1-2. Pakupera kubhabhatijwa ngozvapi zvatinodikana kwenderera mberi teciita? Sananguranyi.

 IMWIMWI munoaja kucenesa nyumba yenyu? Mucito mathutha kwenda ku muzi kwenyu, zvingaita kuti makaamba ngo kuicenesa. Zvicinyi zvaizoitika kudari mukatama kuicenesazve? Zvakajeka kuti ngo kukasika, nyumba iyi yaizozara ngo svina no mabukuta akawanda. Kudari tecida kuti nyumba yedu ienderere mberi yakacena, tinodikana kugara tecindoicenesa.

² Mu njira yakafanana, kudari tiri kuda kuva no murangariro no undhu unodakajisa Jehovha tinodikana kuita zviri zvese. Izvokadi kamare kuti, ticito takabhabhatijwa takadikana kuita cinjo jakawanda maningi kamare mu upenyu hwedu kuti tijicenese “pa zviro zvese zvinosvipisa muviri no mujimu.” (2 Vakorinte 7:1) Wari tinodikana kuzwira ndhungamiriro ya mupostori Pauro ‘yo kwenderera mberi teciita vapsa.’ (Vaefeso 4:23) Ngenyi tinodikana kuita zvondhozvo? Ngokuti zvinoitwa mu nyika ino zvingaita kuti itusu tive vandhu vacikazivi kucena pamberi pa Jehovha. Kuti izvi zvitame kuitika no kwenderera mberi tecidakajisa Jehovha, tinodikana kunasa kusotesesa zviri mu murangariro mwedu, undhu hwedu no zviro zvatinodakarira.

3. ‘Kucinja murangariro’ kunorevenyi? (Varoma 12:2)

³ Tingaitisa kudini kuti ticinje murangariro wedu? (Verenganyi Varoma 12:2.) Gama ro Cigiriki rokuti “kucinja murangariro” ringasandujwa inga “kucinjwa ko murangariro.” Izvi azvirevi kuti tinodikana kuita basi zviro zvakanaka mu upenyu. Asi tinodikana kusotesesa zvatiri ngo mukati, toita  cinjo jinodikana kuti tidakajise Jehovha. Izvi atidikani kuzviita kamwe basi, asi tinodikana kwenderera mberi tecizviita.

4. Ngozvapi zvatinodikana kuita kuti murangariro wedu utame kuumbwa ngo nyika ino?

⁴ Patinozova vandhu vakakwana, tinozokwanisa kudakajisa Jehovha mukuvo wese kamare. Mukuvo uwu ucito wakaguma, tinodikana kuvangisira kuti tiite zviro zvinodakajisa Jehovha. Pana Varoma 12:2 mupostori Pauro wakananga kuti tinodikana kucinja murangariro wedu kuti tizive zvinoda Jehovha kuti itusu tiite. Atidikani kutendera kuti nyika ino itiumbe. Tinodikana kujipopora tivone kuti murangariro wedu uri kutungamirihwa ngo zvinoda Jehovha kana uri kutungamirihwa ngo nyika ino.

5. Ngojapi muvhunjo jatinodikana kujiita kuti tivone kukhwedera ko njiku ya Jehovha? (Vonanyi foto.)

⁵ Amborangariranyi izvi basi. Bhaibheri rinonanga kuti tinodikana “kunasa kuziva kuguma ko njiku ya Jehovha.” (2 Pedhru 3:12) Mungajivhunjisa kudari: ‘Kureva kuti manera andiri kupona anovonesa kuti ndiri kuzwisisa kuti tiri kupona mu njiku yokupejisira? Zvivaringo zvangu ngo pamusoro po kujija ku univhersidhadhi no basa zvinovonesa kuti kushandira Jehovha iciro cinosisira mu upenyu hwangu? Ndinothemba kuti Jehovha anozopa zvandinoda no zvinodiwa ngo mbhuri yangu kana ndinoneseka maningi ngo zviro zvo kunyama?’ Pacina kukana-kana, Jehovha anozodakara maningi ngo kuvona kuti itusu tiri kuita zvese zvatinokwanisa kuti timudakajise.—Mateu 6:25-27, 33; Vafiripi 4:12, 13.

6. Ngozvapi zvatinodikana kwenderera mberi teciita?

⁶ Tinodikana kunasa kusotesesa manera edu okurangarira mukuvo wese, perapo toita cinjo jinodikana. Mupostori Pauro wakati: “Endereranyi mberi mecijipopora kuti  muvone kuti muno rutendo kana kuti haiwa; rambanyi mecijieja zvamuri.” (2 Vakorinte 13:5) Kuva no “rutendo” zvinobatanija zvizinji kusiyapo basi kwenda ku musongano no basa ro kucumaera mukuvo no mukuvo. Ikona kunobatanija murangariro wedu no zviya zvatinodakarira. Ngo iyo ndava, tinodikana kucinja murangariro wedu ngo kuverenga Soko ra Mwari, kujija kurangarira ngo manera anorangarira Jehovha no kuita zvinomudakajisa.—1 Vakorinte 2:14-16.

7. Mukuzwirana no Vaefeso 4:31, 32, ngocapi ciro cimweni catinodikana kuita, ngenyi zvinganesa kuita zvondhozvo?

⁷ Verenganyi Vaefeso 4:31, 32. Kusiyapo kucinja basi manera edu okurangarira, itusu tinodikana “kusimira undhu hupsa.” (Vaefeso 4:24) Kuita izvi zvinoda kuvangisira. Kuti tikwanise kuzviita, tinodikana kusiya zviro zvimweni zvakashata, zvakadari inga kuva no bundu, ushungu pomwe no kunyangajwa. Zvinganesa kuita izvi. Ngenyi? Ngokuti zviro zvimweni zvakona zviciri kutinesera maningi kuti tizvikanganwe. Inga muezaniso, Bhaibheri rinonanga kuti vamweni ‘vanonyangajwa ngo kukasika’ no ‘vakazara ngo ushungu.’ (Mazwi Akangwara 29:22) Vandhu vano zvineso zvakadari inga izvi vanodikana kwendera mberi vacivangisira pikija paya pavanopera kubhabhatijwa, inga zvatinoda kuvona pa muezaniso wo ndima inotevera.

8-9. Muezaniso wa hama Sitefane ungatibeseresa kudini kuti tikwanise kuvhura undhu hwokare?

⁸ Hama imweni inodanijwa Sitefane yaikasika maningi kunyangajwa. Iyona yakananga kudari: “Pikija pandakapera kubhabhatijwa ndaidikana kushanda ngo simba kuti nditame kukasika kunyangajwa. Pa vhaza imweni pandainga mu basa rokucumaera aripo wakandibira radhiyo yangu yo mu karu. Inini ndakamutevera, pandakaguma phedo no mbavha iyi, iyona yakatiza yombhweja radhiyo pasi. Pandakaverengera vakuru manera ondakaiwana radhiyo yangu, mukuru umweni wakandivhunjisa kudari: ‘Sitefane nowakaiwana mbavha iyi, waiida kuiitenyi?’ Zvakandivhunjisari mukuru uwu zvakandiita kuti ndirangarire no kundiita kuti ndienderere mberi ndecipsaka runyararo.” b

⁹ Inga zvakaitika na hama Sitefane, pikija tikavona kuti takwanisa kusiya mugariro jimweni jakashata, zvingatangazve kuviyazve pa mukuvo wokuti aticaizvivetera. Kudari zvikamuitikira, mucapera simba kana kutorangarira kuti imwimwi amuripi Mukristu waushoni. Mupostori Pauro wakananga kudari: “Pandinoda kuita zvakanaka, zvakashata zvinotanga kundigumira.” (Varoma 7:21-23) Inga zvataperari kuvona, kudari tikatama kucenesazve nyumba yedu iyona inozozara ngo bukuta no svina yakawanda maningi. Mu njira yakaezanana, ngo ndava yo kutama kwedu kukwana zviro zvakashata zvataiitaya kare zvingaviyazve. Ngo kudaro, zvinoda kuvangisira kuti tizvinyise. Tingazviitisa kudini?

10. Ngozvapi zvamunodikana kuita kuti munyise zvirovejeso zvakashata? (1 Johani 5:14, 15)

¹⁰ Kudari muno cirovejeso jakashata, kumbiranyi Jehovha kuti amubesere, mothemba kuti iyena anozwa no kuzomubesera. (Verenganyi 1 Johani 5:14, 15.) Ndizvona kamare kuti Jehovha aazopeji ngo mushamaiso cirovejeso catinaco cakashata, asi anozomupekeja simba kuti mukwanise kuhwisana naco. (1 Pedhru 5:10) Tanganyi kuita zviro mukuzwirana no zvamakakumbira pa mukumbiro  wenyu. Ngwariranyi kuti mutame kuita zviro zvinovonesa kuti mucino undhu hwokare. Inga muezaniso, munodikana kungwarira kuti mutame kuvona mafirmi, urongwa wo muterevhizau kana kuverenga zviro zvimweni zvinoita kuti muvezve no undhu hwokare. Mucazaja murangariro wenyu ngo zviro zvakashata.—Vafiripi 4:8; Vakorose 3:2.

11. Ngozvapi zvatinodikana kuita kuti tisimire undhu hupsa?

¹¹ Pamunovhura undhu hwokare, zvinosisira maningi kusimira undhu hupsa. Mungazviitisa kudini izvi? Idanyi kutevejera mugariro ja Jehovha pamunonga mecijija ngo pamusoro pake. (Vaefeso 5:1, 2) Inga muezaniso, pamunoverenga ciitiko ciri cese ciri mu Bhaibheri, jivhunjisenyi kudari: ‘Inini ndiri mundhu anoregerera?’ Pamunoverenga Bhaibheri movona manera anotaja Jehovha varombo, jivhunjisenyi kudari: ‘Kunanga kuti ndinoneseka no hama jangu jinoda besero, ndovonesa zvondhozvo ngo zvandinoita?’ Ngo kudaro, endereranyi mberi mecicinja murangariro wenyu ngo kusimira undhu hupsa, mova mundhu anosengerera.

12. Bhaibheri rakacinjisa kudini upenyu hwa hama Sitefani?

¹² Hama Sitefani vambonangwaya, padoko ngo padoko ivona vakaenderera mberi vecisimira undhu hupsa. Ivona vakati: “Pasure po kubhabhatijwa, ndakasongana no mugariro jakasiyana-siyana jaizondiita kuti ndinyangajwe. Ndakajijira kuhwisana no cineso ici, ngo kugara ndhambo no vaya vaindiambira, kana kutoita zvimweni kuti nditame kunyangajwa. Vandhu vakawanda kubatanijavo no mukaji wangu, vakandisimba ngo manera ondakanyisa zvineso izvi. Inini ndakatozvivonavo kuti ndainga ndacinja kamare. Asi andizivi kukwanisa kuzviita ngo simba rangu. Ndino cokwadi cokuti Bhaibheri rino simba ro kucinja upenyu hwo vandhu.”

13. Ngozvapi zvinozotibesera kuti tiite zviro zvakanaka? (Vagaratiya 5:16)

¹³ Verenganyi Vagaratiya 5:16. Kuita zviro zvakanaka azvizivi kureruka, asi ngo kukova kwese Jehovha anotipa mujimu wake mucena. Patinojija Bhaibheri, itusu tinonga tecitendera kuti mujimu mucena wa Jehovha utibesere. Tinoashirazve mujimu mucena patinonga tiri pamusongano. Pa musongano tinopeja mukuvo no hama no hambzaji tecivangisana no kubesana kuti tiite zvakanaka. (Vahebheru 10:24, 25; 13:7) Patinoita mukumbiro tecideketera kuti Jehovha atibesere kunyisa cirovejeso catainga tinaco cakashata, anozotipa mujimu mucena kuti ativangise. Kujija Bhaibheri, kwenda kumusongano no kuita mukumbiro, azvizoiti kuti zvirovejeso zvedu zvakashata zvipere. Asi izvona zvinotibesera kuti titame kuita zviro izvi, togumira pa kushaisha. Inga zvinonangwa pana Vagaratiya 5:16, kudari tikaenderera mberi tecifamba mu mujimu ‘atizoiti zvido zvo nyama.’

14. Ngenyi zvinosisira maningi kwenderera mberi tecisakurira murangariro jakacena?

¹⁴ Patinoda kuita zviro zvaushoni zvinotibesera kuti tive no ushamwari hwaushoni na Jehovha, zvinosisira kwenderera mberi tecizviita, tovangisira kuti tive no murangariro jakacena. Ngenyi? Ngokuti umwe wo vavengi vedu anoshanda nguva jese. Muvengi uwu ndi cido catinaco co kuda kuita zvakashata. Pikija patinopera kubhabhatijwa tingava no cido cokuhwirirazve kuita zviro zvatinoziva kuti aticaidikanazve kuzviita, zvakadari inga kutamba cabutha, kumwa maningi doro no kuvona zvoumitu-mitu. (Vaefeso 5:3, 4)  Hama imweni iri mujaha yakananga kudari: “Cineso cikuru candiri kuhwisana naco ngo co kudakarira mwanarume doni. Ndairangarira kuti cineso condhoco ngo co mukuvo mushomani, asi mbhera wari zviciri kundinesa.” Zvicinyi zvamungaita kudari muri kuhwisana no cido cakashata cakavanga maningi?

15. Ngenyi zvinosisira kuziva kuti vamweni vakakwanisa kunyisa ‘muejo jakatojana’ no jedu? (Vonanyi foto.)

¹⁵ Kudari muri kuhwisana no cirovejeso cakashata, ceukijanyi kuti amuripi mwega. Bhaibheri rinonanga kudari: “Imwimwi muri kusongana no muejo jakatojana no muejo jo vandhu vese.” (1 Vakorinte 10:13a) Bhaibheri rimweni rakasanduja vhesi iyi ngo njira iyi: “Zvineso zvamuri kusonganari nazvo ndizvona zviri kusongana no vandhu vamweni.” Masoko aya akavhunjwa hama no hambzaji jo ungano yo Korinte. Vandhu vamweni vainga mu ungano iyi vaiita zvoupombo, vanarume vaivatana no vanarume no zvidakwa. (1 Vakorinte 6:9-11) Imwimwi munorangarira kuti povakapera kubhabhatijwa, avazivi kuvazve no cido cokuhwirira koita zvovaiitaya? Ndizvona kuti wari ivona vainga vaamakristu akazojwa, asi ngo ndava yo kutama kukwana vaizova no zvido zvakashata nguva jimweni. Kuziva zvondhozvo zvingatibesera. Ngenyi? Tavona kuti azvinenyi no zvineso zvatiri kuhwisana nazvo, vamweni vakakwanisa kuzvinyisa. Imwimwi mungakwanisa kuva no “rutendo hwakavanga, meciziva kuti matambujiko akadaro ari kuwananavo no hama jenyu jo munyika yese.”—1 Pedhru 5:9.

16. Ngozvapi zvamucikadikani kurangarira, ngenyi?

¹⁶ Mucaeja henyu kurangarira kuti apana anozwisisa zvineso zvamuri kusongana nazvo. Kurangarira ngo njira iyi zvingamuita kuti mugume pa mbhejiso yokuti amuzokwanisi kunyisa zvineso zvamuri kusongana nazvo nokutizve imwimwi amuna simba ro kucijikira zvinesozvo. Vonanyi basi zvinonanga  Bhaibheri: “Mwari wakagondeka, iyena aazotenderi kuti muejwe mbhera pamucikakwanisi kucungirira. Iyena anozomubesera kuti mukwanise kucungirira muejo iji.” (1 Vakorinte 10:13b) Izvi zvinoda kunanga kuti pikija cido cenyu cokuda kuita zvakashata cakavanga maningi, imwimwi mungakwanisa kucinyisa. Ngo besero ra Jehovha tingakwanisa kunyisa cirovejeso co kuita zvakashata.

17. Pikija ticikakwanisi kugara ticina zvido zvakashata, ngozvapi zvinodikana kuithwa ngo umwe na umwe wedu?

¹⁷ Nguva jese ceukijanyi kuti: Itusu tiri vandhu vacikazivi kukwana, zvinganesa kuti titame kuva no zvido zvakashata nguva jimweni. Kudari mukava no cido cakashata imwimwi mungakwanisa kucinyisa ngo kukasika, inga ndi Josefa wakatiza mukaji wa Potifari. (Genesi 39:12) Imwimwi amudikani kutendera kuwira mu zvido zvakashata, moguma pa kushaishira Jehovha.

18-19. Ngojapi muvhunjo jatingadikana kujiita patinonga tecicinja murangariro wedu?

¹⁸ Kucinja murangariro wedu zvinobatanija kuvangisira kuti tive no murangariro pamwepo no zviito zvinodakajisa Jehovha. Kuti tikwanise kuita izvi, mukuvo wese tinodikana kujipopora tojivhunjisa kudari: ‘Zvandinoita zviri kuvonesa kuti inini ndiri kuzwisisa kuti mugumo waaphedo? Ndiri kukwanisa kusimira undhu hupsa? Ndiri kutendera kuti mujimu wa Jehovha undibesere kuti nditame kuwira mu zvirovejeso zvakashata, ndogumira pakuita cishaishi?’

¹⁹ Pamunonga mecijipopora mucavetera kuti muve makakwana. Dakaranyi ngo zviya zvamuri kukwanisa kuita. Kudari mukazwisisa kuti munodikana kuitisa nane zviri zvese, mucandoremba. Kusiyapo zvondhozvo, tevejeranyi ndhungamiriro iri pana Vafiripi 3:16, inoti: “Azvinenyi no makurire ataita, ngatirambe tecifamba mu gwanja rondhoro.” Kudari mukaita izvi, ivanyi no cokwadi cokuti Jehovha anozomukomborera ngo kuvangisira kwamuri kuita kuti mucinje murangariro wenyu.