1. Ngorapi thangwe rakaitisa kuti Jehovha aite nasiriro yo mucadho?

 JEHOVHA ndi “Mwari wakadakara,” iyena anodavo kuti itusu tive takadakara. (1 Timoti 1:11) Iyena wakatipa zvipo zvakawanda kuitira kutibesera kuti tidakajihwe ngo upenyu. (Jakobo 1:17) Cimwe co zvipo izvi, i mucadho. Mwanarume no mwanakaji pavanocadha, ivona vanoita mbhiko yokudisana, kureremejana no kutajana umwe kuno umweni. Kudari mukaji no mwamuna vakaenderera mberi vano rudo hwakavanga ku umwe no umweni, vovaviri vanozova vakadakara.—Mazwi Akangwara 5:18.

2. Mugariro wapi uno mucadho muzinji nyamasi uno?

² Zvinosuruvarisa ngozvokuti, varovorani vazinji vo nyika nyamasi uno, vanokanganwa mbhiko javakaita pa njiku yo mucadho. Inga muviyo, ivona avazivi kudakara. Inga muezaniso, vapsakisisi vakananga kuti majimwamuna mazinji anotaka vakaji vavo, kuvavereketera magama akashata no kutoshaisha kuvataja. Mwamuna anoita zvakadaro, kangaije anotaja mukaji wake ngo nderemejo pakazara vandhu asi pavanonga vari ku muzi anoshaisha kumutaja. Mucadho muzinji ajivivo no mudakaro kudari mwamuna ari kuvona zvoumitu-mitu.

3. Zvicinyi zvingaitisa kuti mwamuna ashaishe kutaja mukaji wake?

³ Ngenyi majimwamuna mazinji anotaja vakaji vavo ngo njira yakashata? Zvingaita kuti mwamunewo wakakura ecivona baba wake vecishaisha kutaja mai wake, zvoita kuti arangarire kuti kushaisha kutaja mukaji azvizivi kushata. Vanarume vamweni vanoshaisha kutaja vakaji vavo ngokuti vakatendenejwa ngo vandhu vanomurangariro wakashata wokuti “mwanarume wokadi” anodikana kushandisa simba kuti avonese ku mukaji wake kuti iyena ndiyena mutongi wo pamuzi. Vanarume vamweni avazivi kujijiswa kuti vave vanojibata no kungwarira ushungu hwavo. Vanarume vazinji vanovona zvoumitu-mitu mukuvo wese, zvovaitisa kuti vave no mavonero akashata ngo pamusoro po vanakaji no zvovatano. Vapsakisisi vazinji vakavona kuti mukati mo korona, majimwamuna mazinji akatanga kushaisha kutaja vakaji vavo. Asi narini mwamuna aadikani  kushaisha kutaja mukaji wake ngo thangwe riri rese.

4. Majimwamuna o Cikristu anodikana kungwarira kuti atame kuitenyi, ngenyi?

⁴ Majimwamuna anoshandira Jehovha anodikana kungwarira kuti vatame kutendera kuti murangariro wakashata uno vandhu vo nyika ngo pamusoro po vanakaji utamevo kuvaita kuti vave no mavonero akashata ngo pamusoro po vanakaji. a Ngenyi? Rimwe ro thangwe rakona ngorokuti murangariro jo mundhu kazinji jinomuitisa kuti aite zvaari kurangariraro. Mupostori Pauro wakangwaja Makristu o kuzojwa o ku Roma kuti ‘aregere kuumbhwa ngo nyika ino.’ (Varoma 12:​1, 2) Mupostori Pauro paakatarira karata Varoma, vandhu vo ku ungano yondhoyo vainga vari Makristu ko makore akawanda. Ngo kudaro, magama a Pauro anovonesa kuti vamweni mu ungano iya vainga veciumbhwa ngo zvirovejeso no murangariro jo nyika. Ndiyo ndava, Pauro wakavangwaja kuti vacinje murangariro wavo no maitiro avo. Mbhangiro iyi inoshandavo ku majimwamuna o Cikristu nyamasi uno. Asi zvinosuruvarisa ngo zvokuti vamweni vakona vakaumbhwa ngo murangariro wo nyika votoguma pakushaisha kutaja vakaji vavo. b Jehovha anovetera kuti mwamuna atajise kudini mukaji wake? Mupinguro wo muvhunjo uwu uri pa vhesi yakacijikira musoro uno.

5. Mukuzwirana na 1 Pedhru 3:​7, mwamuna angatajisa kudini mukaji wake?

⁵ Verenganyi 1 Pedhru 3:7. Jehovha anovhunja majimwamuna kuti akuje vakaji vavo. Kukuja zvinoreva manera atinotaja mundhu watinoreremeja. Mwamuna anokuja mukaji wake anomutaja ngo njira yokunaka mwoyo no yo rudo. Mu cijijo cino, tinozovona kuti mwamuna angakujisa kudini mukaji wake. Pakutanga, tiri kuda kubhuisana ngo zviro zvicikadikani kuithwa ngo mwamuna ku mukaji wake.

MUCAITA ZVIRO ZVINOVONESA KUTI AMUREREMEJI MUKAJI WENYU

6. Jehovha anovona kudini mwanarume anoshaisha kutaja mukaji wake? (Vakorose 3:19)

⁶ Mwamuna aadikani kunesa mukaji wake. Jehovha anonyenya vandhu vanoshandisa simba ravo kuti vaite zvakashata. (Nduyo 11:5) Jehovha anonyenya mwanarume wese anoshaisha kutaja mukaji wake. (Marakiya 2:16; verenganyi Vakorose 3:19.) Mukuzwirana no vhesi yakacijikira musoro uno ya 1 Pedhru 3:​7, kudari mwamuna akashaisha kutaja mukaji wake, zvondhozvo zvinozokhuvaza ushamwari hwake na Jehovha. Jehovha aazozwi mukumbiro jake.

7. Mukuzwirana na Vaefeso 4:​31, 32, majimwamuna anodikana kungwarira kuti atame kuitenyi? (Vonanyi “Magama Akasananguhwa.”)

⁷ Mwamuna aadikani kukharira mukaji wake kana kumuvhunja zviro zvakashata. Majimwamuna mazinji anobhuya no vakaji vavo vakanyangajwa no kubhuya zviro zvinovanyangajisa. Asi Jehovha anonyenya, “bundu, ushungu, kunyangajwa, joweyowe no magama anotuka.” c (Verenganyi Vaefeso 4:​31, 32.) Iyena anozwa zvese. Manera mwamuna anobhuya no mukaji wake pavanonga vari vega no mukaji wake, zvinosisira kuna Jehovha. Mwamuna anobhuya ngo njira yakashata no mukaji wake, aakhuvazi basi mucadho wake, asi anokhuvazavo ushamwari hwake na Jehovha.—Jakobo 1:26.

8. Jehovha anovona kudini zvoumitu-mitu, ngenyi?

⁸ Kuvona zvoumitu-mitu. Jehovha anovona kudini zvoumitu-mitu? Iyena anozvinyenya. Ngo kudaro, mwamuna anovona mafoto acizivi  kucena, anokhuvaza ushamwari hwake na Jehovha pomwe no mukaji wake. d Jehovha anovetera kuti mwamuna aenderere mberi akagondeka kuno mukaji wake, haiwa basi ngo zviito asi kubatanijavo no mu murangariro. Jesu wakananga kuti mwanarume anosotesesa mwanakaji umweni ngo kumuemura anonga aita naye uhure, “ngo mu mwoyo make.” e—Mateu 5:​28, 29.

9. Ngenyi Jehovha anonyenya mwanarume anoita zvovatano no mukaji wake ngo njira iciripi yaushoni?

⁹ Mwamuna aadikani kuvangirija mukaji wake kuita ciro cokuti mukajiwo aadi kuciita. Majimwamuna mazinji anovangirija vakaji vavo kuti vaite zvovatano ngo njira inopseruja inomuita kuti ajizwe acizivi kucena kana kujizwa acikadiwi. Jehovha anonyenya maitiro aya akashata anovonesa kutama kugondeka. Jehovha anovetera kuti mwamuna ade no kutaja mukaji wake no kureremeja mazwiro ake. (Vaefeso 5:​28, 29) Kudari mwamuna wo Cikristu akaita zviro zvinopseruja, kushaisha kutaja mukaji wake no kuvona zvoumitu-mitu keni? Angacinjisa kudini murangariro wake no zviito zvake?

MWAMUNA ANGAITISA KUDINI KUTI ASIYE ZVIITO ZVAKE ZVAKASHATA?

10. Majimwamuna angabesereka kudini ngo muezaniso wa Jesu?

¹⁰ Zvicinyi zvingabesera mwamuna kuti anyise murangariro no zviito zvake zvinopseruja? Anodikana kuvangisira pakutevejera Jesu. Pikija Jesu aazivi kucadha, asi manera aakataja vajiji vake, i muezaniso waushoni kuti mwamuna atevejere pa kutaja mukaji wake. (Vaefeso 5:25) Inga muezaniso, vonanyi kuti majimwamuna angajijenyi kuvha ku muezaniso wa Jesu ngo manera aaitaja vajiji vake no manera aaibhuya navo.

11. Jesu wakatajisa kudini vajiji vake?

¹¹ Jesu wakataja vajiji vake ngo njira yokunaka mwoyo no inofanera. Jesu narini aazivi kumbova mundhu wakashata. Pikija iyena wainga ano simba kupinda vajiji vake, iyena aazivi kumborishandisa kuti vajizwe vakaremba no kumuthya. Kunja kwa zvondhozvo, iyena wakavashandira no kujidodokesa. (Johani 13:​12-17) Iyena wakati ku vajiji vake: “Jijanyi ndini. Ngokuti inini ndiri mundhu wakapfava no kuthiva mwoyo. Mukadaro, imwimwi munozotondhojwa.” (Mateu 11:​28-30) Vonanyi kuti Jesu wainga mundhu wakapfava. Mundhu wakapfava asipi mundhu wakarembejeka. Iyena wakavanga zvokuti anokwanisa kujingwarira. Jesu paaijizwa aciripi ushoni, wairamba akagajana no kujibata kuti akwanise kungwarira mazwiro ake.

12. Jesu waibhuisa kudini no vamweni?

¹² Jesu wakashandisa magama ake kuti atondhoje no kudakajisa vamweni. Iyena aacaibhuyepi ngo njira yakavanga no vateveri vake. (Ruka 8:​47, 48) Pikija vavengi vake pavaimutuka no kumuambira, “iyena aacaihwirijirepi ngo kutukavo.” (1 Pedhru 2:​21-23) Nguva jimweni, Jesu waitovona kuti zviri nane kuramba akanyarara kusiyapo kuvadavira. (Mateu 27:​12-14) Uwu muezaniso waushoni ku majimwamuna o Cikristu.

13. Inga zviri kukhombijwa pana Mateu 19:​4-6, mwamuna angakhombijisa kudini ‘kubatana no mukaji wake’? (Vonanyi foto.)

¹³ Jesu wakajijisa majimwamuna kuti aenderere mberi akagondeka ku vakaji vavo. Iyena wakananga kuti Baba wake vakananga kuti mwamuna anodikana ‘kubatana no mukaji wake.’ (Verenganyi Mateu 19:​4-6.) Gama ro Cigiriki rakashandiswari apa rokuti “kubatana” rinoreva “kunama.” Rudo hwo mukaji no mwamuna unodikana kuva hwakavanga zvodari inga vakanamwa pamwepo. Kudari umwe akaita ciro cinokhuvaza mudoni wake, vovaviri vanozotambujika. Mwamuna anoda maningi mukaji wake anozoramba mukhaindi uri wese wo zviro zvinovonesa zvo umitu-mitu. Iyena ngokukasika anozoreesa  majiso ake “kuti atame kuvona zviro zvabiresi.” (Nduyo 119:37) Ngo kudaro, iyena anoita citenderano no majiso ake kuti atame kuemura mwanakaji ari wese aciripi mukaji wake.—Jobe 31:1.

14. Ngozvapi zvinodikana kuithwa ngo mwanarume anoshaisha kutaja mukaji kuti akwanise kuitisa nane ushamwari hwake na Jehovha pomwe no mukaji wake?

¹⁴ Mwamuna anoita zviro zvakashata kana anovereketa zviro zvakashata ku mukaji wake, anodikana kuita zviro zvakawanda kuti akwanise kuitisa nane ushamwari hwake na Jehovha pomwe no mukaji wake. Zviro izvi ngozvapi? Cokutanga, iyena anodikana kuziva kuti ano cineso cikuru. Cimwenizve, Jehovha anovona zvese zvaanoita no gama rimwe nga rimwe raanobhuya. (Nduyo 44:21; Mucumaeri 12:14; Vahebheru 4:13) Cocipiri, iyena anodikana kusiya cirovejeso cokushaisha kutaja mukaji wake no kucinja murangariro wake. (Mazwi Akangwara 28:13) Cocitatu, iyena anodikana kukumbira kuregerehwa ngo mukaji wake no kukumbira kuregerehwa ndi Jehovha. (Mabasa o Vapostori 3:19) Cimwenizve, anodikana kudeketerera Jehovha ecikumbira cido cokucinja no besero kuti angwarire murangariro jake, mavereketero ake no zviito zvake. (Nduyo 51:​10-12; 2 Vakorinte 10:5; Vafiripi 2:13) Cocirongomuna, iyena anodikana kuita mukuzwirana no mukumbiro jake ngokujijira kunyenya mushovo wese wo zvakashata no magama akashata. (Nduyo 97:10) Cocishanu, iyena anodikana kukumbira besero ngokukasika ku vakuru vano rudo mu ungano make. (Jakobo 5:​14-16) Cocitandhatu, iyena anodikana kuita urongwa unozomubesera kuti atamezve kuzoita zvaaitari kumbejiyo. Mwamuna anovonavo zvoumitu-mitu anodikana kuita zvese zvaperari kunangwa. Jehovha anozokomborera kuvangisira kwenyu kuti mucinje murangariro wenyu. (Nduyo 37:5) Asi azvikwani basi mwamuna kuima kuita zviro zvicikareremeji mukaji wake. Iyena anodikana kujijira kukuja mukaji wake. Angazviitisa kudini izvi?

MUNGAKUJISA KUDINI MUKAJI WENYU?

15. Mwamuna angakhombijisa kudini rudo ku mukaji wake?

¹⁵ Mukhombijenyi kuti munomuda. Hama jakacadha cimwenizve jino mudakaro, jino cirovejeso cokuita ciri cese njiku ngo njiku kuitira kuvonesa vakaji vavo kuti vanovada maningi. (1 Johani 3:18) Mwamuna angakhombija rudo uhu ku mukaji wake ngokuita zviro zvidoko zvakadari inga, kubata nyara yake kana kumukumbatira  ngo njira yo rudo. Iyena angatumira mesajhi ecinanga kudari: “Ndiri kukurangarira maningi” kana kumuvhunjisa kuti “iri kufamba kudini njiku yako?” Pa mukuvo umweni iyena angaita kutara karata ino masoko anovonesa kuti iyena anomuda maningi. Mwamuna paanoita izvi anokuja mukaji wake no kuvangisa mucadho wake.

16. Ngenyi mwamuna anodikana kukuja mukaji wake?

¹⁶ Muvhunjenyi kuti anosisira maningi kwamuri. Mwamuna anokuja mukaji wake, anomujijisa no kumuvangisa. Njira imwe yokuita izvi ngo yokuceukija kubongesera ngo zvese zvaanoita kuti amubesere. (Vakorose 3:15) Mwamuna paanokuja mukaji wake, anoita kuti mwoyo wake udakare. Iyena anozojizwa akangwaririka, ecidiwa no kukujwa.—Mazwi Akangwara 31:28.

17. Mwamuna angakhombijisa kudini nderemejo ku mukaji wake?

¹⁷ Ivanyi mundhu wakanaka no ano nderemejo. Mwamuna anoda mukaji wake anomureremeja. Iyena anovona mukaji wake inga cipo cakaseja cinovha kuna Jehovha. (Mazwi Akangwara 18:22; 31:10) Inga muviyo, iyena anomutaja ngo njira yakanaka no yo nderemejo, pikija paya pavanonga veciita zvovatano. Iyena aazomuvangiriji kuti vaite zvovatano ngo njira inomuita kuti atame kujizwa ushoni, inomupseruja kana inopsaswa hana yake. f Iyena anozovangisira kuti aenderere mberi ano hana yakacena pamberi pa Jehovha.—Mabasa o Vapostori 24:16.

18. Majimwamuna anodikana kutema civaringo cokuitenyi? (Vonanyi bhokiso rino musoro unoti: “ Njira Murongomuna Jingabesera Majimwamuna Kuti Ave no Nderemejo.”)

¹⁸ Majimwamuna anodikana kuva no cokwadi cokuti Jehovha ari kuvona kuvangisira kwavari kuita kuti vakuje vakaji vavo pa zvese zvavanoita mu upenyu hwavo. Iyena anodikana kutema civaringo cokukuja mukaji wake, kumuda, kumureremeja no kumukhombijira rudo. Ngokuita izvi munokhombija kuti munomuda no kumureremeja. Kujanyi mukaji wenyu, mukaita kudaro, munozojivirira ushamwari hwenyu naye pomwe no ushamwari hwenyu na Jehovha uwo unosisira maningi.—Nduyo 25:14.