1. Mukuzwirana na Nduyo 18:​46, Mambo Dhavhidhi wakaezanisa Jehovha no cinyi?

 TIRI kupona mu mukuwo wokuti uno zvineso no mugariro zvingacinja upenyu hwedu ngokukasika. Itusu tinobongesera maningi ngo kuva no besero ra Jehovha. Mu cijijo cakapera, itusu takaceukijwa kuti Jehovha ndi Mwari anopona nokutizve iyena nguva jese wakanasiririka kuti atibesere. Jehovha paanoita izvi, tinozwisisa kuti iyena ndi ‘Mwari anopona.’ (Verenganyi Nduyo 18:46.) No papera mukuvo mushomani Mambo Dhavhidhi naapera kutara izvi, iyena wakadaninja Jehovha kuti “i Buwe rangu.” Ngenyi iyena waizoezanisira Jehovha Mwari anopona no buwe ricina upenyu?

2. Tinozojijenyi mu cijijo cino?

² Mu cijijo ici, tinoda kuvona kuti ngenyi Jehovha anodaninjwa kuti buwe nokutizve kuezanisira uku kunotijijisenyi ngo pamusoro pake. Tiri kuda kuvonazve kuti ngenyi tingathemba Jehovha nokumudaninja kuti i buwe redu. Pejisire tinozovona njira jimweni jatingatevejera ndijona mugariro ja Jehovha.

NGENYI JEHOVHA ANOEZANISIHWA NO BUWE?

3. Ko vhaza jakawanda, ngo njira yapi Bhaibheri rinoshandisa gama rokuti “buwe”? (Vonanyi yo pakapa.)

³ Bhaibheri rinoezanisira Jehovha no “buwe” kuitira kutibesera kuti tinase kuziva ushoni mugariro jake. Kazinji vashandiri va Jehovha pavanomukuja ngo ndava yo mugariro jake jinoshamaisa, vanomudainja kuti i buwe. Mu Bhaibheri Jehovha anotanga kudaninjwa kuti “Buwe,” pana Deuteronòmio 32:4. Pa mukumbiro wake, Ana wakananga kuti ‘akunazve buwe rakadari inga Mwari wedu.’ (1 Samueli 2:2) Abhakuki wakadaninja Jehovha kuti “Buwe rangu.” (Abhakuki 1:12) Mutari wo Nduyo 73 wakadaninja Jehovha kuti ‘buwe ro mu mwoyo mangu.’ (Nduyo 73:26) Pikija Jehovha paakabhuya ngo pamusoro pake kamare, iyena wakajiezanisa no buwe. (Isaia 44:8) Wari ngatende tivone mugariro mutatu ja  Jehovha jinovonesa kuti iyena ndi buwe, tinoda kujijazve kuti tingaitisa kudini kuti tivone Jehovha inga “Buwe redu.”—Deuteronòmio 32:31.

4. Ngo njira yapi Jehovha citiziro? (Nduyo 94:22)

⁴ Jehovha citiziro cedu. Pa mukuvo unonga weciitika dutu, itusu tingawana pokufindarira pakadari inga mubako. Mu njira yakaezana, patinosongana no mugariro jinonesa mu upenyu hwedu, Jehovha angatijivirira. (Verenganyi Nduyo 94:22.) Jehovha anozotibesera pakungwarira ushamwari hwedu naye. Iyena anotigondesa kuti akuna cineso ciri cese catingahwisana naco wari uno cingatikhuvaza mbhera narini. Jehovha anonanga kuti anozoita zvizinji kupinda izvi, iyena anonanga kuti kumbejiyo anozoparaja ciri cese haco cingativiisira kuthimwa-thimwa no matambujiko.—Ezekieli 34:​25, 26.

5. Jehovha angaitisa kudini kuti ave buwe no Citiziro cedu?

⁵ Njira imwe Yokutizira kuna Jehovha, ngo yo kuita mukumbiro. Patinoita mukumbiro tinowana “runyararo hwa Mwari” hunongwarira mwoyo no murangariro jedu. (Vafiripi 4:​6, 7) Vonanyi muezaniso wa hama Artem vakadihwa mukadheya ngo ndava yo rutendo hwavo. Pavainga vari mukadheya mupsakisisi wakavavhunjisa kakawanda, kushaisha kuvataja nokueja kuvathyisijira. Ivona vakati: “Mupsakisisi paindoenderera mberi ecindivhunjisisa, ndaibararika hwiru . . . Inini ndaaita mukumbiro kuna Jehovha ndecikumbira runyararo no uzivi.” Ivona vakatizve: “Mazano o mupsakisisi wiya aazivi kushanda kwandiri . . . Ngo besero ra Jehovha zvaidari inga ndainga ndakajiviririhwa ngo mupfimbiji.”

6. Ngenyi mukuvo wese tingathemba Jehovha? (Isaia 26:​3, 4)

⁶ Jehovha anothembeka. Kudari inga buwe kana kuti dundhu rokuti aribudi parinonga riri, Jehovha narini aazombocinji. Iyena wakanasiririka kuti atibesere. Itusu tingamuthemba ngokuti iyena i “Buwe ricina magumo.” (Verenganyi Isaia 26:​3, 4.) Jehovha mukuvo wese anozonga akanasiririka kuti akwanirise zvigondiso zvake, ecipurukira mukumbiro jedu, nokutibesera paya patinonga tecida besero. Itusu tingathemba Jehovha ngokuti iyena wakagondeka kuna vaya vano mushandira. (2 Samueli 22:26). Iyena aazokanganwi zvatakamuitira ngo ndava yo rudo hwake.—Vahebheru 6:10; 11:6.

7. Zvicinyi zvinozoitika kudari tikathemba Jehovha? (Vonanyi foto.)

⁷ Itusu tinozovona Jehovha inga buwe redu kudari tikamuthemba. Itusu tingava no cokwadi cokuti kudari tikazwira Jehovha pikija pamugariro jiya jinonesa, tinozokomborehwa. (Isaia 48:​17, 18) Patinozwisisa manera Jehovha akatibesera kuthemba kwedu kunoengejeka maningi. Tinothembazve kuti Jehovha ndiyena ega basi anokwanisa kutibesera kuti ticungirire zvineso zviri zvese, azvinenyi no manera azvinganesa. Kazinji patinosongana no mugariro jinovoneka inga jinonesa maningi, ngo patinozwisisa kuti tinodikana kuthembadi kamare Jehovha. Ndizvonavo zvakaitika na hama Vhradhimiri. Ivona vakati: “Pa mukuvo wandakadihwa mukadheya ndipona pandakajizwa maningi ndiri phedo na Jehovha.” “Inini ndakajijirazve kuthemba maningi Jehovha ngokuti ndainga ndiri ndega apana waivonerera mugariro wangu.”

8. (a) Ngenyi tingananga kuti Jehovha aacinji? (b) Ngenyi ngozvaushoni kuva na Jehovha inga Buwe redu? (Nduyo 62:​6, 7)

 ⁸ Jehovha aacinji. Kudari inga buwe guru, undhu no cidisiso ca Jehovha azvicinji. (Marakiya 3:6) Adhamu na Evha pavakapandukira Jehovha, iyena aazivi kucinja cidisiso cake kuno vandhu. Mupostori Pauro wakatara kuti Jehovha “aakwanisi kujiramba ega.” (2 Timoti 2:13) Izvi zvinoreva kuti azvinenyi no zvingaitika kana zvingaithwa ngo vamweni, Jehovha narini aazocinji manera aanoita zviro, zvidisiso zvake no ndhungamiriro jake. Itusu tingathemba Mwari wedu uwo acikacinji no kuva no cokwadi cokuti iyena anozotibesera pamukuvo jokunesa nokukwanirisa zvigondiso zvake zvese kuitira kumbeji.—Verenganyi Nduyo 62:​6, 7.

9. Majijenyi kuvha ku zvakaitika na hambzaji Tatyana?

⁹ Patinorangarijisisa ngo mugariro ja Jehovha no zvidisiso zvake kuno vandhu, zvinozotibesera kuti tirambe takagajana no kuramba takagondeka kwaari paya patinonga tecihwisana no muejo. (Nduyo 16:8) Ndizvonavo zvakaitika no hambzaji imweni inodanijwa kuti Tatyana. Ivona vakafungihwa pamuzi pavo inga kadheya ngo ndava yo rutendo hwavo. Ivona vakati: “Ndakamuka kugajikwa ndega kamare.” “Pakutanga cakava cineso, ndakacamwa maningi.” Kuvhira pondhopo ivona vakatanga kurangarijisisa ngo pamusoro pa Jehovha no zvidisiso zvake kuno vandhu, perapo ivona vakazwisisa kuti ngenyi zvaisisira kucungirira muejo wavaingari vecisongana nawo. Zvondhozvo zvakavabesera kuti varambe vakagajana no kucungirira. “Kuzwisisa thangwe raaita kuti ndisongane na zviya, kwakandibesera kuti ndiceukije kuti wainga Jehovha waitendera kuti inini ndiwanike ndiri pa mugariro jondhojo. Izvi zvakandibesera kuti nditame kurangarira ngo pamusoro pangu.”

10. Kutangira wari uno tingaitisa kudini kuti Jehovha ave Buwe redu?

¹⁰ Ngokukasika, tinozova pa mugariro unonesa maningi, tinozodikana kuthemba Jehovha kupinda kare. Ndiyo ndava, zvinosisira maningi kutanga wari kuri kuvangisa kuthemba kwedu no rutendo hwedu kuna Jehovha pakuti iyena anozotipekeja besero rese ratinoda kuti tienderere mberi takagondeka kwaari. Tingazviitisa kudini izvi? Ngokuverenga zviitiko zvo mu Bhaibheri zvo mu nguva yokare, no kuverenga zviitiko zvo hama no hambzaji jakabesehwa ndi Jehovha kuti jikwanise kucungirira. Patinoverenga zviitiko izvi, tinodikana kurangarira kuti Jehovha wakabeseresa kudini vashandiri vake. Vhisanyi nguva kuti murangarijisise ngo pamusoro po zviitiko izvi, kudari mukaita zvondhozvo, munozonasa kuvona kamare kuti Jehovha i Buwe renyu.

TEVEJERANYI MUGARIRO JA JEHOVHA

11. Ngenyi tinoda kutevejera mugariro ja Jehovha? (Vonanyi bhokiso rinoti: “ Hama Jiciri Majaha Jingagaja Zvido Zvapi?”)

¹¹ Mbhera apa takwanisa kuvona mugariro jimweni ja Jehovha jinotibesera kuvona kuti ngenyi iyena anoezanisihwa no buwe. Wari tiri kuda kuvona kuti tingatevejeresa kudini mugariro iji. Kudari tikaita zvese zvatinokwanisa kuti titevejere Jehovha, tinozokwanisa kuvangisa hama jedu. Inga muezaniso, Jesu wakapekeja Simoni zina rokuti Khefasi (rikasandujwa rinozwi “Pedhru”),  zina iri rinoreva kuti “Dimbu ro Buwe.” (Johani 1:42) Ngo njira iyi, Jesu wakaita kuti Pedhru azwisise kuti waidikana kuzotondhoja hama jo ku ungano, nokutizve waizovangisa rutendo hwavo. Vakuru mu ungano vanovoniwa inga “munvuriri wo buwe rakakura.” Izvi zvinoreva kuti vakuru i cijiviriro kuitira hama mu ungano. (Isaia 32:2) Zvakajeka kuti itusu tese kuciripi basi vakuru, tingatevejera mugariro ja Jehovha ngokuvangisa vamweni mu ungano.—Vaefeso 5:1.

12. Tingaitisa kudini kuti tive citiziro kuno hama jedu?

¹² Ivanyi citiziro kuno hama. Hama jedu pajinoitikihwa ngo ngozi jinoitika jega, kana kuti hondo, kangaije pangadikana kuti tive citiziro kwavari ngo njira yokuezanisira. Mugariro “mu njiku jino jokupejisira” paunoenderera mberi wecishatisisa, tinozodikana kubesana umwe no umweni. (2 Timoti 3:1) Kusiyapo basi kuvabesera ku divi ro kunyama, itusu tingavabeseravo ngokuvathondhoja no kuvakhombijira rudo. Njira imwe yo kuita ndiyona izvi, ngo yo kubhuisana navo pavanoviya kumusongano pa Nyumba yo Umambo nokuvatondhoja. Tinoda kuita kuti ungano ive ndau ino rudo no inovangisa. Nyamasi uno, vandhu vamweni vanotaja vamweni ngo hasha. Izvo zvinoita kuti hama jedu no hambzaji jijizwe jakasuruvara nokuvona kuti ajidiwi. Kumusongano tinoda kuti hama no hambzaji jedu jijizwe jecidiwa, kutondhojwa no kujivirihwa.

13. Vakuru vangaitisa kudini kuti vave citiziro ku vamweni? (Vonanyi foto.)

¹³ Vakuru vangava citiziro kuno hama jinosongana no muejo jakasiyana-siyana. Panoitika ngozi jinoitika jega kana kuraphwa kuri kwese, vakuru vanonasirira besero rinodikana ngokukasika kuitira hama no hambzaji jondhojo. Ivona vanoshandisa Bhaibheri kuti vape besero rinovangisa. Hama jinozojizwa jakasujunuka kuti jikumbire besero ku mukuru anozivikana ngokunaka mwoyo, pena no anovangisira kuti azwisise mazwiro o hama. Mukuru anokhombija mugariro iji, anoita kuti hama jijizwe jecidiwa. Ngo njira  iyi, hama no hambzaji jinozova jakarerukihwa kuti jizwire ndhungamiriro javanopuwa ngo vakuru jakacijikira mu Bhaibheri.—1 Vatesaronika 2:​7, 8, 11.

14. Tingakhombijisa kudini kuti tiri vandhu vanothembeka?

¹⁴ Ivanyi vanothembeka. Itusu tinoda kuti vamweni vavone kuti itusu takanasiririka kuti tivabesere paya pavanosongana no mugariro jinonesa. (Mazwi Akangwara 17:17) Ngozvapi zvatinodikana kuita kuti hama jizive kuti tinothembeka? Itusu tingaita zvese zvatinokwanisa kuti tikwanise kutevejera Jehovha njiku no njiku. Inga muezaniso, kukwanirisa zvatakagondesa, no kuguma pa nguva yatakapangana no ari wese. (Mateu 5:37) Cimweni, tingaita zvese zvatinokwanisa kuti tibesere vaya vanoda besero. Kusiyapo zvondhozvo, tinoda kukwanirisa mabasa atinogajwa mu ungano mukuzwirana no ndhungamiriro jatinoashira.

15. Kuitisa kudini vakuru vanothembeka vanobesera ungano?

¹⁵ Vakuru vanothembeka i zvipo ku ungano. Kuitisa kudini? Hama jikandoziva kuti jinodikana kupsaka vakuru paya pajinoda besero, izvi zvinovabesera kuti vajizwe vakasujunuka.  Hama jinojizwa jecidiwa pajinoziva kuti vakuru vakanasiririka kuti vajipe besero. Cimwenizve, hama jinozothemba maningi vakuru pajinoziva kuti ivona vanoshandisa Bhaibheri no mabhuku edu kuciripi mazano avo pacavo kuti vatipekeje mbhangiro. Kunja kwa zvondhozvo, hama jinozothemba vakuru vaya vokuti avavhunji vandhu zviro zvavanonga vapera kubhuisana no vanokwanirisa zvavanogondesa.

16. Ngenyi zvinosisira nguva jese kuteverera ndhungamiriro ja Jehovha?

¹⁶ Nguva jese teveranyi ndhungamiriro ja Jehovha. Kudari tecizwira Jehovha pa zviro zvese no kutema zvivaringo zvakacijikira mu Bhaibheri, tinozopa muezaniso waushoni kuti vamweni vatevejere. Patinojija Bhaibheri no kuvangisa rutendo hwedu kuna Jehovha, tinozova takagondeka kwaari no ku ndhungamiriro jake. Itusu atizopsaswi ngo jijiso jokunyepa, nee ngo murangariro jakasiyana no zvinojijiswa ndi Jehovha mu Bhaibheri. (Vaefeso 4:14; Jakobo 1:​6-8) Patinoashira masoko akashata, itusu tinojizwa tino runyararo ngokuti tino rutendo pa zvigondiso zva Jehovha. (Nduyo 112:​7, 8) Tinozokwanisa kubesera vaya vari kuhwisana no zvineso pomwe no muejo.—1 Vatesaronika 3:​2, 3.

17. Vakuru vangabeseresa kudini hama kuti jienderere mberi jecivangisa rutendo hwajo?

¹⁷ Vakuru vanodikana kuva vandhu vakaezanana ngo pamusoro po zvirovejeso, vano murangariro jakanaka, vakarongeka no vanozwisisa. Vakuru vanobeseravo vamweni kuti varambe vakagajana no kuva no rutendo hwakavanga kuna Jehovha. Ivona vanovangisavo ungano ngo majijisire avo. Bhaibheri rinoti: “Majijisire ake anodikana kubatisisa soko rinogondeka.” (Tito 1:9; 1 Timoti 3:​1-3) Ngo muezaniso wavo no manera avanohavisa hama no hambzaji, vakuru vanobesera vacumaeri vo mu ungano kuti vapinde musongano sumana jese, vaende mu basa rokucumaera no kuita jijo yavo yo mundhu ega. Hama pajinosongana no zvineso no kugara jecithimwa-thimwa, vakuru vanovaceukija dikano yokuthemba Jehovha nokwenderera mberi vakabatikana pa zvigondiso zvake.

18. Ngenyi tinoda kukuja Jehovha no kuramba tiri phedo naye? (Vonanyi bhokiso rinoti: “ Njira Jingatibesera Kuti Tikhwedere Phedo na Jehovha.”)

¹⁸ Patinopera kujija ngo pamusoro po mugariro munganani ja Jehovha, inga zvakatahwa ndi Mambo Dhavhidhi, itusu tingananga kudari: “Jehovha Buwe rangu, ngaasimbwe.” (Nduyo 144:1) Itusu mukuvo wese tingathemba Jehovha mu upenyu hwedu hwese. Pikija tikava vasharuka, itusu tinothemba kuti Jehovha anozoenderera mberi ecitibesera kuti tienderere mberi tiri phedo naye. Itusu tingatonangavo kuti Jehovha “i Buwe rangu.”—Nduyo 92:​14, 15.