Muvhunjo jo Vaverengi
Magama okuti “munozovangwarira” anowanika pana Nduyo 12:7, anorevera “vari kutambujika” (vhesi 5) kana “zvinobhuiwa ndi Jehovha” (vhesi 6)?
Zvese zviri kubhuiwari zvinokhombija kuti vhesi iyi iri kurevera vandhu.
Pana Nduyo 12:1-4, tinoverenga kuti “vandhu vakagondeka vangarangaka pakati po vandhu.” Wari vonanyi Nduyo 12:5-7, mavhesi anobatanijwa pa muvhunjo.
“‘Ngo ndava yo kubzinyirihwa ko vandhu vari kutambujika,
Ngo ndava yo kugomera ko varombo,
Inini ndinozomuka ndoita ciri cese.
‘Inini ndinozovaponesa munyara ja vaya vanovashora.’
Zvinobhuiwa ndi Jehovha zvakacena;
Zvakaita inga sirivha yakasefwa no kuceneswa runomwe pacoto cakaumbwa ngo mavhu.
Jehovha imwimwi munozovangwarira;
Imwimwi munozongwarira umwe na umwe wavo kutangira pa mubarihwana uwu, mbhera kwenda no kwenda.”
Vhesi 5 inokhombija zvakanangwa ndi Mwari ngo pamusoro “po vari kutambujika.” Iyena anozovaponesa.
Vhesi ya 6 inoengejera yeciti, “zvinobhuiwa ndi Jehovha zvakacena,” “zvakaita inga sirivha yakasefwa.” Izvi zvinovonesa manera atinozwa ngo pamusoro po Soko ra Mwari.—Nduyo 18:30; 119:140.
Wari vonanyi vhesi inotevera, Nduyo 12:7: “Jehovha imwimwi munozovangwarira; Imwimwi munozongwarira umwe na umwe wavo kutangira pa mubarihwana uwu, mbhera kwenda no kwenda.” Gama rokuti “munozovangwarira” riri kurevera ani?
Inga manera inoenderera mberi yecinanga vhesi ya 7 ngo pamusoro po “zvinobhuiwa ndi Jehovha” vamweni vangaguma pa mbhejiso yokuti zvinoreva zvaanobhuya. Itusu tinozviziva kuti Mwari wakangwarira Bhaibheri pikija no kuvangisira ko vavengi vaieja kuriimisa no kuriparaja.—Isaia 40:8; 1 Pedhru 1:25.
Asi ngo zvokadi kuti Jehovha anongwarira vandhu vanonangwa pa vhesi ya 5. Jehovha anoda nokutizve anozoenderera mberi ecibesera no kuponesa “vanotambujika” no vaya vari “varombo.”—Jobe 36:15; Nduyo 6:4; 31:1, 2; 54:7; 145:20.
Ngo kudaro, “ivona”vari kunangwari pa vhesi 7, i vanaani?
Patinonasa kusotesesa ngo phedo vhesi iyi ya nduyo, tinozvivona zvakanasa kujeka kamare kuti iri kurevera vandhu.
Nduyo 12:1, pakutanga, Dhavhidhi anobhuya ngo pamusoro po vashandiri va Jehovha vakagondeka vakacengejwa ngo vandhu vakashata. Perapo, tinovona kuti Jehovha anozomukira vandhu vakashata ava. Nduyo anotivangisa kuti tingathemba kuti Jehovha anozotingwarira ngokuti zvaanobhuya zvakacena.
Vhesi ya 7 iri kunanga kuti Jehovha anozovangwarira no kuvajivirira. Gama rokuti “ivona” riri kureva vaya vakakhuvazwa ngo vandhu vakashata.
Gama rokuti “ivona” rakashandiswa pa vhesi iyi inga khopi inothembeka yo Matahwa o Cihebheru. Septuajhita yo Cigiriki inoshandisa “itusu” kunokwana kaviri pa vhesi ya 7, kunovonesa vaya vakagondeka vanotambujwa nokuithwa varombo. Pakupejisira, vhesi ya 7 inoti “umwe nga umwe” wo vakagondeka anozongwaririhwa “pa mubarihwana uwu” kana kuti ku vandhu vanoita zvakashata. (Nduyo 12:7, 8) Vhesi ya 7 yo makhopi o Ciaramaiko anonanga kuti: “JEHOVHA imwimwi munozovangwarira; Imwimwi munozongwarira umwe na umwe wavo kutangira pa mubarihwana uwu, mbhera kwenda no kwenda.” Izvi zvinotiita kuti tinase kuthemba kuti Nduyo 12:7 airipi kunangira zvinobhuiwa ndi Mwari.
Ngo thangwe iri, vhesi iyi iri kuviisa vetero ku “vandhu vakagondeka.” Vanozotungamirihwa ndi Mwari
