1. Ngenyi vandhu vazinji avathembi Bhaibheri?

 VANDHU vazinji nyamasi uno avacazivi mundhu wavangathemba. Ivona avacatozivi dangani vangathemba vandhu vavanoreremeja dangani vavanonasa kuziva, inga vanotungamirira zvo poritika, masietista no maemperezariyo. Kusiyapo zvondhozvo, ivona avareremeji vatungamiriri vomagerejha avo. Zvecivoneka kuti vandhu ava avathembi zvinonangwa ngo Bhaibheri zvinonesa maningi kuti ivona vathembe vatungamiriri ava vanoshandisari Bhaibheri.

2. Mukuzwirana na Nduyo 119:160, tinodikana kuva no cokwadi cenyi?

² Inga vashandiri va Jehovha, itusu tinokhohwa kuti iyena ndi “Mwari wokadi-kadi” nokutizve nguva jese anoda zvaushoni kwatiri. (Nduyo 31:6; Isaia 48:17) Itusu tinothemba zvese zvatinoverenga mu Bhaibheri. Tinoita zvondhozvo ngokuti ‘Soko [ra Mwari] rese icokwadi.’ (Verenganyi Nduyo 119:160, Sandujo yo Nyika Imbza.) Itusu tinotenderana no zvakananga mwanarume umweni anojija ngo zvo Bhaibheri paakati: “Zvese zvakananga Mwari azvizivi kuposeka, nguva jese zvinozokwanirisika. Vandhu va Mwari vanothemba zvese zvaanonanga ngokuti ivona vanoziva kuti Mwari ndi mundhu anothembeka.”

3. Ngozvapi zvatinozovona mu cijijo ici?

³ Tingaitisa kudini kuti tibesere vamweni kuti vathembe Soko ra Mwari inga manera atinoita itusu? Ngatende tivone mathangwe matatu anotiitisa kuti tithembe zvinonangwa ngo Bhaibheri. Tinozovona kuti kuitisa kudini Soko ra Mwari arizivi kucinja, tozovonazve kukwanirisika kunoita zviporofita zvo  Bhaibheri no simba rarinaro rokucinja upenyu hwo vandhu.

4. Ngenyi nyamasi uno vandhu vamweni avathembi Bhaibheri?

⁴ Jehovha wakashandisa vanarume vanokwana kuita makumarongomuna vakagondeka kuti vatare mabhuku o mu Bhaibheri. Ngo kudaro, nyamasi uno itusu aticina maphepha avakatararo, tinomakhopi no makhopi o masokowo. Ngo iyo ndava vazinji nyamasi uno vanokana-kana kuti zvavanoverengari ndizvona zvakatahwaya ngo vanarume vaya kana kuti haiwa. Itusu tingava no cokwadi cokuti zvavakatararo ndizvonadi kamare, ngenyi?

5. Vandhu vakakhopari Matahwa o Cihebheru vakazviitisa kudini? (Vonanyi foto yo pakapa.)

⁵ Kuti ajivirire masoko anowanika mu Bhaibheri, Jehovha wakavhunja vandhu vake kuti vaite makhopi aro. Iyena wakavhunja majimambo o Iziraeri kuti vaite makhopi avo o mutemo, wakagaja Varevhi kuti vajijise vandhu mutemo wondhowo. (Deuteronòmio 17:18; 31:24-26; Neemia 8:7) Vajudha pavakatohwa kuenda ku uranda ku Bhabhironiya, cikwata co vandhu vaiita basa rokutara vakatanga kutara makhopi akawanda o Matahwa o Cihebheru. (Esdra 7:6) Vanarume ava vaingwarira maningi. Inga muezaniso, vatari ava vatanga kuverenga magama no maretera o zviro zvavaitararo. Vaiita izvo kuti vave no cokwadi cokuti vainasa kukhopa kamare zvese zviriwaro pamakhopi amweni. Zvecivoneka kuti ivona vainga vandhu vacikazivi kukwana kungwarira kwese kwavaiita akucaibesera maningi. Zvavaikhopari Zvakasarira no zvimweni zvaiposeka. Asi zvecivoneka kuti kwakaithwa makhopi mazinji o masokowo, pakufamba ko nguva zvimweni zvaingaro zvakaposeka zvakazovoneka. Kuitisa kudini?

6. Vandhu vanoitisa kudini kuti vavone zvakaposeka pa makhopi akatahwa kare o Bhaibheri?

⁶ Vaya vanojija ngo zvo Bhaibheri vanokwanisa kuwana zvakaposekari Bhaibheri poraitahwa. Inga muezaniso, ngatiti vanarume vanokwana kuita 100 vanoda kukhopa ngo nyara masoko amwewo. Umwe wavo anoposa padoko paanonga ecitara, njira imwe yokuwana zvaakaposaro ngo yokutora zvaakatararo no zvakatahwa ngo vamweni kakuzviezanisa. Munjira yakafanana, tingakwanisa kuvona kuti mundhu waitaraya wakaposa zviri zvese kana wakaengejera, ngo kuezanisa makhopi amweni akatahwa ngo vamweni kuti tikwanise kuvona zvakaposekaro.

7. Kuitisa kudini vakatara makhopi o Bhaibheri vakanasa kutara ngo kungwarira kwese?

⁷ Vaya vaitara makhopi o Bhaibheri vaireremeja maningi basa ravaiitari. Ngatende tivone muezaniso unovonesa izvi. Makhopi okare akapera kutahwa o Matahwa o Cihebheru ngo o mugore ra 1008 no 1009 Kristu Acito Aviya. Iwona anodanijwa kuti Kodhiko yo Renigradhi. Asi ko makore manganani aperari kwakawanika makhopi akawanda o Matahwa o Cihebheru akatahwa ko ciuru co makore Kodhiko yo Renigradhi icito yatahwa. Vamweni vairangarira kuti, zvainga zvakasiyana maningi zvakatahwari pa Kodhiko yo Renigradhi no Matahwa akawanikari. Izvo zvakaitika ngokuti kwainga kwakhirira ciuru co makore zvokuti makhopi aya ainga atahwa ko vhaza jakawanda, asi andizvopi zvakaitika. Vazivi vo zvo Bhaibheri povakaezanisa zvakatahwari kare no zvaingari zvatahwa wari vakavona kuti painga no musiyano mudoko basi pamagama asi revo yakona yainga icizivi kucinja.

8. Ngowapi musiyano wo Matahwa o Cigiriki no makhopi amweni akatahwa pa mukuvo wondhowo?

⁸ Makristu omuzana rokutanga aitaravo makhopi o Matahwa o Cihebheru. Ivona vakanasa kungwarira pakutara makhopi anokwana  kuita 27 o mabhuku o Matahwa o Cigiriki ovaishandisa pamusongano no kuenda kocumaera. Muzivi umweni paakapera kuezanisira Matahwa o Cigiriki no mabhuku amweni akatahwa kare, wakaguma pambhejiso iyi: “Nyamasi uno kuno makhopi akawanda maningi o Matahwa o Cigiriki kupinda makhopi amweni akatahwa pamukuvo wondhowo, . . . makhopi aya o Bhaibheri akatahwa ese kamare.” Bhuku rimweni rinobhuya ngo zvo Bhaibheri rakananga kudari: “Tingathemba kuti zvatinoverenga mu matahwa anothembeka o Cigiriki zvakaezana no zviro zvakatahwaya ngo vatari vokutanga vakatara Bhaibheri.

9. Mukuzwirana na Isaia 40:8, ngozvapi zvatingananga ngo masoko anowanika mu Bhaibheri?

⁹ Ko mazana o makore vandhu vazinji vaiita basa rokutara, vakavangisira kuti vatare makhopi o Bhaibheri atinawo wari nyamasi uno. b Pacina kukana-kana, ndi Jehovha wakaita kuti matahwa aya awanike nyamasi uno kuti timajije. (Verenganyi Isaia 40:8.) Pikija zvakadaro, vamweni vangananga kuti ndizvona kuti Bhaibheri arizivi kucinja asi irona arizivi kufemehwa ndi Mwari. Ngo kudaro, ngatende tivone mathangwe manganani anovonesa kuti Bhaibheri rakafemehwa ndi Mwari.

10. Tecirangarira ngo zvinonangwa pana 2 Pedhru 1:21 ipanyi muezaniso wociporofita cakakwanirisika. (Vonanyi mafoto.)

¹⁰ Bhaibheri rino zviporofita zvakawanda zvakakwanirisika, zvimweni zvakona zvakakwanirisika pasure po mazana no mazana o makore no zvakapera kuithwa. Tinokwanisa kuvona izvi ngo zvakaitika kuvhira kare. Izvi azvitishamaisi ngo kuti itusu tinoziva kuti wakafemera zviporofita zvinowanikari mu Bhaibheri, ndi Jehovha. (Verenganyi 2 Pedhru 1:21.) Inga muezaniso, amborangariranyi ngo ciporofita cinobhuya ngo pamusoro pokunyiswa ko dhorobha ro Bhabhironiya. Mugore ro cisere Kristu Acito Aviya, muporofita Isaya wakafemehwa kuti anange kuti dhorobha ro Bhabhironiya raizonyiswa. Iyena wakatonanga kuti mwanarume waidanwa Siro ndiyena waizonyisa  dhorobha iri no kutonangavo manera waizoita kuti aite izvi. (Isaia 44:27–45:2) Isaya wakanangazve kuti Bhabhironiya pakufamba ko nguva raizoparajwa rotamazve kugahwa. (Isaia 13:19, 20) Ndizvona kamare zvakaitika. Bhabhironiya rakatohwa ngo va Medho no Persiya mu gore ra 539 Kristu Acito Aviya. Paingaya no dhorobha iri nyamasi uno imathere basi.—Vonanyi vhidhiyo inoti: Bhaibheri Rakananga ngo Kuparajwa ko Bhabhironi, inowanika mu bhuku Mungadakara Kwenda no Kwenda mu cijijo co 3 fundo 5.

11. Ciporofita cinowanika pana Danieli 2:41-43, ciri kukwanirisika kudini nyamasi uno?

¹¹ Zviporofita zvo Bhaibheri azvizivi kukwanirisika basi munguva jo kare, asi zviri kukwanirisikavo nyamasi uno. Inga muezaniso, amborangariranyi ngo ciporofita ca Dhanyeri cinobhuya ngo Utongi wo Pasi Pese wo Angro-Amerikana. (Verenganyi Danieli 2:41-43.) Ciporofita ici cinonasa kuvonesa kamare kuti utongi uwu waizova wakavanga ‘inga simbi, worembejeka inga mavhu.’ Wari tiri kukwanisa kuvona kuti izvi ndizvonadi kamare. Reino Unidhu no Amerika vainga vakavanga inga simbi, ivona vakashanda ngo simba kuti vawine pa hondo jo nyika jese. Wari vari kuenderera mberi vano masoca akawanda maningi, asi simba ravo rinorembeswa ngo vandhu vavanotonga. Kazinji ivona vanoita gerevhe kuna vaya vano empereza no ku utongi kuti vaite zvavanoda. Muzivi umweni wo zvo poritika wo nyika jese wakananga kudari: “Nyamasi uno, akuna nyika imweni ino rusujunuko wo kusana mambo wovanoda kupinda Estadhus Unidhus, asi yova yakaparajana mu zvo uporitika.” Asi ku Reino Unidhu zviri kuitikavo zviro zvakafanana. Kondhoyo vandhu vakatoparajanavo, vecida kuziva kuti Reino Unidhu yakabatana papi no Uniao Europeya. Ngo ndava yokuparajana uku, Utongi hwo Pasi Pese wo Angro-Amerikana aukwanisi kutonga ngo simba.

12. Zviporofita zvinonangwa mu Bhaibheri zvinotiita kuti tikhohwenyi?

¹² Zviporofita zvakawanda zvinonangwa mu Bhaibheri zvakakwanirisika, zvinovangisa rutendo hwedu kuti zvinonanga Jehovha kuitira kumbeji zvinozokwanirisikavo. Pacina kukana-kana, tinotenderana no mukumbiro wakaitwa ngo mutari wo nduyo kuna Jehovha paakati: “Mwiha wangu wakaremba kugarira ruponeso hwenyu, asi ndinovetera mazwi enyu.” (Nduyo 119:81) Jehovha ngo kunaka kwake mwoyo “anotipa makore akawanda o ruvetero.” (Jeremia 29:11) Vetero yedu yo kumbeji aifiri pa kuvangisira kunoita vandhu asi pa zviya zvinogondesa Jehovha. Ngo kudaro, zvinosisira maningi kuenderera mberi ticiverenga Soko ra Mwari no kuvangisa kuthemba kwatinoriita.

13. Mukuzwirana na Nduyo 119:66, 138, ngorapi thangwe rimweni ratinaro rinotiita kuti tithembe Bhaibheri?

¹³ Thangwe rimweni rinotiita kuti itusu tithembe Bhaibheri ngo rokuti mazano aro ari kubesera vandhu vakawanda maningi. (Verenganyi Nduyo 119:66, 138.) Inga muezaniso, ngo besero rinowanika mu Bhaibheri varovorani vaida kurambana wari vaano mucadho unodakajisa. Vana vari mu mbhuri yakadari, vari kureriwa pa mbhuri vecijizwa vakangwaririka no vecidiwa.—Vaefeso 5:22-29.

14. Ipanyi muezaniso unovonesa kuti kushandisa zvinojijiswa ngo Bhaibheri zvingacinja upenyu hwo vandhu.

¹⁴ Vandhu vamweni vaivoniwa kuva vakashatisisa vakacinja upenyu hwavo ngo kushandisa zvinowanika mu Bhaibheri. Vonanyi kuti izvi zvakaitisa kudini ku musungwi umweni anodaninjwa kuti Jeki. c Iyena wainga bhandidhu rakashatisisa maningi zvokuti  pavasungwi vese vainga vakatongehwa kufa iyena ndiyena wainga wakashatisisa maningi kupinda vese. Njiku imweni iyena wakagaravo no umweni paainga ecijijiswa Bhaibheri. Rudo wakakhombijwa ngo hama ku musungwi uwu waingari ecijija Bhaibheri, wakapsasa maningi Jeki zvoita kuti iyena adevo kujija Bhaibheri. Iyena wakatanga kushandisa zvaaijija zvoita kuti acinje mugariro wake wova mundhu waushoni kamare. Pakufamba ko nguva Jeki wakava mucumaeri, wotogumira pa kubhabhatijwa. Iyena wakavangisira maningi pa kucumaera ku vasungwi vamweni zvoita kuti vasungwi varongomuna vagumire pa kujija cokwadi. Njiku yo kuuraiwa kwake poyakaguma, umwe wo adhivhogadho wake wakanaga kudari: “Jeki asipi mundhu wandakazivaya ko makumaviri o makore akapera, zvaakajijiswa ngo zvapupu zva Jehovha zvakacinja maningi upenyu hwake.” Jeki wakaguma pa kuuraiwa asi muezaniso wake unotibesera kuziva kuti Soko ra Mwari rino simba ro kucinja upenyu hwo vandhu.—Isaia 11:6-9.

15. Kuitisa kudini kushandisa zvinonangwa ngo Bhaibheri kunoita kuti vandhu va Jehovha vave vakasiyana no vamweni? (Vonanyi foto.)

¹⁵ Vashandiri va Jehovha vakabatana ngo kuti vanoshandisa zvinonangwa ngo Bhaibheri. (Johani 13:35; 1 Vakorinte 1:10) Runyararo no rubatano hwedu unovoneka maningi nyamasi uno ngo kuti vandhu vazinji vakaparajana ngo zviro zvo poritika, ganda kana manera avakakura. Rubatano uno vandhu va Jehovha wakapsasa maningi mujaha umweni anodanwa Jeni, wakakurira ku nyika imweni yo Afrika. Hondo payakatanga mu nyika iyi, iyena wakabatana no masoca pakufamba ko nguva otiza woenda kunyika inoita mugano no nyika yondhoyo. Ndikona kwaakazivira Zvapupu zva Jehovha. Iyena wakati: “Ndakajijira kuti vaya vanoita kunamata ko cokwadi avanghwiniri mu zvo poritika nee avazivi kuparajana. Mukusiyana ivona vanodisana ngo cavo.” Iyena wakaenderera mberi eciti: “Ndakapeja mukuvo wakareba mu upenyu hwangu ndecishandira nyika. Asi pandakajija  cokwadi, ndakapira upenyu hwangu kuti ndishandire Jehovha.” Upenyu hwake wakacinja kamare, kusiyapo kuhwisana no vandhu vakasiyana na iyena wari iyena anovhunja vandhu masoko akacijikira mu Bhaibheri kuti vave vakabatana. Zvecivoneka kuti mazano o mu Bhaibheri ari kubesera vandhu vakawanda vo ndau jakasiyana-siyana zvinovonesa kamare kuti itusu tingathemba zvarinonanga.

16. Ngenyi zvinosisira maningi kuvangisa rutendo hwedu ngo Soko ra Mwari?

¹⁶ Nyika ino iri kuenderera mberi yecishatisisa, ngo iyo ndava kuthemba kwatinoita Soko ra Mwari kunozova pamuejo. Vandhu vangaeja kutiita kuti tigare tecikana-kana. Inga muezaniso, ivona vangatonanga kuti Bhaibheri asipi bhuku rinothembeka kana Jehovha aaripi kushandisa muranda wakagondeka no wakangwara kuti atitungamirire. Kudari tikakhohwa kuti Soko ra Mwari ngo rokadi zvese izvi zvinoithwari azvizorembesi rutendo hwedu. Tinozotema civaringo “cokuzwira matongero ese a Jehovha nguva jese mbhera kumagumo.” (Nduyo 119:112, Sandujo yo Nyika Imbza) Atizopseruki kuvhunja vamweni ngo pamusoro po cokwadi no kuvavangisa kuti vapone mukuzwirana naco. (Nduyo 119:46) Tinozokwanisa kucungirira zvineso zvakasiyana-siyana zvatinosongana nazvo kubatanijavo kuteverehwa “no kusengerera no mudakaro.”—Vakorose 1:11; Nduyo 119:143, 157.

17. Vhesi yo gore inozotibeseresa kudini?

¹⁷ Zvokadi kamare tinobonga maningi Jehovha ngo kutibesera kwake kuti tizive cokwadi. Cokwadi cinotibesera kuti tive vandhu vakathiva no vakagajana. Cimwenizve cinotijijisa manera atinodikana kupona munyika ino yakashata kudari. Iconazve cinotipavo vetero yo kumbeji kwakanaka, Umambo hwa Mwari paunonga wecitonga pasi pano. Vhesi yedu yo gore ro 2023, inotibesera kuti itusu tienderere mberi tecithemba kuti Soko rese ra Mwari icokwadi.—Nduyo 119:160.