Haiwa. Zvaakatarari zvainga zvocokwadi kamare.

Vonanyi basi zvaakananga pa vhesi iyi no vhesi jimweni jakafanana. Iyena wakati: “Ngokudaro ndinozorijira zina renyu kucikaperi, ndeciita njiku jese bzondakapika.” “Ndinomubonga ngo mwoyo wangu wese, Tenji Mwari wangu, ndinozokuja zina renyu kucikaperi.” “Ndinokomborera zina renyu mukuvo wese ucikaperi.”—Nduyo 61:9; 86:12; 145:1, 2.

Ngo kunanga kwake magama aya Dhavhidhi aacaingepi ecinyanyisa kana ecirangarira kuti aacaizofa. Iyena waiziva kuti Jehovha wainga wakananga kuti kushaisha kwakaita vandhu kwaizovaita kuti vafe. Dhavhidhi wakatonanga kuti iyena wainga mushaishi. (Genesi 3:3, 17-19; Nduyo 51:6, 7) Iyena waitozivazve kuti pikija vanarume vainga vakagondeka vakadari inga Abhirahama, Izaki na Jakobe vakafa. Iyena waiziva kuti pakufamba ko nguva waizofavo. (Nduyo 37:25; 39:5) Asi magama atinowanari pana Nduyo 61:9 anovonesa cido cake no kuda kwake kukuja Jehovha no kucikaperi, kana kuti kuita izvi pa mukuvo wese waainga ecirarama.—2 Samueli 7:12.

Nguva jimweni Dhavhidhi wakatotara zviro zvakamuitikira mu upenyu hwake inga zvatinokwanisa kuvona pa magama ari pa kutanga ko cipauko ca Nduyo 18, 51 na 52. Pana Nduyo 23, Dhavhidhi wakasanangura Jehovha inga muhavisi anotungamirira, kutondhoja no kujivirira mavhuta ake. Dhavhidhi waingavo muhavisi. Waida kushandira Jehovha ‘njiku jese jo kurarama kwake.’—Nduyo 23:6.

Ceukijanyi kuti Jehovha ndiyena wakafemera Dhavhidhi kuti atare zvese zvaakatararo. Zviro zvimweni zvaakatara zvinobatanija zviporofita zvinozokwanirisika kumbejiyo. Inga muezaniso pana Nduyo 110, Dhavhidhi wakatara ngo pamusoro po mukuvo wokuti Mambo wake ‘waizogara pa mukono muho’ wa Mwari kumatenga mbhera woashira simba guru. Kuti aitenyi no simba rondhoro? Kuti apanice vavengi va Mwari no ‘kutonga majinja’ ese pasi pano. Dhavhidhi wainga mubarihwana wa Mesiya, uwo waizotonga kudenga no kuva “mupiri mbhera narini.” (Nduyo 110:1-6) Jesu wakatonanga kuti ciporofita cinowanika pana Nduyo 110 caibhuya ngo pamusoro pake nokutizve caizokwanirisika kumbejiyo.—Mateu 22:41-45.

Hina, Jehovha wakafemera Dhavhidhi kuti atare zviro ngo pamusoro po mukuvo uno no unozoza, paya paanozomuswa kuti akuje Jehovha no kucikaperi. Masoko atinowana pana Nduyo 37:10, 11, 29 angashanda kuitira mukuvo aakatahwaro no kumbejiyo. Mavhesi aya akakwanirisika mu Iziraeri yokare, anozokwanirisikazve kumbejiyo Mwari paanozokwanirisa zvigondiso zvake zvese.—Vonanyi ndima 8 yo musoro unoti: “Iwewe Unozova na Inini mu Paradhiso” unowanika mu Murindiri uwu.

Nduyo 61:9 no mavhesi amweni akafanana, anovonesa kuti Dhavhidhi waida kukuja Jehovha mu Iziraeri yo kare mbhera kufa kwake. Iwona anovonesazve zvinozoitwa ndi Dhavhidhi kumbejiyo, Jehovha paanozomumusa.