1. Ndirini vokuzojwa vese vanozoenda kudenga?

 PAMAKORE adarika, vandhu va Jehovha vaijivhunjisa kudari: ‘Ndirini vokuzojwa vokupejisira vanozoendeswa kudenga?’ Pakutanga tairangarira kuti vokuzojwa vokupejisira vari pasi pano, vanozoenda mu Paradhiso pamukuvo mushoma pasure po Armagedhoni. Asi pa Murindiri wa 15 wa Julho wo 2013, itusu takajija kuti hondo yo Armagedhoni icito yatanga, vese vokuzojwa vanokwana kuita 144.000 vanozonga vari kudenga.—Mateu 24:31.

2. Muvhunjo japi jokuti tingava najo, nokuti tinozovonenyi mu cijijo cino?

² Asi vamweni vedu tingajivhunjisa kudari: Zvicinyi zvinozoitika no vo “mavhuta amweni” a Kristu anonga ecishandira Jehovha no akagondeka pasi pano pamukuvo wo “dambujiko guru”? (Johani 10:16; Mateu 24:21) Mavhuta amweni kangaije anganeseka kuti aazozivi cokuita, cimwenizve kuti aazovi no ari wese anozomabesera no kumatungamirira pasure pokuti hama no hambzaji jo vokuzojwa jinonga japinda kudenga. Kangaije ivona vangarangarira kudaro ngo ndava yo zviitiko zviviri zvo mu Bhaibheri. Ngatende tivone zviitiko izvi nokuvona kuti ngenyi atidikani kuneseka.

ZVICINYI ZVICIKAZOITIKI?

3-4. Vamweni vangajivhunjisenyi, nokutizve ngenyi?

³ Kangaije vamweni vanganeseka kuti vo mavhuta amweni vanozosiya kushandira Jehovha ngokuti vokuzojwa vaya vaivatungamiriraya avacipo. Kangaije zviitiko zvimweni zvo mu Bhaibheri ndizvona zvingavaita kuti vathye. Ngativone muezaniso muviri. Wokutanga wakona ngo wo Mupiri Mukuru Jehoyadha. Iyena wainga mushandiri wakagondeka wa Jehovha. Iyena no mukaji wake, Jehozabhati vakabesera pa kujivirira cimujahwa caizwi Joaxi, ivona vakamubesera kuti ave mambo waushoni no wakagondeka. Jehoyadha painga ari penye Joaxi wakashandira Jehovha naakagondeka no kuita zviro zvaushoni. Jehoyadha paakafa Joaxi wakatanga kuita zviro zvakashata. Iyena wakazwira  mbhangiro jo shamwari jakashata wogumira pakusiya kushandira Jehovha.—2 Kronike 24:​2, 15-19.

⁴ Muezaniso umweni ngo wo Makristu akapona pasure pokufa ko vapostori. Mupostori Johani ndiyena wakapejisira kufa pakati po vapostori vese. Pa mukuvo wokuti iyena wainga ari penye, iyena wakabesera Makristu akawanda kuti arambe akagondeka kuna Jehovha. (3 Johani 4) Inga zvakaithwa ngo vapostori vamweni va Jesu, mupostori Johani wakaita zvese zvaikwanisa kuti ajivirire ungano ku vapanduki vainga vakavatendeneja. (1 Johani 2:18; 2 Vatesaronika 2:7) Pasure po kufa ka Johani vapanduki vakandha-ndhanika inga kupsa ko makwasha. Pa makore manganani akazotevera mu ungano jo Cikristu mainga mazara ngo majijisiro o kunyepa o vapanduki.

5. Ngozvapi zvaticikadikani kurangarira no takacijikira pa zviitiko zviviri izvi?

⁵ Zvitiko izvi zviviri zvo mu Bhaibheri zvinokhombija kuti vo mavhunta amweni vanozoitavo zvakafanana apo Makristu okuzojwa pavanozoenda kudenga? Kureva kuti Makristu akagondeka pa nyika pano anozotanga kuita zviro zvakashata inga ndi Joaxi kana kuva vapanduki inga zvakaithwa ngo vazinji pasure pokufa ko vapostori? Haiwa. Itusu tingava no cokwadi cokuti Makristu ese okuzojwa paanozonga apinda ku denga vo mavhunta amweni vanozoenderera mberi vecinamata Jehovha mu njira yaanotendera nokutizve Jehovha anozoramba ecivabesera. Ngenyi tingava no cokwadi ici?

KUNAMATA KWAKACENA KUNOZOGARA MBHERA NARINI

6. Mukuvo japi mutatu jatiri kuda kuvona?

⁶ Ngenyi tingava no cokwadi cokuti kunamata kwakacena akuzoperi pikija no zvineso zvatinozonga tecihwisana nazvo? Ngokuti Bhaibheri rinonasa kusanangura kuti itusu tiri kupona pa mukuvo wakasiyana maningi no mukuvo wo Vaiziraeri no mukuvo wokuti vapostori vainga vapera kufa. Wari ngatinase kuzwisisa zvakaitika pa mukuvo mutatu iji: Wokutanga, mukuvo wo Iziraeri yo kare, wocipiri, mukuvo wokuti vapostori vainga vapera kufa no wocitatu mukuvo wedu, “mukuvo wokumusijira zviro zvese.”—Mabasa o Vapostori 3:21.

7. Ngenyi Vaiziraeri vakagondeka vaizoguma pakuva no cidaka-daka cokuda kushandira Jehovha?

⁷ Mukuvo wo Iziraeri yo kare. Pamukuvo mushomani Mosi acito afa, wakavhunja Vaiziraeri kuti: “Ngokuti ndinoziva kuti sure ko kufa kwangu munozovoresesa mwoyo yenyu mecisia gwanja ro ndakamupangira.” (Deuteronòmio 31:29) Mosi wakavangwaja kuti vatakama kuzwira ivona vaizotohwa kuendeswa ku uranda. (Deuteronòmio 28:​35, 36) Kunanga kuti magama aya akakwanirisika here? Hina. Ko mazana o makore akazotevera, majimambo mazinji akatema civaringo cokutama kuzwira mupango ja Jehovha voitisazve kuti vandhu vanamate zvimwari zvokunyepa. Ngo ndava ya izvi, Jehovha wakasiya jinja iri rinopandukira, cimwenizve iyena aazivi kutenderazve kuti umambo wo Iziraeri utongezve vandhu vake. (Ezekieli 21:​25-27) Asi Vaiziraeri vamweni pavakavona magama a Jehovha ecikwanirisika ivona vakada kushandira Jehovha novakagondeka.—Isaia 55:​10, 11.

8. Kureva tinodikana kukahamara ngokuziva kuti pakupera kufa ko vapostori, Makristu amweni akasiya cokwadi? Sananguranyi.

⁸ Mukuvo wokuti vapostori vainga vapera kufa. Kureva kuti taizoshamaisika ngokuvona ungano yo Cikristu yo muzana iri yeciva vapanduki? Haiwa. Ngokuti Jesu wainga akazvinanga kuti zvaizoitika. (Mateu 7:​21-23; 13:​24-30, 36-43) Mupostori Pauro, Pedhru na Johani vakananga kuti uporofita wa Jesu wainga watanga ku kwanirisika mu mukuvo wavo mu zana rokutanga ro makore. (2 Vatesaronika 2:​3, 7;  2 Pedhru 2:1; 1 Johani 2:18) Pasure pokufa ko mupostori wokupejisira Makristu ainga vapanduki akaita divi ro Bhabhironiya Guru rinobatanija kunamata kwese ko kunyepa. Apa zvakabhuya Jesu zvakakwanirisika.

9. Ngenyi mukuvo wedu wakasiyana no mukuvo wo Iziraeri yo kare no mukuvo wokuti Makristu akava vapanduki?

⁹ “Mukuvo wokumusijira zviro zvese.” Mukuvo wedu wakasiyana no mukuvo wo Iziraeri yo kare no mukuvo uwo wokuti Makristu akaita vapanduki. Mukuvo wedu unodanijwa kudini? Itusu tinodanija mukuvo uwu inga “njiku jokupejisira” jo mu nyika ino yakashata. (2 Timoti 3:1) Bhaibheri rinokhombija kuti pakatangari njiku jokupejisira kwakatangavo mukuvo unosisira no wakareba maningi. Mukuvo uwu unozoenderera mberi uripo mbhera Umambo hwa Kristu uzoitise kuti vandhu vave vakakwana nokuita kuti pasi pave Paradhiso. Mukuvo uwu unodanijwa kuti “mukuvo wokumusijira zviro zvese.” (Mabasa o Vapostori 3:21) Mukuvo uwu wakatanga mu gore ro 1914. Waro zvicinyi zvakaizwa pa mukuvo uwu? Zvokadi, Jesu wakatanga kutonga kudenga. Ngo njira iyi Jehovha wakagaja nga papsa mambo waizomuimirira wo mubarihwana wa Dhavhidhi. Asi Jehovha asipi izvi basi zvaakaita. Pasure pa izvi no papera mukuvo mushoma, kunamata kwakacena kwakatanga kumusijihwa. (Isaia 2:​2-4; Ezekieli 11:​17-20) Waro kureva kuti kunamata kwakacena kunozoimazve?

10. (a) Bhaibheri rinonangenyi ngo pamusoro pokunamata kwakacena mu njiku jedu jino? (Isaia 54:17) (b) Ngenyi zviporofita izvi zvinotidakajisa?

¹⁰ Verenganyi Isaia 54:17. Rangariranyi ngo pamusoro po ciporofita ici basi: “Apana nvuti yakanasirihwa kuti ikuhwise inozobudirira.” Magama aya akafemehwa ari ku kwanirisika nyamasi uno. Iwona anotinyarajavo mu njiku jedu jino: “Vana vako vese vanozojijiswa ndi Jehovha, Runyararo wo vana vako unozokura maningi. Iwewe unozonasa kuvangiswa ngo ururami . . . Apana caunozothya nee apazovi no ciri cese cinokuthyisa, Ngokuti icona acizokukhwedereri phedo.” (Isaia 54:​13, 14) Pikija Sathana “mwari wo nyika ino”, aana simba rokuimisa basa rokucumaera masoko akanaka riri kuithwa ngo pamusoro pa Jehovha. (2 Vakorinte 4:4) Kunamata kwakacena kwakamusijihwa nokutizve akuzoimiswi mbhera narini. Apana cokurhwa ndicona cinozoparaja vashandiri va Jehovha.

NGOZVAPI ZVINOZOITIKA?

11. Ngozvapi zvinotithembesa kuti vandhu vakawanda avazosiiwi vokuzojwa pavanonga vapera kupinda kudenga?

¹¹ Zvicinyi zvinozoitika vokuzojwa pavanozonga vapera kuenda ku denga? Ceujanyi kuti  Jesu ndi muhavisi wedu. Iyena ndi musoro wo ungano yo Cikristu. Jesu wakanasa kujekesa paakananga kuti: “Mutungamiriri wenyu ndi umwe basi, Kristu.” (Mateu 23:10) Mambo wedu ari kutonga, iyena aazotami kukwanirisa zvaakagajwa. Zvecivoneka kuti Kristu ndiyena kamare ari kuvonerera zviro, vateveri vake avadikani kuthya zviri zvese pasi pano. Ngo zvokadi kuti itusu atinasi kuziva kuti Jesu anozotungamiririsa kudini vandhu vake mukuvo uwu ukaguma. Wari ngativone muezaniso munganani jo mu Bhaibheri jingatitondhoja.

12. Jehovha wakatajisa kudini vandhu vake (a) pasure po kufa ka Mosi? (b) Eriya paakapera kuashira basa ibza? (Vonanyi foto.)

¹² Vaiziraeri vacito vaghwina mu Nyika yo Cipikihwa Mosi wakafa. Ngozvapi zvakazoitika naivona? Vacina besero ra Mosi kureva kuti ivona vakagara vacina cokuita? Haiwa. Pamukuvo wokuti ivona vaienderera mberi vakagondeka kuna Jehovha iyena waivataja. Mosi acito afa Jehovha wakamuvhunja kuti agaje Joshuwa kuti atungamirire vandhu vake. Mosi wakaroveja Joshuwa ko makore akawanda. (Exodo 33:11; Deuteronòmio 34:9) Kunja kwa izvi, kwaitongavo no vanarume vainga vakatonasiririka kuti vatungamirire vandhu va Mwari vakadari inga, vatongi vo makumi o mazana, vo mazana, vo makumaxanu no vo gumi. (Deuteronòmio 1:15) Vandhu va Mwari vainga vecinaswa kutajwa. Muezaniso umweni watinawo ngo wa Eriya. Ko makore akawanda, iyena wakabesera Vaiziraeri kuti varambe veciita kunamata kwakacena. Asi pakufamba ko nguva Jehovha wakazogaja basa rimweni Eriya ku mavirira ko Judha. (2 Majimambo 2:1; 2 Kronike 21:12) Kureva kuti Vaiziraeri vakagondeka vo umambo wo majinja gumi akapandukira? Haiwa. Eriya wakaroveja Erizeu ko makore akawanda. Asi kwaingavo no ‘vana vo vaporofeta’ avo vokuti kangaije vainga vakanasiririka ngo zvikwata, cimwenizve vainga vakaashira rovejo. (2 Majimambo 2:7) Kana kuti kainga no vanarume vakawanda vakagondeka vainga vakanasiririka kuitira kutungamirira vandhu va Jehovha. Jehovha wakaenderera mberi ecikwanirisa cidisiso cake nokutaja ushoni vashandiri vake.

13. Ngozvapi zvinotigondesa Jehovha pana Vahebheru 13:5b? (Vonanyi foto.)

¹³ Pasure pokuvona muezaniso iji ngozvapi zvamuri kurangarira zvingazoitika vokuzojwa vokupejisira pavanopera kupinda kudenga? Atidikani kurangarira maningi. Mu Bhaibheri tinowana cokwadi cakajeka cinotitondhoja: Jehovha narini aazosiyi vashandiri vake pa nyika pano. (Verenganyi Vahebheru 13:5b.) Nyamasi uno kuno cikwata cidoko co vokuzojwa vari kutungamirira vandhu va Jehovha  ivona ngo vo Mukhumbi Unotonga. Inga ndi Mosi na Eriya ivona vari kurovejavo vanarume vo mavhuta amweni kuti vazobesere kungwarira vandhu va Jehovha. Inga muezaniso, vo Mukhumbi Unotonga vanonasirira zvikora zvakawanda kuti varoveje vakuru, vafakei vo vavonereri vo ndharaundha hama jo pa Bheteri, no hama jimweni. Ivona vanovangisira pacavo kamare kuti varoveje vabeseri vazinji vo Komisau yo Mukhumbi Unotonga. Vabeseri ava vaano basa kutangira wari nokutizve vakanasiririka kuti vaenderere mberi no basa rokutaja mavhuta a Kristu.

14. Ngozvapi zvanasa kujeka pa jijo iyi?

¹⁴ Pa jijo iyi, mbhera wari tavona kuti shwiro iyi yakajeka: Vokuzojwa vokupejisira pavanozoenda kudenga phedo no kumbhiri ko dambujiko guru, vanamati va Jehovha vanozoenderera mberi vecimunamata no vakagondeka. Ngo besero ra Mambo wedu Jesu Kristu itusu atizosiyi kunamata Jehovha. I zvokadi kuti pamukuvo uwu tinozohwiswa ndi Gogi wo Magogi kubatana ko majinja. (Ezekieli 38:​18-20) Kuhwiswa uku kunozova ko nguva doko nee akuzoitiki. Akuzoitisi kuti vanamati va Jehovha vatame kumunamata. Jehovha no cokwadi cese iyena anozotiponesa. Mu civoniso caakavoneswa mupostori Johani wakavona “vandhu vakawanda” vo mavhuta amweni a Kristu. Johani wainga eciziva kuti “vandhu vakawanda” vainga vecivha ku “dambujiko guru.” (Apokaripsi 7:​9, 14) Pacina kukana-kana Jehovha anozotiponesa.

15-16. Mukuzwirana na Apokaripsi 17:14; ngozvapi zvinozoithwa ngo vokuzojwa pakati po hondo yo Armagedhoni, ngenyi zvondhozvo zvinotivangisa?

¹⁵ Pikija zvakadaro, vamweni vangarangarira kudari: ‘Zvicinyi zvinozoitika no vokuzojwa? Ivona vanozoitenyi pavanozonga vari kudenga?’ Bhaibheri rinodavira ngo njira yakajeka muvhunjo iji. Irona rinoti majimambo o nyika ino ‘anozohwisana no Vhuta.’ Asi Zvakajeka kuti ivona vanozoruza. Bhaibheri rinoti: ‘Vhuta . . . rinozovanyisa.’ Ndiyani anozoribesera? Bhaibheri rinodavirazve muvhunjo uwu. Irona rinoti: “Vakadanijwa” “vosanwa” “vova vakagondeka.” (Verenganyi Apokaripsi 17:14.) Ndiyani ava? Ngo vokuzojwa vanonga vamuswa! Ngo kudaro, wokupejisira paanozopinda kudenga kumbhiri ko dambujiko guru basa rokutanga  ravanozoashira rinozova rokuhwa. Iri rinozova basa rinoshamaisa maningi. Vamweni vokuzojwa vacito vava Zvapupu zva Jehovha vainga no cirovejeso cokutakana. Vamweni vakatomboshanda inga masoca. Asi pakufamba ko nguva pavakazova Zvapupu zva Jehovha ivona vakaziva gwanja ro runyararo. (Vagaratiya 5:22; 2 Vatesaronika 3:16) Ivona vakasiya kubesera hondo. Asi pavanozotohwa voenda kudenga, ivona vanozova pamwepo na Jesu kubatanijavo no ngirozi. Ivona vanozohwa pa hondo yokupejisira no vavengi va Jehovha.

¹⁶ Rangariranyi izvi basi! Nyamasi uno vokuzojwa vamweni vaavasharuka, cimwenizve avacina maningi simba. Asi pavanozomuswa kuti vaende kudenga, ivona vanozova zvisikwa zvokumujimu zvakavanga, zvicikafi no zvino simba maningi zvinozohwa pamwepo na Mambo wo Hondo Jesu Kristu. Hondo yo Armagedhoni painozopera, ivona vanozoshanda pamwepo na Jesu pakubesera vandhu kuti vave vakakwana. Pacina kukana-kana, pavanozonga vari kudenga ivona vanozoita zviro zvakawanda maningi kuitira kubesera hama no hambzaji jinonga jiri pasi pano, izvo zvavainga vacikakwanisi kuita pavainga pasi pano inga vandhu vacizivi kukwana.

17. Tinozvizivisa kudini kuti vashandiri va Mwari vanozova vakangwaririka pamukuvo wokuti Armagedhoni iri kuitika?

¹⁷ Imwimwi munoita divi ro vo mavhuta amweni? Waro ngozvapi zvamunodikana kuita hondo huru yo Armagedhoni painonga yotanga? Zvakajeka kuti: Thembanyi Jehovha no ndhungamiriro jake. Zvicinyi zvinobatanijwa? Bhaibheri rinobhuya izvi pa bhuku ra Isaya kuti: “Munghwine mu nyumba jenyu, mufunge musuvo sure kwenyu. Mufindare pa mukuvo mudoko mbhera ushungu wangu upinde.” (Isaia 26:20) Kana kuti vashandiri vese vakagondeka va Jehovha vo pasi pano kana kuti vokudenga ivona vanozova vakajiviririka pamukuvo wo Aramagedhoni. Inga zvakatara mupostori Pauro, itusu tino cokwadi kuti apana “nee utongi, nee zviro zvawari, nee zviro zvamangwana . . . azvikwanisi kuparajanisa rudo hwakatatijwa ndi Mwari.” (Varoma 8:​38, 39) Nguva jese ceujanyi kuti Jehovha anomuda maningi iyena narini aazomusiyi.