1. Icinyi “runyararo hwa Mwari,” tinobesereka kudini ndiwona? (Vafiripi 4:6, 7)

 KUNO runyararo umweni wokuti vandhu vo nyika avato vakambova nawo. “Runyararo hwa Mwari,” iwona unobatanija kuva wakagajana no ucikathimwi-thimwi. Zviro zvokuti zvinowanika basi nga vaya vano ushamwari na Jehovha. Patinonga tino runyararo unovha kuna Mwari tinojizwa takajiviririka. (Verenganyi Vafiripi 4:6, 7.) Itusu tingakwanisa kuva no ushamwari wo phedo na vaya vanodavo Jehovha. Kusiyapo zvese izvi, tinova no ushamwari wo phedo “na Mwari wo runyararo.” (1 Vatesaronika 5:23) Patinoziva, tothemba no kuzwira Jehovha, runyararo unovha kwaari unozotondhoja mwoyo wedu patinonga tecihwisana no mugariro jinonesa.

2. Tinozvizivisa kudini kuti zvinokwanisika kuva no runyararo hwa Mwari?

² Kunanga kuti zvinokwanisika kuva no runyararo hwa Mwari patinosongana no zvineso mu upenyu, zvakadari inga mutungu, ngozi no kuteverehwa? Zvineso zvese izvi zvingatiita kuti tithye. Pikija zvakadaro, tinodikana kuceukija zvakananga Jesu kuvateveri vake: “Mucaregera mwoyo yenyu yecitambujika. Mucairegera yecithya.” (Johani 14:27) Hama no hambzaji zinji jiri kutevera zvakanangwari ndi Jesu. Ngo besero ra Jehovha ivona vari kukwanisa kuwana runyararo pikija vari pa mugariro unonesa.

3. Mutungu kana kuti ndhendha zvingamupsasisa kudini?

³ Ndhendha kana kuti mutungu zvingaita kuti zvicinje upenyu hwedu munjira yatainga ticikarangariri. Inga muezaniso, korona vhiru yakapsasa upenyu hwo vandhu vakawanda maningi. Kupsakisisa kumweni kwakavonesa kuti pamutengo wo vandhu  vakavhunjiswa, vakawanda vakona avaripi kukwanisa kuvata ushoni ngo ndava yo mutungu uwu. Ngo ndava yo mutungu uwu vandhu vazinji varikuhwisana no kuthimwa-thimwa, kusuruvara, kumwa maningi doro, kushandisa mutombo jinodhakwisa, kutama kuzwana pamuzi no kuda kujiuraya. Kudari kuno ndhendha iri kundhandhanika kumutundhu kwamunogararo, mungaitisa kudini kuti mutame kuthimwa-thimwa maningi no kuramba muno runyararo hwa Mwari?

4. Ngenyi kuziva zvakananga Jesu ngo pamusoro po njiku jokupejisira zvinotipa runyararo?

⁴ Jesu wakananga kuti munjiku jokupejisira kunozova no “ndhendha mu ndau jakasiyana-siyana.” (Ruka 21:11) Ngenyi kuziva izvi kunotiita kuti tive no runyararo? Itusu atizothimwi-thimwi tikavona mutungu weciitika kwatinogara. Tinoziva kuti zviro zviri kuitika kamare inga zvakanangwa ndi Jesu. Ngo ndava yazvo, zvinosisira maningi kuzwira ndhungamiriro yakapa Jesu kuna vaya vaizopona mu njiku jokupejisira. Wakati: “Bhasopanyi, mucathya.”—Mateu 24:6.

5. (a) Mukuzwirana no Vafiripi 4:8, 9, ngo zvapi zvatinodikana kukumbira patinohwisana no mutungu? (b) Kupurukira audhiyo jakagaravhahwi jo Bhaibheri kungamubeseresa kudini?

⁵ Panoitika mutungu tingagara tecineseka kana kutothya kamare. Ndizvona zvakaitika na hambzaji Dheizi. b Nevanji wakona, abamudoko wakona na medhiko wavo pavakabatwa ngo korona vhiru vofa, ivona vakathya kuti vaizoiwanavo zvoita kuti mai wakona vainga vaamusharuka vabatwevo ndiyona. Ngo ndava yo mutungu uwu, ivona vaithya kuti vaizoruza basa vokonehwa kuzosapota mbhuri yavo no kukonehwa kupagari nyumba yavaigara. Ivona vakagara vecineseka maningi zvokuti avacaikwanisa kuvata. Asi vakakwanisazve kuwana runyararo. Vakazviitisa kudini? Ivona vakaita mukumbiro vecinasa kunanga kamare zvavainga vecizwa kuti vave vakagajana nokuvazve no murangariro jaushoni. (Verenganyi Vafiripi 4:8, 9.) Ivona vaizwa Jehovha “ecibhuya” navo pavaipurukira audhiyo jakagaravhahwi jo Bhaibheri. Ivona vakati: “Maizwi akathiva o vaverengi akandiita kuti ndive ndakagajana no kuceukija kuti Jehovha waindibesera.”—Nduyo 94:19.

6. Jijo yo mundhu ega no kuenda kumusongano kunomubeseresa kudini?

⁶ Paya panoitika mutungu zviro zvimweni zvataiita njiku ngo njiku zvingacinja, atidikani kutendera zvondhozvo kuti zvitiite kuti tisiye kuita jijo yo mundhu ega kana kuenda kumusongano. Zviro zvatinowana mu mabhuku edu no mavhidhiyo o sangano zvinovonesa kuti hama no hambzaji jedu jiri kuramba jakagondeka pikija jecihwisana no zvineso. (1 Pedhru 5:9) Kusiyapo zvondhozvo, musongano jingamubesera kuti muzaje murangariro wenyu ngo zviro zvaushoni zvo mu Bhaibheri. Cimwenizve,  patinonga tiri kumusongano tino mukana wo kuvangisa vamweni no kuvangiswavo. (Varoma 1:11, 12) Pamunorangarijisisa Jehovha manera anobesera vashandiri vake kuti vahwisane no kujizwa vari vega, ndhendha no kuthya, rutendo hwenyu hunovanga maningi, mova no cokwadi cokuti Jehovha anozomubeseravo.

7. Ngo zvapi zvatinojija ngo muezaniso wo mupostori Johani?

⁷ Vangisiranyi nguva jese kuti mubhuye no hama no hambzaji jo mu ungano. Panonga peciitika mutungu zvinganesa maningi kuti tivoneke tiri pamwepo no hama no hambzaji. Pamukuvo wakadari tingatojizwa inga manera akajizwaya mupostori Johani. Iyena waida maningi kuvona shamwari yake Gayo. (3 Johani 13, 14) Johani waizviziva kuti azvicaizokwanisika kuita izvi pamukuvo uwu. Iyena wakaenderera mberi ecibhuya naye ecishandisa karata. Kudari zvicikakwanisiki kufambirana no hama no hambzaji jedu, ejanyi kubhuya navo mecishandisa foni, mesajhi no vhidhiyo shamadha. Patinoenderera mberi tecibhuya no hama no hambzaji jedu tinoramba tino runyararo atizojizwi tiri tega. Kudari muri kujizwa mecithimwa-thimwa, psakanyi besero ku vakuru no kutendera besero ravanomupekejaro.—Isaia 32:1, 2.

8. Mungapsasiswa kudini ngo ngozi jinoitika?

⁸ Kudari makambosongana no ngozi jakadari inga kuzara ko kumwa, kuzungunyika ko nyika no kupsihwa ngo zviro, zvingaita kuti makambothimwa-thimwa ko mukuvo wakareba. Kudari makafihwa ngo mundhu wamaida pa ngozi iyi kana makaruza zviro zvamainga nazvo, zvingaita kuti makasuruvara no kutama cokuita. Asi izvi azvinangi kuti munoda maningi zviro zvokunyama kana kuti amuna rutendo. Masongana no mugariro unonesa maningi azvizivi kushata kuva no mazwiro aya pakutanga. (Jobe 1:11) Pikija mukasongana no zvineso zvokuti amucaiveterepi, mungakwanisa kuva no runyararo. Mungazviitisa kudini?

9. Jesu wakananga kuti tinodikana kuitenyi kuti tive takanasiririka kuitira ngozi jinoitika?

⁹ Ceukijanyi kuti Jesu wakananga kuti “kunozova no kuzungunyika kukuru ko nyika” no ngozi jimweni jinoitika mugumo ucito waguma. (Ruka 21:11) Mukusiyana no vandhu vo nyika vanorangariraya kuti avazopsaswi ngo ngozi jinoitika, itusu tinoziva kuti kunozoitika ngozi jakawanda zvokuti jimweni jakona jinozotipsasa. Jesu wakanangazve ngo “kuwanda ko ushaishi,” tinozvivona ngo kuengejeka ko kutama kuzwira mutemo no ubhandidhu. (Mateu 24:12) Jesu aazivi kunanga kuti zviro izvi zvaizopsasa basi vaya vacikashandiri Jehovha. Zvakajeka kamare kuti vashandiri vakagondeka va Jehovha, vangapsaswavo ngo ngozi iji. (Isaia 57:1; 2 Vakorinte 11:25) Zvingaita kuti Jehovha aazotiponesi ngo njira inoshamaisa pa ngozi yatinonga tinayo, asi anozotipekeja simba ratinoda kuti tive no runyararo no kuva takagajana.

10. Ngenyi kunasirira wari kuitira ngozi kunokhombija kuti tino rutendo? (Mazwi Akangwara 22:3)

¹⁰ Kudari tikadikana kutiza ngo kukasika, zvinozotirerukira maningi kuti tive takagajana patinonga takanasiririka. Kuita izvi zvinoreva kuti atina rutendo kuna Jehovha? Haiwa. Patinonasirira kuitira ngozi nguva iciripo, tinokhombija kuti tinotenda kuti Mwari anokwanisa kutibesera. Kuitisa kudini? Soko ra Mwari rinotivhunja kuti tigare takanasiririka kuitira ngozi jingazoviya. (Verenganyi Mazwi Akangwara 22:3.) Sangano ra Jehovha rinotipa ngwajo nguva iciripo kuitira kuti tizokwanise kutiza ngo kukasika ngozi inozoviya, recishandisa musongano jo ungano, zviziviso no mabhuku edu. c Kureva kuti tinothembadi Jehovha  kamare? Kudari tecimuthemba, ngatitevere ndhungamiriro jake wari uno kucito kwaitika ngozi iri yese.

11. Ngozvapi zvamajija ngo muezaniso wa hambzaji Margareti?

¹¹ Ngativone zvakaitika no hambzaji inodanijwa Margareti. Ngo ndava yo kupsa ko zviro kwakaitika phedo no kwavaigara, ivona vakadikana kubuda pa muzi pavo. Zvecivoneka kuti vandhu vakawanda vaida kubuda pa mukuvo umweo, karu jainga jakawanda maningi mu citaka zvokuti avacaikwanisa kubudazve. Ciusi cakakwakwatija ndauyo yese yogara yakasvipa. Hambzaji Margareti avazivi kukwanisa kubuda mu karu mavo. Asi vakakwanisa kupona ngokuti vainga vakanasirira. Ivona vainga no mapa mupasta mavo waivonesa kuti kwainga no gwanja rimweni ravaizokwanisa kubuda ndirona. Ivona vakatombofambeyo no karu yavo kuitira kuti panozoitika ngozi vazokwanise kubuda ngo kukasika. Hambzaji Margareti vakakwanisa kupona pa mugariro uwu ngokuti vainga vakanasiririka.

12. Ngenyi tinodikana kuzwira ndhungamiriro?

¹² No cinangwa co kutijivirira, utongi ungatotikumbira kuti titame kubuda pa muzi mbhera mukuvo wovatema kamare kana kutotama kuita zviro zvimweni. Vandhu vamweni avazwiri zvinonangwa ngo utongi ngokuti avadi kuruza zviro zvavo zvokunyama. Waro ngozvapi zvinoitwa ngo Makristu? Bhaibheri rinonanga kudari: “Ngo pamusoro pa Mambo, jidirenyi pasi po zviro zvese zvakaithwa ngo vandhu, zvakadari inga mambo, wiya ano cigaro cakakhwirira kupinda imwimwi, kana ku magovhernadhori akatumwa ndi mambo.” (1 Pedhru 2:13, 14) Sangano ra Jehovha rinotipa ndhungamiriro kuitira kutingwaririra. Inga muezaniso, tinovangiswa kuti tivhunje vakuru zvese zvatinonga tacinja, zvakadari inga numero jo foni no kwatinogara. Ngo kudaro, ivona vanozokwanisa kubhuya na itusu kudari pakaitika ngozi iri yese. Kureva kuti vakuru vano numero yenyu yo foni no ndau yamunogara kudari macinja here? Kusiyapo zvese izvi, tingaashira ndhungamiriro jakadari inga kutama kubuda pa muzi, kwenda ku ndau yakajiviririka, kuwana zvokuha no manera atingaita kuti tikwanise kubesera vamweni. Kudari tikatama kuzwira ndhungamiriro iji, tinodira upenyu hwedu no upenyu hwo vakuru pa ngozi. Tinodikana kuceukija kuti hama iji jino mutoro wo kutitungamirira. (Vahebheru 13:17) Hambzaji Margareti vakananga kudari: “Ndinovona kuti kuzwira ndhungamiriro jinovha ku vakuru no ku sangano ra Jehovha zvakaponesa upenyu hwangu.”

13. Zvicinyi zvakabesera hama zinji jakadikana kutiza no kusiya muzi javo kuti jiwane runyararo no mudakaro?

 ¹³ Hama no hambzaji zinji jakadikana kusiya nyumba javo ngo ndava yo ngozi, hondo no gerevhe. Asi vakakwanisa kuzwiranisa upenyu hwavo no cinjo javaingaro vaita no kuramba vecibatikana pa zviro zvokumujimu. Inga Makristu o muzana rokutanga, hama jedu jiri kuenderera mberi “jecitokotesa masoko akanaka.” (Mabasa o Vapostori 8:4) Kucumaera kuri kubesera hama kuti jibatikane pa zviro zvo umwari kuciripi pazvavari kusongana nazvo. Ngokuita kwavo izvi, vari kukwanisa kuenderera mberi vano runyararo.

14. Kuteverehwa kungatipsasisa kudini?

¹⁴ Ngo ndava yo kuteverehwa tingaguma pakuruza zviro zvakawanda maningi zvinotipa runyararo. Inga muezaniso, tinodakara maningi patinonga takasujunuka kuti tisongane no hama jedu, kucumaera navo no kuva no upenyu wakareruka ticikathyi kuendeswa mu kadheya. Patinonga ticina rusujunuko wokuita izvi, tingagara tecithimwa-thimwa kana kutothya ngo kurangarira zvinozoitika. Zvakareruka kuva no mazwiro aya. Asi pikija zvakadaro tinodikana kungwarira. Jesu wakananga kuti kuteverehwa uku kwaizotiita kuti tikhugunyike kana kuti tirembejeke. (Johani 16:1, 2) Tingawanisa kudini runyararo patinonga tecihwisana no kuteverehwa?

15. Ngenyi atidikani kuthya kuteverehwa? (Johani 15:20; 16:33)

¹⁵ Bhaibheri rinonanga kudari: “Vese vaya vanoda kurarama mu kujipira kuna Mwari, mukubatana na Kristu Jesu, vanozoteverehwa.” (2 Timoti 3:12) Hama imweni inodanijwa Andireya zvaiinesera maningi kutenda kuti Zvapupu zva Jehovha zvo mu nyika yoyaigararo zvaizoteverehwa. Iyona yakarangarira kudari: ‘Muno, muno Zvapupu zva Jehovha zvakawanda maningi. Utongi auna manera okuvasunga vese.’ Murangariro uwu auzivi kuita kuti hama iyi igare yakagajana asi wakaita kuti iyona ithimwe-thimwe. Hama jimweni jakasunga kuthemba Jehovha kusiyapo kurangarira kuti ajicaizosungwepi. Ivona vaizviziva kuti mukuvo uri wese vaizodihwa mu kadheya asi avacaigarepi vecithimwa-thimwa inga ndi hama Andireya. Ngo kudaro, hama Anderiya vakasunga kutevejera muezaniso wo hama jimweni no kuthembavo Jehovha. Azvizivi kutora mukuvo wakareba, ivona vakazova no runyararo no kuramba vakadakara pikija vecisongana no zvineso. Zvondhozvo  zvingaitikavo na itusu nyamasi uno. Jesu wakananga kuti itusu taizotereverehwa, asi wakagondesa kuti tingakwanisa kuenderera mberi takagondeka.—Verenganyi Johani 15:20; 16:33.

16. Ngojapi ndhungamiriro jatinodikana kuzwira paya pokuti basa redu riri kurambijwa?

¹⁶ Kudari basa redu recirambijwa mu nyika yatinogararo, tinozoashira ndhungamiriro yecivha ku Bheteri no ku vakuru vo ungano. Ndhungamiriro iji ikuitira kutijivirira no kuita kuti tive no cokwadi cokuti tinozoenderera mberi teciashira zvokuha zvoumwari no kutibesera kuti tienderere mberi tecicumaera mbhera pazvinokwanisika. Zwiranyi ndhungamiriro iji, pikija mucikanasi kujizwisisa. (Jakobo 3:17) Nee atidikani kundhandhanisa masoko ngo pamusoro po hama no hambzaji jedu kana mabasa anoizwa mu sangano ra Jehovha kuno vaya vacina dikano yo kumazwa.—Mucumaeri 3:7.

17. Inga vapostori vo muzana rokutanga ro makore, tinodikana kuitenyi?

¹⁷ Thangwe rimwe rinoita kuti Sathana anyenye vandhu va Jehovha ngo rokuti ivona vanoita basa ro “kuita ucapupu ngo pamusoro pa Jesu.” (Apokaripsi 12:17) Mucatendera kuthyisijihwa ndi Sathana no nyika yake. Kucumaera no kuita kuti vandhu vave vajiji kunotiita kuti tive no mudakaro no runyararo pikija teciteverehwa. Mu zana ro kutanga ro makore, vatungamiriri vo Cijudha vakavhunja vapostori kuti vaime kuita basa ro kucumaera. Pikija zvakadaro, vanarume ava vakagondeka vakakheta kuzwira Mwari. Ivona vakaenderera mberi vacicumaera, zvoita kuti vadakare maningi. (Mabasa o Vapostori 5:27-29, 41, 42) Ngo zvokadi kuti basa redu parinorambijwa, tinodikana kungwarira patinonga tecicumaera. (Mateu 10:16) Kudari tikaita zvese zvatinokwanisa mu basa redu ro kucumaera, tinova no runyararo ngo kuziva kuti tiri kuita zvinoda Jehovha no kuita basa rinoponesa vandhu.

18. Ndiyani angatipa runyararo hwokadi?

¹⁸ Thembanyi kuti pikija muri pa mugariro unonesa, mungava no runyararo. Pa mugariro jakadari, ndipona patinodikana kuceukija kuti tinoda runyararo hwa Mwari, kana kuti, runyararo watingapuwa ndi Jehovha basi. Ngo kudaro, muthembenyi pamunonga mecihwisana no mutungu, ngozi kana kuteverehwa. Rambanyi muri phedo no sangano rake. Mukuvo wese ceukijanyi ngo kumbeji kunoshamaisa kwatiri kuvetera. Mukaita kudaro, ‘Mwari wo runyararo anozova nemwi.’ (Vafiripi 4:9) Mu cijijo cinotevera, tinozovona kuti tingaitisa kudini kuti tibesere hama jedu jiri kusongana no zvineso kuti jive no runyararo hwa Mwari.