MUSORO WO KUJIJA WO 14
“Mukaita Kudaro, Vese Vanozoziva kuti Imwimwi Muri Vajiji Vangu”
“Mukaita kudaro, vese vanozoziva kuti imwimwi muri vajiji vangu: kudari mukadisana ngo cenyu.”—JOHANI 13:35.
NDUMBO 106 Sakuriranyi Vara ro Rudo
ZVATICAJIJA a
Vandhu vanorangarirenyi pavanovona rudo uno vandhu va Jehovha? (Vonanyi ndima 1)
1. Ngozvapi zvinovoniwa nga vaya vari kutanga kusistiri musongano pa Nyumba yo Umambo? (Vonanyi foto.)
AMBORANGARIRANYI ngo varovorani vari kutanga kusistiri musongano pa Nyumba yo Umambo. Ivona vanoshamaisika maningi ngo manera avanoashihwa no rudo hwavanokhombijirana mu ungano. Pavanonga vari mu gwanja vecienda kumuzi, mukaji anovhunja mwamuna wake kudari: ‘Vandhu ava vakasiyana kamare no vandhu vamweni vatinoziva.’
2. Ngenyi vamweni vakasiya kushandira Jehovha?
2 Rudo uno vandhu va Jehovha unosisira maningi. Ngo zvokadi kuti Zvapupu zva Jehovha azvizivi kukwana. (1 Johani 1:8) Patinonasa kuziva hama jo mu ungano, zvakareruka maningi kuzovona zvavanoposa. (Varoma 3:23) Zvinosuruvarisa ngo zvokuti vandhu vamweni vakatendera kuti kuposa kwakaita vamweni kuvaite kuti vasiye kushandira Jehovha.
3. Vandhu vaizozivisa kudini Makristu o cokwadi? (Johani 13:34, 35)
3 Vonanyizve basi vhesi yakacijikira musoro uwu. (Verenganyi Johani 13:34, 35.) Vandhu vangazivisa kudini Makristu o cokwadi? Ngo rudo hwavanokhombija. Bhaibheri arinangi kuti ivona vaizova vandhu vakakwana. Makwanisa kuvona kuti Jesu apa aazivi kunanga kudari: ‘Imwimwi munozoziva kuti muri vajiji vangu.’ Asi iyena wakati: “Mukaita kudaro, vese vanozoziva kuti imwimwi muri vajiji vangu.” Apa Jesu aacaingepi ecinanga kuti vajiji vake ndivona vega basi vaizoziva kuti mu ungano munokhombijihwana rudo. Vandhu vokunja vaizokwanisa kuvonavo izvi.
4. Muvhunjo japi jingaithwa ngo vamweni ngo pamusoro po Makristu o cokwadi?
4 Vamweni vokuti asipi Zvapupu vangajivhunjisa kudari: ‘Mu njira yapi rudo ungavonesa kuti muri muteveri wa Jesu? Jesu wakakhombijisa kudini rudo ku vapostori vake? Tingatevejeresa kudini muezaniso wa Jesu nyamasi uno?’ Pikija itusu tiriyari Zvapupu zva Jehovha, tinodikana kurangarira ngo muvhunjo iji. Tikaita kudaro, zvinozotibesera kuti tinase kukhombija rudo maningi-ningi paya patinovona kuposa kwavanotiitira.—Vaefeso 5:2.
NGENYI TINGANANGA KUTI RUDO NDIWONA UNOVONESA VATEVERI VA JESU VO COKWADI?
5. Magama a Jesu anowanika pana Johani 15:12, 13, anorevenyi?
5 Jesu wakananga kuti vateveri vake vaizodisana ngocavo ngo njira inoshamaisa. (Verenganyi Johani 15:12, 13.) Vonanyi kuti Jesu wakavavhunja kudari: “Disananyi ngocenyu inga zvandakamuda.” Izvi zvinoda kurevenyi? Jesu wakasanangurira vajiji vake kuti ivona vaidikana kuda vamweni kupinda manera ovaijida pa cavo kana kuti ivona kudari zvecidiwa vaitodikana kudira upenyu hwavo pa ngozi kuti vaponese vamweni. b
6. Bhaibheri rinokhombijisa kudini kuti rudo unosisira maningi?
6 Bhaibheri rinojijisa kuti rudo ndi ciro cinosisira maningi. Vandhu vazinji vanodakarira maningi mavhesi anoteverari: “Mwari i rudo.” (1 Johani 4:8) “Idai mudoni wako inga zvaunojiita.” (Mateu 22:39) “Rudo hunofukija zvishaishi zvakawanda.” (1 Pedhru 4:8) “Rudo ahuperi.” (1 Vakorinte 13:8) Mavhesi aya no mavhesi amweni anonasa kujekesa kamare kuti zvinosisira maningi kukhombija mugariro uwu unodakajisa.
7. Ngenyi Sathana aazokwanisi kuita kuti vandhu vave vakabatana no kudisana ngocavo?
7 Vandhu vazinji vanojivhunjisa kudari: ‘Tingacizivisa kudini ciara cokadi? Zviara zvese zvinonanga kuti zvinojijisa cokwadi asi cimwe nga cimwe cinojijisa zviro zvakasiyana ngo pamusoro pa Mwari.’ Sathana ari kukwanisa kuita kuti kuve no magerejha akawanda, izvi zviri kuita kuti vandhu vakawanda vabararike hwiru. Asi Sathana narini aazokwanisi kubatanija vandhu vo nyika jese kuti vadisane ngocavo. Ndi Jehovha basi anokwanisa kuita izvi. Izvi zvinozwisisika, ngokuti rudo hwokadi hunovha kuna Jehovha. Vaya vanobesehwa ngo mujimu wake ndivona basi vangakwanisa kuva no rudo hwondhohwo. (1 Johani 4:7) Izvi ndizvona zvakaita kuti Jesu anange kuti rudo ndiwona waizovonesa Makristu o cokwadi.
8-9. Vandhu vamweni vanojizwa kudini pavanovona rudo hunokhombijwa ngo Zvapupu zva Jehovha?
8 Inga zvakanangwa ndi Jesu, vandhu vazinji vari kukwanisa kuziva vanamati vokadi ngo ndava yo rudo hwavanokhombijirana ngocavo. Inga muezaniso, hama imweni inodanwa Iyani, yakananga kuti icaceukija zvakaitika pa vhaza yokutanga payakaenda ku gungano rakaitihwa phedo no pamuzi payo, pandau poyaienda kosistiri bhora recitambhwa ko mweji munganani jadarika. Iyona yakati: “Zvese Zvainga zvakatosiyana kamare. Zvapupu zva Jehovha zvainga vandhu vainga no nderemejo, vainga vakanasa kusimira.” Iyona yakaengejera yeciti: “Vana vavo vainga vakanasa kugajana kamare. Kusiyapo zvese izvi ivona vainga vakadakara, vaingazve no runyararo inini ndaidavo kuti izvi zviitike na inini. Andicaceukiji hurukuro imwe hayo yakaithwepo, asi rudo hwavakakhombija ndiwona wakandipsasa maningi.” c Zvakavoniwari ndi hama iyi zvakaitika ngo ndava yo rudo hwatinokhombijirana. Patinoda hama no hambzaji jedu tinovataja ngo kunaka mwoyo no nderemejo.
9 Hama imweni inodanwa Joni yakavavo no mazwiro ondhowo payakatanga kusistiri musongano pa Nyumba yo Umambo. Iyona yakati: “Ndakashamaisika maningi ngo manera avanokhombijirana ushamwari, zvaiita inga kuti ivona vakakwana. Rudo hwokadi hwavakakhombija, wakaita kuti ndikhohwe kamare kuti ndainga ndawana cokwadi.” d Muezaniso iji no jimweni jinovonesa kamare kuti vandhu va Jehovha ndi Makristu o cokwadi.
10. Ngopapi patinomukana wo kukhombija kuti tinoda hama no hambzaji jedu? (Vonanyi masoko o pasi.)
10 Inga zvatavona pakutanga ko cijijo cino, mu ungano amuna mundhu wakakwana. Nguva jimweni, hama jedu jingaita kana kunanga zviro zvinotinyangajisa. e (Jakobo 3:2) Izvi pazvinoitika tingakhombija kuti tinoda hama no hambzaji jedu ngo zviro zvatinovereketa kana kuita. Zviro zvingatibesera kuti tiite izvi i kujija ngo muezaniso wa Jesu.—Johani 13:15.
JESU WAKAKHOMBIJISA KUDINI KUTI WAIDA VAPOSTORI VAKE?
Jesu wakataja ngo rudo vapostori vake pikija paya pavaiposa (Vonanyi ndima 11-13)
11. Ngo japi mugariro jakashata jakakhombijwa ndi Jakobo na Johani? (Vonanyi foto.)
11 Jesu aacaiveterepi kuti vapostori vake vave vakakwana. Kusiyapo zvondhozvo, Jesu wakavabesera kuti ivona vakwanise kuitisa nane mugariro javo kuti vakwanise kudakajisa Jehovha. Pa vhaza imweni, vapostori vaviri, Jakobo na Johani, vakakumbira mai wavo kuti vaende kobhuya na Jesu kuti ivona vazove no zvigaro zvakakhwirira mu Umambo. (Mateu 20:20, 21) Zvakaithwari ndi Jakobo na Johani zvakavonesa kuti ivona vaida kuva vandhu vanojikuja no vanosisira maningi kupinda vamweni.—Mazwi Akangwara 16:18.
12. Kunanga kuti Jakobo na Johani ndivona vega basi vakakhombija mugariro jicikaripi jaushoni? Sananguranyi.
12 Asipi Johani na Jakobo basi vakakhombija mugariro jakashata pa vhaza iyi. Vonanyi basi zvakaithwa ngo vapostori vamweni: “Gumi ro vajiji vamweni povakazvizwa, vakanyangajwira Jakobo na Johani.” (Mateu 20:24) Tingatorangarira kunesana kwakava no vapostori ava izvi pozvakapera kuitika. Zvingaita kuti ivona vakatanga kunanga zviro zvakadari inga izvi: ‘Munorangarira kuti ndimwi ani kuti mukumbire zvigaro zvakakhwirira mu Umambo? Andimwipi mwega basi makashandari makagondeka na Jesu. Itusu tinofaneravo kuva no cigaro cakakhwirira!’ Azvinenyi hazvo, pa vhaza iyi vapostori vakakanganwa kuti zvinosisira maningi i kudisana no kuva vakanaka mwoyo umwe no umweni.
13. Jesu wakaitenyi vapostori pavakakhombija mugariro jicikaripi jaushoni? (Mateu 20:25-28)
13 Jesu wakaitenyi pa mugariro wakadari? Iyena wakava anosengerera. Nee aazivi kunanga kuti ndinoda kusana vapostori vamweni vakanaka maningi, vandhu vanojidodokesa, vano rudo no vanokwanisa kutaja vamweni. Mukusiyana, Jesu wakabhuya navo ngo njira yo kusengerera, ngokuti waizviziva kuti ivona vanoda kuita zviro zvaushoni. (Verenganyi Mateu 20:25-28.) Iyi aicainga vhaza yokutanga yokuti vapostori vakanesana ngo pamusoro pokuti ndiyani wainga mukuru pakati pavo, pikija zvakadaro Jesu mukuvo wese wakavataja ngo rudo.—Marko 9:34; Ruka 22:24.
14. Vapostori va Jesu vakakurira mu ndau yakadini?
14 Pacina kukana-kana, Jesu wakarangariravo ngo ndau yakakurira vapostori. (Johani 2:24, 25) Ivona vakakurira mu ndau yokuti vatungamiriri vo magerejha vainanga kuti mundhu anova anosisira kudari ari pacigaro cakakhwirira. (Mateu 23:6) Vatungamiriri vo zviyara vo Cijudha vaijivona kuti vanosisira maningi kupinda vamweni. f (Ruka 18:9-12) Jesu waizviziva kuti izvi zvaizopsasa manera vapostori vaijivona pacavo no manera o vaivonavo vamweni. (Mazwi Akangwara 19:11) Jesu waizviziva kuti vajiji vake vaizoposa, ngo iyo ndava wakava anosengerera kwavari. Iyena waizviziva kuti ivona vainga vandhu vaushoni. Ngo kudaro, wakapsaka nguva kuti avabesere kuti ivona vave vandhu vanojidodokesa no vanodisana, kusiyapo kuda maningi kuva vandhu vanosisira.
TINGATEVEJERESA KUDINI MUEZANISO WA JESU?
15. Tinojijenyi kuvhira ku zvakaitika na Jakobo na Johani?
15 Tingajija zvizinji kuvha ku zvakaitika na Jakobo na Johani. Kukumbira cigaro cakakhwirira mu Umambo, zvokadi kamare zvainga zvakashata. Vapostori vamweni vakatoposavo ngokuti vakatendera kuti mugariro uwu uvaite kuti ivona vaparajane. Asi Jesu, wakataja vapostori vese gumi na vaviri ngo kunaka mwoyo no rudo. Tinojijenyivo? Cinosisira asipi kusota zvinoposwa ngo vamweni asi ngo njira yo tinovataja ndiyona. Zvicinyi zvinozotibesera kuti titaje vamweni ngo njira ya ushoni? Kudari hama iri yese ikatinyangajisa tingajivhunjisa kudari: ‘Ngenyi zvayaindiitirari zvandipsasa kudari? Kureva kuti izvi zvakhombija kuti ndinodikana kuita cinjo pa divi riri rese? Kureva kuti hama iyi iri kuhwisana no cineso ciri cese? Kudari ndikavona kuti ndino thangwe rokuti ndinyangajwe, kureva kuti ndinodikana kumukhombijira rudo no kumuregerera here?’ Kudari tikataja vamweni ngo rudo, tinotatija kamare kuti tiri vateveri vokadi va Kristu.
16. Tinojijenyizve kuvha ku muezaniso wa Jesu?
16 Muezaniso wa Jesu unotikhombija manera atinodikana kuzwisisa hama jedu. (Mazwi Akangwara 20:5) Jesu waikwanisa kuvona zviri mu mwoyo mo vandhu. Itusu atikwanisi. Asi itusu tingasengerera ngo kutama kukwana ko hama no hambzaji jedu. (Vaefeso 4:1, 2; 1 Pedhru 3:8) Cinotibesera kuita zvondhozvo i kunasa kuziva ushoni hama no hambzaji jedu. Ngatimbovona muezaniso umweni.
17. Kuitisa kudini kuziva ushoni hama kwakabesera muvonereri umweni wo ndharaundha?
17 Muvonereri wo ndharaundha anoshandira kumavhazuva ko Afrika wakananga kuti anoceukija hama imweni yainga no mugariro unonesa kuhwisana nawo. Muvonereri wo ndharaundha uwu wakaitenyi? Iyena wakati: “Kusiyapo kusiya kubhuya no hameyo ndakatema civaringo cokunasa kuiziva.” Ngo kuita izvi hama iyi yakazwisisa kuti manera yakarehwa hama imweni iyana zvakapsasa maningi undhu hwayo zvoita kuti itame kutaja ushoni vamweni. Muvonereri wo ndharaundha anoenderera mberi eciti: “Pondakazwisisa kuti zvakainesera maningi kuti iite cinjo no kuvona cinjo joyainga yakaita pa mukuvo uwu zvakaita kuti ndishamaisike maningi. Takazova no ushamwari hwaushoni.” Izvi zvinovonesa kuti kudari tikapsaka nguva kuti tizwisise hama no hambzaji jedu zvinozotirerukira maningi kuti tijide.
18. Ngojapi muvhunjo jatinodikana kujiita kudari tikanyangajiswa ngo hama iri yese? (Mazwi Akangwara 26:20)
18 Nguva jimweni tingatovona kuti zvinodikana kubhuya no hama yatinyangajisa kuti titonge cinesoco. Pakutanga, zvaizova zvaushoni kujivhunjisa kudari: ‘Kunanga kuti ndinoziva zvese zvinobatanijwa pa zvaitikari?’ (Mazwi Akangwara 18:13) ‘Kunanga kuti iyena waita izvi ngo cabomo?’ (Mucumaeri 7:20) ‘Ndakamboitavo zvishaishi zvakadari inga izvi kuphinda no kuphinda?’ (Mucumaeri 7:21, 22) ‘Kudari ndikaeja kubhuya naye, kunanga kuti zvinoita kuti shwiroyo iengejeke?’ (Verenganyi Mazwi Akangwara 26:20.) Kudari tikapsaka nguva torangarijisisa ngo pamusoro po muvhunjo iji, tingatoguma pa mbhejiso yokuti zviri nane kukhombija rudo kuno hama no hambzaji jedu totosiya shwiroyo hedu.
19. Masunga kuitenyi?
19 Zvapupu zva Jehovha zvinokhombija kuti ndi vateveri vokadi va Jesu ngo ngokuti vanokhombija rudo. Umwe nga umwe wedu tingakhombija kuti tiri vateveri vokadi va Jesu kudari tikakhombija rudo kuno hama no hambzaji jedu pikija no zvavanoposa. Vamweni vanozozwisisa kuti itusu tiri Makristu o cokwadi no kutodavo kunamata Mwari wedu ano rudo Jehovha. Ngo iyo ndava, tasunga kuenderera mberi tecikhombija rudo uwo unovonesa kuti tiri Makristu o cokwadi.
NDUMBO 17 “Ndinoda”
a Vandhu vazinji vanoda kujija cokwadi ngo ndava yo rudo hwatinokhombijirana. Asi itusu atizivi kukwana, nguva jimweni zvinonesa kukhombijirana rudo. Ngatende tivone kuti ngenyi rudo hunosisira maningi. Tinozovonazve kuti tingatevejeresa kudini muezaniso wa Jesu, vamweni pavanotishaishira.
b Vonanyi bhuku rinoti: “Uya Uve Muteveri Wangu,” cipauko 17 ndima 10-11, mu Cishona.
c Vonanyi musoro unoti: “Wari Upenyu Hwangu Hwaanocinangwa” mu Murindiri wo 1 wa novembro wo 2012 pheji 13-14, mu Cishona.
d Vonanyi musoro unoti: “Zvaaita Inga Kuti Upenyu Hwangu Hwaindifambira Ushoni” mu Murindiri wo 1 wa maio wo 2012 pheji 18-19, mu Cishona.
e Apa atiripi kunanga ngo zvishaishi zvikuru zvinodikana kutongwa ngo vakuru, zvakadari inga zvakandandaniswa pana 1 Vakorinte 6:9, 10.
f Ripoti imweni inovonesa kuti mujiji umweni wakananga kudari: “Munyika muno amupindiriji vandhu vanokwana kuita makumatatu vakarurama inga Abhirahama. Kudari variyo havo vandhu vanokwana kuita makumatatu, inini no mwana wangu tiri vaviri vavo. Kudari vari vandhu vanokwana kuita gumi, inini no mwana wangu tiri vaviri vavo. Kudari kuno vanokwana kuita vashanu inini no mwana wangu tiri vaviri vavo. Kudari kuno vaviri ndini no mwana wangu, asi kudari kuna umwe ndini.”
