NGO mucitatu mu njiku 18 ya Janeiro wo 2023, ciziviso cimweni cinosisira maningi cakawanika mu jw.org cecinanga kuti hama mbiri Gage Fleegle na Jeffrey Winder, vagajwa kuti vashande inga vamwe vo Mukhumbi Unotonga wo Zvapupu zva Jehovha. Hama mbiri iji jino zviitiko zvakakura maningi mu basa ravanoitira Jehovha novakagondeka.

Hama Fleegle ivona vakakurira ku mavirira ko Pennsylvania ku Estadhus Unidhos pamwepo no vabereki vavo vainga vari Zvapupu zva Jehovha. Ivona pavainga vaaruka, mbhuri yavo yakathutha kwenda kucidhorobha cidoko cokumavirira kwainga kwecidikana maningi vacumaeri. Nopapera mukuvo mushomani, ivona vakabhabhatijwa mu njiku 20 ya Novembro wo 1988.

Vabari va hama Fleegle vaindovavangisa kuti vanghwine mu nguva yakazara. Kazinji ivona vaiashira vavonereri vo ndharaundha no mabheterita pamuzi pavo, ngo kudaro hama Fleegle vaivona manera avainga vakadakara. Nopapera mukuvo mushoma no vabhabhatijwa, ivona vakatanga kushanda inga piyona wo nguva jese mu njiku 1 ya Setembro wo 1989. No padarika makore maviri, ivona vakakwanirisa cido cavo cavainga vakagaja pavainga no makore anokwana gumi na maviri. Cido cokushandira pa Bheteri. Ivona vakatanga kushanda pa Bheteri ro ku Brooklyn mu mweji wa Outubro mu gore ra 1991.

Ku Bheteri hama Fleegle vakashanda pa basa ro ku Enkadherinari ko makore masere, pakupera kwa izvi ivona vakagajwa kuti vashande pa Dhepartamento ro Basa. Pa mukuvo wondhowo ivona vakashanda makore manganani mu ungano yo ku Rusiya. Mu gore ra 2006 ivona vakacadha na Nadhiya. Mukajiwo wakakokwavo kuti ashandire pa Bheteri. Novari vese, ivona vakashandira ku ndima yo ciputikezi, perapo ko makore anopindirija gumi, ivona vakashanda ku ndima yo Espanyori. Pasure po makore akawanda pa basa ro Dhepartamento ro Basa, hama Fleegle vakagajwa kuti vashandire mu Hofisi yo Komisau yo Kujijisa, perapo vakashandazve mu Hofisi yo Komisau  yo Basa. Mu mweji wa Março wo gore ra 2022 ivona vakagajwa inga mubeseri wo Komisau yo Basa yo Mukhumbi Unotonga.

Hama Winder vakakurira ku Murrieta ku Kariforiniya yo ku Estadhos Unidhos yo Amerika. Ivona vakajija cokwadi no vabari vavo perapo vakabhabhatijwa mu njiku 29 ya Março wo 1936. Pa mweji wakatevera ivona vakashanda inga piyona wo besero. Ivona vakadakarira maningi zvokuti vakatoda kwenderera mberi. Nopapera mweji jakawanda, vecishanda inga piyona wo besero, ivona vakatanga kushanda inga piyona wo nguva jese mu njiku 1 ya Outubro wo gore ra 1986.

Pavainga vaamujaha, hama Winder vakavhakacira majinevanji avo maviri aishandira pa Bheteri. Pamukuvo wondhowo kuvhakacira kwavakaitari kwakavaita kuti vave no cido co kushandira pa Bheteri. Mu mweji wa Maio wo 1990, ivona vakakokwa kuti vaende koshandira ku Bheteri ro Wallkill.

Kubheteri, hama Winder vakashanda mu mabauhwa akasiyana-siyana, kubatanija Dhepartamento ro Kucenesa, Dhepartamento ro Fazenda no kushanda mu Hofisi yo Bheteri. Ivona vakacadha no mukaji wavo Angela mu gore ro 1997, perapo vakatanga kushandira pa Bheteri vese. Mu gore ra 2014 ivona vakaendeswa ku Warwick kondhoyo hama Winder vakabesera pa kuvakwa ko Nyumba yo Cine ro Pasi Pese. Mu gore ra 2016 ivona vakacinja kuenda Centro Educasional da Torre de Vigia ku Patterson, kondhoyo vakashanda pa basa ro Audhiyo no Vhidhiyo. Pasure po makore marongomuna ivona vakahwirira ku Warwick, kondhoyo vakagajwa kuti vashande mu Hofisi Comissão de Pessoal. Mu wa Março wo gore ra 2022 ivona vakagajwa inga mubeseri wo Comissão de Pessoal yo Mukhumbi Unotonga.

Itusu tinokumbira kuti Jehovha aenderere mberi ecikomborera “zvipo zvo vanarume” izvi nokutizve ivona vaenderere mberi vecishanda ngo simba kuitira kubesera Umambo.—Vaefeso 4:8.