1. Vazinji nyamasi uno vanoneseka pa cinyi?

 KANGAIJE imwimwi muri kukwanisa kuvona kuti vandhu vazinji nyamasi uno, vanoneseka pacavo kuciripi kuneseka ngo vamweni. Inga muezaniso, vandhu vazinji vanovangisira maningi kuti vagare mu interneti kuitira kujivonesa pacavo no kuvonesa manera avari kubudirira. Ngo kudaro, i vandhu vashoma basi nyamasi uno vanopekeja rukujo kuna Jehovha. Mu cijijo cino, tinozovona kuti zvinorevenyi kupekeja rukujo Jehovha, no kuzovonazve kuti zvicinyi zvingativangisa kuita zvondhozvo. Tinozojija kuti tingaitisa kudini kuti tipekeje rukujo Jehovha hwaanofanera, cimwenizve, anozoitisa kudini kuti akuje zina rake kumbejiyo.

ZVINOREVENYI KUPA RUKUJO JEHOVHA?

2. Jehovha wakavonesa kudini rukujo hwake pa Dundhu ro Sinai? (Vonanyi foto yo.)

² Icinyi rukujo? Mu Bhaibheri gama rokuti “rukujo” rinonangira ciricese cinoitisa kuti mundhu ave anoshamaisa. Jehovha wakaita ciro caivonesa rukujo hwake pasure po kusujunura Vaiziraeri kuvha kuuranda ku Ejipita. Amborangariranyi zviuru no zviuru zvo Vaiziraeri vakaungana phedo no Dundhu ro Sinai kuti vazwe zvavaida kuvhunjwa ndi Mwari wavo. Gore raisvipa rakafukija dundhu. Ngocivhumbu mbheni yakapaja no kurazva, makore akasvipa akafukija dundhu kozika kurira ko mbhayapaya. (Ekisodho 19:​16-18; 24:17; Nduyo 68:8) Rangariranyi ngo Vaiziraeri manera avakashamisika Jehovha paakavonesa simba rake no rukujo.

3. Zvinorevenyi kupa rukujo Jehovha?

³ Tingativo kudini ngo vandhu? Kureva kuti tingapekeja rukujo Jehovha? Hina tingapekeja. Njira imwe yo kupa rukujo Jehovha,  ngo yokubhuya no vamweni ngo pamusoro po simba rake rinoshamaisa no mugariro jake jinodakajisa. Cimwenizve, tinopekeja nderemejo Jehovha ngo kumukuja kuvha ku zviro zvatinoita tecishandisa simba rake. (Isaya 26:12) Dhavhidhi wakagaja muezaniso waushoni ngokuti wakapa rukujo Jehovha. Pa mukumbiro waakaita pamberi po mbungano yo Vaiziraeri, Dhavhidhi wakati kuna Jehovha: “Komuri, Tenji Mwari, ukuru, simba, ruveneko, utongi, goja, ngokuti bzese mu gore no mu nyika mbzenyu.” Mambo Dhavhidhi paakapejisa mukumbiro wake, “gungano rese rakasimba Tenji Mwari.”—1 Kronika 29:​11, 20.

4. Jesu wakapekejesa kudini rukujo Jehovha?

⁴ Paainga pasi pano, Jesu wakakuja Baba wake ngo kuvhunja vandhu kuti Jehovha ndiyena waimupa simba ro kuita mushamaiso. (Marko 5:​18-20) Jesu wakapa rukujo Jehovha ngo manera aakabhuya ngo pamusoro pa Baba wake no manera aaitaja vamweni. Pavhaza imweni, Jesu wainga ecijijisa musinagoga. Pa vandhu vainga vecimupurutana, painga no mwanakaji wainga no dhimoni ko makore anokwana kuita 18. Dhimoni iri raimuita kuti iyena afambe akakotama zvokuti aacaikwanisa no kuima. Izvi zvinosuruvarisa maningi. Ngo ndava yo pena, Jesu wakakwederera mwanakaji wiya no kunaka mwoyo omuvhunja kudari: “Mwanakaji ndhendha yako yapera.” Iyena wakamucanjikira nyara, pa mukuvo wondhowo, “iyena wakaima wotanga kukuja Mwari.” Iyena wakabongesera mangi Jehovha ngokuti wainga aano uhomi hwaushoni. (Ruka 13:​10-13) Mwanakaji wiya wainga no mathangwe aushoni kuti akuje Jehovha, itusu tinawovo.

NGENYI TINOKUJA JEHOVHA?

5. Mathangwe api atinawo anotiita kuti tireremeje Jehovha?

⁵ Tinokuja Jehovha ngokuti tinomureremeja maningi. Tino mathangwe akawanda kuti timureremeje. Jehovha ngo wo masimba ese, cimwenizve ano simba ricina magumo. (Nduyo 96:​4-7) Uzivi hwake hwakakura unovoneka kuvhira ku zviro zvaakasika. Iyena wakatipekeja upenyu no zvese zvatinoda kuti tikwanise kurarama. (Apokaripsi 4:11) Iyena wakagondeka. (Apokaripsi 15:4) Zvese zvaanoita zvinobudirira, mukuvo wese anokwanirisa zvaakagondesa. (Joshuwa 23:14) Atishamisiki ngo zvakananga muprofeti Jeremiya ngo pamusoro pa Jehovha, iyena wakati: “Ngokuti pakati po vazivi vese vo majinja no pakati po umambo wavo wese, apana mundhu wakaezana na imwimwi.” (Jeremiya 10:​6, 7) Ngo kudaro, tino mathangwe aushoni kuti tireremeje Baba wedu vo kudenga. Jehovha anoita zvizinji kupinda kumureremeja kwatinomuita, iyena ano mugariro jaushoni jinotiita kuti timude maningi.

6. Ngenyi tinoda Jehovha?

⁶ Tinokuja Jehovha ngokuti tinomuda maningi. Vonanyi mugariro muzinji ja Jehovha jinotiita kuti timude. Iyena ano usizi no unyasha. (Nduyo 103:13; Isaya 49:15) Jehovha anohwajihwa ngo matambujiko atiri kusongana nawo. (Zakariya 2:8) Iyena anotibesera kuti timuzive no kuva shamwari jake. (Nduyo 25:14; Mabasa o Vapostori 17:27) Iyena anojidodokesa, “iyena anokotama kuti avone denga no nyika, iyena anovhisa pa bukuta, mundhu acina mubeseri.” (Nduyo 113:​6, 7) Kuitisa kudini ariwese waizoramba kukuja Mwari wedu mukuru?—Nduyo 86:12.

7. Mukana wapi unosisira watinawo?

⁷ Tinokuja Jehovha ngokuti tinoda kuti vamweni vamuzive. Vazinji avazivi cokwadi ngo pamusoro pa Jehovha. Ngenyi? Ngokuti Sathana wakapofumaja murangariro jo vandhu vacikatendi ngo kundha-ndhanisa manyepo akashatisisa ngo pamusoro pake. (2 Vakorinte 4:4) Sathana wakakhohwesa vandhu kuti Jehovha ndi Mwari wakanyangajwa,  acikaneseki ndisu, cimwenizve, ndiyena anoitisa matambujiko akawanda mu nyika muno. Asi tinoziva cokwadi ngo pamusoro pa Mwari wedu. Tinomukana wo kujekesa zviro no kumupa rukujo. (Isaya 43:10) Nduyo 96 inobhuya maningi ngo kupekeja rukujo Jehovha. Patinonga tecivona magama akafemehwa o bhuku iri ra nduyo rangariranyi ngo manera amungapekeja rukujo Jehovha hwaanofanera.

TINGAPEKEJESA KUDINI RUKUJO JEHOVHA HWAANOFANERA?

8. I njira yapi yatingakuja ndiyona Jehovha? (Nduyo 96:​1-3)

⁸ Verenganyi Nduyo 96:​1-3. Tinokuja Jehovha ngo zvatinobhuya ngo pamusoro pake. Pamavhesi aya, vandhu va Jehovha vanokokwa kuti ‘vaimbire Jehovha,’ ‘vasimbe zina rake,’ ‘vazivise masoko akanaka o ruponeso hwake’ no ‘kuzivisa rukujo hwake pakati po majinja.’ Njira jese iji tingajishandisa kuti tikuje Baba wedu vo kudenga. Vashandiri va Jehovha vo mu nguva yo kare, vainga no cidaka-daka co kuvhunja vamweni ngo pamusoro po mugariro ja Jehovha no zviro zvese zvaushoni zvavakaitihwa ndiyena. (Dhanyeri 3:​16-18; Mabasa o Vapostori 4:29) Tingaitisa kudini kuti tiitevo zvondhozvo?

9-10. Majijenyi kuvha ku muezaniso wa hambzaji Anjerina? (Vonanyi foto.)

⁹ Vonanyi zvakaitika no hambzaji imweni inodanijwa Anjerina, a inogara ku Estadhus Unidhus. Iyona yainga no cicunge, cimwenizve, yaibhuya ngo pamusoro pa Jehovha ku vadoni vo kubasa kwayo. Zvecivoneka kuti iyona yainga yecitanga kushanda pa basa riya, iyona yakakokwa no vandhu vamweni vaingavo vapsa pa basa rondhoro kuti vave pa musongano umweni. Pamusongano uwu vese vakava no mukana wo kuverengera vamweni ngo pamusoro po upenyu hwavo. Hambzaji Anjerina vakanasirira foto kuti vakwanise kukhombija no kuvonesa mudakaro wavainga nawo ngo kuva Capupu ca Jehovha. Pecicota mukuvo mushoma kuti igume vhaza yavo yo kuvereketa, mudoni wavo wo kubasa wakananga kuti iyena wakarehwa ngo Zvapupu zva Jehovha. Iyena wakatanga kushora zvatinotenda. Hambzaji Anjerina vakati: “Mwoyo wangu waitaka ngo simba. Inini andicaidepi kuti vandhu vatende manyepo aibhuwari ngo pamusoro pa Jehovha. Ngo kudaro, ndakatema civaringo co kubhuya cokwadi ngo pamusoro pake.”

¹⁰ Mudoni wavo paakapeja kubhuya, hambzaji  Anjerina vakaita mukumbiro ngo cinyararire. Ngo kukasika, ivona vakatanga kubhuya ngo njira yaushoni veciti: “Mugariro wako wakatojana no wangu inini ndakarehwa inga Capupu ca Jehovha nokwenderera mberi ndakadaro mbhera na nyamasi.” Pikija mugarirowo waivanyangajisa, hambzaji Anjerina vakaenderera mberi vakagajana. Ivona vakakhombija vadoni vavo vo ku basa foto javo javakavhishwa no shamwari javo novakadakara vecishandira Jehovha. Cimwenizve, vakavasanangurira zvavaitenda ngo njira yo nderemejo. (1 Pedhru 3:15) Ngowapi wakava muviyo? Hambzaji Anjerina pavakapeja kubhuya, mwanarume wiya wakava akagajana. Iyena wakabhuyavo ngo zviro zvaushoni zvaakaceukija zvaakajijiswa ngo Zvapupu Jehovha. Hambzaji Anjerina vakati: “Zvatinotenda ngo pamusoro pa Jehovha zvinodikana kujivirihwa. I cidakajiso cikuru kujivirira zina rake.” Itusu tinocidakajiso co kusimba no kukuja Jehovha pikija vamweni vacikazviiti.

11. Vanamati vo cokwadi vakatevereresa kudini ndhungamiriro inowanika pana Nduyo 96:8?

¹¹ Verenganyi Nduyo 96:8. Tingakuja Jehovha ngo zviro zvatinazvo zvinosisira. Vanamati vo cokwadi mukuvo wese vaikujavo Jehovha ngo njira iyi. (Mazwi Akangwara 3:9) Inga muezaniso, Vaiziraeri vaipira mare no zviro zvimweni zvaisisira kuitira kubesera kuvakiswa ko themberi no kuinasirira-nasirira. (2 Majimambo 12:​4, 5; 1 Kronika 29:​3-9) Vajiji va Jesu vakabesera Jesu kubatanijavo no vapostori vake ngo “upfumi hwavo.” (Ruka 8:​1-3) Makristu o muzana rokutanga ro makore, akaitavo mupiro jo kubesera hama no hambzaji javo jo kumujimu ngo zvokuha. (Mabasa o Vapostori 11:​27-29) Nyamasi unovo tingakuja Jehovha ngo kuita mupiro jo kujipira.

12. Mupiro jedu jingakujisa kudini Jehovha? (Vonanyi foto.)

¹² Ngatende tivone muezaniso umwe unovonesa kuti mupiro jedu jinokuja Jehovha. Mu gore ra 2020 ku Zimbabwe kwakapeja muvo wakareba kucikani nvura. Zviuru no zviuru zvo vandhu zvakasongana no njara kubatanijavo hambzaji imweni inodanijwa kuti Priska. Pikija kucikani nvura, hambzaji Priska vakaenderera mberi no urongwa hwavo hwo kucumaera ngo Citatu no Cishanu pikija pa mukuvo wo kurima. Vo cigarisano vavo vaivashora ngo kwenda kwavo mu basa ro kucumaera kusiyapo kushanda. Ivona vaivavhunja kudari: “Unondofa ngo njara gore rino.” Hambzaji Priska no kuthemba kwese vaidavira kudari: “Jehovha narini aazosiyi vashandiri vake.” Pacito papera mukuvo wakawanda no zvaitika izvi, ivona vakabesehwa  ngo zvokuha zvavakapuwa ngo sangano. Zvokuha izvi zvavakapuwari zvakakwanisika ngo ndava yo mupiro jedu. Vocigarisano va hambzaji Priska vakashamaisika no kuvavhunja kudari: “Jehovha aazivi kusiya kukubesera, itusu tinodavo kujija ngo pamusoro pake.” Vandhu vaikwana kuita vanomwe vo pacigarisano pavo, vakatanga kuvona musongano jo ungano.

13. Mufambiro wedu ungakujisa kudini Jehovha? (Nduyo 96:9)

¹³ Verenganyi Nduyo 96:9. Tingakuja Jehovha ngo mufambiro wedu. Vapiri vaishandira mu themberi ya Jehovha, vaidikana kugara vakacena. (Ekisodho 40:​30-32) Itusuvo tinodikana kuva takacena haiwa basi mu muviri asi tinodikana kungwarira kuti titame kuita zviri zvese zvinonyenywa ndi Jehovha. (Nduyo 24:​3, 4; 1 Pedhru 1:​15, 16) Tinodikana kuvangisira maningi kuti “tivhise undhu hwo kare” zvirovejeso no zviito zvicizivi kucena, “tosimira undhu hupsa” no kurangarira ngo njira inovonesa mugariro ja Jehovha jinoshamaisa. (Vakorose 3:​9, 10) Ngo besero ra Jehovha, pikija vandhu vaya vanoita zvo uhure no uphanga vangacinja mugariro javo vosimira undhu hupsa.

14. Ngozvapi zvatajija ngo muezaniso wa Jeki? (Vonanyi foto.)

¹⁴ Inga muezaniso, Jeki wainga mwanarume wakashata maningi waiita zvo uphanga iyena wakatoguma pakudanijwa kuti dhimoni. Ngo ndava yo zvakashata zvaainga eciita, Jeki wakatongehwa kufa. Ngo kudaro, paainga eciimira kuti atongwe, iyena wakatendera kujija Bhaibheri no hama yakavhakacira mukadheya maaingaro akafungihwa. Pikija no mugariro wake, Jeki wakacinja undhu hwake hwo kare, pakufamba ko nguva wakazokwanirisa kuti abhabhatijwe. Jeki wakacica maningi zvokuti pa njiku yaaida kuurawa vangwariri vo kadheya vakacema maningi pavaienekana naye. Umwe mushandi wo pakadheya iyi wakananga kuti: “Jeki wakava musungwi wakashata maningi, asi wari uno, iyena waa mundhu waushoni maningi.” Pa sumana yakatevera Jeki naapera kuurawa, hama pajakaviyazve kuzoitisa musongano mu kadheya iyi, jakawana musungwi umweni wakatanga kuvona musongano pa vhaza yo kutanga. Zvicinyi zvakamuitisa kuti ateme civaringo co kuvona musongano uwu? Iyena wakashamaisika maningi ngo kucinja kwakaita Jeki. Cimwenizve, waida kuziva kuti ngozvapi zvaangaita kuti anamate  Jehovha. Zvakajeka kuti mufambiro wedu ungakuja Baba wedu vo kudenga.—1 Pedhru 2:12.

JEHOVHA ANOZOKUJISA KUDINI ZINA RAKE KUMBEJIYO?

15. Jehovha anozokujisa kudini zina rake mukuperera kumbejiyo? (Nduyo 96:​10-13)

¹⁵ Verenganyi Nduyo 96:​10-13. Mavhesi o kupejisira o Nduyo 96 anonanga kuti Jehovha ndi Mutongi na Mambo wakarurama. Jehovha anozokujisa kudini zina rake kumbejiyo? Ngo matongere ake. Ngokukasika iyena anozoparaja Bhabhironiya Guru ngokuti zviara zvo kunyepa zvakaita zviro zvakashata no kujijisa manyepo akashata ngo pamusoro pake. (Apokaripsi 17:​5, 16; 19:​1, 2) Vamweni vanozovona kuparajwa ko Bhabhironiya Guru kangaije vangazoda kubatana na itusu pa kunamata kokadi. Pakupejisira, pa Armagedhoni, Jehovha anozoparaja zviro zvese zvakashata zvakaithwa ndi Sathana no kuparaja vese vanoteverera zina rake no kurishora. Asi anozoponesa vaya vanomuda no kumuzwira no vanodakara ngo kumukuja. (Marko 8:38; 2 Vatesaronika 1:​6-10) Pamuejo wokupejesera mukati mo Kutonga ko Ciuru co Makore ca Kristu, Jehovha anozocenesa zina rake mukuperera. (Apokaripsi 20:​7-10) Pamukuvo wondhowo, “nyika inozozara ngo kuziva nduma ya Jehovha, inga kumwa inopfukija jombe.”—Abhakuki 2:14.

16. Matema civaringo co kuitenyi? (Vonanyi foto.)

¹⁶ Zvinozodakajisa maningi, vandhu vese vanopona pavanozokuja Jehovha inga zvaanofanera. Mbhera igume njiku iyi, tingaita zvese zvatinokwanisa kuti tikuje Jehovha pamukana jese jatinowana. Kuitira kunasa kujekesa shwiro iyi inosisirari, Mukhumbi Unotonga wasana Nduyo 96:8 inga vhesi yedu yo gore ra 2025: “Ipanyi Jehovha rukujo unozwirana no zina rake.”