wo Iziraeri, vandhu va Mwari vakava no runyararo no zvese zvavaida mu nyika yaipopoma mukaka no uci. Mwari wakati: “Mukateveja muthetho no mupango yangu, meciiita ndinozozisa runyararo mu nyika, mecivata mucikaneswi.” (VaLevi 20:24; 26:3, 6) Izvi zvakaitikadi kamare mu utongi hwa Soromona. (1 Kronike 22:9; 29:26-28) Jehovha wainga akananga kuti vakashata ‘avacazowanikizve.’ (Nduyo 37:10) Ngo kudaro, masoko akatahwa mu bhuku ra Nduyo 37:10, 11, 29 akakwanirisika mu nguva jo kare, anozokwanirisikazve kumbejivo.

9. Mambokaji wo Sabhaa wakanangenyi ngo pamusoro po utongi hwa Soromona?

⁹ Mambokaji wo Sabhaa wakaziva kuti umambo  hwa Soromona hwakaita kuti Vaiziraeri vave no runyararo pomwe no zvese zvavaida. Iyena wakaita hwendo hwakakura maningi kuti aende ku Jerusarema kovona ega zviro zvainga zveciitika. (1 Majimambo 10:1) Paakapera kuvona zvese zvaiingari akazwa, wakati: “Avazivi kundiverengera no divi razvo. . . . Vanomucena vanarume vako, vanomucena varanda vako, vari pambeji pako njiku jese, vozwa uzivi hwako.” (1 Majimambo 10:6-8) Manera wainga upenyu mu njiku ja mambo Soromona, wainga wecivonesa zvinozoita Jehovha, Mwana wake Jesu Kristu, paanozotanga kutonga.

10. Munjira yapi Jesu wakasiyana maningi na Mambo Soromona?

¹⁰ Jesu wakasiyana maningi na Mambo Soromona. Soromona wainga mundhu acizivi kukwana, cimwenizve iyena wakaita zvishaishi zvakawanda maningi pamberi pa Jehovha, zvoita kuti vandhu va Jehovha vatambujike. Asi Jesu ndi Mutongi wakakwana, iyena narini aazoposi. (Ruka 1:32; Vahebheru 4:14, 15) Jesu wakaenderera mberi akagondeka kuna Jehovha pikija Sathana wakaeja kuita zvese zvaaikwanisa kuti iyena atame kuva akagondeka. Iyena wakavonesa kare kamare kuti narini aazoposi, nokutizve aazoitisi zviro zvinotiita kuti titambujike. Pacina kukana-kana iyena ndi Mambo wakanaka maningi watingava naye.

11. Mbhaani vanozobesera Jesu?

¹¹ Kuti akwanirise zvinoda Jehovha ngo pamusoro po vandhu no nyika, Jesu anozobesehwa ngo vo 144.000 vaanozotonga navo. (Apokaripsi 14:1-3) Vandhu ava vaanozotongari navo, vanoziva kamare kuti zvinorevenyi kusongana no zvineso zvakasiya-siyana, ngokuti ivona ndi vanarume no vanakaji vakamboponavo pasi pano vosonganavo no zvineso zvakasiyana-siyana, ngo iyo ndava ivona vanozonasa kuzwisisa mazwiro edu. Asi ngo rapi basa ravanozoita?

12. Jehovha wakapa vo 144.000 basa ro kuitenyi?

¹² Jesu no vo 144.000 vanozova no basa rakawanda maningi kupinda rakava na Mambo Soromona. Mambo Soromana wakadikana kubesera zviuru no zviuru zvo vandhu ku ndau imwe basi. Asi vaya vanozotonga mu Umambo hwa Mwari, vanozodikana kubesera mabhiriyoni o vandhu kutenderera pasi pese. Zvokadi kamare Jehovha wakapa vo 144.000 rukujo wakakura maningi.

13. Ngorapi basa rimweni rinosisira rinozoitwa ngo vo 144.000?

¹³ Kudari inga ndi Jesu vo 144.000 vanozoshanda inga majimambo no vapiri. (Apokaripsi 5:10) Mutemo wa Mosi wainanga kuti vapiri ndivona vainga vano basa ro kujivirira vandhu ku divi ro kunyama no ku divi ro kumujimu. Mutemo wainga “munvuriri wo zviro zvinozoviya.” Ngo kudaro, tingaguma pa mbhejiso yokuti vo 144.000 vanozobesera vandhu va Mwari ku divi ro kunyama no kumujimu. (Vahebheru 10:1) Atito tazviziva kuti vapiri ava no majimambo vanozobhuisa kudini na itusu pasi pano. Asi catinoziva ngo cokuti Jehovha anozoita nasiriro yo kuti vese mu Paradhiso vaashire ndhungamiriro javanoda.—Apokaripsi 21:3, 4.

14. Vo “mavhuta amweni” no vo 144.000 vakaezana papi?

¹⁴ Jesu wakadaninja vaya vaanozotonga naye kuti “mushambi mudoko.” (Ruka 12:32) Iyena wakabhuyazve ngo cikwata cocipiri, wocidaninja kuti “mavhuta amweni.” Zvikwata zviviri izvi zvinoumba mushambi umwe. (Johani 10:16) Vese vo zvikwata zviviri izvi vari kushanda vese nyamasi uno, ivona vanozoenderera  mberi vecindoshanda vese nyika ino painozova Paradhiso. Mu nyika imbza “mushambi mudoko” unonga uri kudenga, asi vo “mavhuta amweni” vanozova no vetero yo kuzopona pasi pano kwenda no kwenda. Asi kuti vo “mavhuta amweni” vazopone mu nyika imbza ivona vanodikana kutanga vaita zviro zvinganani wari uno kamare.

15. (a) Vo “mavhuta amweni” vanobesera kudini hama ja Kristu? (b) Mungaitisa kudini kuti mutevejere muezaniso wo hama iri mu farimasiya? (Vonanyi foto.)

¹⁵ Mbavha yakakhauyaya, yakafa icito yava no mukana wo kuvonesa kubongesera kwayo ngo zvayakaitihwa ndi Kristu. Asi nyamasi uno vo “mavhuta amweni” vano mukana wo kuvonesa kuti ivona vanoda maningi Jesu. Inga muezaniso, itusu tinokhombija rudo hwedu kwaari ngo manera atinotaja hama jake jokuzojwa. Jesu wakatonanga kuti anozotonga mavhuta mukuzwirana no manera avanotaja hama jake. (Mateu 25:31-40) Itusu tingabesera hama ja Kristu ngo kubatikana mu basa ro kucumaera no kubesera vandhu kuti vave vajiji. (Mateu 28:18-20) Njira imwe yokuita nayo zvondhozvo ngo yokunasa kushandisa bhuku redu ibza Mungadakara kwenda no kwenda. Kudari amuripi kujijisa mundhu Bhaibheri mecishandisa bhuku iri, ngenyi amuvangisiri kuti muwane vandhu vakawanda vokujija navo Bhaibheri?

16. Ngozvapi zvatinodikana kuita wari kuti tive takanasiririka kuti tipone mu nyika imbza?

¹⁶ Itusu atidikani kuvetera kuti tive mu Paradhiso kuti tivangisire pa kuva mundhu wakanaka. Tingakwanisa kuva vandhu vakagondeka, vanobhuya ushoni no vakaezanana kutangira wari kamare. Tingatovazve takagondeka kuna Jehovha, kuwatakarovorana naye no kuno hama no hambzaji jedu. Kudari tikazwira Jehovha mu nyika ino yakashatari, zvinozotirerukira maningi kuti timuzwire patinonga tiri mu Paradhiso. Ngo iyo ndava tinodikana kujijira kuva no mugariro jaushoni jinovonesa kuti itusu takanasiririka kuti tigare mu Paradhiso. Vonanyi musoro unoti: “Makanasiririka Kuti Muve ‘Veno vo Nyika’?” unowanika mu Murindiri uwu.

17. Ngenyi atidikani kugara takasuruvara ngo zvishaishi zvotakaita kare? Sananguranyi.

¹⁷ Zvinosisira maningi kutama kuviga bundu ngo zvishaishi zvatakaita kare. Asi atidikani  kuvona muripo wokujipira wa kristu inga thangwe rokuita “cishaishi ngo cabomo.” (Vahebheru 10:26-31) Asi tingava no cokwadi cokuti kudari takakhauya ngo zvishaishi zvatakaita topsaka besero ra Jehovha no ro vakuru no kucinja manera edu okuita zviro iyena anozotiregerera kamare. (Isaia 55:7; Mabasa o Vapostori 3:19) Ceukijanyi zvakananga Jesu kuno Vafarisi paakati: “Ngokuti andizivi kuviya kuzodanija vandhu vakarurama, asi ndakaviira vashaishi.” (Mateu 9: 13) Muripo wokujipira wa Jesu wakakura maningi zvokuti unokwanisa kufukija zvishaishi zvedu zvese.

18. Ngozvapi zvamungada kuvhunjisa mbavha yakafaya pamuti pa Jesu?

¹⁸ Ejanyi kujivona muri mu Paradhiso mecibhuya no mbavha iya yakakhohomehwaya na Jesu. Pacina kukana-kana, movovaviri munozovonesa kubongesera kwenyu ngo ndava yo muripo wo kujipira wa Jesu. Kangaje mungatoda kumuvhunjisa kuti ngoapi mazwiro aakava nawo pa nguva yo kupejisira yo upenyu hwake paainga ari pamutivi pa Jesu, wovhunjwa kuti waizova mu paradhiso. Kangaije iyena angatomuvhunjisavo kuti makakwanisa kudini kupona mu njiku jo kupejisira jo nyika ino ya Sathana. Zvinozodakajisa maningi kujija Bhaibheri no vandhu vakadari inga mwarume uwu.—Vaefeso 4:22-24.

19. Ngenyi kupona mu Paradhiso akuzorembesi? (Vonanyi foto yo pakapa.)

¹⁹ Upenyu mu Paradhiso narini auzorembesi. Nguva jese tinozoziva vandhu vakasiyana-siyana no kuita basa rinodakajisa. Zvaushoni maningi kupinda zvese izvi ngo zvokuti njiku imwe nga imwe tinozonasa kuziva Baba wedu vo kudenga no kudakajihwa ngozviro zvese zvaushoni zvavanozotipa. Tinozojija zvakawanda maningi ngo pamusoro pa Jehovha no zvisikwa zvake. Patinoenderera mberi tecipona, rudo hwedu kuna Jehovha hunozovanga maningi. Pacina kukana-kana, tinobonga maningi Jehovha na Jesu ngo kutipa kwavo mukana wokuzopona mu Paradhiso kwenda no kwenda.