MUSORO WO KUJIJA WO 3
NDUMBO 35 ‘Sananyi Zviro Zvinodikana’
Temanyi Zvivaringo Zvinodakajisa Jehovha
“Kuziva Jehovha, zvinoreva kutanga kuwana uzivi, Kuziva Mwari Wakacena, zvinoreva kuzwisisa.”—MAZWI AKANGWARA 9:10.
ZVATICAJIJA
Mu cijijo cino, tinozovona kuti tingashandisisa kudini uzivi kuti titeme zvivaringo zvaushoni.
1. I ciro capi cinonesa catinodikana kuita?
NJIKU jese tinoda kutema zvivaringo. Zvivaringo zvimweni zvakadari inga ndinoda kuhenyi comangwani kana ndicito ndaenda kovata, zvakareruka kuzviita. Asi kuno zvivaringo zvimweni zvinonesa maningi kuda kuzviita. Zvimweni zvingapsasa uhomi hwedu, mudakaro wedu, ukama hwedu, no kunamata kwedu. Tinoda kuti zvivaringo zvedu zvitibesere no kubeseravo mbhuri yedu. Kunja kwa zvese izvi tinoda kuti zvivaringo zvedu zvidakajise Jehovha.—Varoma 12:1, 2.
2. Ngozvapi zvinozomubesera kuti muteme zvivaringo zvaushoni?
2 Kangaije munozokwanisa kutema zvivaringo zvaushoni cokutanga, kudari mukaziva zvese zvinobatanijwepo, cocipiri, kudari mukarangarira mavonero anoita Jehovha ngo pamusoro po shwiroyo no cocitatu, kudari mukarangarira ngo kungwarira kwese ngo pamusoro po shwiroyo. Cijijo cino cinozobhuya ngo mafundo aya, iwona anozotibesera kuti tiroveje simba redu ro kuzwisisa.—Mazwi Akangwara 2:11.
ZIVANYI ZVINOBATANIJWEPO
3. Ipanyi muezaniso unovonesa kuti ngenyi munodikana kuzwisisa zvese zvinobatanijwa mucito matema civaringo?
3 Ciro cokutanga cinozomubesera kuti muteme civaringo caushoni ngo co kuziva zvese zvinobatanijwepo. Ngenyi izvi zvinosisira? Amborangariranyi kuti mundhu ariwese ari kuhwaja woenda kovhunja medhiko ngo pamusoro po ndhendha yake inonesa maningi. Kureva kuti medhiko waizotema civaringo co kurapa mundhu ari kuhwajaro acito atanga apsakisisa kuti ngozvapi zvaarikuzwa? Zvakajeka kuti haiwa. Imwimwi munozotemavo zvivaringo zvaushoni, kudari mukatanga marangarira ngo kungwarira kwese ngo pamusoro po zviro zvinobatanijwa pa shwiroyo. Mungazviitisa kudini izvi?
4. Mukuzwirana na Mazwi Akangwara 18:13 mungaitisa kudini kuti muve no cokwadi kuti munoziva zvese zvinobatanijwepo? (Vonanyi foto.)
4 Kazinji imwimwi mungazwisisa zvese zvinobatanijwa pa shwiroyo ngo kujiita muvhunjo. Ngatiti makokwa ku mabungaijo ariese. Kureva kuti imwimwi maizoendeyo? Kudari imwimwi mucikazivani no mutungamiriri wo mabungaijo aya kana nasiriro yaithwa kuitira mabungaijo aya, maizojivhunjisa muvhunjo jakadari inga iji: “Ngo kwapi nokutizve ndirini kunozoithwa mabungaijo aya? Vandhu vangana vanozoveyo? Ndiyani anozotungamirira? Ndivanaani vanozoveyo? Ngozvapi zvakarongwa kuti zvizoithwa pa mabungaijo aya? Kunozova no doro kuitira vandhu vanongaro vakokwa?” Mupinguro jo muvhunjo iji jinozomubesera kuti muteme civaringo ngo ungwaru.—Verenganyi Mazwi Akangwara 18:13.
Zwisisanyi zvese zvinobatanijwepo ngo kuita muvhunjo (Vonanyi ndima 4) a
5. Munodikana kuitenyi pamunopera kuzwisisa zvese zvinobatanijwepo?
5 Perapo pasure po kuziva zvese zvinobatanijwepo, rangariranyi no kungwarira kwese ngo pamusoro po shwiroyo. Inga muezaniso, kudari mukaziva kuti vandhu vanozova kumabungaijo aya i vandhu vacikazwiri Jehovha, cimwenizve, mozivazve kuti kunozova no doro asi akuna mundhu anozotungamirira kuitira kuti vandhu vacamwa maningi, ngozvapi zvamaizoita? Munorangarira kuti pano mukana wokuzoita kuti mabungaijo aya atame kuva akashata? (1 Pedhru 4:3) Ngo divi rimweni, ngozvapi zvaizoitika kudari nguva yo kwenda kumabungaijo aya ndiyona yondhoyo no yo kwendavo kumusongano wo ungano kana kwenda mubasa ro kocumaera? Kudari imwimwi mukazwisisa zvese zvinobatanijwepo munozokwanisa kutema civaringo caushoni. Asi kuno ciro cimweni camunodikana kuita, imwimwi munoziva manera amuri kujizwa ngo pamusoro po shwiroyo, waro Jehovha anozvivonavo kudini?—Mazwi Akangwara 2:6.
VONANYI ZVIRI KURANGARIHWA NDI JEHOVHA
6. Mukuzwirana na Jakobo 1:5, ngenyi tinodikana kuita mukumbiro tecida besero ra Jehovha?
6 Kumbiranyi Jehovha kuti amubesere kuzwisisa manera ake o kurangarira. Jehovha anogondesa kuti anozotipa uzivi kuitira kutibesera kuzwisisa kuziva kuti ngozvapi zvaanorangarira ngo pamusoro po shwiroyo. “Iyena anozomupa uzivi hwakawanda ngo mwoyo wese acikamuvereketeri.”—Verenganyi Jakobo 1:5.
7. Mungaitisa kudini kuti muzive zviri kurangarihwa ndi Jehovha ngo pamusoro po shwiroyo? Ezanisanyi.
7 Pasure po kuita mukumbiro mecikumbira ndhungamiriro ya Jehovha, imwimwi munodikana kunasa kuzwisisa mupinguro waanozomupa. Inga muezaniso, kudari imwimwi mukarasika pamunonga meciita hwendo, imwimwi munokumbira besero ku mundhu anogara mu mutundhu wondhowo. Kureva kuti imwimwi maizopinda mundhuwo acito amudavira? Zvakajeka kuti haiwa. Imwimwi maizopurukira no kungwarira kwese zvaaizomuvhunjaro. Mu njira yakaezana, pasure po kukumbira Jehovha kuti amupe uzivi, ejanyi kuzwisisa mupinguro wake ngo kupsakisisa mutemo no ndhungamiriro jo mu Bhaibheri jingashanda pa mugariro wenyu. Inga muezaniso, pamunonga mecitema civaringo kuti munozoenda ku mabungaijo anangwaya pakutanga kana kuti haiwa, imwimwi mungavona kuti Bhaibheri rinonangenyi ngo pamusoro po mabungaijo aciripi aushoni, shamwari jakashata, no kuvona dikano yo kudira Umambo hwa Mwari pa kutanga kuciripi zvinodiwa zvenyu.—Mateu 6:33; Varoma 13:13; 1 Vakorinte 15:33.
8. Mungaitenyi kudari mecida besero kuti muwane mazano ngo pamusoro po zvamuri kupsaka? (Vonanyi foto.)
8 Pikija zvakadaro, kazinji imwimwi mungada besero kuti muwane zvamunongaro mecipsakisisa. Imwmwi mungaashira mazano ecivha ku hama kana hambzaji inoruzivo. Ngo kudaro, imwimwi munozobeserekavo ngo kupsakisisa kwenyu kwamunonga meciita. Kuno mabhuku anowanika mu mathurusi edu o kujijisa akadari inga Bhuku ro Kupsakisisa ro Zvapupu zva Jehovha no Vhesi Jinotibesera Kuti Tishandire Jehovha. Ceukijanyi kuti cinangwa ngo cokuda kudakajisa Jehovha.
Vonanyi manera Jehovha anorangarira (Vonanyi ndima 8) b
9. Tingaitisa kudini kuti tive no cokwadi cokuti civaringo cedu cinozodakajisa Jehovha? (Vaefeso 5:17)
9 Tingaitisa kudini kuti tive no cokwadi co kuti civaringo cedu cinozodakajisa Jehovha? Ticito tatema civaringo tinodikana kuziva zvese zvinobatanijwepo. Bhaibheri rinoti: “Kuziva Mwari Wakacena, zvinoreva kuzwisisa.” (Mazwi Akangwara 9:10) Hina, kunasa kuzwisisa i kuziva mugariro ja Jehovha, cinangwa cake, no kuziva zvaanoda no zvaanonyenya. Jivhunjisenyi kudari: ‘Ndakacijikira pa zviro zvandinoziva ngo pamusoro pa Jehovha, civaringo capi candinodikana kutema cinozomudakajisa?’—Verenganyi Vaefeso 5:17.
10. Ngenyi ndhungamiro jo mu Bhaibheri jinosisira maningi kupinda zvirovejeso zvo mbhuri kana zvo mu mutundhu mamunogararo?
10 Mukuvo umweni kuti tikwanise kudakajisa Jehovha, tingaita ciro cinganyangajisa vamweni. Inga muezaniso, vabari vokuti vatori no mugariro ja ushoni kangaije vangatovangirija mwana wavo kuti acadhe no hama yavanovona kuti inomare yakawanda maningi kana inozovapagari mare yakawanda maningi pikija icikavangisiri pa kushandira Jehovha. Ngozvokadi kuti ivona vanoda kuti mwana wavo atajwe ushoni kudivi ro kunyama, waro ndiyani anozomubesera kuti akure ku divi ro kumujimu? Jehovha anovonesa kudini shwiro iyi? Tinowana mupinguro pana Mateu 6:33. Pa vhesi iyi, Makristu anovangiswa kuti ‘aenderere mberi ecitanga kupsaka Umambo.’ Pikija tinodikana kukuja vabari vedu no kureremeja vandhu vanogara mu mutundhu medu, cinosisira maningi i kuita kuti Jehovha adakare.
KURANGARIRA NO KUNGWARIRA KWESE NGO PAMUSORO PO SHWIROYO
11. Mugariro wapi unowanika pana Vafiripi 1:9, 10 unozomubesera kunasa kurangarira ngo pamusoro po shwiroyo?
11 Pasure po kusotesesa ndhungamiriro jo mu Bhaibheri jingashandiswa pa shwiro yenyu, imwimwi munodikana kunasa kurangarira no kungwarira kwese ngo pamusoro po shwiroyo. (Verenganyi Vafiripi 1:9, 10.) “Kuzwisisa” kwenyu kunozomubesera kuti muzive muviyo unozovepo. Mukuvo umweni zvingava zvakareruka kutema zvivaringo, asi zvivaringo zvese asipi zvaushoni. Kuzwisisa kunozomubesera kuti muteme zvivaringo zvaushoni pikija pa mugariro jiya jinonesa.
12-13. Kuzwisisa kunozomubesera kudini kuti muteme civaringo caushoni ngo pamusoro po basa riri rese?
12 Ambovonanyi muezaniso uwu basi. Ngatiti imwimwi muri kupsaka basa kuitira kusapota mbhuri yenyu, mozwa kuti kuno ndau mbiri jinoda vashandi. Imwimwi munopsaka kuzwisisa zvese zvinobatanijwepo, mushovo wo basero, manera arinoithwa, mukuvo wamunopeja mecifamba kuti moguma kundhoyo no zvimweni zvakadaro. Movona kuti mabasa ese ondhowo anotendewa kuti Mukristu aite. Kangaije imwimwi mungasana basa ramunovona kuti ngo raushoni kwamuri, cimwenizve rino mupekeja mare yakawanda. Asi kusiyapo zvondhozvo, kuno zviro zvimweni zvamunodikana kusotesesa mucito matema zvivaringo.
13 Inga muezaniso, kureva kuti basa ramunodaro kuita rinozoita kuti mutame kuvona musongano jo ungano? Kureva kuti rimwe ro basa ramurikudaro rinozomupa nguva yamunoda kuti mubesere mbhuri yenyu kuti ijizwe yakangwaririka, yakadakara no kukhwedera phedo na Jehovha? Kujiita muvhunjo iji kunozomubesera kuti mudire pakutanga “zviro zvinosisira,” kunamata kwenyu Jehovha no zvinodiwa zvo mbhuri yenyu kuciripi zviro zvokunyama. Ngo kudaro, imwimwi munozotema civaringo cinozoita kuti Jehovha amukomborere.
14. Kuzwisisa no kukhombija rudo zvinozotibeseresa kudini kuti tingwarire kukhugunya vamweni?
14 Kuzwisisa kunotivangisavo kuti tivone kuti civaringo cedu cinozopsasisavo kudini vamweni kuti titame kukhugunya vamweni. (Vafiripi 1:10) Izvi zvinosisira paya patinotema zvivaringo pa cedu zvakadari inga masimiriro no manera o kujironga. Inga muezaniso, tingakheta mushovo wo nguvo jatinoda no manera o kujinemesa. Waro ngozvapi zvamaizoita kudari vandhu vokunja kana kuti vo mu ungano vakakhugunyika ngo zvondhozvo? Kunasa kurangarira kunozotibesera kuti tireremeje mazwiro avo. Rudo unozotindundira kuti tipsake “zvinobesera” vamweni no kujidodokesa. (1 Vakorinte 10:23, 24, 32; 1 Timoti 2:9, 10) Perapo tinozotema civaringo cinovonesa rudo no nderemejo ku vamweni.
15. Ngozvapi zvamunodikana kurangarira mucito matema civaringo cinosisira?
15 Kudari imwimwi muri kuda kutema civaringo cinosisira, rangariranyi ngo zvamunozodikana kuita kuti muzoite mukuzwirana no civaringoco. Jesu wakatijijisa kuti “tiverenge mare.” (Ruka 14:28) Ngo kudaro, sotesesanyi mukuvo wamunozopeja, mabasa amunozoita no kuvangisira kamunozodikana kuita kuti mukwanirise civaringo camakatemaro. Pamugariro jimweni, imwimwi mungazovhunjisa mbhuri yenyu kuti muzive kuti ngozvapi zvinozoithwa ngo mundhu umwe na umwe kuti abesere civaringoco. Ngenyi kuita izvi kunosisira? Kuita kudaro zvinosisira ngokuti zvinozomubesera kuzwisisa kuti munodikana kuita cinjo jiri jese pa civaringo camatemaro kana kuciitisa nane. Pamunovhunja mbhuri yenyu ngo pamusoro po civaringo cenyu no kuzwa mazano ayo, ivona vanozoshanda ngo simba kuti civaringoco cibudirire.—Mazwi Akangwara 15:22.
TEMANYI CIVARINGO CINOZOBUDIRIRA
16. Ngozvapi zvinozomubesera kuti muteme zvivaringo zvinozobudirira? (Vonanyi bhokiso rino musoro unoti “ Mungaitisa Kudini Kuti Muteme Zvivaringo Zvaushoni?”)
16 Kudari imwimwi mukatevejera mazano anangwari munozova makanasiririka kuti muteme civaringo caushoni. Kudari imwimwi mukazwisisa zvese zvinobatanijwepo no kusotesesa ndhungamiriro jo mu Bhaibheri zvinozomubesera kuti muteme zvivaringo zvinodakajisa Jehovha. Ngo kudaro, wari mungakumbira Jehovha kuti amubesere kutema zvivaringo zvaushoni.
17. Ngocapi ciro cingamubesera kuti muteme civaringo caushoni?
17 Pikija makambotema zvivaringo zvakabudirira kareko, ceukijanyi kuti cinozomubesera kuti muteme zvivaringo zvaushoni i kuthemba uzivi hwa Jehovha haiwa uzivi hwenyu. Ndi Jehovha basi angamupekeja zivo yokadi, kuzwisisa no ungwaru, ngokuti zviro izvi zvinosisira. (Mazwi Akangwara 2:1-5) Jehovha anozomubesera kuti muteme zvivaringo zvinomudakajisa.—Nduyo 23:2, 3.
NDUMBO 28 Kuwana Ushamwari hwa Jehovha
