Ngenyi mwanarume umweni anodanijwa ngo Bhaibheri kuti, “Ngana” wakananga kuti ‘waizoparaja’ utaka hwake kudari iyena akacadha na Rute? (Rute 4:1, 6)

Munguva jo kare kudari mwanarume wakacadha akafa acito kumbobara mwana paimuka muvhunjo munganani. Inga muezaniso: Zvicinyi zvaizoitika no zviro zvake? Kureva kuti zina ro mbhuri yake raizogara ricikaziviki mbhera narini? Mutemo wa Mosi waidavira muvhunjo iji.

Zvicinyi zvaizoitika no zviro zvake kudari iyena akafa kana kudari akazvitengesa zvirozvo ngokuti waamurombo? Hama yake kana ukama wo phedo waizotenga zvirozvo. Izvo zvaizoita kuti zvirozvo zvirambe zviri mu jinja rake.—VaLevi 25:23-28; Bziverengo 27:8-11.

Zvicinyi zvaidikana kuithwa kuti zina ro mbhuri ya nyakufa rirambe riripo? Hama ya nyakufa yaidikana kugara utaka mwanakajiwo inga zvaidikana kuitihwa Rute. Hama ya nyakufa yaidikana kucadha no mwanakaji wiya kuti vabare mwana, mwanewo waidikana kuduhwa zina ra nyakufa kuti zina ro mbhuri yake rirambe riripo. Nasiriro iyi yaibesera maningi noni.—Deuteronòmio 25:5-7; Mateu 22:23-28.

Vonanyi zvakaitika na Naomi. Iyena wainga akarovohwa ngo mwanarume waidanwa Erimereki. Erimereki no vana vake vaviri povakafa, Naomi wakasara acina mundhu wokumukorondha. (Rute 1:1-5) Naomi paakahwirira ku Judha na Rute wakavhunja Rute kuti aende ko kumbira Bhowazi kuti atenge minda javo. Bhowazi wainga ukama wo phedo wa Erimereki. (Rute 2:1, 19, 20; 3:1-4) Asi Bhowazi waiziva kuti kwainga no ukama umweni hwo phedo unodanijwa ngo Bhaibheri kuti “Ngana.” Izvi zvaireva kuti iyena wainga wo kutanga wainga no mukana wo kugara utaka.—Rute 3:9, 12, 13.

Pakutanga “Ngana” uwu waida kubesera. (Rute 4:1-4) Iyena waizviziva kuti waizopeja mare yakatikuti, kuti atenge minda jiya asi waizivazve kuti Naomi wainga waamusharuka maningi kuti abare mwana waidikana kugara utaka zviro zva Erimereki. Zviro izvi zvaizova zvake nganewo zvoita kuti iyena awane zvakawanda.

Asi mwanarume uwu wakacinja zvaairangarirari paakazwisisa kuti ndi Rute waidikana kugahwa utaka. Iyena wati: “Kudari bzakadaro, andidi kutenga mundewo wo ndicikakoni kuusiira vana vangu.” (Rute 4:5, 6) Ngenyi iyena wakacinja murangariro wake?

Kudari Ngana uwu kana mwanarume umweni wakacadha na Rute vova no mwana, mwana ondhowo waizogara utaka zviro zva Erimereki. Waro kuitisa kudini izvo ‘zvaizoparaja utaka’ hwa Ngana? Bhaibheri apana zvarinonanga ngo pamusoro pazvo, asi tingakwanisa kurangarira ngo mathangwe manganani.

• Rokutanga, iyena waizoruza mare ngo kutenga munda wa Erimereki. Ngokuti pakufamba ko nguva zvese zvaizova zvo mwana wa Rute.

• Rocipiri, iyena waizova no mutoro wokukorondha Naomi na Rute.

• Rocitatu, kudari Rute waizobara vana vamweni na Ngana, vana ava vaizovavo no divi pa utaka hwake kubatanijavo no vana vamweni vaainga navo kare.

• Rocirongomuna, kudari Ngana uwu wainga acina vana, vana vaaizobara na Rute, vaizodikana kugara utaka zviro zva Erimereki kubatanijavo no zvake. Ngana paaizofa, zviro zvake zvaizova zvo mwana waakabarari, uwo wadanijwa ngo zina ra Erimereki kuciripi rake. Mwanarume uwu aacaida kuruza utaka hwake kuti abesere Naomi. Iyena wakavona kuti zvainga zvaushoni kuti Bhowazi uwo wainga ukama umweni wo phedo uite izvi. Bhowazi wakaita izvi ngokuti waida kumusijira “zina ra nyakufa pa ndhaka yake.”—Rute 4:10.

Zvinovoneka inga kuti mwanarume uwu waida maningi kujivirira zina rake no ndhaka yake. Izvi zvinovonesa kuti waida maningi zvinomudakajisa basi. Ngana uwu waida kujivirira zina rake, asi zvinosuruvarisa ngo zvokuti mbhera nyamasi apana mundhu anoziva zina rake. Iyena wakazoruza makomborero anosisira maningi akazopuwa Bhowazi, okuva umwe wo mubarihwana wa Mesiya, Jesu Kristu. Zvakaitikari zvinovonesa muviyo wakava na Ngana ngo kuda kwake zvinodakajisa iyena basi acikadi kubesera vamweni.—Mateu 1:5; Ruka 3:23, 32.