1. Vashandiri va Jehovha vo mu nguva yo kare vakaitenyi?

 IMWIMWI munoreremeja ushamwari hwenyu na Jehovha? Zvakajeka kuti hina. Imwimwi amuripi mega. Kuvhira kare no kare, vandhu vakajizwavo ngo manera amuri kujizwaro. (Nduyo 104:​33, 34) Vandhu vakawanda vakasiya zviro zvimweni kuti vakwanise kunamata Jehovha. Izvi ndizvona zvakaithwa ngo Vanaziri ku Iziraeri yo kare. Ivona vainga vanaani, tingajijenyi ngo muezaniso wavo?

2. (a) Vanaziri vainga vanaani? (Bziverengo 6:​1, 2) (b) Ngenyi Vaiziraeri vamweni vakakheta kuita mbhiko yokuva Munaziri?

² Gama rokuti “Munaziri” rikasandujwa ku Cihebheru, rinoreva kuti “Mundhu Wakakhethwa” “Wakaparajaniswa” nokuti “Wakajipira.” Vanaziri vainga Vaiziraeri vaivangisira maningi kuti vasiye zviro zvimweni kuti vashandire Jehovha mu njira kwayo. Mutemo wa Mosi waitendera kuti mwanarume kana kuti mwanakaji aite mbhiko kuna Jehovha ecikheta kupona inga Munaziri ko mukuwo wakatikuti. a (Verenganyi Bziverengo 6:​1, 2.) Muiziraeri paiita mbhiko iyi yokupona inga Munaziri pikija ari mwanarume kana kuti mwanakaji, iyena waidikana kuteverera ndhungamiriro jokuti nee Vaiziraeri vamweni avacaidikanepi kujiteverera. Ngenyi Muiziraeri waaita mbhiko yo kuva Munaziri? Muiziraeri waaita mbhiko iyi ngo ndava yo rudo hwake kuna Jehovha no kuda kubonga ngo makomborero aaipuwa Ndiyena.—Deuteronòmio 6:5; 16:17.

3. Kuitisa kudini vandhu va Jehovha nyamasi uno vanokhombija mugariro umwewo no waikhombijwa ngo Vanaziri?

³ Nasiriro yokuva Munaziri yakapera Mutemo wa Mosi pawakafakeiwa  ngo ‘mutemo wa Kristu.’ (Vagaratiya 6:2; Varoma 10:4) Ngo kudaro, inga Vanaziri vandhu va Jehovha nyamasi uno vari kwenderera mberi vecikhombija cido cakavanga cokuda kumushandira ngo mwoyo wese, mwiha, murangariro no simba. (Marko 12:30) Tinoita zvondhozvo patinotema civaringo co kumushandira no kujipira pacedu kwaari. Kuti tikwanise kupona mukuzwirana no mbhiko iyi tinodikana kuita kuda ka Mwari no kusiya zvimweni kuti timushandire. Itusu tinoda kuvona kuti Vanaziri vakaitisa kudini kuti vakwanirise mbhiko yavo, zvondhozvo zvinozotibesera kuti tikwanirisevo mbhiko yedu yokujipira kuna Jehovha. b (Mateu 16:24) Ngatende tivone muezaniso jimweni jakona.

SIYANYI ZVIMWENI

4. Mukuzwirana no bhuku ra Bziverengo 6:​3, 4; Vanaziri vainga vakanasiririka kuti vasiye zviro zvapi?

⁴ Verenganyi Bziverengo 6:​3, 4. Vanaziri avacaidikanepi kumwa doro nee kuha zviro zvakadari inga uvha. Vaiziraeri vamweni vaimwa doro no kuha mucero, zvecivoneka kuti painga pacina cakashata pakuha zviro izvi. Bhaibheri rinonanga kudari “doro rinodakaja mwoyo” ngokuti cipo cinovha kuna Mwari. (Nduyo 104:​14, 15) Pikija zvakadaro, Vanaziri vainga vakanasiririka kuti vasiye zviro izvi. c

5. Hama Madhiyan na hambzaji Marsera vakasiyenyi, ngenyi?

⁵ Inga Vanaziri, itusuvo tinosiya zviro zvimweni kuti tiitire Jehovha zvizinji. Vonanyi muezaniso wa Madhiyan na Marsera. d Varovorani ava vaibusa upenyu hwaushoni. Madhiyan wainga no basa raushoni raivabesera kuti vagare pa nyumba yakanaka. Asi ivona vaida kuita zvizinji mu basa ravo kuna Jehovha. Kuti vakwanirise cido ici, ivona vakadikana kuita cinjo jiri jese. Ivona vanonanga kudari: “Takatanga kupungura dhispeza jedu.” “Itusu takathutha kuenda kogara pa nyumba yainga icikapeji mare yakawanda no kutengesa karu yedu.” Hama Madhiyani na hambzaji Marsera, vakadikana kusiya zviro izvi ngokuti ivona vaida kuita zvizinji mu basa ravo ravaiitira Jehovha. Ivona vari kujizwa ushoni no kudakara ngo zvivaringo zvavakatema.

6. Ngenyi tinosiya zviro zvimweni? (Vonanyi foto.)

⁶ Vashandiri va Jehovha vanodakara maningi ngo kusiya zviro zvimweni kuti vave no nguva yakawanda kuti vashandire Jehovha. (1 Vakorinte 9:​3-6) Jehovha aativangiriji kuti  tisiye zviro zvimweni izvi nokutizve zviro zvimweni zvinosiyiwari ngo hama azvizivi kushata. Inga muezaniso, vamweni vakanasiririka kuti vatame kuva no nyumba yavo pacavo kana kuti kuva no basa ravanodakarira no zviro zvimweni zvakadaro. Vamweni vakatema civaringo cokutama kucadha ko nguva yakareba kana kutama kuva no vana pasure pokucadha. Vamweni vanosana koshandira kunodiwa maningi vacumaeri pikija zvondhozvo zvecireva kugara ndhambo no ukama kana shamwari. Vazinji vedu tinosiya zvimweni kuti tinase kubatikana pa basa ra Jehovha. Ivanyi no cokwadi cokuti Jehovha anoreremeja maningi zviri zvese zvamungasiya zvingava zvidoko kana zvikuru kuti mu mushandire.—Vahebheru 6:10.

IVANYI MAKANASIRIRIKA KUTI MUVE WAKASIYANA

7. Ngowapi mugariro waidikana kuhwisana no Munaziri kuti akwanirise mbhiko yake? (Bziverengo 6:5) (Vonanyi foto.)

⁷ Verengani Bziverengo 6:5. Vanaziri avacaidikanepi ku gunda vhuji ravo. Iyi yainga njira yokukhombija zvakakwana kujidira kwavo pasi kuna Jehovha. Kudari mu Iziraeri akava Munaziri ko mukuvo wakareba, vhuji rake raizoguma pakureba maningi izvi zvaizoita kuti vandhu vamweni vazvizwisise. Kudari vamweni vakareremeja no kuvangisa Munaziri kuti akwanirise mbhiko yake zvaizova zvakareruka kwaari kuti ave wakasiyana. Zvinosuruvarisa ngozvokuti kwakava no mukuvo umweni wokuti ku Iziraeri Vanaziri avacaireremejwazve nee kubesehwa ngo Vaiziraeri vamweni. Pa mukuvo wo muporofeti Amosi, Vaiziraeri vamweni vainga vapanduki vakaenderera mberi ‘vecipa Vanaziri vhinyu kuti vamwe’ kangaije ivona vaieja kuti vatame kuzwira mutemo wokutama kumwa vhinyu. (Amosi 2:12) Vanaziri vaidikana kuva no cicunge kuti vakwanirise mbhiko yavo nokutizve vave vakasiyana no vamweni.

8. Muezaniso wa hama Bhejhamin wamuvangisa kudini?

⁸ Ngo besero ra Jehovha itusuvo tingava no cicunge no kuva takasiyana no vamweni, pikija tiri vandhu vanothya ngo cibarihwe. Vonanyi muezaniso wa hama Bhejhamin vano gumi ro makore vanogara ku Noruwega. Ngo ndava yo hondo iri kuitika ku Ukraniya, cikora yavo yakaita cimusongano kuitira kuvonesa kubesera kwavo vandhu vo Ukraniya. Vajiji vaidikana kuimba mumbo no kusimira nguvo jainga no mushovo wo bhandera ro Ukraniya. Kuti vatame kuva pacimusongano ici hama Bhejhamin i vakagara ngo ndhambo no paaitihwa cimusonganoco. Asi prosora umweni wakavavona ovakharira eciti: “Viyayi kuno wari, tese takakuimira.” Hama Bhejhamin i vakakhwederera prosora wiya vomuvhunja kudari no cicunge cese: “Inini andina kwandakapeyamira  nokutizve andiiti zvo poritika. Zvokadi Zvapupu zva Jehovha zvakawanda zviri mukadheya ngo ndava yokuramba kwenda ku hondo.” Prosora wiya wakatendera zvavakanangaro ovavhunja kuti vangatama havo kuva pondhopo. Asi vadoni va hama Bhejhamin vakatanga kuita muvhunjo ngo pamusoro pokuti ngenyi aazivi kuvepo. Hama Bhejhamin vakanyangajwa maningi mbhera pakutoguma pakucema. Mu kusiyana, no cicunge cese, ivona vakaphindazve magama aya avakabhuyaya na prosora wiya ku vadoni vese vo kucikora. Pasure pa izvi, hama Bhejhamin vakabhuya no vabari vavo kuti Jehovha wainga avabesera pakujivirira rutendo hwavo.

9. Tingadakajisa kudini mwoyo wa Jehovha?

⁹ Vandhu vanotizwisisa kuti takasiyana ngokuti tinozwira Jehovha. Itusu tinoda cicunge kuti tikwanise kubhuya kucikora kuti tiri Capupu ca Jehovha. Pamukuvo wokuti mugariro uno wo nyika uri kushatisa, zvinozotinesera maningi kupona mukuzwirana no ndhungamiriro jo Bhaibheri nokucumaera ku vamweni. (2 Timoti 1:8; 3:13) Mukuvo wese ceukijanyi kuti ‘mwoyo wa Jehovha unodakara’ maningi paya patinonga tino cicunge kuti tive vandhu vakasiyana na vaya vacikamushandiri.—Mazwi Akangwara 27:11; Marakiya 3:18.

DIRANYI JEHOVHA PAKUTANGA MU UPENYU HWENYU

10. Ngenyi zvainesa maningi ku Munaziri kuti azwire ndhungamiriro inowanika pana Bziverengo 6:​6, 7?

¹⁰ Verenganyi Bziverengo 6:​6, 7. Vanaziri avacaidikanepi kukhwederera mutembo. Kangaije tingarangarira kuti zvondhozvo azvicaingepi zviro zvainesa maningi. Asi caizova cineso cikuru maningi ku Munaziri kudari wafaro ndi umwe wo ukama hwake hwophedo. Cirovejeso co ciriro pamukuvo wondhowo caibatanija kuva phedo no mundhu wafaro. (Johani 19:​39, 40; Mabasa o Vapostori 9:​36-40) Munaziri aacaidikanepi kuita cirovejeso ici. Pikija paaifihwa, Munaziri waidikana kwenderera mberi ecikwanirisa mbhiko yake. Izvi zvaizokhombija kuti iyena wainga no rutendo wakavanga. Kunasa kunanga Jehovha waipa simba Vanaziri kuti vahwisane no cineso ici.

11. Ngozvapi zvatinodikana kuita patinotema zvivaringo zvo pa mbhuri? (Vonanyi foto.)

¹¹ Itusu tinoreremeja maningi mbhiko yatakaita kuna Jehovha. Zvondhozvo zvingapsasa zvivaringo zvedu ngo pamusoro po shwiro jo mbhuri. Itusu tinovangisira kuti tipe zvinodiwa ku mbhuri yedu asi atizodiri pakutanga zvinodiwa zvo mbhuri yedu kupinda kuda ka Jehovha. (Mateu 10:​35-37; 1 Timoti 5:8) Nguva jimweni tingadikana kutema zvivaringo  zvokuti ukama hwedu aungazvidakariri asi zvinodakajisa Jehovha.

12. Pavaihwisana no zvineso zvo pa mbhuri, hama Areshandre ngozvapi zvavakaita ngozvapi zvavacizivi kuita?

¹² Vonanyi muezaniso wa hama Areshandre no mukaji wavo Dhorina. Ivona vakatanga kujija Bhaibheri, asi pasure po gore rimwe mukaji wavo wakaima kujija. Cimwenizve, iyena waida kuti mwamunake aimevo kujija. Naakagajana no kubhuya ngo njira yaushoni, iyena wakamuvhunja kuti aacaizoimepi kujija. Mukaji wavo Dhorina aazivi kuzvidakarira, wakaita zvese zvaaikwanisa kuti ivona vaime kujija. Hama Areshandere vakaeja kuzwisisa kuti ngenyi mukaji wavo waiita zvondhozvo. Asi azvizivi kuva zvakareruka kwavari. Mukuvo jimweni mukaji wavo paaivanesa no kubhuya ngo hasha ivona vakaguma pakuda kusiya kujija Bhaibheri. Pikija zvakadaro, hama Areshandre vakaenderera mberi vecidira jehovha pa ndau yokutanga. Pamukuvo umwewo vakaendererazve mberi vecikhombija rudo no nderemejo ku mukaji wavo. Ngo ndava yo muezaniso waushoni wa hama Areshandre mukaji wavo wakatangazve kuda kujija Bhaibheri perapo iyena wakazobahabhatijwa.—Endanyi mu jw.org moenda kovona vhidhiyo ino musoro unoti: Alexandru na Dorina Vacar: “Rudo Hunosengerera Rudo Huno Unyasha” pa “Mundandanda wo Mavhidhiyo.”

13. Itusu tingakhombijisa kudini rudo hwedu kuna Jehovha no ku mbhuri yedu?

¹³ Jehovha ndiyena wakaita mbhuri. Iyena anoda kuti mbhuri yedu igare yakadakara. (Vaefeso 3:​14, 15) Kudari itusu tikada kuva no mudakaro wokadi, tinodikana kuita zviro zvinodiwa ndi Jehovha. Pacina kukana-kana, Jehovha anodakara maningi pamunoita zvese zvamunokwanisa kuti mu mushandire no pamunotaja mbhuri yenyu ngo rudo no nderemejo.—Varoma 12:10.

VANGISANYI VAMWENI KUTI VATEVEJERE VANAZIRI

14. Ndiani watinodikana kuvangisa ngo magama edu?

¹⁴ Vese vanosana kushandira Jehovha nyamasi uno, vanodikana kuva vakanasiririka kuti vasiye zviro zvimweni ngo ndava yo rudo hwavanahwo na iyena. Nguva jimweni kuita izvi azvizivi kureruka. Tingabeseravo kudini vamweni kuti vasiye zviro zvimweni ngo ndava yo rudo hwavo kuna Jehovha? Tingavavangisa ngo magama edu. (Jobe 16:5) Kureva kuti pano hama jo mu ungano mwenyu jiri kuita zvese zvajinokwanisa kuti jibatikane pa mabasa o umwari? Kureva kuti imwimwi munoziva majaha ari kuva no cicunge kuti ave akasiyana no vamweni kushikora pikija zvondhozvo zvinganesa? Munoziva hama iri yese kana kuti mujiji wo Bhaibheri ari kuita zvese zvaanokwanisa kuti  aenderere mberi akagondeka pikija no kuteverehwa ngo mbhuri yake? Ivanyi makanasiririka kuti muvangise vese ava no kuvavhunja kuti muri kushamaisika maningi ngo cicunge cavari kukhombija no zvese zvavari kuitira Jehovha.—Firimoni 4, 5, 7.

15. Vamweni vanobeseresa kudini vaya vari mu nguva yakazara?

¹⁵ Nguva jimweni, tingapekeja besero ku hama jiri mu nguva yakazara. (Mazwi Akangwara 19:17; Vahebheru 13:16) Ndizvona zvakaita hambzaji imweni yaamusharuka inogara ku Sri Lanka. Hambzaji iyi payakaengejehwa mare yayaiashira ngo ukarahwa kana kuti mare yo phenjeni, iyona yakatema civaringo cokobesera hambzaji mbiri jaishanda inga mapiyona no kuenderera mberi jeciita basa rajo pikija no cineso co mare. Iyona yakatema civaringo cokuti mweji ngo mweji ipe mutengo wo mare yaizovabesera kuti vaite zvese zvaidiwa vecishandisa foni. Hambzaji iyi yakakhombija mugariro unodakajisa maningi.

16. Ngozvapi zvatinojija kuvha ku Vanaziri?

¹⁶ Ngozvokadi kuti itusu tingajija zviro zvizinji ngo muezaniso wo Vanaziri. Asi mbhiko yo Vanaziri inotijijisa ciro cimweni ngo pamusoro pa Baba wedu Jehovha. Ivona vanoziva kuti tinoda kuvadakajisa nokutizve takanasiririka kuti tisiye zviro zvimweni no kukwanirisa mbhiko yedu. Iyena anotikuja ngokutipa kwake mukana wokukheta kukhombija rudo kwaari pacedu. (Mazwi Akangwara 23:​15, 16; Marko 10:​28-30; 1 Johani 4:19) Mbhiko yo Vanaziri inovonesa kuti Jehovha anovona zvese zvatinoita kuti timushandire nokutizve anotida ngo zvese zvatinomuitira. Ngatiite zvese zvatinokwanisa kuti tienderere mberi tecishandira Jehovha no kuva takanasiririka kuti timupe zviro zvaushoni mukuvo wese.