1-2. Ngenyi tinoenda ku Cirangarijo makore ese?

 POKHWEDERA 2.000 o makore Jesu naapera kupira upenyu hwake kuitira itusu, izvi ndizvona zvinotipa mukana wokuti tizorarame no kucikaperi. Pausiku acito afa Jesu wakavhunja vajiji vake kuti vaceukije muripo waakapari. Veciita izvi ngo njira yakareruka, vecishandisa pau no vhinyu.—1 Vakorinte 11:23-26.

² Itusu tinozwira zvakanangari Jesu ngokuti tinomuda maningi. (Johani 14:15) Gore ngo gore pamukuvo wo Cirangarijo itusu tinokhombija kubongesera kwedu ngo zvaakatiitirari, ngo kuwana mukuvo wokurangarira zvinoreva rufu hwake kwatiri no kuita mukumbiro ngo pamusoro pazvo. Cimweni ngo kuvangisira maningi mubasa ro kucumaera no kukoka vandhu vakawanda kuti vaviyevo paciitiko ici cinosisira. Zvakajeka kuti atizotenderi ciricese kana ariwese hake kuti atiite kuti titame kuenda ku Cirangarijo.

3. Tinozovonenyi mu cijijo ici?

³ Mu cijijo ici tinozovona njira ndhatu jinoshandiswa ngo vandhu va Jehovha kuti vavangisire pa kuceukija kufa ka Jesu: (1) kuita Cirangarijo ngo njira yaakajijisa Jesu, (2) kukoka vamweni kuti vaviye ku Cirangarijo no (3) kuita Cirangarijo pikija tiri pamugariro unonesa.

4. Ngozvapi zvatinojija makore ese pa hurukuro yo Cirangarijo, ngenyi tinodikana kuzvireremeja? (Ruka 22:19, 20)

⁴ Makore ese pamukuvo wo Cirangarijo, tinopurukira hurukuro inodavira muvhunjo munganani ngo pamusoro pokufa ka Jesu. Tinojija kuti ngenyi vandhu vanoda muripo no kujijazve  kuti kufa ko mundhu umwe kungaripisa kudini zvishaishi zvo vandhu vese. Cimwenizve catinojija ngo cokuti, ndiani anoha pau no kumwa vhinyu nokutizve ngoyapi revo yo zviro zviviri izvi. (Verenganyi Ruka 22:19, 20.) Kunja kwa zvondhozvo, tinovonazve makomborero ano vaya vano vetero yo kuzorarama no kucikaperi pasi pano. (Isaia 35:5, 6; 65:17, 21-23) Zvinosisira maningi kureremeja zviro izvi. Zviuru no zviuru zvo vandhu apana zvazvinoziva ngo pamusoro po zviro izvi. Nee avareremeji muripo nguva jese. Cimwenizve ivona avaceukiji kufa ka Jesu ngo njira yaakajijisa. Kuitisa kudini?

5. Mukuvo mushomani vapostori va Jesu na vafa zvicinyi zvakaitika?

⁵ No papera mukuvo mushoma vazinji vo vajiji va Jesu no vapera kufa, mu ungano makatanga kunghwina Makristu o kunyepa. (Mateu 13:24-27, 37-39) Ivona vaivereketa “zviro zvakashata zvinozopausa vajiji kuti vavatevere.” (Mabasa o Vapostori 20:29, 30) Cimwe co zviro zvakashata zvaiizwa ngo Makristu okunyepa cainga cokuti Jesu aazivi kupira muviri wake kamwe basi “kuti atore zvishaishi zvo vazinji.” inga zvinojijiswa ngo Bhaibheri. Ivona vanonanga kuti muripo wa Jesu waidikana kundogara weciithwa basi mukuvo wese. (Vahebheru 9:27, 28) Nyamasi uno vandhu vakanaka mwoyo vari kutendera jijiso iyi. Vandhu vamweni vanoenda ku magerejha sumana jese kana njiku jese kamare, kuti vaceukije kufa ka Jesu kwavanodaninjaya kuti “Misa.” b Magerejha amweni aaceukiji kufa ka Jesu sumana jese kana kuti njiku jese. Vamweni vakona avanasi kuzwisisa zvinobatanijwa pa muripo wo kufa ka Jesu. Vamweni vanojivhunjisa kudari: Kufa ka Jesu kunoreva kuti zvishaishi zvangu zvingaregerehwadi kamare? Ngenyi vamweni vanoita muvhunjo uwu? Vanoita muvhunjo uwu ngo kuti vanonga vapera kukhohweswa ngavayani vanonangaya kuti muripo wa Jesu aukwanisi kuregerera zvishaishi zvedu zvese. Makristu o cokwadi anobeseresa kudini vandhu ava kuti vazwisise manera aushoni o kuceukija muripo wo kufa ka Jesu?

6. Ngozvapi zvakapfumbuhwa mucikwata cimwe co vajiji vo Bhaibheri mu gore ra 1872?

⁶ Mugore ra 1870, hama Charles Taze Russell no hama jimweni vakatanga kuita urongwa wokujija Bhaibheri. Ivona vaida kuziva kuti muripo wokufa ka Jesu unorevenyi nokuti vangazviitisavo kudini kuti vaceukije kufa kwake. Kuvhira mugore ra 1872, ivona vakazwisisa kuvha mu Bhaibheri kuti Jesu wakafa kuti aponese upenyu hwo vandhu vese. Ivona vakaita zvese zvavaikwanisa kuti vavhunje vamweni zvavaingaro vakajija vecishandisa mabhuku, marevhista no majhorinari. Inga zvaiizwa munguva jo vapostori, ivona vakatanga kuceukija kufa ka Jesu kamwe pa gore.

7. Kupsakisisa kwakaita Makristu okare kunotibeseresa kudini nyamasi uno?

⁷ Nyamasi uno, itusu tinobesereka ngo zvakapfumbuhwari ngo vajiji ava vo Bhaibheri. Kuitisa kudini? Jehovha watibesera kuzwisisa kuti muripo wo kufa ka Jesu unorevenyi nokuti ngozvapi zvaanozoita kuno vandhu kumbejiyo. (1 Johani 2:1, 2) Takajijazve kuti kuno vetero mbiri kuna vaya vanoshandira Jehovha, vamweni vanozoenda korarama kudenga, zviuru no zviuru zvinozopona pasi pano kwenda no kwenda. Kurangarijisisa manera Jehovha anotida, manera atinobesereka ngo muripo wo kuzvipira wa Jesu, zvinotiita kuti tikhwedere phedo maningi na Jehovha. (1 Pedhru 3:18; 1 Johani 4:9) Inga Makristu  okare, itusu tinokokavo vandhu kuti vaviye kuzovona Cirangarijo cokufa ka Jesu ngo njira yaakajijisa.

8. Ngozvapi zviri kuizwa ngo vandhu va Jehovha kuti vakoke vandhu kuti vaviye ku Cirangarijo? (Vonanyi foto.)

⁸ Ko makore akawanda vandhu va Jehovha vanokoka vandhu kuti vaviye ku Cirangarijo. Mu gore ra 1881, hama no hambzaji jo ku Estadhus Unidhus, jakakokwa kuti jiende ku muzi ko hama imweni kovona musongano unosisira maningi ku Allegheny, Pennsylvania. Pakufamba ko nguva, ciitiko ici cinosisira cakatanga kuithwa mu ungano jese. Mu mweji wa Março mu gore ra 1940, vacumaeri vakavangiswa kuti vakoke vandhu vanodakarira kuti vaviye kuzovona ciitiko cinosisira. Ngokudaro mu gore ra 1960, Bheteri raka impirimiri mukoka jo Cirangarijo pa vhaza yo kutanga kuitira ungano jese. Kuvhira pondhopo kwakakovaniswa zviuru no zviuru zvo mukoka. Asi ngenyi tinoita zvese zvatinokwanisa kuti tikoke vandhu?

9-10. Ndiyani anobesereka ngo kukoka vandhu kuti vaviye ku Cirangarijo? (Johani 3:16)

⁹ Thangwe rimweni rinotiita kuti tikoke vandhu kuti vaviye ku Cirangarijo ngo rokuti tinoda kuti ivona vazive zvatiri kuitihwa ndi Jehovha na Jesu. (Verenganyi Johani 3:16.) Catinoda ngo cokuti, zvavanojija no kuzwa panonga peciithwa Cirangarijo, zvivabaye mwoyo kuti ivona vade kuva vashandiri va Jehovha. Izvi azvibeseri ivona basi.

¹⁰ Itusu tinokokavo vaya vakaima kushandira Jehovha. Tinoita zvondhozvo kuti ivona vaceukije kuti Jehovha aciri kuvada maningi. Vazinji vanotendera mukoka uwu. Itusu tinodakara  maningi ngo kutendera kwavo.Kuviya kwavo pa Cirangarijo kunoita kuti ivona vaceukije mukuvo wovainga vakadakara maningi pavaishandira Jehovha. Vonanyi muezaniso wa hambzaji Monika. c Pakatanga mutungu wo korona vhiru, ivona vakatangazve kucumaera no Zvapupu zva Jehovha. Pavakapera kuvona Cirangarijo mu gore ra 2021, ivona vakananga kudari: “Cirangarijo ici cava cinosisira maningi kwandiri. Pasure po makore anokwana kuita makumaviri, ndatangavo kukoka vandhu kuti vaviye ku Cirangarijo. Zvecivoneka kuti ndinobonga maningi ngo zvakandiitira Jehovha na Jesu, ngo kudaro ndakaita zvese zvandaikwanisa kuti ndikokevo vandhu kuti vaviye ku Cirangarijo.” (Nduyo 103:1-4) Tinoita zvese zvatinokwanisa kuti tikoke vandhu kuti vaviye ku Cirangarijo azvinenyi kuti ivona vanotendera mukoka kana kuti haiwa, zvinosisira maningi ngo zvokuti Jehovha anoreremeja kuvangisira kwedu.

11. Jehovha anokomboreresa kudini kuvangisira kwatinoita kuti tikoke vandhu kuti vaviye ku Cirangarijo? (Hagayo 2:7)

¹¹ Jehovha anokomborera kuvangisira kwatinoita kuti tikoke vandhu kuti vaviye ku Cirangarijo. Mu gore ra 2021, pikija no kurambijwa kuita zvimweni ngo ndava yo mutungu wo korona vhiru, takava no vandhu vakawanda maningi vaticizivi kumbova navo vakavona Cirangarijo vanokwana kuita 21.367.603 yo vandhu. Mutengo uwo unopeta kaviri mutengo wo Zvapupu zva Jehovha kutenderera pasi pese. Jehovha aanesehwi ngo kuwanda kunoita vandhu vanoviya ku Cirangarijo, asi anoneseka nga umwe na umwe anoviya konayo. (Ruka 15:7; 1 Timoti 2:3, 4) Tino cokwadi cokuti patinokoka vandhu kuti vaviye ku Cirangarijo Jehovha anotibesera kuti tiwane vandhu vaya vano mwoyo unoda.—Verenganyi Hagayo 2:7.

12. Ngozvapi zvingaita kuti tinesehwe kuenda kovona Cirangarijo? (Vonanyi foto.)

¹² Jesu wakananga kuti mu njiku jo kupejisira taizosongana no matambujiko akawanda, kuteverehwa ngo vo pambhuri no vamweni, mutungu no zvimwenivo. (Mateu 10:36; Marko 13:9; Ruka 21:10, 11) Zviro zvakadari inga izvi zvingatiita kuti tinesehwe kuenda ku Cirangarijo. Hama no hambzaji jedu jiri kuitisa kudini kuti jihwisane no zvineso zvakadari inga izvi, Jehovha ari kuvabeseresa kudini?

13. Jehovha wakakomboreresa kudini cicunge ca hama Artemi ngo kuita kwavo Cirangarijo pikija pavainga mukadheya?

¹³ Patinonga tiri mukadheya. Hama jiri mukadheya jiri kuita zvese zvajinokwanisa kuti jikwanise kuvona Cirangarijo co kufa ka Jesu. Vonanyi muezaniso wa hama Artemi. Pamukuvo wo Cirangarijo mu gore ra 2020, iyona yainga yakafungihwa mukadheya dokowane no vasungwi vamweni vanokwana kuita vashanu. Pikija zvakadaro ivona vakaita nasiriro kuti vawane pau no vhinyu kuti vakwanise kuita Cirangarijo no kunasirira hurukuro kuitira ivona vega. Asi vasungwi vamweni vainga mukatimo vaibhema maningi no kubhuya magama anotuka. Hama Artemi vakaitenyi? Ivona vakakumbira vanarume ava kuti vaime kubhema no kubhuya magama anotuka kuti vamboita Cirangarijo panguva imwe basi. Zvinoshamaisa ngo zvokuti ivona vakatendera. Hama Artemi vakati: “Ndakajipira kuti ndivasanangurire ngo pamusoro po Cirangarijo.” Pikija vakaramba kupurukira havo pamukuvo wondhowo hama Artemi veciita  hurukuro yavo yo Cirangarijo, ivona vakatanga kuita muvhunjo.

14. Zvapupu zva Jehovha zvakaitisa kudini kuti zviite Cirangarijo pikija no mutungu wo korona vhiru?

¹⁴ Mutungu wo korona vhiru. Ngo ndava yo mutungu uwu, Zvapupu zva Jehovha azvicaikwanisepi kuenda koita Cirangarijo ku Nyumba yo Umambo. Izvi azvizivi kuvaita kuti vatame kuceukija kufa ka Jesu. d Ungano jaikwanisa kunghwina mu interneti jakaita Cirangarijo jecishandisa vhidhiyo shamadha. Vandhu vazinji avacaikwanisepi kunghwina mu interneti, waro vakaitisavo kudini kuti vavone Cirangarijo? Kunyika jimweni, hurukuro yo Cirangarijo yakaizwa kwecishandiswa radhiyo no terevhizau. Kusiyapo zvondhozvo mabheteri akawanda akagaravhari hurukuro mundumi jinodarika 500. Hama jakatora hurukuro jakagaravhahwi kuenda kopekeja vainga vacikwanisi kunghwina mu interneti pikija vaya vaigara ndhambo kamare vakakwanisa kuitavo Cirangarijo.

15. Majijenyi kuvha ku muezaniso wa Suwi?

¹⁵ Kuteverehwa pa mbhuri. Kuvandhu vamweni  cineso cingavaita kuti vatame kuenda kovona Cirangarijo, kuteverehwa pa mbhuri. Vonanyi muezaniso wo mujiji umweni wo Bhaibheri anodanwa Suwi. Kwecicota njiku imwe kuitira Cirangarijo mu gore ra 2021, Suwi wakavhunja mujijisi wake wo Bhaibheri kuti aacaizokwanisa kuenda ku Cirangarijo ngo ndava yo kuteverehwa pa mbhuri. Mujijisi wake wo Bhaibheri wakaverenga bhuku ra Ruka 22:44. Pondhopo iyena wakamusanangurira kuti paya patinohwisana no mugariro unonesa kudari, tinodikana kutevejera muezaniso wa Jesu. Iyena waiita mukumbiro kuna Jehovha wosiya zvese munyara jake. Njiku yakatevera, Suwi wakakwanisa kuwana pau no vhinyu no kutokwanisazve kuvona Kunamata ko Mangwanani ko njiku yo Cirangarijo mu jw.org. Wakakwanisa kuvona hurukuro yo Cirangarijo ecishandisa foni yake kamare. Perapo Suwi wakatarira masoko aya ku mujijisi wake wo Bhabheri, iyena wakati: “Zvamakandivhunjaya zuro zvakandivangisa maningi. Inini ndakaita zvese zvandaikwanisa kuti ndivone Cirangarijo, Jehovha wakandibesera. Andizvizivi kuti ndinganangisa kudini manera andakadakara no manera andingabonga Jehovha ngo kundibesera kwake.” Imwimwi munovona kuti Jehovha angamubeseravo pamunonga muri pamugariro wakaezana na uwu?

16. Ngenyi tingava no cokwadi cokuti Jehovha anokomborera kuvangisira kwatinoita kuti tiende kovona Cirangarijo? (Varoma 8:31, 32)

¹⁶ Jehovha anoreremeja maningi kuvangisira kwatinoita kuti tiende koceukija kufa ka Jesu. Ngative no cokwadi cokuti Jehovha anozotikomborera ngo kubongesera kwatinoita pa zvese zvaanotiitira. (Verenganyi Varoma 8:31, 32.) Ndiyo ndava tinoda kuita zvese zvatinokwanisa kuti tiende kovona Cirangarijo cokufa ka Jesu no kubatikana mubasa ro kucumaera pa sumana Cirangarijo cicito caithwa no pacinopera kuithwa.