1-2. Ngozvapi zvamunoanja kuvona pa njiku yo rubhabhatijo, ngozvapi zvatinozovona pa musoro uwu?

 IMWIMWI makambovona vandhu vanoda kubhabhatijwa pa gungano ro ndharaundha kana kuti ro mutundhu? Mungakwanisa kuvona zvavanonga vasunga pavanonga vecidavira muvhunjo muviri vacito vabhabhatijwa. Munovona ukama hwavo no shamwari jecidakara no kudada ndivona. Pavanonga vapera kubhabhatijwa munozwa vandhu vecitakira nyara no kuvona kudakara kovanonga vakaita. Kutenderera pasi pese, sumana ngo sumana zviuru no zviuru zvo vandhu zviri kupira upenyu hwazvo kuna Jehovha no kubhabhatijwa.

² Imwimwivo kenyi? Kudari muri kurangarira kubhabhatijwa muri mundhu anosisira maningi mu nyika ino inocidima ngokuti muri ‘kupsaka Mwari.’ (Nduyo 14:1, 2) Azvinenyi kuti muri mujaha kana dhodha, musoro uwu wakaitihwa imwimwi. Kudari makabhabhatijwa jijo iyi inozovangisa maningi cido cenyu cokuenderera mberi mecishandira Jehovha. Pa musoro uwu tinozovona mathangwe matatu anotiita kuti tide kushandira Jehovha.

3. Ngenyi vashandiri va Jehovha vanoda zvokadi no zvakarurama? (Nduyo 119:128, 163)

³ Jehovha wakavhunja vandhu vake kuti ‘vade cokwadi.’ (Zakaria 8:19) Jesu wakavhunja vajiji vake kuti vapsake ururami. (Mateu 5:6) Izvi zvinoreva kuti tinodikana kuva no cido cakavanga cokuita zviya zvinonangwa ndi Mwari kuti zvakarurama no zvakanaka. Imwimwi munoda zvokadi no zvakarurama? Itusu tino cokwadi cokuti hina. Imwimwi munonyenya zviro zvakashata no kutama kunyepa. (Verenganyi Nduyo 119:128, 163.) Ndiani anovereketa zviro zvokunyepa anotevejera undhu hwa Sathana mutongi wo nyika ino. (Johani 8:44; 12:31) Zvinoda Sathana ngo zvokusvipisa zina rakacena ra Jehovha. Kuvhira paakapandukira  mu munda wo Edheni, Sathana ari kundondhandhanisa manyepo ngo pamusoro pa Mwari. Sathana ndiyena ari kuita kuti vandhu varangarire kuti Jehovha ndi mutongi anoda zvinodakajisa iyena basi, acizivi kugondeka no acikaiti zviro zvaushoni kuno vandhu vake. (Genesi 3:1, 4, 5) Manyepo ari kunangwari ndi Sathana ngo pamusoro pa Jehovha, ari kuita kuti vandhu varangarire zviro zvakashata ngo pamusoro pake. Vandhu pavanokheta kutama ‘kuda cokwadi’ Sathana anovaita kuti vade kuita zviro zvakashata no zvicizivi kurungama.—Varoma 1:25-31.

4. Ngozvapi zviri kuithwa ndi Jehovha zvinovonesa kuti iyena ndi “Mwari wokadi-kadi”? (Vonanyi foto.)

⁴ Jehovha ndi “Mwari wokadi-kadi,” ndiyo ndava anojijisa cokwadi vandhu vese vanomuda. (Nduyo 31:6) Paanoita kudaro, anonga ecivabesera kuti vatame kucengejwa ngo manyepo a Sathana. Jehovha anojijisazve vashandiri vake kuti vave vandhu vakagondeka no vakarungama. Izvi zvinobesera vaya vanoda Jehovha kuti vajide pacavo no kuva no runyararo. (Mazwi Akangwara 13:5, 6) Imwimwi munorangarira kuti Jehovha ari kumuitiravo zvondhozvo pamukuvo wamunoita jijo yenyu yo Bhaibheri? Imwimwi makajija kuti manera Jehovha anoitira zviro vandhu, akanaka maningi. (Nduyo 77:14) Ndiyo ndava munoda kuita zvinonangwa ndi Jehovha kuti zvakanaka. (Mateu 6:33) Imwimwi munoda kujivirira cokwadi no kubesera kuvonesa kuti zvakanangwa ndi Sathana ngo pamusoro pa Baba wedu Jehovha, manyepo. Mungazviitisa kudini?

5. Mungavonesa kudini pambhene kuti imwimwi munobesera zvakarurama no zvokadi?

⁵ Imwimwi mungakwanisa kupona munjira inovonesa kuti muri “kuramba manyepo a Sathana asi muri kubesera cokwadi. Tingavonesa kamare kuti tiri kuda kutongwa ndi Jehovha ngo kuramba manyepo a Sathana no kuita zviya zvaanonanga kuti zvakanaka.” Imwimwi mungazviitisa kudini izvi? Itanyi mukumbiro kuna Jehovha no kujipira kwaari, perapo movonesa izvi pambhene ngo kubhabhatijwa. Kuda kwatinoita zvakarurama no zvokadi ndikona kunozotiita kuti tide kubhabhatijwa.

6. Nduyo 45:5 inotipa mathangwe api anotiita kuti tide Jesu?

⁶ Ngenyi munoda Jesu Kristu? Pa bhuku ra Nduyo tinovona mathangwe anotiitisa kuti timude, Nduyo 45:5. (Verenganyi.) Jesu anoda cokwadi, anozvidodokesa nokutizve  wakarurama. Zvese izvi zvinotiita kuti tide Jesu Kristu. Amborangariranyi manera Jesu wakajivirira cokwadi no zvakarurama. (Johani 18:37) Jesu wakakhombijisa kudini kuti tinodikana kuva vandhu vanojidodokesa?

7. Ngozvapi zvinosisira pa kujidodokesa kwa Jesu?

⁷ Jesu wakajijisa ngo muezaniso wake kuti kuti tinodikana kuva vandhu vanojidodokesa. Mukuvo wese iyena anopa rukujo kuna Baba wake haiwa kujipa rukujo pacake. (Marko 10:17, 18; Johani 5:19) Munovona kudini ngo muezaniso uwu wokujidodokesa? Pacina kukana-kana, unomuvangisa kuti mude Jesu Kristu no kuenderera mberi mecimutevejera. Ngenyi Jesu anojidodokesa? Ngokuti Jehovha anojidodokesa. Jesu anoda no kutevejera muezaniso wa Baba wake. (Nduyo 18:36; Vahebheru 1:3) Izvo azvimuiti kuti imwimwi mude Jesu uwo anoda kutevejera muezaniso ja Baba wake here?

8. Ngenyi tinoda kuva na Jesu inga Mambo wedu?

⁸ Itusu tinoda maningi kuva na Jesu inga Mambo wedu, ngokuti iyena ndi Mutongi wakanakisisa. Ndi Jehovha wakajijisa Mwana wake no kumugaja kuti ave mambo. (Isaia 50:4, 5) Jesu wakasiya kuita zviro zvakawanda maningi zvaaida ngo ndava yo rudo hwanahwo na itusu. (Johani 13:1) Inga Mambo wedu, Jesu anofanira kudiwa ndisu. Iyena wakasanangura kuti vaya vanomuda kana kuti vaya vaanodanija kuti shamwari jake, vanodikana kukhombija kuti vanomuda ngo kuzwira mupango jake. (Johani 14:15; 15:14, 15) Ndi makomborero makuru kuva shamwari yo Mwana wa Jehovha.

9. Rubhabhatijo hwedu wakaezana papi no hwa Jesu?

⁹ Umwe wo mupango wa Jesu ngo wokuti vateveri vake vanodikana kubhabhatijwa. (Mateu 28:19, 20) Iyena wakapa muezaniso pakuita izvi. Rubhabhatijo hwa Jesu wakasiyana padoko no rubhabhatijo hwo vateveri vake. (Vonanyi bhokiso rinoti: “ Rubhabhatijo hwa Jesu wakasiyana papi no rubhabhatijo hwo vateveri vake?”) Rubhabhatijo hwese hwo huviri wakaezana pa zviro zvakatikuti. Jesu paakabhabhatijwa wakajipira kuti aite kuda ka Baba wake. (Vahebheru 10:7) Munjira yakaezana, patinobhabhatijwa tinokhombija kuti tajipira kuti tiite kuda ka Jehovha. Kuvhira pondhopo, ciro cinosisira maningi mu upenyu hwedu ngo cokuita kuda ka Mwari kuciripi kuda kwedu. Ngo kuita kudaro tinonga tecitevejera muezaniso wa Jesu.

10. Ngozvapi zvinodikana kumuita kuti mude kubhabhatijwa?

¹⁰ Amborangariranyi padoko ngo zvamunoziva ngo pamusoro pa Jesu. Imwimwi maakuziva kuti Jesu ndi Mwana wo dangwe wa Mwari, wakakhethwa kuti atonge inga Mambo. Makwanisa kuvona kuti Jesu anonasa kutevejera kamare kujidodokesa ka Baba wake. Cimwenizve, makajija kuti Jesu wakapa zvokuha vandhu vainga no njara, wakavangisa vainga vakaremba no kurapa vandhu vainga vecihwaja. (Mateu 14:14-21) Munokwanisazve kuvona kuti Jesu ari kutungamiririsa kudini ungano nyamasi uno. (Mateu 23:10) Munozivazve kuti iyena inga Mambo wo Umambo hwa Mwari, anozoita zviro zvakawanda kumbejiyo kupinda zvaari kuita wari. Waro pamunorangarira zvese izvi mungakhombijisa kudini kuti munoda Jesu Kristu? Ngo kutevejera muezaniso wake. (Johani 14:21) Ciro cokutanga camungaita ngo cokujipira kuna Jehovha, mobhabhatijwa.

11. Ngo rapi thangwe rimweni rinotiita kuti tide kubhabhatijwa, ngenyi?

¹¹ Ngorapi thangwe rimweni rinotiita kuti tide kubhabhatijwa? Jesu wakapa mupinguro wakona paakananga kuti ngowapi mupango mukuru wakatipa Mwari, iyena wakati: “Idai Jehovha Mwari wako ngo mwoyo wako wese, upenyu hwako hwese, murangariro wako wese no simba  rako rese.” (Marko 12:30) Imwimwi munorangarira kuti munoda Jehovha ngo njira iyi?

12. Ngenyi tinoda Jehovha? (Vonanyi foto.)

¹² Pano mathangwe amweni anotiita kuti tide Jehovha. Inga muezaniso, imwimwi makajija kuti iyena ndi “cinyuke co uhomi.” Cimwenizve makajija kuti “cipo cese cakanaka no cipo cese cakakwana” cinovha kwaari. (Nduyo 36:10; Jakobo 1:17) Jehovha Mwari ano rudo no anokova, wakamupa zvese zvamunazvo mu upenyu.

13. Ngenyi muripo i cipo cinoshamaisa maningi?

¹³ Muripo wa Jesu ndi cipo cinoshamaisa cakanaka maningi caakatipa Jehovha. Ngenyi tinonanga zvondhozvo? Itusu tino mathangwe akawanda anotiita kuti tinange zvondhozvo. Inga muezaniso, makamboima morangarira ushamwari una Jehovha na Jesu. Jesu wakati: “Baba vanondida” inini “ndino rudo na Baba.” (Johani 10:17; 14:31) Jesu na Jehovha vakapeja makore akawanda maningi vari vese, izvi zvakaita kuti ushamwari hwavo huvange maningi. (Mazwi Akangwara 8:22, 23, 30) Wari amboimanyi mumborangarira kuhwajihwa kwakava na Jehovha ngo kutendera kuti Mwana wake atambujike mbhera kufa. Jehovha wakatendera kuti Mwana wake auraiwe kuitira kuti tive no mukana wo kuzorarama kwenda no kwenda. Izvi zvinokhombija kuti Jehovha anoda vandhu vese kubatanijavo na imwimwi. (Johani 3:16; Vagaratiya 2:20) Muripo ithangwe rinosisira maningi rinotiita kuti tide Jehovha.

14. Ngozvapi zvinosisira maningi zvamungaita mu upenyu?

 ¹⁴ Rudo hwenyu kuna Jehovha wakakura maningi pamakaenderera mberi mecijija ngo pamusoro pake. Pacina kukana-kana, munoda kuenderera mberi muno ushamwari wo phedo na Jehovha kwenda no kwenda. Izvi zvinokwanisika. Jehovha anokumbira kuti imwimwi mudakajise mwoyo wake. (Mazwi Akangwara 23:15, 16) Mungakwanisa kukhombija izvi haiwa basi ngo magama enyu asi ngo zvamunoita. Ngo kudaro, manera amunopona anovonesa kuti imwimwi munodadi Jehovha kamare. (1 Johani 5:3) Izvi izviro zvakanaka maningi zvamungaita mu upenyu.

15. Mungakhombijisa kudini kuti munoda Jehovha?

¹⁵ Mungakhombijisa kudini kuti munoda Jehovha? Itanyi mukumbiro no muri mega mecivonesa kuti munoda kumushandira. (Nduyo 40:9) Perapo vonesanyi zvamasungaro ngo kubhabhatijwa. Inga zvatavona mu cijijo cino, kubhabhatijwa ndi ciro cinosisira maningi camungaita mu upenyu hwenyu. Munonga mecitangisa upenyu hupsa mucikajiponeri pacenyu asi meciponera Jehovha. (Varoma 14:8; 1 Pedhru 4:1, 2) Ici ndi civaringo cakakura, asi cinoita kuti muve no upenyu unodakajisa. Kuitisa kudini?

16. Mukuzwirana na Nduyo 41:13, Jehovha anozokomboreresa kudini vaya vanopira upenyu hwavo kwaari?

¹⁶ Jehovha ndi Mundhu anokova maningi kupinda vese. Azvinenyi kuti ngozvapi zvamuri kumuitira, mukuvo wese iyena anomupa zvakawanda kupinda izvi. (Marko 10:29, 30) Iyena anomupa upenyu unodakajisa no kumupa makomborero akawanda, pikija mu nyika ino inodari kuparajwa. Aya i matangiro basi. Asi upenyu wamunozowana pamunopera kubhabhatijwa ngo wo kwenda no kwenda. Imwimwi mungaenderera mberi mecishandira Baba wenyu vano rudo kwenda no kwenda. Rudo hwenyu na Jehovha hunozoenderera mberi hwecikura, imwimwi munozopona kwenda no kwenda pamwepo na iyena.—Verenganyi Nduyo 41:13.

17. Ngozvapi zvamungapa Jehovha zvokuti iyena aana?

¹⁷ Pamunopira upenyu hwenyu kuna Jehovha mobhabhatijwa, munonga mecipa Jehovha zviro zvinosisira maningi. Zviro zvese zvaushoni zvamakava nazvo no mukuvo wamakapona makadakara ndi zvipo zvamakapuwa ndi Jehovha.  Mungatopekejavo mune wo denga no nyika zviro zvaacina, kuva makagondeka kwaari no kumushandira ngo mwoyo wese. (Jobe 1:8; 41:11; Mazwi Akangwara 27:11) Zvokadi kamare iyi injira yaushoni yamungashandisa upenyu hwenyu. Pacina kukana-kana, ndi Jehovha anomupa thangwe rinomuita kuti mude kubhabhatijwa.

18. Ngojapi muvhunjo jamungajiita?

¹⁸ Imwimwi munoda kubhabhatijwa? Ndimwi basi mungadavira muvhunjo uwu. Mukuvo umweni zvaushoni maningi kujivhunjisa kudari: ‘Ndakanasiririka kuitira kuti ndibhabhatijwe?’ (Mabasa o Vapostori 8:36) Amborangariranyi ngo mathangwe matatu atabhuya mu cijijo cino. Rokutanga, imwimwi munoda zvokadi no zvakarurama. Jivhunjisenyi kudari: ‘Ndinoda kupona munyika yokuti vandhu vese vanobhuya cokwadi no kuita zvakarurama?’ Rocipiri, imwimwi munoda Jesu Kristu. Jivhunjisenyi kudari: ‘Inini ndinoda kuti Mwana wa Mwari ave Mambo wangu no kutevera muezaniso wake?’ Rocitatu, zvinosisira pa zvese, ngo zvokuti imwimwi munoda Jehovha. Jivhunjisenyi kudari: ‘Inini ndinoda kudakajisa mwoyo wa Jehovha ngo kumushandira?’ Kudari madavira hina muvhunjo iji ngenyi amuripi kubhabhatijwa?—Mabasa o Vapostori 16:33.

19. Ngenyi imwimwi amudikani kuthya kubhabhajijwa? Ezanisanyi. (Johani 4:34)

¹⁹ Kudari muri kuthya kubhabhatijwa amborangariranyi muezaniso wakaithwa ndi Jesu. (Verenganyi Johani 4:34.) Jesu wakaezanisira kuda ka Mwari no zvokuha. Ngenyi? Ngokuti zvokuha zvakanaka. Jesu anozviziva kuti zvese zvinotivhunja Jehovha kuti tiite zvakanaka. Jehovha aadi kuti itusu tiite ciricese cingatikhuvaza. Kunanga kuti Jehovha anoda kuti imwimwi mubhabhatijwe? Hina. (Mabasa o Vapostori 2:38) Mungava no cokwadi cokuti mukabhabhatijwa zvinozova zvaushoni kwamuri. Amucaizothya zvokuha zvakanaka zvamunoziva kuti zvinonaka maningi, waro ngenyi munothya kubhabhatijwa?

20. Ngozvapi zvatinozovona mu cijijo cinotevera?

²⁰ Makanasiririka kuti mubhabhatijwe? Vazinji vanodavira ngo njira iyi: “Inini andito ndanasiririka.” Civaringo cokupira upenyu hwenyu kuna Jehovha mobhabhatijwa ndi ciro cinosisira maningi camungaita mu upenyu hwenyu. Izvi zvingaita kuti imwimwi mungadikana kutema civaringo ici ngo kungwarira kwese, kangaije zvingatoda kuvangisira no kupeja mukuvo wakatikuti kuti muve makanasiririka. Kudari kuti imwimwi munodadi kubhabhatijwa, ngo zvapi zvamungaita kuti muve makanasiririka? Tinozovona mupinguro wo muvhunjo uwu mu cijijo cinotevera.