MUSHANDO wedu unosisira zve una mutengo mukuru. Asi, asipi vese votinocumairira vanotatija kudakarira. Pikija vandhu vanotatija kudakarira masoko o Bhaibheri, asipi mukuvo wese vanovona dikano yo kujija Soko ra Mwari na itusu.

Izvi ngozvakaitika na Gavin, uwo wakata nga kuviya ku musongano jo ungano; asi wakaramba kujija Bhaibheri. Iyena wakati: “Uzivi hwangu hwo Matahwa hwaenga hushoma, zve andicaidepi kutatija kutama kuziva kwangu. Ndaithya kucengejwa, zve ndaithya kundotendera zviro basi.” Munovona kudini? Kureva kuti Gavin aacaizobeserekazve here? Haiwa, azvirevi kudaro. Rangariranyi mapsasire anoita jijiso jo Bhaibheri kuno mundhu. Jehovha wakananga kudari kuno vandhu vake vo kare: “Mazwi angu ajiparaje inga cando, adondhe inga veto pa mauswa mavixi.” (Dt. 31:​19, 30; 32:2) Mugariro jo cando jinonasa kuezanisa ushoni kuti tingabeseresa kudini mushovo wese wo vandhu ngo maitiro anobudirira mu mushando wedu.​—1 Tim. 2:​3, 4.

Cando cakathiva. Cando cinoungana padoko ngo padoko, kubva ku buruvusi ro madondhwe o kumwa ari mu mapepo. Mazwi a Jehovha ‘aiparajika inga cando’ ngokuti waivereketa ngo kunaka mwoyo, kupfava, no ndereremejo ku vandhu vake. Itusu tinotevejera Jehovha potinoreremeja mavonero o vandhu vamweni. Tunovangisa vandhu kuti varangarijire voga zve vave no mbhejiso yavo kamare. Potinovareremeja kudaro, mazwi edu anova anozwisisika zve mushando wedu unobudirira maningi.

Cando cinotondhoja. Mushando wedu unotondhoja vamweni potinorangarijisisa ngo mamusijiriro otingaita cidaka-daka cavo. Gavin, wanangwaya pa kutanga, aazivi kuvangijihwa kuti adavire kujija Bhaibheri. Hama yakatanga kumukhwederera inodanijwa Kris, yakawana njira jakasiana-siana jokuita kuti Gavin azwe kusujunyuka pa kuita mabhuyo o mu Bhaibheri. Kris wakadurujira Gavin kuti Bhaibheri rino musoro mukuru, zve kuuzwisisa kwaizomubesera kuti azwisise ushoni zvainangwa pa musongano jo ungano. Tevere, Kris wakamukhombija ciphorofeti co Bhaibheri cakamukhohwesa kuti Bhaibheri ngo ro cokwadi kamare. Izvi zvakavaendesa ku mabhuyo mazinji ngo pamusoro po kukwanirisika ko zviphorofeti zvo Bhaibheri. Gavin wakazwa kutondhojwa ngo mabhuyo aya zve pakupejidira wakadavira kujija Bhaibheri.

Cando cinoponesa upenyu. Mu nyika yo Iziraeri, zuva raipisa maningi, pasi paioma mu mukuvo wokuti kangaije kwakhirira mweji jakawanda nvura icikani. Pacina mutota waidihwa ngo cando, mamiti aifota no kuoma. Nyamasi uno kuna cikava co kumujimu, enga ngo zvaakananga Jehovha. (Am. 8:​11) Iyena wakapikira kuti vatokotesi vakazojwa ‘vaizodari enga cando cinobva kuna Jehovha’ povanocumaira masoko o Umambo, vacibesehwa ngo vadoni vavo vo “mabvuta amweni.” (MIK. 5:​7, Baiberi Mazwi Akacena aMwari; Jo. 10:​16) Tinoreremeja masoko o Umambo otinocumaira enga divi ro nasiriro ya Jehovha yokuponesa vandhu ngo mutota wo kumujimu here?

Cando i makomborero anobva kuna Jehovha. (Dt. 33:​13) Mushando wedu ungavavo makomborero kuna vaya vanoateveja. Gavin wakaashira enga makomborero. Ngo kujija kwake Bhaibheri, wakawana mupinguro jo mubvunjo jake jese. Wakakura kumujimu ngo kukasika wobhabhatijwa zve wari, iyena no mukaji wake, Joyse, vari kucumaira masoko akanaka o Umambo.

Kurangarijisisa ngo cando kungativangisa kuti tireremeje maningi kucumaira kwedu ko mundhu ega mu mushando. Kuitisa kudini? Dondhwe rimwe roga ro kumwa i doko maningi, asi rikabatana no zviuru zvo madondhwe o cando anozaja pasi ngo mutota. Mu njira yakaezana, kucumaira kwedu ko mundhu ega mu mushando tinokuvona kuti i kudoko maningi. Asi, kukabatanijwa no kuvangisira ko vashandiri vese vakazvipira va Jehovha kunobesera pa kupa ucapupu “ku vandhu vese.” (Mt. 24:14) Mushando wedu unozokhombija kuva makomborero anobva kuna Jehovha ku vamweni here? Masoko otinocumaira anozoita makomborero paanozoezana no cando​—ngo kuva akathiva, anotondhoja, no anoponesa upenyu!