“Cigondiso” [kana Cibatiso]: Mukuzwirana no bhuku rimweni, gama ro ciGiriki rakasandujwa “Cigondiso” pana 2 Korinto 1:22, rainga “gama ro pa mutemo raishandiswa pa zvo matengesehwano” rainangira “divi rokutanga kuripa, kuvigisa, kuripa kokutanga, kwaiitwa, kuitira kugondisa citenderano co pamutemo ngo pamusoro po ciro cinongaro cecitengesehwana, kana caiitwa kutira kuti citenderano cishande.” Ngo pamusoro po vokuzojwa, mupfupo wavo unonangwa pana 2 Korinto 5:1-5 kuva unobatanija kuashira muviri ucikavori wo kumujimu. Iwonavo unobatanizve kuashira cipo co muviri ucikafi.​—1 Kor. 15:48-54.

Mu ciGiriki ca nyamasi uno, gama rakaezana na iri rinoshandiswa pa kuda kunangira mbhete inoshandiswa ngo vari kuda kucadha vese. Muezaniso uwu unokwajana kamare kuushandisira vaya vanotora rutivi pa mukaji wo kuezanisira wa Kristu.​—2 Kor. 11:2; Ap. 21:2, 9.

Cidhindo: Mu nguva jo kare, cimwe cidhindo caishandiswa inga kusaina kuitira kuvonesa kuva mune wo ciro, kuvonesa kuti ciro ngo cokadi kamare kana kuitira kuvonesa kutendera. Vokuzojwa vakadihwa “cidhindo” co kuva va Mwari, ngo maitiro o kuezanisira, ngo mujimu mucena. (Ef. 1:13, 14) Asi, vo kuzojwa vanodhindhwa kuitira kwenda no kwenda, nguva shomani vacito vafa, kana kuti nguva shomani dambijiko guru ricito ratanga.​—Ef. 4:30; Ap. 7:2-4.