Makanasiririka Kuti Muve “Veno vo Nyika”?
TESE tiri kuimira no cidaka-daka cese kukwanirisika ko magama a Jesu, okuti: “Vanodakara vakapfava, ngokuti vanozova veno vo nyika.” (Mateu 5:5) Vokuzojwa vanozova veno vo nyika ngo kutonga inga majimambo kumatenga pamwepo na Jesu. (Apokaripsi 5:10; 20:6) Makristu mazinji ocokwadi nyamasi uno, ari kuvetera kuzopona kwenda no kwenda pasi pano. Ivona vanonga vakakwana, vano mudakaro no kupona mu runyararo. Kuti vakwanirise zvese izvi vanodikana kuita basa rinosisira maningi. Inga muezaniso, ivona vanozobesera kuti nyika ive paradhiso, kubesera vanonga vamuswa kuti vawane zviro zvavanoda no kujijisa vanongaro vamuswa. Vonanyi kuti ngozvapi zvatingadikana kuita wari kuti tivonese kuti itusu tinozoda kuita zviro izvi mu nyika imbza.
MAKANASIRIRIKA KUTI MUITE KUTI NYIKA IVE PARADHISO?
Jehovha paakavhunja vandhu kuti ‘vazaje nyika no kuitonga’ wainga ecivonesa kuti nyika yese pakufamba ko nguva yaizova paradhiso. (Genesi 1:28) Vaya vanozopona kuenda no kuenda, vanodikanavo kuita izvi. Asi musiyano ngo wokuti ivona vanodikana kutanga zvese nga papsa, ngokuti munda wo Edheni auciko. Pakupera ko hondo yo Armagedhoni, tinozova no basa rakawanda rokucenesa mativi akawanda o nyika anonga apera kuparajwa. Iri rinozova basa rakakura maningi!
Izvi zvinotirangarija basa guru rakava no Vaiziraeri povakahwirira kuvha Bhabhironiya. Nyika yavo yakapeja makore anokwana kuita 70 icikagahwi. Asi Isaya wakananga kuti ngo makomborero a Jehovha, ivona vaizokwanisa kuicenesa. Ciporofita cinoti: “Anophinduja bzipare bzaro, wobziita munda wa Mwari; no bani raro, woriita cija ca Tenji.” (Isaia 51:3) Jehovha wakabesera Vaiziraeri kuti vakwanise kucenesa nyika yavo. Mukufananavo, ngo makomborero a Jehovha, vaya vanozoita veno vo nyika vanozokwanisa kuicinja mbhera yova paradhiso. Pano zviro zvamungaita wari kuti muvonese kuti imwimwi munozoda kuita basa iri.
Njira imwe yamungajijira ndiyona kuita izvi, ngo yokuenderera mberi mecicenesa no kuronga pamuzi penyu no ndau yese yakamutendeneja. Imwimwi mungaita izvi azvinenyi dangani mavhizinyu enyu anocenesa kana aacenesivo ndauyo. Mungatoitavo zvondhozvo ngo kubesera kucenesa no kunasirira-nasirira Nyumba yo Umambo no Nyumba Jinoitihwa Magungano. Kudari mugariro wenyu wecitendera mungatojipira kuti mubesere paya panoitika ngozi jinoitika jega. Zvondhozvo zvinozovonesa kuti imwimwi munoda kubesera hama no hambzaji jenyu. Mungajivhunjisa kudari: ‘Ngozvapi zvandingajijira kuita wari kuti ndikwanise kuzvishandisa mu nyika imbza?’
MAKANASIRIRIKA KUTI MUBESERE VANOZOMUSWA?
Jesu paakandopera kumusa mwana wokaji wa Jairosi, iyena wakananga kuti ivona vamupe zviri zvese kuti ahe. (Marko 5:42, 43) Aricaingepi basa rakakura maningi kukorondha mwana uwu waingari amuswa wo 12 o makore. Asi rangariranyi basa rakadini ratinozova naro Jesu paanozokwanirisa cigondiso cake paya pokuti “vese vari mu makuva anoceukijwa, vanozozwa izwi rake vobuda.” (Johani 5:28, 29) Bhaibheri arinasi kunanga zvese zvatinozodikana kuita pakubesera vanozomuswa. Asi tinoziva kuti ivona vanozoda besero pakuwana zvokuha, ndau yokugara no zvokusimira. Mungakhombija kuvhira wari kamare kuti imwimwi makanasiririka kuti muzobesere. Vonanyi zviro zvinganani zvamungaita.
Ngozvapi zvamungaita nyamasi uno kuti muvonese kuti makanasiririka kuti muve veno vo nyika?
Pakambhera ngo kuitwa ciziviso co kuti muvonereri wo ndharaundha ari kuviya kovhakacira ungano yenyu, munoanja kumukoka kuti aviye koha na imwimwi? Hama jinoshanda ku Bheteri pajinovhunjwa kuti basa rajo rapera, jogajwa ku ungano yenyu kana muvonereri wo ndharaundha basa rake ro kuvhakacira ungano parinonga rapera, munovabesera kuti vawane pokugara here? Kudari gungano ro ndharaundha kana gungano rinosisira rikaitwa mu ndharaundha yenyuyo, munojipira kuti mubesere gungano ricito raitwa no paya parinopera kuitwa kana kutoashira vaya vanoviya kovona gungano?
IVANYI MAKANASIRIRIKA KUTI MUJIJISE VANOZOMUSWA
Mukuzwirana no zvatinoverenga pana Mabasa o Vapostori 24:15, tinovetera kuti zviuru no zviuru zvo vandhu zvinozomuswa. Vazinji vavo vanozova vaya vokuti avazivi kuva no mukana wo kuziva Jehovha. Ivona vanozova no mukana uwu pavanozopera kumuswa. a Vashandiri vakagondeka va Jehovha vanozobatikana pa basa iri ro kujijisa. (Isaia 11:9) Hambzaji Shariroti, vakambocumaera ku Europa, Amerika dhu Suri no Afrika, vari kuvetera maningi mukuvo uwu. Ivona vakati: “Ndinoda maningi kuzojijisa vaya vanozomuswa. Pandinoverenga ngo pamusoro po mundhu wakapona kare, ndinorangarira kudari: ‘Kudari mundhu uwu naakaziva Jehovha, upenyu hwake waizova wakasiyana kamare.’ Ndinoda maningi kujijisa vandhu ava ngo pamusoro pa Jehovha.”
Pikija vashandiri vakagondeka va Jehovha vakapona Jesu acito aviya panyika vanozova no zviro zvakawanda zvokujija. Amborangariranyi kuti zvaizodakajisa zvakadini kuvhunja Dhanyeri kukwanirisika ko zviporofita zvaakatara zvaainga acikanasi kuzwisisa pamukuvo wondhowo. (Danieli 12:8) Zvinozodakajisavo maningi kubesera Rute na Naomi kuti vazwisise kuti mbhuri yavo yakabatanijwavo pa munda-nda-nda wa Mesiya. Zvinozodakajisa maningi kujijisa vandhu kutenderera pasi pese ticikavangirijwi kana kuphingaijwa ngo nyika ino yakashata.
Ngozvapi zvamungaita wari kuti muvonese kuti imwimwi makanasiririka kuti mubesere kujijisa vaya vanozomuswa? Njira imwe yamungaita ndiyona izvi ngo yo kuitisa nane manera enyu okujijisa no kubatikana mu basa ro kucumaera mukuvo wese. (Mateu 24:14) Pikija amucakwanisi kucumaera inga zvamaida wari, kangaije ngokuti maamusharuka kana ngo ndava yo mugariro umweni, imwimwi mungakhombija kuti makanasiririka kuti mujijise vanozomuswa ngo kuita zvese zvamunokwanisa mu basa ro kucumaera wari.
Zvinosisira maningi kurangarira ngo pamusoro po muvhunjo uwu unosisira, kunanga kuti imwimwi makanasiririka kuti muve veno vo nyika? Kunanga kuti muri kuvetera no cidaka-daka cese kuitira kubesera kuti nyika ive paradhiso, kupsaka ndau yo kugara kuitira vaya vanozomuswa no kuvajijisa? Mungakhombija kuti imwimwi makanasiririka ngo kuita zvese zvamunokwanisa nyamasi uno pa mabasa akafanana no amunozoita kumbejiyo.
a Vonanyi musoro unoti: “Kuita kuti Vazinji Vave Vakarurama” wakabudiswa mu Murindiri wa setembro wo 2022.
