MUSORO WO KUJIJA WO 4
NDUMBO 18 Kubonga ngo Muripo
Muripo Unotijijisenyi?
“Ngo njira iyi, Mwari wakatatija rudo hwake.”—1 JOHANI 4:9.
ZVATICAJIJA
Mu cijijo cino, tinozovona kuti ngozvapi zvatinojija ngo rufu hwa Jesu ngo pamusoro po mugariro jakaseja ja Jehovha no ja Jesu javakakhombija.
1. Tinobesereka kudini ngokuvona Cirangarijo co kufa ka Jesu gore ngo gore?
NGOZVOKADI kuti munotendera kuti muripo i cipo cinosisira maningi. (2 Vakorinte 9:15) Zvecivoneka kuti Jesu wakapira upenyu hwake ku vandhu, imwimwi mungakwanisa kuva no ushamwari hwophedo na Jehovha. Imwimwi mungavavo no vetero yo upenyu ucikaperi. Tino mathangwe akawanda o kubongesera Jehovha ngokutipa kwake muripo ngokuti anotida maningi. (Varoma 5:8) Kuitira kutibesera kuti tienderere mberi tecibongesera no kutama kukanganwa zvatakaitihwa ndi Jehovha na Jesu, Jesu wakativhunja kuti tivone Cirangarijo co kufa kwake gore ngo gore.—Ruka 22:19, 20.
2. Ngozvapi zvatinozovona mu cijijo cino?
2 Gore rino, Cirangarijo cinozoithwa ngo Musabudu mu njiku 12 ya Abril wo 2025. Pacina kukana-kana, tese tiri kuita nasiriro kuti tizovepo. Tinozobesereka maningi kudari tikazovhisa nguva pamukuvo wo Cirangarijo kuti tirangarijisise a ngo zvatakaitihwa ndi Jehovha no Mwana wake Jesu. Mu cijijo ici, tinozovona kuti muripo unotijijisenyi ngo pamusoro pa Jehovha no Mwana wake. Mu cijijo cinotevera, tinozobesehwa kuzwisisa kuti tingaitisa kudini kuti tibesereke ngo muripo uwu no manera atingakhombijavo kubongesera ku muripo wondhowo.
MURIPO UNOTIJIJISENYI NGO PAMUSORO PA JEHOVHA?
3. Rufu wo mundhu umwe ungasujunurisa kudini zviuru no zviuru zvo vandhu? (Vonanyi foto.)
3 Muripo unotijijisa ngo pamusoro po ururami hwa Jehovha. (Dhotoronome 32:4) Kuitisa kudini? Amborangariranyi izvi basi: Ngo kutama kuzwira ka Adhamu, itusu takagara utaka cishaishi cinotiita kuti tigumire pakufa. (Varoma 5:12) Kuitira kutisujunura ku cishaishi no rufu, Jehovha wakatipa muripo ecishandisa Mwana wake Jesu. Asi zvaizoitisa kudini kuti muripo wo mundhu umwe wakakwana usujunure zviuru no zviuru zvo vandhu? Mupostori Pauro wakati: “Ngo kutama kuzwira ko mundhu umwe basi [Adhamu] vandhu vese vakazwi vashaishi, ngo maitiro ondhowo, ngo kuzwira ko mundhu umwe basi [Jesu] vandhu vese vanozozwi vakarurama.” (Varoma 5:19; 1 Timoti 2:6) Ngo kudaro, mupostori Pauro wainga ecinanga kuti vandhu vese vakava vashaishi, cimwenizve vanofa ngokuti mundhu wainga akakwana aazivi kuzwira Jehovha. Ngo kudaro, paidikana mwanarume wakakwana no anozwira kuti atisujunure.
Mwanarume umwe wakatiita kuti tive vandhu vano cishaishi no rufu. Mu njira yakaezana, mwanarume umwe wakatisujunura (Vonanyi ndima 3)
4. Ngenyi Jehovha aazivi kutendera kuti vana va Adhamu vaizokhombija kuzwira vapone kwenda no kwenda?
4 Kureva kuti Jesu wakadikana kufa kuti atiponese? Ngenyi Jehovha aazivi kutendera kuti vana va Adhamu vaizozwira vararame kwenda no kwenda? Itusu tingarangarira kuti iyi yaizova njira yaushoni yo kutonga cineso, asi aivonesi kururama kwakakwana ka Jehovha. Zvecivoneka kuti Jehovha wakarurama, iyena aacaizoitepi ciri cese caizovonesa kuti Adhamu aazivi kushaisha.
5. Ngenyi tingava no cokwadi cokuti Jehovha mukuvo wese anozoita zvakarurama?
5 Asi ngozvapi zvaizoitika kudari Jehovha naacizivi kutipekeja muripo, osiya kururama kwake ngokutendera kuti vana Adhamu vacizivi kukwana vapone kwenda no kwenda? Kangaije vandhu vaizorangarira kuti Mwari waizosiya kururama kwake pa shwiro jimweni. Inga muezaniso, kureva kuti Jehovha angasiya kukwanirisa zvigondiso zvake zvimweni? Atidikani kuneseka ngo pamusoro pazvo. Jehovha ngokuita kwake zviro zvakarurama, pikija zvakamubarira basa guru ro kutora Mwana wake umwe ega basi kuti atifire, zvinotivangisa kuti mukuvo wese iyena anozoita zviro zvakarurama.
6. Ngowapi mugariro umweni wakaita kuti Jehovha atumire Mwana wake? (1 Johani 4:9, 10)
6 Pikija kuti muripo unotibesera kuzwisisa kuti Jehovha wakarurama, iwona unotibeseravo kuzwisisa kuti rudo hwake hwakakuravo maningi. (Johani 3:16; verenganyi 1 Johani 4:9, 10.) Zviro zvatinojija ngo pamusoro po muripo zvinovonesa kuti Jehovha aadi basi kuti itusu tive no upenyu ucikaperi asi anodavo kuti tiite divi ro mbhuri yake. Amborangariranyi izvi: Adhamu paakashaisha, Jehovha wakamugogomera pakati po mbhuri yo vanamati vake. Inga muviyo, itusu tese takabahwa kunja ko mbhuri ya Jehovha. Ngo ndava yo muripo, Jehovha anoregerera zvishaisi zvedu, pejisire anoviisa vese vaya vanokhombija rutendo no kumuzwira ku mbhuri yake. Pikija zvakadaro, tingava no ushamwari hwophedo na Jehovha no hama no hambzaji jatinonamata najo. Ngo kudaro, Jehovha anotida maningi.—Varoma 5:10, 11.
7. Kutambujika ka Jesu kunotibeseresa kudini kuzwisisa kuti Jehovha anotida maningi?
7 Tingazwisisa ushoni kuti Jehovha anotida maningi kudari tikasotesesa kuhwajihwa kwaakava nako ngokuvona Mwana wake ecitambujika kuti atifire. Sathana wakananga kuti apana no mushandiri umwe wa Jehovha anozoenderera mberi akagondeka kwaari paya paanozosongana no zvineso. Kuitira kuvonesa kuti zvakanangwari ndi Sathana ngozvokunyepa, Jehovha wakatendera kuti Jesu atambujike acito afa. (Jobe 2:1-5; 1 Pedhru 2:21) Jehovha wainga ecivona Mwana wake Jesu paainga ecishohwa ngo vavengi vake avo vainga vatungamiriri vo zviara, paiitakwa ngo masoca no paakakohomehwa pamutanda. Perapo Jehovha wakazovonazve Mwana wake anodiwa ecitambujika no kufa ngo njira inohwaja. (Mateu 27:28-31, 39) Jehovha wainga no simba ro kuimisa izvi kuti zvicaitika. Inga muezaniso, vavengi vake pavakanangaya kuti “Mwari wakewo ngaamuponese kudari Ecimuda,” Jehovha waizoita zvondhozvo kamare. (Mateu 27:42, 43) Mukusiyana, kudari Jehovha naakaimisa kuti izvi zvicaitika, apana muripo waizopagahwi, cimwenizve, aticaizovepi no vetero iri yese. Asi Jehovha wakatendera kuti Mwana wake acungirire matambujiko aya mbhera kufa.
8. Kureva kuti Jehovha wakahwajihwa ngokuvona Mwana wake ecitambujika? Sananguranyi. (Vonanyi foto.)
8 Atidikani kurangarira kuti Mwari wo Masimba Ese aana mazwiro. Jehovha wakasika vandhu ovaita kuti vave no mazwiro. Ndiyo ndava, Bhaibheri rinonanga kuti iyena wakavasika ngo muezaniso wake, izvi zvinoreva kuti Jehovha anawovo mazwiro. Bhaibheri rinonanga kuti iyena “wakahwajihwa” no “kunyangajwa.” (Nduyo 78:40, 41) Vonanyi muezaniso wa Abhirahama na Izaki. Ceukijanyi kuti Jehovha wakavhunja Abhirahama kuti apire mwana wake umwe ega inga mupiro. (Genesisi 22:9-12; Vahebheru 11:17-19) Mungakwanisa kurangarira mazwiro akava na Abhirahama paainga ecinasirira kuti auraye mwana wake Izaki ngo cipanga. Jehovha wakahwajihwa maningi no kunyangajwa paakavona vandhu vecitambuja Mwana wake no kumuuraya.—Vonanyi vhidhiyo inoti: Tevejeranyi Rutendo Hwavo—Abhirahama, divi 2 mu jw.org.
Jehovha wakahwajihwa maningi paakavona Mwana wake ecitambujika (Vonanyi ndima 8)
9. Ngozvapi zvamunojija pana Varoma 8:32, 38, 39, ngo pamusoro po rudo hwa Jehovha?
9 Muripo unotijijisa kuti akuna mundhu ari wese anotida maningi kupinda Jehovha, nee ukama hwedu hwatinoda maningi nee shamwari yedu yaushoni. (Verenganyi Varoma 8:32, 38, 39.) Pacina kukana-kana, Jehovha anotida maningi kupinda kutida kwatinojiita pacedu. Imwimwi munoda kupona kwenda no kwenda? Itusu tinoda kupona kwenda no kwenda asi Jehovha ndiyena anoda maningi kuti itusu tipone kwenda no kwenda kupinda itusu. Imwimwi munoda kuti zvishaishi zvenyu zviregerehwe? Itusu tinoda kuregerehwa zvishaishi zvedu asi Jehovha ndiyena anozvida maningi kupinda itusu. Iyena anokumbira kuti itusu titendere cipo ici ngokuva no rutendo hwakavanga kwaari no kumuzwira. Muripo i citatijo co rudo wakakura wa Jehovha. Mu nyika imbza tinozojija zvakawanda ngo pamusoro po rudo hwa Jehovha.—Mucumaeri 3:11.
MURIPO UNOTIJIJISENYI NGO PAMUSORO PA JESU?
10. (a) Ngenyi Jesu wakahwajihwa ngokuziva mafire aaizoita? (b) Jesu wakakhombijisa kudini kuti Jehovha ndi Mwari wakarurama? (Vonanyi bhokiso rinoti: “ Kugondeka Kwa Jesu Kwakakhombijisa Kudini Kuti Jehovha Ndi Mwari Wakarurama?”)
10 Jesu anoneseka maningi ngo zvinorangarihwa ngo vandhu ngo pamusoro pa Baba wake. (Johani 14:31) Jesu wakahwajihwa maningi ngo zvakashata zvaizorangarihwa ngo vandhu ngo pamusoro pa Baba wake pakuti iyena waizouraiwa inga mundhu wainga acikareremeji Mwari kana kuti mushaishi. Ndiyo ndava, iyena wakaita mukumbiro eciti: “Baba wangu, kudari zvecikwanisika, kopo iyi ngaifunduruke kondiri.” (Mateu 26:39) Ngo kwenderera kwake mberi akagondeka kuna Jehovha mbhera kufa, Jesu wakacenesa zina ra Baba wake.
11. Jesu wakakhombijisa kudini rudo hwakakura ku vandhu? (Johani 13:1)
11 Muripo unotijijisa kuti Jesu anoneseka maningi ngo vandhu, maningi-ningi vajiji vake. (Mazwi Akangwara 8:31; verenganyi Johani 13:1.) Inga muezaniso, Jesu waizviziva kuti basa raiitari pa nyika ro kucumaera masoko akanaka, raizomuviisira zvineso zvizinji, pejisire waizofa mu njira inohwaja maningi. Jesu wakaita zviro zvese izvi zvainesari haiwa ngokuti wainga akagajwa ndi Baba wake kuti azviite, asi wakazviita ngokuti waida maningi vandhu. Kusiyapo zvondhozvo, Jesu wakabatikana pa basa rokucumaera, kujijisa no kubesera vamweni. Pikija pa njiku yaakazofa, Jesu wakawana nguva yo kusuka soka jo vajiji vake kuitira kuvajijisa, kuvavangisa, no kuvatondhoja. (Johani 13:12-15) Perapo, pikija waizwa kuhwaja maningi ecifa pa mutanda, Jesu wakapa vetero mushaishi waingaya pa divi rake ngokumuvhunja kuti anozova naye muparadhiso, cimwenizve wakakhombijavo kuneseka kuna mai wake ngokukumbira Johani kuti azovataja. (Ruka 23:42, 43; Johani 19:26, 27) Jesu aazivi basi kukhombija rudo hwake ku vandhu ngokuvafira, iyena wakavataja ngo rudo no kunaka mwoyo.
12. Jesu ari kutibeseresa kudini wari uno?
12 Pikija Kristu wakafa kuti “atame kuzofazve,” iyena aciri kutiitira zviro zvakawanda. (Varoma 6:10) Kuitisa kudini? Iyena aciri kwenderera mberi ecishanda kuitira kutipa zviro zvakawanda zvaushoni zvatinowana ngo ndava yo muripo. Ambovonanyi zvaari kuita wari. Iyena ari kushanda inga Mambo wedu, Mupiri Mukuru no musoro wo ungano. (1 Vakorinte 15:25; Vaefeso 5:23; Vahebheru 2:17) Iyena ari kutungamirira basa ro kuunganija vo kuzojwa no vo mavhuta amweni, basa rokuti rinozopera dambujiko guru ricito ratanga. b (Mateu 25:32; Marko 13:27) Iyena ari kutungamirirazve pakupa zvokuha zvo kumujimu ku vashandiri vake vakagondeka mukati mo mukuvo jino jokupejisira. (Mateu 24:45) Mukati mo Kutonga Kwake ko Ciuru co Makore, iyena anozoenderera mberi ecitipa zviro zvatinoda. Jehovha wakatipekejadi Mwana wake.
MUCAIMA KUJIJA
13. Kurangarijisisa kunozomubeseresa kudini kuti muenderere mberi mecijija ngo pamusoro po rudo hwa Jehovha na Jesu kwamuri?
13 Munozoenderera mberi mecijija ngo pamusoro po rudo una Jehovha na Jesu wavanawo na itusu kudari mukaenderera mberi mecirangarijisisa ngo pamusoro pavo. Kangaije mukati mo Cirangarijo co gore rino, imwimwi munganasa kuverenga Vhangeri rimwe kana kuti maviri. Mucaverenga zvipauko zvakawanda pamukuvo umwewo. Kunja kwa zvondhozvo, mucaverenga zvakawanda, cimwenizve, psanganyi mathangwe anovonesa kuti ngenyi tinodikana kuda Jehovha na Jesu. Ngo njira iri yese kovananyi no vamweni zvamunonga mecijija.
14. Mukuzwirana na Nduyo 119:97, kupsakisisa kungamubeseresa kudini kuti muenderere mberi mecijija ngo pamusoro po muripo no zviro zvimweni? (Vonanyi foto.)
14 Kudari imwimwi muno makore akawanda muri mucokwadi, kangaije mungajivhunjisa kuti zvinokwanisika kuwana zviro zvipsa ngo pamusoro po shwiro jinozivikanwa maningi jakadari inga, kururama ka Mwari, rudo hwake pomwe no muripo. Zvokadi, mukuvo wese tinozova no zviro zvokujija ngo pamusoro po shwiro iji. Waro ngozvapi zvamunodikana kuita? Verenganyi no kujija zviro zvinoshamaisa mu mabhuku edu akacijikira mu Bhaibheri. Pamunoverenga zviro zvokuti amunasi kuzvizwisisa ushoni, psakisisanyi. Ngo kudaro, kumbhiri ko njiku, rangarijisisanyi ngo zvamawana no zvazvinoreva ngo pamusoro pa Jehovha na Jesu no rudo hwavo kwamuri.—Verenganyi Nduyo 119:97.
Pikija tino makore akawanda tiri mucokwadi, tingaengejera kubongesera kwedu ngo ndava yo muripo (Vonanyi ndima 14)
15. Ngenyi zvinosisira kwenderera mberi tecijija zviro zvipsa zvinowanika mu Bhaibheri?
15 Mucaruza mudakaro paya pamunotama zviro kana zvinoshamaisa pamunonga meciverenga kana kupsakisisa. Jivonenyi inga mundhu ari kupsaka goridhe. Ngo kusengerera kwese, vandhu vanopsaka goridhe, vanopeja nguva no njiku jakawanda vacito vawana nee zvigoridhe zvidoko. Ngo kudaro, vanoenderera mberi vecipsaka ngokuti nee cidimbu co goridhe cinosisira maningi kwavari. Asi zviro zvinosisira maningi i ciro cimwe nga cimwe cipsa catinojija mu Bhaibheri. (Nduyo 119:127; Mazwi Akangwara 8:10) Ngo kudaro, ivanyi anosengerera, kwanirisanyi urongwa hwenyu hwokuverenga Bhaibheri.—Nduyo 1:2.
16. Tingatevejeresa kudini Jehovha na Jesu?
16 Pamunonga mecijija, psanganyi njira jokushandisa zvamunongaro mecijija. Inga muezaniso, tevejeranyi kururama kwa Jehovha ngokutaja vamweni mucikakheti. Tevejeranyi rudo hwa Jesu hwaainga nahwo kuna Baba wake no vandhu, ngokuva makanasiririka kuti muite zvinodiwa ndi Jehovha no kubesera vamweni pikija zvingatoita kuti upenyu hwenyu hunese nguva jimwemi. Cimwenizve, tevejeranyi Jesu ngokucumaera vamweni kuti vawanevo mukana wokutendera cipo cinosisira ca Jehovha.
17. Ngozvapi zvatinozovona mu cijijo cinotevera?
17 Patinozonasa kuzwisisa no kureremeja muripo, tinozodavo maningi Jehovha no Mwana wake. Ngokuti itusu tinovada, ivona vanozotidavo maningi. (Johani 14:21; Jakobo 4:8) Ngo kudaro, ngatishandise besero ratinopuwa ndi Jehovha ngokukwenderera mberi tecijijira ngo pamusoro po muripo. Mu cijijo cinotevera, tinozojija ngo pamusoro po makomborero atinawo ngokuti Jesu wakatifira no kuvona kuti tingakhombijisa kudini kubongesera pacedu.
NDUMBO 107 Muezaniso wo Umwari wo Rudo
a KUSANANGUHWA KO MAGAMA: “Kurangarijisisa” kunoreva kubatikana pa shwiro iri yese no kuipsakisisa.
b “Kuunganija zviro zvese zviri kudenga” kwakanangwa ndi Pauro inga zviri kukhombijwa pana Vaefeso 1:10, kwakasiyana no ‘kuunganija vakasanwa’ kwakanangwa ndi Jesu inga zviri kukhombijwa pana Mateu 24:31 na Marko 13:27. Pauro wainga ecirevera mukuvo wokuti Jehovha anozosana Makristu anozotonga na Jesu awo akazojwa ngo mujimu mucena. Asi Jesu wainga ecirevera mukuvo wokuti vokuzojwa vanonga vasara pa nyika pano, vanozotohwa vounganijwa kuti vaende kudenga mukati mo dambujiko guru.
