1. Ngozvapi zvatingaita kuti tidakajise Jehovha?

 AMBORANGARIRANYI kupa cipo cinosisira cakaseja no caushoni ku mundhu wamunoda. Imwimwi maizokhugunyika kudari mundhuwo akatora cipoco ociviga otamazve kuceukija ngo pamusoro paco. Ngodivi rimweni, imwimwi maizodakara maningi kudari mundhuwo akashandisa ushoni cipo ici no kukhombija kubongesera. Cipo ici cinobatana papi no cipo co muripo ca Jehovha? Jehovha wakapa Mwana wake kuitira itusu. Jehovha anodakara maningi patinokhombija kubongesera cipo ici cinosisira no rudo hwake hwakamuita kuti atipe muripo uwu.—Johani 3:16; Varoma 5:​7, 8.

2. Ngozvapi zvatinozovona mu cijijo cino?

² Pakufamba ko nguva, tingatamazve kubongesera ngo cipo ici, zvaizodari inga kuviga cipo ca Jehovha. Itusu tinonga takadakara ngo cipo ici asi tinonga takaciviga inga ticikacivoni. Kuti titame kuita izvi, tinodikana kugara tecibongesera ngo zvatakaitihwa ndi Jehovha na Jesu. Cijijo ici cinozotibesera kuita izvi. Cimwenizve, tinozovona kuti tingabesereka kudini ngo muripo uwu wari, nokutizve tinozobesereka kudini ndiwona kumbejiyo. Tinozovonazve kuti tingaitisa kudini kuti tikhombije kubongesera rudo hwa Jehovha maningi-ningi pa mukuvo wo Cirangarijo.

TIRI KUBESEREKA KUDINI WARI UNO?

3. I njira yapi yatingabesereka ndiyona ngo muripo wari uno?

³ Wari tiri kubesereka ngo muripo wa Kristu. Inga muezaniso, ngo ndava yo muripo, Jehovha anoregerera zvishaishi zvedu. Iyena aavangirijwi kuti atiregerere asi iyena anoda. Mutari wo Nduyo wakabongesera eciti: “Ngokuti imwimwi Jehovha makanaka, nguva jese makanasiririka kuti muregerere.”—Nduyo 86:5; 103:​3, 10-13.

4. Jehovha wakapa ani muripo? (Ruka 5:32; 1 Timoti 1:15)

 ⁴ Vamweni vedu vangajizwa kuti avafaneri kuregerehwa ndi Jehovha. Kunasa kunanga, tese tinojizwavo kudaro. Mupostori Pauro wakazwisisa kuti iyena acaifanerepi kudanijwa mupostori, ngo kudaro iyena wakaengejera eciti: “Ndiri zvandiri wari ngo pamusoro po unyasha hucikaezaniswi hwa Mwari.” (1 Vakorinte 15:​9, 10) Patinokhauya ku zvishaishi zvedu, Jehovha anotiregerera. Ngenyi? Asipi ngo ndava yo kuti tinofanera, asi ngokuti iyena anotida. Pamunojizwa mucikafaneri ceukijanyi kuti Jehovha wakapa muripo haiwa ku vashaishi basi asi kuvashaishi vanokhauya.—Verenganyi Ruka 5:32; 1 Timoti 1:15.

5. Kureva kuti Jehovha anodikana kutiregerera? Sananguranyi.

⁵ Apana na umwe wedu anodikana kurangarira kuti anozoashira unyasha hwa Jehovha basi ngokuti ano makore akawanda ecimushandira. I zvokadi kuti Jehovha anoceukija zvese zvatakamuitira. (Vahebheru 6:10) Iyena wakatipa muripo wake mahara haiwa kutipagari ngo ndava yo basa ratinomuitira. Kudari tikavona kuti itusu tinodikana kuashira unyasha kana kujivona inga tinosisira maningi, kunasa kunanga tinonga tecivonesa kuti kufa ka Jesu akuna zvakunoshanda.—Ezanisanyi na Vagaratiya 2:21.

6. Ngenyi Pauro wakashandira Jehovha ngo simba?

⁶ Mupostori Pauro waiziva kuti aacaizowana unyasha hwa Jehovha. Waro ngenyi iyena waishanda ngo simba mu basa ra Jehovha? Haiwa kuti avonese kuti waifanera asi kuti akhombije kumbongesera ngo unyasha ucikaezaniswi hwa Mwari. (Vaefeso 3:7) Inga ndi Pauro, itusu tinoenderera mberi tecishanda ngo simba, haiwa kuti tifanere kuashira unyasha hwa Jehovha, asi kuitira kukhombija kubongesera kwaari.

7. I njira yapi imweni yatingabesereka ndiyona ngo muripo wari uno? (Varoma 5:1; Jakobo 2:23)

⁷ Njira imweni yatingabesereka ndiyona ngo muripo wari uno, ngo yo kuva no ushamwari hwophedo pacedu na Jehovha. a Inga zvatakavona mucijijo cakapera, patakabahwa tainga ticina ushamwari na Jehovha. Asi ngo ndava yo muripo, itusu tingava no “runyararo na Mwari” no kukwanisa kukhwedera phedo naye.—Verenganyi Varoma 5:1; Jakobo 2:23.

8. Ngenyi tinodikana kubongesera Jehovha ngo cidakajiso co mukumbiro?

⁸ Kuita mukumbiro kuna Jehovha i ciro cinosisira maningi catingaita ngokuva no ushamwari hwo phedo naye. Jehovha aazwi basi mukumbiro jatinoita pakazara vandhu pa musongano, asi anozwavo mukumbiro wa umwe nga umwe wedu. Patinoita mukumbiro, tinopungura kuthimwa-thimwa kwedu, asi izvi andizvopi zvatinowana basi ngo ndava yokuita mukumbiro. Iwona ungatovangisavo ushamwari hwedu na Jehovha. (Nduyo 65:2; Jakobo 4:8; 1 Johani 5:14) Paainga ari pasi pano, Jesu wakaita mukumbiro kuna Jehovha kakawanda, ngokuti waizviziva kuti Jehovha waizwa mukumbiro jake. Cimwenizve, mukumbiro waimubesera kuti aenderere mberi ano ushamwari hwakavanga na Baba wake. (Ruka 5:16) Itusu tinobongesera maningi ngo muripo wa Jesu ngokuti ngo ndava yavo tinokwanisa kuva shamwari ja Jehovha no kubhuya naye ngokuita mukumbiro.

TINOZOBESEREKA KUDINI KUMBEJIYO?

9. Muripo unozobeseresa kudini vanamati vakagondeka kumbejiyo?

⁹ Vanamati vakagondeka va Jehovha vanozobesereka kudini ngo muripo kumbejiyo? Ivona vanozoashira upenyu ucikaperi. Vandhu vakawanda vanorangarira kuti izvi azvizokwanisiki ngokuti vandhu vari kufa ko makore akawanda.  Asi cidisiso ca Jehovha ku vandhu cainga cokuti vararame no kucikaperi. Kudari Adhamu naacizivi kushaisha, apana na umwe waizorangarira kuti azvingakwanisiki kupona kwenda no kwenda. Pikija tingavona zvecinesa kupona kwenda no kwenda wari uno, tingathemba kuti izvi zvinozoitika ngokuti tinoziva kuti Jehovha wakapagari mutengo mukuru wo upenyu hwo Mwana wake kuti izvi zvikwanisike.—Varoma 8:32.

10. Ngozvapi zviri kuvetehwa ngo vokuzojwa no vo mavhuta amweni?

¹⁰ Pikija upenyu ucikaperi i makomborero atinozoashira kumbejiyo, Jehovha anoda kuti timavetere. Vokuzojwa vari kuvetera kuzova no upenyu kudenga pavanonga vecitonga nyika na Jesu. (Apokaripsi 20:6) Vo mavhuta amweni vari kuvetera kuzorarama mu paradhiso vacikahwajihwi no kusuruvara. (Apokaripsi 21:​3, 4) Imwimwi muri umwe wo mavhuta amweni ano vetero yo kuzopona pasi pano? Uwu asipi mupfupo mudoko tikaezanisa no upenyu hwo kudenga. Vandhu vese vakasikihwa zvonazvo. Upenyu muparadhiso unozotidakajisa maningi.

11-12. Ngoapi makomborero amweni o mu Paradhiso atingavetera? (Vonanyi foto.)

¹¹ Rangariranyi kuti upenyu unozova wakadini kwamuri mu nyika imbza. Imwimwi amuzonesekizve ngo kuhwaja no kufa. (Isaya 25:8; 33:24) Jehovha anozomupa zviro zvese zvakanaka zvamunonga mecida. Ngozvapi zvamunozoda kujija? Maidakarira kuzojija ngo pamusoro po zvinyama? Maizodakarira kujijira kurija? Imwimwi munozodakarira kujijira kudhezenyari? Muparadhiso tinozoda vandhu vanoziva, kunasirira, no kuvaka nyumba. Vandhu vanozodikanazve kuti varime, kunasirira zvokuha, kunasirira zviro zvinoda kuzoshandiswa, kusima mafirori no kumataja. (Isaya 35:1; 65:21) Pamunozopona kwenda no kwenda, munozova no mukuvo wokuita zvese izvi no zvimweni zvakawanda.

¹² Tinozova no mudakaro mukuru wo kuzoashira vaya vanozomuswa kuti vaponezve. (Mabasa o Vapostori 24:15) Rangariranyi ngo mudakaro  wamunozova nawo ngokujijira zvizinji ngo pamusoro pa Jehovha no kusotesesa mabasa ake o zviro zvizinji zvaakasika. (Nduyo 104:24; Isaya 11:9) Ciro cinosisira maningi kupinda izvi ngocokuti imwimwi amuzoshaishi. Ngo kudaro, munozokwanisa kushandira Jehovha mucikadikani kukumbira kuregerehwa. Imwimwi maizocinja makomborero ese aya o kumbeji ngo “kubusa mabuso o nguva shomani o cishaishi”? (Vahebheru 11:25) Zvakajeka kuti haiwa. Makomborero aya anosisira maningi kupinda zviri zvese zvatingadikana kuita wari uno. Ceukijanyi kuti pamunonga muri mu nyika imbza amuzorangaririzve ngo vetero yo kumbeji. Pamukuvo wondhowo, nyika imbza inozonga iri ndau yedu yokugara njiku no njiku. Izvi azvicaizokwanisikepi kudari Jehovha naacizivi kukhombija kuti anotida ngokutipekeja Mwana wake.

TENDERANYI RUDO HWA JEHOVHA

13. Tingaitenyi kuti tikhombije kubongesera rudo hwa Jehovha? (2 Vakorinte 6:1)

¹³ Tingaitisa kudini kuti tikhombije kubongesera Jehovha ngokutipekeja kwake muripo? Ngo kudira basa rake pakutanga mu upenyu hwedu. (Mateu 6:33) Kunasa kunanga, Jesu wakafa kuti “vandhu vanorarama vatame kujiraramira vega, asi vararamire wiya wakavafira no kumuka.” (2 Vakorinte 5:15) Jehovha ngokuita kwake izvi, wakakhombija kunaka mwoyo no kutiregerera. Patinoita zvese zvatinokwanisa kuti timushandire tinokhombija kuti tiri kuzwisisa zvese zvaakatiitira, cimwenizve tinonga tecibongesera.—Verenganyi 2 Vakorinte 6:1.

14. Tingakhombijisa kudini rutendo ku ndhungamiriro ja Jehovha?

¹⁴ Tingakhombijazve kubongesera rudo hwa Jehovha ngo kumuthemba no kuzwira ndhungamiriro jake. Kuitisa kudini? Paya patinotema zvivaringo zvakadari inga, tinoda kujija mbhera papi kana i basa rapi ratinodikana kuita, tinodikanavo kuziva kuti ngozvapi zvinoda Jehovha kuti itusu tiite. (1 Vakorinte 10:31; 2 Vakorinte 5:7) Patinokhombija rutendo hwedu ngo zviito, ciro cinoshamaisa cinoitika ngocokuti, rutendo hwedu no ushamwari hwedu na Jehovha zvinovanga maningi. Cimwenizve, vetero yedu inovangavo maningi.—Varoma 5:​3-5; Jakobo 2:​21, 22.

15. Tingakhombijisa kudini kubongesera pa mukuvo wo Cirangarijo?

¹⁵ Kuno njira imweni yatingakhombija kubongesera rudo hwa Jehovha. Njira iyi ngo yo kushandisa mukuvo wo Cirangarijo kuitira kukhombija Jehovha kuti tiri kumubongesera maningi ngo ndava yo muripo. Kusiyapo kuronga kuti tive pa Cirangarijo, tinodikanavo kukoka vamweni kuti vaviyevo kuzovona Cirangarijo. (1 Timoti 2:4) Vhunjanyi vamunokoka kuti zvicinyi zvinozoitika pa Cirangarijo. Imwimwi mungazotovakhombija vhidhiyo jinowanika mu jw.org jinoti: Ngenyi Jesu Wakafa? no Kuceukija Kufa ka Jesu. Vakuru vanodikana kuva no cokwadi cokuti vacikacaviyi kumusongano vakokwa kana kuti haiwa. Rangariranyi kuti kudenga no pasi pano kunozova no mudakaro  mukuru maningi kudari mavhuta akasvejeka a Jehovha akakwevehwa kuti aviyezve mu phandu. (Ruka 15:​4-7) Pa Cirangarijo, ngative no cinangwa cokucungamija haiwa basi hama no hambzaji asi maningi-ningi vapsa na vaya vainga vacikacaviyi kumusongano ko mukuvo wakareba. Tinoda kuti ivona vajizwe kuti vaashihwa ushoni.—Varoma 12:13.

16. Ngenyi tinodikana kuengejera basa redu pa mukuvo wo Cirangarijo?

¹⁶ Kureva kuti mungaita zvizinji mu basa ra Jehovha pa sumana nganani Cirangarijo cicito catanga no pacinopera? Kuita zvondhozvo i njira yaushoni yokukhombija kubongesera ngo zvatakaitihwa ndi Jehovha na Jesu. Patinobatikana mu basa ra Jehovha, tinozovona kuti iyena ari kutibesera maningi, inga muviyo rutendo hwedu hunozovangavo maningi. (1 Vakorinte 3:9) Kunja kwa zvondhozvo, nasanyi kuteverera urongwa wo kuverenga Bhaibheri kuitira Cirangarijo, unowanika pa cibhuku Jijanyi Matahwa Njiku Jese no pa bhokiso rinowanika pa Co Kutarira zvo Musongano. Imwimwi mungatosana kushandisa mavhesi aya o mu Bhaibheri inga urongwa hwenyu hwo kujija.

17. Ngozvapi zvinodakajisa Jehovha? (Vonanyi bhokiso rinoti: “ Manera Api Atingaita Kuti Tikhombije Kubongesera Rudo wa Jehovha?”)

¹⁷ Izvokadi kuti mugariro jenyu jingatama kumutendera kuti muite zvese zvanangwa mu cijijo cino. Ceukijanyi kuti Jehovha aaezanisi zvamunoita no zvinoithwa ngo vamweni, asi anovona zviri mu mwoyo mwenyu. Iyena anodakara maningi pamunomubongesera ngo mwoyo wese ngo cipo cake co muripo.—1 Samweri 16:7; Marko 12:​41-44.

18. Ngenyi tinobongesera Jehovha na Jesu Kristu?

¹⁸ Kunasa kunanga, i muripo wakatiita ku tiregerehwe zvishaishi zvedu, kuva no ushamwari na Jehovha no kuva no vetero yo kupona no kucingaperi. Tinozoenderera mberi tecibongesera rudo hwa Jehovha uwo wakamuita kuti iyena atipe makomborero ondhowo. (1 Johani 4:19) Tinokhombijavo kubongesera Jesu uwo wakatida maningi ngo kutipekeja upenyu hwake.—Johani 15:13.