Kunanga kuti makanasa kuverenga musoro jo kujija jo Murindiri jo gore iri here? Kudari makajiverenga, vonanyi dangani mungakwanisa kudavira muvhunjo iji:

Tinobesereka kudini kudari tikashandisa ushoni nguva yedu tecibhuya, kupurukira no kurangarira ngo pamusoro pa Jehovha?

Munozotema zvivaringo zvaushoni, munozova mujijisi waushoni, munozova no rutendo hwakavanga no kuda maningi Jehovha.—Murindiri wa 01 wo 22 pheji 30-31.

Tinobesereka kudini kudari tikajijira kuthemba Jehovha no vaya vaanogaja?

Wari inguva yaushoni maningi yo kuthemba manera Jehovha anoita zviro kusiyapo kufiningira ndhungamiriro no zvisungo zvinotemwa ngo vakuru. Dambujiko guru parinozotanga, tinonga takanasiririka kuti tizwire ndhungamiriro jatinopuwa pikija tecivona kuti ajiziki.—Murindiri wa 02 wo 22 pheji 4-6.

Ngirozi yaida kunangenyi poyakavhunja Zakariya ngo pamusoro po “ruji hwo kupima mu nyara ja [govherinadhori] Zerubaberi?” (Zakaria 4:8-10)

Civoniso ici cainga cecikhohwesa vandhu va Mwari kuti themberi dokowane yovaingaro vecivona yecivakwa yaizopera. Nokutizve yaizozwirana kamare no ndhungamiriro ja Jehovha.—Murindiri wa 03 wo 22 pheji 16-17.

Tingaitisa kudini kuti tive “muezaniso . . . pa kuvereketa”? (1 Timoti 4:12)

Tingaita zvondhozvo ngo kubhuya ngo njira yo unyasha no yo nderemejo patinonga tecicumaera, kuimba ngo mwoyo wese, kupa mupinguro mukuvo wese pa musongano, kubhuya cokwadi, kubhuya ngo njira inovangisa vamweni no kutama kubhuya magama okutuka.—Murindiri wa 04 wo 22 pheji 6-9.

Ngenyi zvikara zvirongomuna kana (umambo) zvinonangwa pana Danieli cipauko 7 zvakaezana no cikara cimwe cinonangwa pana Apokaripsi 13:1, 2?

Cikara cinonangwa pana Apokaripsi 13 aciimiriri umambo humwe basi, wakadari inga Roma. Mukusiyana, cinoimirira umambo hwese wakambotonga nyika ino.—Murindiri wa 05 wo 22 pheji 9.

Ngoyapi njira yokutanga yatingakhombija ndiyona kuti tinothemba ururami hwa Jehovha?

Kudari ari wese akatituka, kutinyangajisa kana kutishaishira, tinoeja kutama kuviga bundu, tosiya zvese mu nyara ja Jehovha. Iyena anozopeja zvese zvinoitiswa ngo kutama kukwana.—Murindiri wa 06 wo 22 pheji 10-11.

Hama inoita mukumbiro pa musongano inodikana kurangarirenyi?

Nguva yo kuita mukumbiro aidikani kushandiswa kuitira kupangira ungano kana kuita zviziviso. Nee apadikanivo kushandiswa “magama akawanda,” maningi-ningi pa mukumbiro unoitwaya pakutanga ko musongano. (Mateu 6:7)—Murindiri wa 07 wo 22 pheji 24-25.

Mu njira yapi “vaya vakaita zviro zvakashata vanozomuswa kuti vaende kootongwa”? (Johani 5:29)

Ivona avazotongwi mu njira yakashata nee kupanicwa ngo ndava yo zviro zvavakaita kare. Ivona vanozotongwa mukuzwirana no mufambiro wavo pomwe no zviito zvavanozova nazvo pavanopera kumuswa.—Murindiri wa 09 wo 22 pheji 18.

Magama api anodakajisa akanangwa ndi hama J. F. Rutherford pa gungano rakaitwa mu mweji wa setembro wo 1922?

Pa gungano rakaitwa ku Sedhari Point, Ohiyo, Estadhus Unidhus, hama Rutherford vakati: “Mambo ari kutonga! Imwimwi muno basa ro kuzivisa vandhu izvi. Ngo kudaro, zivisanyi, zivisanyi, zivisanyi Mambo no Umambo hwake!”—Murindiri wa 10 wo 22 pheji 3-5.

Isaia cipauko 30 inovonesa njira ndhatu japi jinoshandiswa ndi Mwari kuti atibesere kucungirira?

Cipauko ici cinovonesa kuti iyena (1) anopurukira no kudavira mukumbiro jedu, (2) anotitungamirira no (3) anotikomborera wari no kuzotikomborerazve kumbejiyo.—Murindiri wa 11 wo 22 pheji 9.

Ngenyi tingaguma pa mbhejiso yokuti magama atinowana pana Nduyo 37:10, 11, 29, akakwanirisika mu nguva jokare nokuti anozokwanirisikazve kumbejiyo?

Magama a Dhavhidhi aisanangura mugariro wauhsoni wakava no Vaiziraeri pa kutonga ka Soromona. Jesu paakananga ngo pamusoro po paradhiso wakashandisa magama anowanika pa vhesi 11. (Mateu 5:5; Ruka 23:43)—Murindiri wa 12 wo 22 pheji 8-10, 14.