1. Zvicinyi zvinobesera vashandiri va Jehovha kuti vaenderere mberi vecimushandira pikija no zvineso zvavanosongana nazvo?

 “MUKUVO unonesa kucungirira”—aya ndiwona manera arinonanga Bhaibheri recida kunangira njiku jatiri kuponari. (2 Timoti 3:1) Kusiyapo kuhwisana no zvineso zviri kuhwisanari no vamweni nyamasi uno, vashandiri va Jehovha vari kuhwisana no zvineso zvokuteverehwa no kuzondhwa. Icinyi cinotibesera kuti tienderere mberi tecinamata Jehovha pikija no zvineso zvese izvi? Rimwe ro thangwe rakona ngorokuti itusu tinoziva kuti Jehovha ndi ‘Mwari anopona.’—Jeremia 10:10; 2 Timoti 1:12.

2. Zvicinyi zvatinoziva ngo pamusoro pa Jehovha zvinotivangisa maningi?

² Jehovha ndi Mwari wokadi. Mukuvo wese iyena anotibesera pa zvineso zvatinosongana nazvo. Anopsaka mukana kuti atibesere kuti ticungirire. (2 Kronike 16:9; Nduyo 23:4) Patinoceukija kuti Mwari wedu anoneseka maningi ngo pamusoro pedu, nokuti iyena anoda kutibesera mukuvo wese, izvi zvinotipa simba kuti tihwisane no zvineso zvatinosongana nazvo. Wari ngatende tivone kuti Jehovha wakazvikhombijisa kudini kuna Mambo Dhavhidhi no ku vashandiri vamweni vake.

3. Dhavhidhi waida kunangenyi paakananga kuti “Jehovha anopona”?

³ Dhavhidhi wainasa kuziva Jehovha. Iyena waimuthemba. Paaiteverehwa ngo vavengi vake kubatanijavo na Mambo Sauri, Dhavhidhi wakaita mukumbiro kuna Jehovha ecikumbira besero rake. (Nduyo 18:6) Jehovha paakapera kudavira mukumbiro uwu no kumubesera, Dhavhidhi wakazonanga kudari: “Jehovha anopona!” (Nduyo 18:46) Dhavhidhi waida kunangenyi paakananga magama aya? Referensiya imweni yakananga kuti pa magama aya Dhavhidhi waida kuvonesa kuthemba kwake Jehovha “no kuvonesa kuti akuna Mwari umweni wokadi kuciripi Jehovha iyena anoda kubesera vashandiri vake.” Kuvha ku zvakamuitikirari,  Dhavhidhi wakanasa kuziva kamare kuti Jehovha wainga ecivona zvese zvainga zvecimuitikira nokuti Jehovha wainga akanasiririka kuti amubesere. Izvi ndizvona zvakabesera Dhavhidhi kuti aenderere mberi ecishandira Jehovha no kumukuja.—Nduyo 18:​28, 29, 49.

4. Ngenyi zvinosisira kuva no cokwadi cokuti Jehovha ndi Mwari anopona?

⁴ Kuva no cokwadi cokuti Jehovha ndi Mwari anopona ngozvinozotibesera kuti tienderere mberi tecimushandira no kuvangisira kwese. Izvi, zvinozotipekejavo simba kuti tikwanise kuhwisana no muejo uri wese watinozosongana nawo no kutivangisa kuti tienderere mberi teciita zvese zvatinokwanisa kuti tiitise nane mu basa rake. Pacina kukana-kana, izvi ndizvona zvinozotibesera kuti tikhwedere phedo na Jehovha.

MWARI ANOPONA ANOZOMUVANGISA

5. Zvicinyi zvingaengejera kuthemba kwedu paya patinosongana no zvineso? (Vafiripi 4:13)

⁵ Itusu tingakwanisa kuhwisana no cineso ciri cese, azvinenyi kuti cidoko kana kuti cikuru, basi kudari tikaceukija kuti Jehovha ndi Mwari anopona nokutizve mukuvo wese anozova akanasiririka kuti atibesere. Ngozvokadi kuti kuna Jehovha akuna cineso caanovona kuti cakakura maningi. Kunasa kunanga iyena ngo wo Masimba Ese, anokwanisa kutipekeja simba ratinoda kuti tikwanise kucungirira. (Verenganyi Vafiripi 4:13.) Itusu tingakwanisa kucungirira cineso ciri cese nokuthemba kwese. Patinovona kuti Jehovha anotibesera pikija pa zvineso zvidoko, kumuthemba kwedu kunozovanga maningi pakuti iyena anozotibesera pa mugariro jinonesa maningi.

6. Zvicinyi zvakaitika na Dhavhidhi paainga ari mujaha zvakamuita kuti iyena athembe maningi Jehovha?

⁶ Wari ngatende tivone zviitiko zviviri zvakabesera Dhavhidhi kuti athembe Jehovha. Paainga ari mujaha no muhavisi, pa mugariro muviri jakasiyana, ursu no mbhondoro zvakatora civhuta ca babake. Ko vhaza mbiri iji, Dhavhidhi wakatevera zvinyama izvi okwanisa kuponesa zvivhuta. Dhavhidhi waizviziva kuti aazivi kukwanisa izvi ngo simba rake. Iyena waizviziva kuti ndi Jehovha wakamupa simba no uzivi kuti akwanise kuita zvondhozvo. (1 Samueli 17:​34-37) Dhavhidhi aazivi kumbokanganwa zviitiko zviviri izvi. Pairangarijisisa ngo zvakaitikari, nokuziva kuti Mwari anopona waizomubesera pese paizoda besero kumbejiyo, kuthemba kwake Jehovha kwaivanga maningi.

7. Dhavhidhi wakabatikana pa cinyi, zvondhozvo zvakamubesera kudini kuti ahwisane na Goriyati?

⁷ No papera mukuvo mushomani, kangaije Dhavhidhi paainga aciri mujaha, iyena wakaenda kwainga no masoca o Vaiziraeri. Iyena wakazwisisa kuti masoca ainga akasuruvara ngo kuti mwanarume umweni waireba maningi waizwi Goriyati, wainga ‘aambira masoca o Vaiziraeri.’ (1 Samueli 17:​10, 11) Masoca akathya maningi ngokuti iwona aibatikana pakureba kwa Goriyati no kuthya zvaainga ecivereketa no kuvathyisijira. (1 Samueli 17:​24, 25) Dhavhidhi wakabatikana pa zviro zvimweni, iyena wainasa kuzviziva kuti Goriyati aacaihwisanepi no masoca o Vaiziraeri asi wainga ecihwisana no “masoca a Mwari anopona.” (1 Samueli 17:26) Dhavhidhi wakabatikana pakuthemba Jehovha. Iyena waithemba kuti Mwari wake wakamubeseraya paainga ari muhavisi, waizomubeseravo pa vhaza iyi. Dhavhidhi aacaikana-kanepi kuti waizova no besero ra Mwari, ndiyo ndava, iyena wakahwisana na Goriyati, inga zvatinoziva, iyena wakawina.—1 Samueli 17:​45-51.

8. Zvicinyi zvingatibesera kuthemba kwedu kuti Jehovha mukuvo wese anozotibesera pa mukuvo jokunesa? (Vonanyi foto.)

⁸ Itusu tingakwanisavo kuhwisana no cineso ciri cese kudari tikaceukija kuti Mwari anopona wakanasiririka kuti atibesere. (Nduyo 118:6) Patinorangarijisisa ngo pamusoro po zvaakaita  kare, tinokwanisa kuvangisa kuthemba kwatinomuita. Ngo kudaro, mungaverenga ciitiko ciri cese cinowanika mu Bhaibheri cinovonesa manera Jehovha akabesera vashandiri vake. (Isaia 37:​17, 33-37) Kusiyapo zvondhozvo, imwimwi mungakwanisa kuverenga zviitiko zvo hama no hambzaji jedu zvinowanika mu jw.org. Zviitiko izvi zvinonasa kujekesa manera Jehovha ari kubesera vandhu vake mazuva ano. Imwimwi mungatorangariravo pa mukuvo jokuti Jehovha wakamubesera. Acingavi ciro cinoshamaisa maningi kuhwisana no ursu no mbhondoro, zvinodakajisa ngozvokuti mukuvo wese, Jehovha wakava na Dhavhidhi. Ndiyena wakatikweveravo kuti tive shamwari jake. (Johani 6:44) Ngo kudaro, i besero ra Jehovha riri kumuita kuti muenderere mberi makagondeka kwaari. Waro zvakadini, kuita mukumbiro kuna Jehovha mecikumbira besero rake, mecirangarira paya paakamubesera muri pa mugariro jinonesa no paakadavira mukumbiro jenyu? Kurangarijisisa ngo pamusoro po zviro izvi, kunozomubesera kuti muve no cokwadi cokuti mukuvo wese mungathemba Jehovha.

9. Paya patinosongana no zvineso tinodikana kuceukijenyi? (Mazwi Akangwara 27:11)

⁹ Kuvona kuti Jehovha ndi Mwari anopona kunozotibesera kuti tivone zvineso zvatinosongana nazvo inga zvakareruka. Kuitisa kudini? Patinosongana no zvineso, tinodikana kubatikana pa zviro zvinosisira, ngokuti Sathana wakananga kuti kudari tikasongana no zvineso taizosiya Jehovha. Ngo kudaro, zvatinoita paya patinosongana no zvineso, zvinopsasa mazwiro a Jehovha. (Jobe 1:​10, 11; verenganyi Mazwi Akangwara 27:11.) Ngo kudaro, patinoenderera mberi takagondeka kuna Jehovha, tinovonesa kuti tinomuda no kuvonesa kuti zvakanangwa ndi Sathana ngo zvokunyepa. Waro imwimwivo keni, kureva kuti muri kuhwisana no cineso co kuteverehwa ngo utongi, cineso co mare kana kutama kubudirira mu basa rokucumaera no zvimwenivo? Asi ceukijanyi kuti mugariro jese jamuri kusongana najo ndi mukana kuti mudakajise Jehovha. Asi mucakanganwa kuti narini Jehovha aazotenderi kuti muejwe mbhera pamucikakwanisi kucungirira. (1 Vakorinte 10:13) Mukuvo wese anozomupa simba kuti mukwanise kucungirira.

 MWARI ANOPONA ANOZOMUPFUPA

10. Jehovha anogondesenyi kuna vaya vakagondeka kwaari?

¹⁰ Jehovha mukuvo wese anopfupa vaya vakagondeka kwaari. (Vahebheru 11:6) Iyena anotipa runyararo no kugarisika wari uno nokuzotipa upenyu ucikaperi kumbejiyo. Itusu tinonasa kuthemba kamare mukuperera kuti Jehovha anozotipfupa nokutizve ano simba rokuita zvondhozvo. Ndiyo ndava, tinoenderera mberi teciita zvese zvatinokwanisa kuti timunamate inga manera avakaitavo vashandiri vo mu nguva yokare. Izvi ndizvonavo zvakaithwa ndi Timoti.—Vahebheru 6:​10-12.

11. Ngenyi Timoti wakaita zvese zvaaikwanisa kuti abesere ungano? (1 Timoti 4:10)

¹¹ Verenganyi 1 Timoti 4:10. Timoti wainga no rutendo hwakavanga pakuti Jehovha waizomupfupa. Ndiyo ndava, iyena wakaita zvese zvaikwanisa kuti ashandire Jehovha pamwepo no hama jake. Wakazviitisa kudini izvi? Pauro wakavangisa Timoti kuti ave mujijisi waushoni mu basa rokucumaera no mu ungano. Pauro wakavhunjazve Timoti kuti apekeje muezaniso waushoni kuno hama jinonga jiri majaha no jinonga jaamadhodha. Cimwenizve, Timoti wakaashira basa rimweni rainesa maningi, raibatanija kupa mbhangiro yakavanga asi yo rudo, kuno vaya vaidikana kuipuwa. (1 Timoti 4:​11-16; 2 Timoti 4:​1-5) Timoti wainga no cokwadi cokuti pikija mukuvo jimweni basa rake rikatama kuva rinovoneka, kana kutama kuva rinoreremejwa ngo vandhu vamweni Jehovha waizomupfupa.—Varoma 2:​6, 7.

12. Ngenyi vakuru vanoita zvese zvavanokwanisa kuitira kubesera ungano? (Vonanyi foto.)

¹² Vakuru nyamasi uno vangavavo no cokwadi cokuti Jehovha anovona zvese zvavanoita nokutizve anozvireremeja. Kusiyapo kuhavisa, kujijisa, kucumaera, vakuru vazinji vanobesera pa basa ro kuvaka no kuitavo divi ro bauhwa ro kubesera. Vamweni vanoshanda pa bauhwa ro kuvhakacira vanohwaja kana pa Bauhwa Rinovonerera ngo zvo Cipitari. Vakuru vanonga  vakanasiririka kuti vaite basa iri, vanozviziva kuti ungano ngo ya Jehovha haiwa yo mundhu. Ndiyo ndava, vanoita zvese zvavanokwanisa, veciziva kuti Jehovha anozovapfupa ngo basa ravanoitaro.—Vakorose 3:​23, 24.

13. Jehovha anozwa kudini patinovangisira kuti timushandire?

¹³ Asi asipi vandhu vese vangava vakuru. Itusu tese tingakwanisa kupa ciri cese Jehovha. Mwari wedu Jehovha anodakara maningi patinoita zvese zvatinokwanisa kuti timushandire. Iyena anosotesesa mupiro jatinoita kuitira basa ro nyika jese, pikija jiri mushoma. Iyena anodakaravo maningi patinovangisira kuti tinyise kuthya tomusa nyara kuti tipe mupinguro pamusongano. Cimwenizve, mwoyo wake unozara ngokujikuja paya paanoziva kuti itusu tasiya pamutivi zvakaposwa ngo hama yedu toiregerera. Pikija mecijizwa kuti amukwanisi kuita zvizinji kuitira Jehovha, imwimwi mungava no cokwadi cokuti anoreremeja maningi zvese zvamunoita. Iyena anomuda maningi, nokutizve anozomupfupa.—Ruka 21:​1-4.

ENDERERANYI MBERI MURI PHEDO NA MWARI ANOPONA

14. Kuitisa kudini ushamwari hwakavanga na Jehovha unotibesera kuti tienderere mberi takagondeka? (Vonanyi foto.)

¹⁴ Zvinozova zvakareruka kwatiri kwenderera mberi takagondeka kuna Jehovha kudari iyena akava Mwari wakagondeka kwatiri. Ndizvonavo zvakaitika na Josefa. Iyena wakaramba kuita uhure ngokuti waizviziva kuti izvi zvaizonyangajisa maningi Jehovha. (Genesi 39:9) Kudari tecida kuti Jehovha avevo mundhu wakagondeka kwatiri, tinodikana kuvhisa mukuvo kuti tibhuye naye ngokuita mukumbiro nokujija Soko rake Bhaibheri. Ngo njira iyi, ushamwari hwedu naye unozokura maningi njiku no njiku. Kudari inga ndi Josefa, tikava no ushamwari hwakavanga maningi na Jehovha tinozoramba kuita ciri cese cinozohwajisa mwoyo wake.—Jakobo 4:8.

15. Tinojijenyi kuvha ku Vaiziraeri pavainga vari muzvipare? (Vahebheru 3:12)

¹⁵ Vaya vanokanganwa kuti Jehovha ndi Mwari wokadi, vanowira pa ngozi yokugara ndhambo nayena. Vonanyi zvakaitika no Vaiziraeri pavainga  vari muzvipare. Ivona vaizviziva kuti Jehovha ariyo, asi vakatanga kukana-kana kuti dangani iyena waida kuvataja kana kuti haiwa. Ngo kudaro, ivona vakavhunjisa kuti: “Jehovha ari pakati pedu kana aaripi pakati pedu?” (Exodo 17:​2, 7) Muviyo wakona wakava wokuti vakazoguma pakupandukira Jehovha. Itusu atidi kuita inga ndivona, tova vandhu vacikazwiri Jehovha.—Verenganyi Vahebheru 3:12.

16. Rutendo hwedu ungaejeswa kudini?

¹⁶ Azvizivi kureruka kwenderera mberi tecikhwedera phedo na Jehovha mu nyika ino yatiri kuponari. Vazinji vanotonanga kuti Mwari aako. Mukuvo jimweni, zvinoita inga kuti vayani vacikadi Mwari vatori no upenyu hwakanaka. Patinovona izvi zviciitika rutendo hwedu hungaguma pakuejwa. Ngozvokadi kuti atizogumivo pa mbhejiso yokuti Mwari aako asi tingatotanga kukana-kana kuti iyena anozotibeseradi kana kuti haiwa. Mutari wo Nduyo 73 wakasonganavo no mugariro uwu. Vandhu vainga vakamutendeneja vairamba mutemo ja Mwari asi vainga no upenyu hwaushoni. Ngo ndava ya zvondhozvo, iyena wakatanga kukana-kana kuti kureva kuti zvaibesera kwenderera mberi ecishandira Mwari kana kuti haiwa.—Nduyo 73:​11-13.

17. Zvicinyi zvinozotibesera kuti tienderere mberi tiri phedo na Jehovha?

¹⁷ Ngozvapi zvakabesera mutari wo nduyo kuti acinje mavonero ake? I kurangarijisisa ngo pamusoro po zvaizoitika na vaya vaikanganwa Jehovha. (Nduyo 73:​18, 19, 27) Iyena wakarangarijisisavo ngo pamusoro po makomborero ese aanawo ngo kushandira Mwari. (Nduyo 73:24) Itusuvo tingatorangarijisisavo ngo pamusoro po makomborero ese atakapuwa ndi Jehovha. Amboejanyi kurangarira kuti upenyu hwenyu waizova wakadini kudari nomainga mucikashandiri Mwari. Kurangarijisisa ngo pamusoro po zviro izvi kunozotibesera kuti tienderere mberi takagondeka kwaari. Inga mutari wo nduyo, tinozonanga kudari: “Kwandiri kukhwedera phedo na Mwari kwakandinakira.”—Nduyo 73:28.

18. Ngenyi atidikani kuthya zvinozoitika kumbejiyo?

¹⁸ Itusu tingakwanisa kuhwisana no cineso ciri cese haco catingasongana naco mu upenyu hwedu mukati mo njiku jino jokupejisira ngokuti ‘tinoshandira Mwari anopona’ no wocokwadi. (1 Vatesaronika 1:9) Jehovha ndi Mwari wakagondeka, mukuvo wese anozonga akanasiririka kuti atibesere. Iyena waigara ku divi ro vashandiri vake vakagondeka vo munguva yo kare. Iyena anozoitavo zvondhozvo na itusu nyamasi uno. Itusu ticada kuhwisana no dambujiko guru, asi atizovi tiri tega Jehovha anozova kudivi redu. (Isaia 41:10) Ngo kudaro, “ngative takanasa kucunga tecinanga kuti Jehovha ndiyena mubeseri wangu. Andizothyi.”—Vahebheru 13:​5, 6.