1. Jehovha anojizwa kudini ngo pamusoro po vashandiri vake?

 JEHOVHA anozwisisa zvese zviri kusongana no vashandiri vake. Iyena anovona paya patinonga takadakara no patinonga takasuruvara. (Nduyo 37:18) Iyena paanotivona teciita zvese zvatinokwanisa kuti timushandire pikija no kuhwajihwa kwatinonga tecisongana nako, iyena anodakara maningi. Kunja kwa zvese izvi, iyena wakanasiririka kuti atibesere no kutinyaraja.

2. Ngozvapi zvinoita Jehovha kuna vaya vano mwoyo inohwaja, itusu tingabesereka kudini ngo matajiro aanotiita?

² Nduyo 147:​3, inonga kuti Jehovha ‘anorapa zvivonje zvo vaya vanohwaja.’ Vhesi iyi inokhombija manera Jehovha aanobesera ngo njira yo rudo vaya vanonga vakasuruvara. Ngozvapi zvatingaita kuti tibesereke ngo kutajwa kwatinoithwa ndi Jehovha? Ngativone muezaniso. Medhiko ano uzivi angaita zvese zvaanokwanisa kuti abesere ari wese ano civonje kuti cirapike. Mundhu anongaro akhuvazika kuti akwanise kubesereka, anodikana kuzwira ndhungamiriro jese jaanonga apekejwa ndi medhiko wiya. Mu cijijo cino, tinozovona kuti Jehovha ecishandisa Soko rake Bhaibheri, ngozvapi zvaanonanga kuna vaya vanonga vecihwajihwa mu murangariro no kuvona kuti tingashandisa kudini mbhangiro janotipekejari jo rudo.

JEHOVHA ANOTICEUKIJA KUTI ITUSU TINOSISIRA MANINGI KWAARI

3. Ngenyi vamweni vanojizwa kuti avasisiri?

³ Tiri kurarama mu nyika icina rudo, zvinosuruvarisa ngozvokuti vandhu vazinji vanojizwa inga vacikasisiri. Hambzaji imweni inozwi Herena  a yakati: “Ndakakurira pa mbhuri icina rudo. Baba wangu vainga mundhu waishupha maningi.” Cimwenizve, nguva jese ivona vaindivhunja kuti andicaisisira. Kangaije, inga ndi hambzaji  Herena, zvingaita kuti imwimwi makamboshaishwavo kutajwa, kuneswa no kuithwa kuti mujizwe inga mucikadiwi. Kudari muri pa mugariro uwu, zvingamunesera maningi kutenda kuti kuno ari wese anomuda maningi.

4. Mukuzwirana na Nduyo 34:18, Jehovha anotingwaririsa kudini?

⁴ Pikija vamweni vanoshaisha kumutaja, ivanyi no cokwadi cokuti Jehovha anomuda maningi, cimwenizve, munosisira maningi kwaari. Iyena “ari phedo no vaya vano mwoyo inohwajihwa.” (Verenganyi Nduyo 34:18.) Kudari imwimwi munojizwa makasuruvara, ceujanyi kuti Jehovha ari kuvona zviro zvakanaka no khwedera kwenyu phedo kwaari. (Johani 6:44) Iyena wakanasiririka kuti amubesere, ngokuti munosisira maningi kwaari.

5. Tinojijenyi ngo manera Jesu aakataja vandhu vainga vacikatajwi ushoni ngo vamweni?

⁵ Kuti tizive mazwiro ana Jehovha, ngatende tipopore muezaniso wa Jesu. Paainga eciita basa rake pasi pano, Jesu wakavona vandhu vainga vacikatajwi ushoni ngo vamweni. Iyena wakavataja ngo njira yo kunaka mwoyo. (Mateu 9:​9-12) Mwanakaji umweni waitambujika ngo ndhendha yainesa maningi, paakabata pura-pura ya Jesu kuti arapike, Jesu wakamutondhoja no kumuvangisa ngo rutendo hwake. (Marko 5:​25-34) Jesu wakatevejera ngo njira yakakwana undhu huna Baba wake. (Johani 14:9) Imwimwi mungava no cokwadi cokuti Jehovha anoreremeja no kuvona mugariro jenyu jaushoni kubatanijavo rutendo no rudo hwamunahwo kwaari.

6. Ngozvapi zvamunodikana kuita paya pamunojizwa kuti amusisiri?

⁶ Ngozvapi zvamungaita kudari njiku iri yese mukajizwa inga mucikasisiri? Verenganyi vhesi jo mu Bhaibheri jinovonesa kuti Jehovha anomureremeja maningi no kurangarijisisa ngo pamusoro pajo. b (Nduyo 94:19) Amudikani kujiezanisa no vamweni, cimwenizve, amudikani  kubatikana pa zviro zvamucikakwanisi kuita. Jehovha aaveteri kuti muite zviro zvamucikakwanisi kuita. (Nduyo 103:​13, 14) Kudari imwimwi makambojiphwa, amudikani kuzvipekeja ndava ngo pamusoro po zvakaithwa ngo mundhuwo. Imwimwi amucaidikanepi kutajwa ngo njira iyi. Ceukijanyi kuti Jehovha anozotonga vaya vanoshaisha kutaja vamweni no kubesera vaya vakashaishwa kutajwa. (1 Pedhru 3:12) Sandra uwo wakajiphwa paainga mwana mudoko, wakati: “Ndinokumbira Jehovha nguva jese kuti andibesere kuti ndijivone ngo njira yakaezanana, kana ngo njira yaanondivona iyena.”

7. Zviro zvakatiitikira kare zvingatibeseresa kudini paya patinonga tecishandira Jehovha mu upenyu hwedu?

⁷ Mucadokana-kana kuti Jehovha angamushandisa kuti mubesere vamweni. Iyena wakamupa rukujo wokushanda naye mu basa rokucumaera. (1 Vakorinte 3:9) Ngo ndava yo zviitiko zvinonesa zvamakambosongana nazvo, zvakareruka maningi kuti muzwisise mazwiro ana vaya vanonga vecitambujika. Imwimwi mungaita zvizinji kuti muvabesere. Hambzaji Herena vambonangwaya, ivona vakashira besero. Wari ivona vakanasiririka kuti vabeserevo vamweni. Ivona vanoti: “Inini ndaijizwa ndicikasisiri, asi Jehovha wakandiita kuti ndijizwe ndecidiwa no kundishandisa kuti ndikwanisevo kubesera vamweni.” Hambzaji Herena vakatodakara ngo kushanda inga piyona wo nguva jese.

JEHOVHA ANODA KUTI TITENDERE KUREGERERA KWAKE

8. I cokwadi capi catinowana mu bhuku ra Isaya 1:18?

⁸ Vamweni vo vashandiri va Jehovha vanojizwa inga vano ndava, ngo ndava yo zvishaishi zvavakaita kare vacito vabhabhatijwa kana vatopera kubhabhatijwa. Asi tinoita zvaushoni patinoceukija kuti Jehovha wakatipekeja muripo ngo ndava yo rudo hwake kwatiri. Ngo kudaro, iyena anoda kuti tiashire cipo ici. Jehovha anotigondesa kuti pikija paya ‘patinopera kutonga shwiro naye’ iyena aagari eciceukija ngo pamusoro po zvatakashaisha. c (Verenganyi Isaya 1:18.) Ngo kutama kuceukija zvishaishi zvatakaita kare, zvinokhombija kuti iyena ano rudo maningi na itusu. Pamukuvo wondhowo, iyena aakanganwi zvakanaka zvatinonga takaita.—Nduyo 103:​9, 12; Vahebheru 6:10.

9. Ngenyi tinodikana kuita zvese zvatinokwanisa kuti tibatikane pa zvatiri kuita wari, zvatinozoita kumbejiyo, kusiyapo zvokare?

⁹ Kudari mecijizwa mecineseka ngo pamusoro po zviro zvakaitika kare, itanyi zvese zvamunokwanisa kuti mubatikane pa zvamuri kuita wari no zvamunozokwanisa kuita kumbejiyo haiwa pa zvakapera kare. Vonanyi muezaniso wo mupostori Pauro. Iyena wakasuruvara maningi ngokuteverera kwaakaita Makristu asi wakaziva kuti Jehovha wamuregerera. (1 Timoti 1:​12-15) Kureva kuti iyena waigara ecirangarira zvishaishi zvaakaitaro kare? Pacina kukana-kana, iyena aazivi kupeja mukuvo wake ecirangarira zviro zvaakaita kuti ave mufarisi anoreremejwa. (Vafiripi 3:​4-8, 13-15) Kusiyapo zvondhozvo, Pauro no kuvangisira kwese wakabatisisa basa rake no kusota kumbeji. Inga ndi Pauro, imwimwi amungakwanisi kucinja zviro zvakaitika kare. Asi imwimwi munganamata Jehovha no kumukuja nyamasi uno. Cimwenizve, mungarangarira ngo pamusoro po kumbeji kunoshamaisa kwaakagondesa.

10. Ngozvapi zvatinodikana kuita kudari zviro zvatakaita kare zvakakhugunya vamweni?

¹⁰ Imwimwi mungasuruvara ngo zviro zvamakaita kare, izvo zvakakhuvaza vamweni. Ngozvapi zvingamubesera? Itanyi zvese zvamunokwanisa kuti muitise nane zviro zvamakaitaro, kunja kwa zvondhozvo, vavhunjenyi no kuvakhombija kuti makhauya. (2 Vakorinte 7:11) Kumbiranyi Jehovha kuti abesere vaya vamakakhugunya. Iyena angabesera imwimwi na vaya vamakakhugunya  kuti mucungirire no kuwanazve runyararo.

11. Tingajijenyi kuvha ku muezaniso wo muporofeti Jona? (Vonanyi pakapa.)

¹¹ Jijiranyi ngo zvamakaposa no kuva makanasiririka kuti Jehovha amushandise ngo manera aanoda. Vonanyi muezaniso wo muporofeti Jona. Kunja ko kwenda Ninivhe kwaainga atumwa ndi Mwari, Jona wakatiza woenda ku divi rimweni. Jehovha wakapangira Jona, iyena wakajija ngo zvaakaposa. (Jona 1:​1-4, 15-17; 2:​7-10) Jehovha aazivi kusiya Jona. Jehovha wakapekejazve mukana umweni Jona kuti aende ku Ninivhe, asi pa vhaza iyi Jona wakazwira kamare. Iyena aazivi kutendera kuti zvaakaitari kare zvimuitise kuti atame kutendera basa raainga apekejwa ndi Jehovha.—Jona 3:​1-3.

JEHOVHA ANOTINYARAJA ECISHANDISA MUJIMU MUCENA

12. Jehovha anoitisa kudini kuti atipekeje runyararo paya patinonga tecisongana no zvineso? (Vafiripi 4:6, 7)

¹² Ecishandisa mujimu wake mucena Jehovha anotinyaraja paya patinonga tecitambujika kana kuti ciro cakashata pacinotiitikira. Ngativone muezaniso wa Ron na Karor. Zvinosuruvarisa ngozvokuti mwana wavo worume wakajiuraya. Ivona vakati: “Tainga takambosongana no zvineso zvimweni zvainesa maningi kareko, asi cineso ici cakava cinonesa maningi. Takaita mukumbiro ko vhaza jakawanda, ngo kudaro, takava no runyararo unonangwa pana Vafiripi 4:​6, 7.” (Verenganyi.) Kudari muri kuhwisana no zvineso zviri kuhwaja mwoyo wenyu, mungaita mukumbiro kuna Jehovha ngo mwoyo wese ko vhaza jakawanda no pamukuvo wamunoda. (Nduyo 86:3; 88:1) Kumbiranyi mujimu wa Jehovha kuphinda no kuphinda. Iyena narini aazorambi kudavira mukumbiro jenyu.—Ruka 11:​9-13.

13. Mujimu mucena ungatibeseresa kudini kuti tienderere mberi tecinamata Jehovha no takagondeka? (Vaefeso 3:16)

¹³ Kureva kuti imwimwi makambosongana no cineso cinonesa maningi coita kuti imwimwi mujizwe mucina simba ro kuita ciri cese? Mujimu mucena ungamubesera kuti muenderere mberi mecinamata Jehovha no makagondeka. (Verenganyi Vaefeso 3:16.) Vonanyi muezaniso wa hambzaji Frora. Ivona no mwamuna wavo vaishanda inga mamisiyonariyo. Perapo mwamuna wavo vakazova vacizivi kugondeka kwavari. Ngo kudaro, vakarambana. Hambzaji Frora vanoti: “Inini ndakasuruvara maningi ngokutama kugondeka ko mwamunangu zvokuti andicaikwanisa kurangarira ciri cese. Ndakaita mukumbiro kuna Jehovha ndecikumbira mujimu wake mucena kuti ndikwanise kucungirira. Jehovha wakanditondhoja pikija zvaivoneka inga kuti azvicaikwanisikepi pakutanga, iyena wakandibesera kuti ndive mundhu wakavanga no kukwanisa kucungirira.” Hambzaji Frora vakavona kuti Jehovha wakavabesera kuti vathembe kuti iyena waizoenderera mberi ecivabesera pa zvineso zvese zvavaizosongana nazvo. Ivona vakaengejera veciti: “Magama anowanika pana Nduyo 119:​32, anoshanda kwandiri: ‘Ndinozozwira matongero enyu ngo mwoyo wangu wese ngokuti imwimwi munoengejera kuzwisisa kwangu.’”

14. Tingaitisa kudini kuti titendere kuti mujimu mucena wa Mwari utibesere?

¹⁴ Mungaitisa kudini kuti mushande mukuzwirana no zvamakakumbira kuna Jehovha? Itanyi zviro zvinozomubesera kuti muenderere mberi meciashira mujimu wa Mwari. Izvi zvinobatanija kupinda musongano no kuita basa ro kucumaera masoko akanaka. Zajanyi murangariro wenyu ngo zviro zvinodiwa ndi Jehovha no kuverenga Soko rake Bhaibheri njiku jese. (Vafiripi 4:​8, 9) Pamunonga meciverenga, rangarijisisanyi ngo vandhu vakasongana no zvineso kareko no kurangarijisisavo manera Jehovha akavabesera kuti vacungirire. Hambzaji vambonangwaya, vakahwisana no zvineso zvakawanda maningi mu upenyu hwavo. Ivona vanoti: “Ciitiko ca Josefa cinondivangisa. Iyena aazivi kuita kuti zvineso zvaakasongana nazvo zvirembese ushamwari hwake na Jehovha.”—Genesisi 39:​21-23.

 JEHOVHA ANOTINYARAJA ECISHANDISA HAMA NO HAMBZAJI

15. Inyarajo yapi yatinoashira yecivha ku hama no hambzaji jedu, ivona vangatibeseresa kudini? (Vonanyi foto.)

¹⁵ Patinonga tecitambujika hama no hambzaji ‘jinotinyaraja maningi.’ (Vakorose 4:11) Jehovha anoshandisa hama no hambzaji kuti akhombije rudo kwatiri. Hama no hambzaji jinotinyaraja maningi paya pavanopeja mukuvo na itusu no kutipurutana patinonga tecinanga mazwiro edu. Ivona vangaverenga vhesi yo Bhaibheri ingatitondhoja kana kuita mukumbiro na itusu. d (Varoma 15:4) Mukuvo umweni, hama kana hambzaji, vangaticeukija manera Jehovha aanorangarira, zvondhozvo zvingatibesera kuti tienderere mberi tecicungirira. Inga muezaniso, hama no hambzaji vangatibesera ngo kutipekeja zvokuha paya patinonga tecitambujika.

16. Ngozvapi zvatinodikana kuita kuti tiashire besero ro vamweni?

¹⁶ Kuti tiashire besero ro vamweni, kangaije tinodikana kuvakumbira. Hama no hambzaji jedu jinotida, cimwenizve, jinoda kutibesera. (Mazwi Akangwara 17:17) Asi ivona vangatama kuziva kuti tiri kujizwa kudini kana kuti ngozvapi zvatiri kuda. (Mazwi Akangwara 14:10) Kudari imwimwi muri kuneseka mu murangariro, jizwenyi makasujunuka kuti muvhunje shamwari jenyu jakaivha ku divi ro kumujimu, siyanyi kuti ivona vavone kuti ngozvapi zvingamubesera. Imwimwi mungabhuya no mukuru umwe kana vaviri, vamunovona kuti vakamurerukira. Hambzaji jimweni  jakavona kuti ngo zvaushoni maningi kubhuya no hambzaji yakakura ku divi ro kumujimu.

17. Ngozvapi zvineso zvimweni zvingatiita kuti titame kuashira vangiso, tingaitisa kudini kuti tizvinyise?

¹⁷ Pejanyi mukuvo no hama no hambzaji jenyu. Nguva jimweni mungajizwa makanyangajwa maningi zvotoita kuti amutodi kupeja nguva no vamweni. Nguva jimweni, hama no hambzaji jingatama kumuzwisisa ushoni no kubhuya magama aciripi aushoni kwamuri vacikazvibati. (Jakobo 3:2) Mucasiya kuti zvineso zvakadari zvimuitise kuti mutame kuashira vangiso yamunoda. Hama imweni iri mukuru wo ungano inodanijwa kuti Gavhin, iyo iri kuneseka ngo mugariro wo kujizwa iri yega, yakati: “Kugara ndecibhuya no shamwari jangu kazinji i ciro cokupejisira candinorangarira kuita.” Hama Gavhin vanovangisira maningi kuti vave vari pamwepo no hama no hambzaji. Kazinji pavanoita kudaro vanojizwa ushoni. Hambzaji imweni inodanijwa kuti Amy yakati: “Ngo ndava yo zviro zvakambondiitikira kareko, ndino cineso cokuthemba vandhu vamweni, asi ndiri kujijira kuda no kuthemba hama no hambzaji jangu inga manera Jehovha anoita. Ngokuti ndinozviziva kuti izvi zvinoita kuti Jehovha adakare. Cimwenizve, zvinondiitavo kuti ndidakare.”

ZVIGONDISO ZVA JEHOVHA KUITIRA KUMBEJI ZVINOTINYARAJA

18. Ngozvapi zvatinodikana kuvetera kuitira kumbeji, ngozvapizve zvatinodikana kuita?

¹⁸ Tingasota kumbeji no kuthemba kwese teciziva kuti Jehovha anozovhisa zvese zvinotiita kuti tisuruvare no zvese zvinotiita kuti tihwajihwe. (Apokaripsi 21:​3, 4) Asi pamukuvo uwu, zvineso zvese zvinonesari maningi zvatiri kusonganari nazvo “azvizohwiririzve mu mwoyo.” (Isaya 65:17) Inga zvatavona Jehovha ‘anorapa zvivonje zvedu’ nyamasi uno. Jehovha wakatipa zvakawanda maningi kuti atinyaraje no kutibesera. Tinodikana kuvona kuti tiri kutendera besero ratiri kupuwari ndiyena kana kuti haiwa. Narini, atidikani kukana-kana ngo manera Jehovha ‘aanotikorondha.’—1 Pedhru 5:7.