1-2. Zvicinyi zvakaitika no vajiji vaviri va Jesu pavainga vecifamba kwenda ku dhorobha ro Emausi?

 YAINGA njiku 16 ya Nisani mu gore ra 33 Jesu naaviya. Vajiji va Jesu vakasuruvara, cimwenizve, vari kuthya. Pa njiku yondhoyo kamare, vajiji vaviri va Jesu vakaita hwendo vecienda ku mutundhu unozwi Emausi, pa mumango wo makiromita anokwana kuita 11 kuvha ku Jerusarema. Vajiji ava vakasuruvara ngokuti Jesu mundhu wavaitevera wainga auraiwa. Ivona vaivetera kuti Mesiya waizoita zviro zvinoshamaisa ku Vajudha asi wari iyena wainga wafa. Wari panoitika ciro cimweni cavainga vacikaveteri.

² Mwanarume umweni anovakhwederera phedo otanga kufamba navo. Asi vajiji vanotanga kuverengera mwanarume uwu zviro zvinothyisa zvakaitika na Jesu. Ngo kudaro, mwanarume wiya wakatanga kubhuya ngo zviro zvokuti narini vajiji avacaizozvikanganwepi. Asi iyena “wakatanga ngo zvakatahwa ndi Mosi no vaporofeti vese,” ecisanangura kuti Mesiya waidikana kutambujika no kufa. Pejisire pavainga vaaphedo no kuguma kumutundhu wo vaienda, ivona vakazwisisa kuti mwanarume wiya wainga Jesu. Cimwenizve, wainga amuswa ndi Mwari. Izvi zvinovonesa kuti vajiji vakadakara maningi ngo kuziva kuti Mesiya wainga amuswa.—Ruka 24:​13-35.

3-4. (a) Zvicinyi zvakaitika no vajiji va Jesu? (b) Mu cijijo cino tinozojijenyi? (Mabasa o Vapostori 1:3)

³ Jesu acito ahwirira kudenga wakapeja makumarongomuna o njiku pa nyika, pa njiku iji, iyena wakabudira vajiji vake ko vhaza jakawanda. (Verenganyi Mabasa o Vapostori 1:3.) Jesu wakavangisa vajiji vake vaingari vakasuruvara vecithya. Ivona vakadakara maningi,  vakavangiswa ndi Jesu kuti vaende kocumaera no kujijisa masoko akanaka ngo pamusoro po Umambo. a

⁴ Tinobesereka maningi ngokujija ngo pamusoro po zviro zvakaithwa ndi Jesu pa mukuvo uwu paaingari ari pasi pano. Mu cijijo cino, tinozovona kuti Jesu wakashandisisa kudini mukuvo uwu, cokutanga, kuti avangise vajiji vake. Cocipiri, kuti avabesere kuti vanase kuzwisisa ushoni Matahwa. Cocitatu, kuti avaroveje kuitira basa ravaizoita kumbejiyo. Pa mugariro umwe nga umwe tinozovona kuti tingatevejeresavo kudini Jesu.

KUVANGISA VAMWENI

5. Ngenyi vajiji va Jesu vaida vangiso?

⁵ Vajiji va Jesu vaida vangiso. Ngenyi? Ngokuti vamweni vakasiya nyumba javo, mbhuri javo no mabasa avo, kuti vatevere Jesu mukuvo wese. (Mateu 19:27) Vamweni vakatogumira pakushaishwa kutajwa ngokuti vainga vari vajiji va Jesu. (Johani 9:22) Ivona vakaita zvese izvi ngokuti vaithemba kuti Jesu waingadi Mesiya waingaya akagondeswa. (Mateu 16:16) Asi Jesu paakauraiwa, ivona vakasuruvara maningi no kuthimwa-thimwa ngokuti avacaizviziva kuti ngozvapi zvaizoitika.

6. Jesu wakaitenyi pasure po kumuswa?

⁶ Pacina kukana-kana, Jesu wakavona kuhwajihwa kwainga no vajiji vake, asi aazivi kuvona kuhwajihwa uku inga kuti ivona vainga varembejeka kumujimu. Asi wakavona kuti kwainga kusengerera kwavainga nako kuvha pa zviro zvakavaitikira. Ngo kudaro, pa njiku yondhoyo kamare yaakamuswaro wakatanga kuvangisa shamwari jake. Inga muezaniso, iyena wakabudira Mariya Madharena paainga ecicema ari pa guva ra Jesu. (Johani 20:​11, 16) Iyena wakatobudiravo vajiji vaviri vaya vanangwaya mukutanga ko cijijo cino. Cimwenizve, wakabudiravo mupostori Pedhru. (Ruka 24:34) Tinojijenyi kuvha ku muezaniso wa Jesu? Ngatende tivone zvakaitika pakutanga paakabudira Mariya Madharena.

7. Inga zvakatahwa pana Johani 20:​11-16, Jesu wakavona Mariya eciitenyi, zvondhozvo zvakamuita kuti iyena aitenyi? (Vonanyi foto.)

⁷ Verenganyi Johani 20:​11-16. Comangwanani pa njiku 16 ya Nisani, vanakaji vakawanda vakagondeka vakaenda ku guva ra Jesu. (Ruka 24:1, 10) Ngatimbobatikana pa ciitiko co mwanakaji umwe, Mariya Madharena. Mariya Madharena paakaguma pa guva, wakarikhanda rakashama.  Iyena wakagogoma kwenda koverengera Pedhru na Johani. Perapo wakavatevera pavaienda ku guva. Pavakapera kuvona vokhohwa kuti mu guva mainga mucina mundhu, ivona vakahwirira kanyi. Asi Mariya wakasara konayo ecicema. Iyena aacaizvizivepi kuti Jesu wainga ecimusota. Jesu wakavona kucema kwaaita mwanakaji uwu waingari akagondeka. Zvondhozvo zvakamuita kuti iyena ade kumutondhoja. Ngo kudaro, iyena wakazobudira Mariya perapo wakaita ciro cakamuvangisa maningi. Iyena wakavhunja mwanakaji uwu kuti aende ku hama jake aende kojipekeja masoko anosisira maningi, okuti Jesu wainga amuswa.—Johani 20:​17, 18.

8. Tingatevejeresa kudini Jesu?

⁸ Tingatevejeresa kudini Jesu? Tingatevejera Jesu ngokuvangisa hama no hambzaji jedu kuti jienderere mberi jecishandira Jehovha. Inga ndi Jesu, tinoda kueja kuzwisisa zvineso zviri kusongana no hama no hambzaji jedu, toeja kuzwisisa mazwiro avo no kuvanyaraja. Ngatende tivone muezaniso wo hambzaji imweni inodanijwa kuti Jhozerein. Hambzaji iyi yakazofa ngo asidhenti. Asi icito yafa yakananga kudari: “Inini ndakapeja mweji jakawanda ndecihwajihwa maningi.” Ngo kudaro, hama imweni no mukaji wayo vakakoka hambzaji iyi kuti iende kumuzi kwavo no kuitendera kuti ibhuye mazwiro ayo. Varovorani ava vakanasa kupurutana ushoni hambzaji iyi, voitaja ngo njira yokunaka mwoyo no kuivhunja kuti iyona inosisira maningi kuna Jehovha. Hambzaji Jhozerein vakananga kudari: “Inini ndakajizwa ndicinazve vetero, ndakavona inga kuti ndainga ndando-ndomera mu murambo muno cidima no dutu. Asi Jehovha wakashandisa hama iyi no mukaji wayo kuti vandiponese. Ivona vakandibesera kuti ndiwanezve cido cangu cokuenderere mberi ndecishandira Jehovha.” Itusuvo tingakwanisa kuvangisa hama no hambzaji kudari tikajisiya kuti jibhuye mazwiro ajo no kunasa kujipurutana ushoni. Ngo njira iyi, tinokwanisa kuvatondhoja no kuvabesera kuti vaenderere mberi vecishandira Jehovha.—Varoma 12:15.

BESERANYI VAMWENI KUTI VAZWISISE SOKO RA MWARI

9. Zvineso zvapi zvakasongana no vajiji va Jesu, iyena wakavabeseresa kudini?

⁹ Vajiji va Jesu vakazwira zvainangwa ngo Soko ra Mwari no kuvangisira kuti vazvishandise mu upenyu hwavo. (Johani 17:6) Asi ivona avacaikwanisa kuzwisisa kuti ngenyi Jesu wakauraiwa inga mushaishi. Jesu waizviziva kuti vajiji vake vainga no rutendo, cimwenizve, vaida maningi Jehovha. Asi wakazwisisa kuti ivona vaidikana kuzwisisa ushoni Matahwa. (Ruka 9:​44, 45; Johani 20:9) Ngo kudaro, iyena wakavabesera kuti vazwisise revo yo zviro zvavaiverenga mu Matahwa. Ngatende tivone kuti iyena wakazviitisa kudini izvi paakabudira vajiji vaviri vayani vaiendaya ku Emausi.

10. Jesu wakakhohwesa kudini vajiji vake kuti iyena waingadi Mesiya? (Ruka 24:​18-27)

¹⁰ Verenganyi Ruka 24:​18-27. Vonanyi kuti Jesu aazivi kuvhunja vajiji vake ciriporipoco kuti iyena wainga aani. Kusiyapo zvondhozvo, iyena wakaita muvhunjo. Ngenyi? Kangaije iyena waida kuti ivona vanange zvainga mu murangariro mavo no mu mwoyo mavo. Ivona vakaita zvondhozvo kamare. Ivona vakatonanga kuti, vairangarira kuti Jesu waizova Mambo wo ku Iziraeri, ovatonga kusiyapo kuti vatongwe ngo Varoma. Povakapera kusanangura kuneseka kwavo, Jesu wakashandisa Matahwa kuti avabesere kuti vazwisise zvainga zvaitika. b Pakufamba ko nguva pa usiku hwiya, Jesu wakazowana vajiji vamweni, ovasananguriravo revo yo zviporofita izvi. (Ruka 24:​33-48) Tinojijenyi kuvha ku ciitiko ici?

11-12. (a) Ngozvapi zvatinojija ngo manera Jesu akajijisa vandhu cokwadi co mu Bhaibheri? (Vonanyi foto.) (b) Hama iyi yakabeseresa kudini mujiji wayo?

¹¹ Tingatevejeresa kudini Jesu? Cokutanga, patinonga teciitisa jijo yo Bhaibheri no vajiji vedu, tinodikana kuita muvhunjo jinozovaita kuti ivona vanange zviri mu murangariro mavo no  mu mwoyo mavo. (Mazwi Akangwara 20:5) Patinopera kuzwisisa mazwiro avo, tinodikana kuvakhombija manera avangawana vhesi jo mu Bhaibheri jingavabesera pa mugariro wavo. Perapo, tinodikana kungwarira kuti titame kuvavangirija kuti itanyi zvakati. Kusiyapo zvondhozvo, tinodikana kuvabesera kuti varangarire ngo pamusoro po Matahwa no kuvona manera avangashandisa ndhungamiriro jo mu Bhaibheri mu upenyu hwavo. Ngatende tivone muezaniso wo hama imweni inozwi Nortei inogara ku Gana.

¹² Ivona vakatanga kujija Bhaibheri pavainga no makore anokwana kuita gumi na matandhatu. Ngokukasika, mbhuri yavo yakatanga kuvashora. Zvicinyi zvakavabesera kuti vaenderere mberi vakavanga? Mujijisi wavo wo Bhaibheri wakashandisa bhuku ra Mateu cipauko 10 kuti avasanangurire kuti Makristu okadi aizoteverehwa. Hama Nortei vakati: “Pandakatangaro kuteverehwa, ndakathemba kamare kuti inini ndainga ndawana cokwadi.” Mujijisi wavo wakavakhombija bhuku ra Mateu 10:​16, iyona inobhuya kuti tinodikana kuva vandhu vakangwara. Perapo, vakabhuisana ngo pamusoro pokuti vhesi iyi ingabeseresa kudini hama Nortei kuti vabhuye ngo nderemejo pavanonga vecisanangura zvavanotenda kuno mbhuri yavo. Pavakapera kubhabhatijwa, hama Nortei vaida kushanda inga piyona, asi baba wavo vaivetera kuti ivona vaende ku univherisidhadhi. Kusiyapo kuvhunja hama Nortei zvavaidikana kuita, mujijisi wakavaita muvhunjo no kuvabesera kurangarira ngo pamusoro po ndhungamiriro jinowanika mu Bhaibheri. Ngowapi wakazova muviyo? Hama Nortei vakatema civaringo cokunghwina mu nguva yakazara. Baba wavo vakavavhunja kuti vaidikana kubuda pamuzi. Hama Nortei vari kuzwa kudini ngo ndava yo zviro zvakavaitikirari? Ivona vanoti: “Ndino cokwadi cokuti ndakatema civaringo caushoni.” Patinoshandisa nguva yedu kuti tibesere vamweni kuti varangarire ngo pamusoro po Matahwa, tinonga tecivabesera kuti vave Makristu akaivha.—Vaefeso 3:​16-19.

BESERANYI HAMA KUTI JIVE “ZVIPO ZVO VANARUME”

13. Jesu wakaitenyi kuitira kuvonesa kuti basa ra Baba wake raizoenderera mberi reciithwa paaizoenda kudenga? (Vaefeso 4:8)

¹³ Paiinga pasi pano, Jesu wakaita basa raakavhunjwa ndi Baba wake ngo njira yakakwana. (Johani 17:4) Asi Jesu acairangarirepi kuti ndiyena basi waizokwanisa kuita zvaidiwa ndi Mwari. Mukati mo makore anokwana kuita matatu no meya eciita basa rake pasi pano, Jesu wakajijisa vandhu vamweni kuti vaitevo basa. Acito ahwirira kudenga, Jesu wakathemba vajiji vake, kangaije vamweni vakona vainga no makore anokwana  kuita makumaviri, ngokuvapekeja basa rokutaja mavhuta anosisira a Jehovha no kutungamirira mu basa ro kucumaera no kujijisa. (Verenganyi Vaefeso 4:8.) Jesu wakashandisisa kudini njiku jake jokupejisira naari pa nyika jinokwana kuita 40, kuti abesere vanarume vaijipira, vaigondeka no vaishanda ngo simba kuti vakwanirise kuti vazove “zvipo zvo vanarume”?—Vaefeso 4:8.

14. Jesu wakabeseresa kudini vajiji vake kuti vakure ku divi ro kumujimu, pa njiku jake jokupejisira pa nyika jinokwana kuita 40? (Vonanyi foto.)

¹⁴ Jesu wakapa vajiji vake mbhangiro yaizovabesera. Iyena wakaita zvondhozvo ngo njira yo rudo. Inga muezaniso, iyena wakakwanisa kuvona kuti vamweni vo vajiji vake vainga no cirovejeso cokukana-kana, ngo kudaro, wakavapangira. (Ruka 24:​25-27; Johani 20:27) Cimwenizve, iyena wakavavhunja kuti vaidikana kubatikana maningi pa kutaja mavhuta a Jehovha haiwa kubatikana pa nyagoso javo. (Johani 21:15) Iyena wakavaceukijavo kuti avacaidikana kuezanisa zvavaiita mu basa ra Jehovha no zvaiithwa ngo vamweni. (Johani 21:​20-22) Iyena wakavapangirazve ngo pamusoro po murangariro jakashata javainga najo ngo pamusoro po Umambo, ovabesera kuti vabatikane pakucumaera masoko akanaka. (Mabasa o Vapostori 1:​6-8) Vakuru vo ungano vanojijenyi kuvha ku muezaniso wa Jesu?

15-16. (a) Vakuru vangatevejeresa kudini Jesu? Sananguranyi. (b) Hama Patriki vakabesereka kudini ngo mbhangiro yavakaashira?

¹⁵ Vakuru vangatevejeresa kudini Jesu? Ivona vangatevejera Jesu ngokuroveja hama pikija jiya jitori majaha kuti vaite mabasa mazinji mu ungano. c Vakuru vanozwisisa kuti hama iji jingadikana kujijira zviro zvakawanda maningi. Vakuru vanodikana kuroveja hama iji ngo njira yo rudo kuti ijona jikwanise kujijira kuva vandhu vanojidodokesa, vanothembeka no vakanasiririka kuti vabesere vamweni.—1 Timoti 3:1; 2 Timoti 2:2; 1 Pedhru 5:5.

¹⁶ Wari ngatende tivone kuti hama imweni inodanijwa kuti Patriki yakabesereka kudini ngo mbhangiro yavakaashira. Hama Patriki pavainga vari mujaha, ivona vaibhuya ngo hasha, kuita zviro zvicizivi kunaka ku vamweni kutobatanijavo no hambzaji. Hama imweni yainga mukuru wo ungano, yakavona kuti hama Patriki vaidikana  kuita cinjo. Ngo kudaro, yakavapa mbhangiro yakajeka asi yakazviita ngo njira yo rudo. Hama Patriki vanoti: “Ndakadakara maningi mukuru wo ungano uwu paakandikhombija zvandaidikana kuitisa nane.” “Inini ndaisuruvara maningi pandaivona hama jimweni jeciashira mabasa okuti inini ndaimadavo. Asi mbhangiro yandakapuwari ngo mukuru uwu, yakandibesera kuti ndive mundhu anojidodokesa pandinonga ndecishandira hama no hambzaji jangu, kusiyapo basi kurangarira kuti ndinodikana kugajwa basa riri rese mu ungano.” Inga muviyo, hama Patriki vakazogajwa kuti vashande inga mukuru wo ungano pavainga no makore anokwana kuita 23.—Mazwi Akangwara 27:9.

17. Jesu wakakhombijisa kudini kuti waithemba vajiji vake?

¹⁷ Jesu wakapa vajiji vake basa haiwa basi ro kucumaera masoko akanaka, asi ro kujijisa. (Mateu 28:20) Zvingaita kuti vajiji vaitojivona inga vacikakwanisi kuita basa ravaingari vakapuwa ndi Jesu. Asi Jesu acaikana-kanepi kuti ivona vaizokwanisa kuita basa iri. Iyena wakatovavhunja no cokwadi cese kuti vaizokwanisa kuriita. Kuitira kuvonesa kuvathemba kwaaita, iyena wakananga kudari: “Inga zvavakandituma Baba, inini ndiri kumutumavo.”—Johani 20:21.

18. Vakuru vangatevejeresa kudini Jesu?

¹⁸ Vakuru vangatevejeresa kudini Jesu? Vakuru vano uzivi vanotevejera Jesu ngo kuroveja hama jimweni no kujigaja kuti jiite mabasa amweni mu ungano. (Vafiripi 2:​19-22) Inga muezaniso, vakuru vangakumbira hama jiciri majaha kuti jibesere pakucenesa-cenesa Nyumba yo Umambo no kunasirira-nasirira. Vakuru vangapekeja hama basa riri rese kuti vaite, perapo vovaroveja kuti vangaitisa kudini kuti vakwanise basero no kuthemba kuti ivona vanozoriita. Hama imweni yavha kugajwa wari inga mukuru wo ungano inodanijwa kuti Mateu, yakananga kuti iri kudakara maningi ngo manera vakuru vano uzivi vari kuiroveja kuti ikwanise kuita basa riri rese rainogajwa perapo no manera avanoithemba kuti inozokwanisa kuita basero. Iyona inoti: “Pondaiposa, ivona vaindibesera kuti ndingaitisa kudini kuti ndijijire ngo zvandinongaro ndaposa no kuitisa nane.” d

19. Tinodika kutema civaringo cokuitenyi?

¹⁹ Jesu wakashandisa njiku jake jinokwana kuita 40 jokupejisira naari pa nyika pano, kuti avangise, kujijisa no kuroveja vandhu vamweni. Tinodikana kutema civaringo cokunasa kutevejera muezaniso wa Jesu. (1 Pedhru 2:21) Jesu anozotibesera kuti tikwanise kuita izvi. Ngokuti iyena wakagondesa kudari: “Ndina imwimwi mbhera pa kupera ko nyika.”—Mateu 28:20.