Imwimwi makambovangisira kuti muceukije zvamapera kujija? Izvi zvinoitika na itusu tese mukuvo no mukuvo. Ngozvapi zvingabesera? I kurangarijisisa ngo zviro zvinosisira maningi.

Pamunonga mecijija amboimanyi padoko kuti mutarire mafundo anosisira. Vonanyi kuti mupostori Pauro wakabeseresa kudini vaya vaireremeja karata yake no kuita zvayainanga, paakatara kuti: “Iri ndirona fundo guru.” (Vahebheru 8:1) Ngo magama aya, iyena wakabesera vadoni vake kuti vatevejere zvaaita no kuzwisisa kuti fundo rimwe nga rimwe raibatana papi no zvainangwa.

Imwimwi mungapsaka cimukuvo, kangaije gumi ro museswa pamunopera kujija, kuti murangarijisise ngo mafundo makuru amajija. Kudari amuripi kukwanisa kuceukija, sotesesanyizve musoro kana magama o zvamaijijaro, maningi-ningi magama o kutanga o mu ndima kuti mukasike kuzviceukija. Kudari majija zviro zvipsa, ejanyi kuzvisanangura ngo magama enyu. Pamunonga mecirangarijisisa ngo mafundo anosisira, amuzobesereki basi pa kuceukija, asi munozonavo kuti zvondhozvo zvinobatana papi no upenyu hwenyu.