VAIZIRAERI vaidakarira maningi mumbo. Bhaibheri rinobhuya ngo vandhu vairija no kuimba mumbo. Kunasa kunanga kuno mutengo unokwana kuita gumi wo Matahwa akadari inga mumbo. Inga muezaniso, mabhuku amweni akona anobatanija bhuku ra Nduyo, Ndumbo jo rudo na Macumbiro. Bhuku rimweni rinobhuya ngo pamusoro po upenyu hwo munguva jo kare rinonanga kuti Bhaibheri rinonasa kujekesa kuti Vaiziraeri vaishandisa mumbo pa mabasa mazinji ovaita mu upenyu hwavo.

Mumbo njiku ngo njiku. Vaiziraeri vairija mumbo kuti vavonese mazwiro avo. (Isaya 30:29) Vanakaji vairija zvimadangari no vakadakara veciimba no kutamba ngo mwoyo wese, maningi-ningi paya pokuti mambo mupsa waigajwa, no paya pokuti masoca aiwina ku hondo kubatanija no pa mabuso o kunamata. (Vatongi 11:34; 1 Samweri 18:​6, 7; 1 Majimambo 1:​39, 40) Vaiziraeri vaimbavo mumbo kuitira kuvonesa kusuruvara kwavo ariwese paaifa. (2 Kronika 35:25) Zvakajeka kuti Vaiziraeri vaida maningi mumbo.

Majimambo o Iziraeri aireremeja maningi mumbo. Ivona vaiwana mudakaro pavaiimba mumbo. Mambo Sauri wakakumbira Dhavhidhi kuti aviye kuzomuimbira mumbo. (1 Samweri 16:​18, 23) Pakufamba konguva Dhavhidhi pakava mambo, iyena wakanasirira zviro zvaidikana kushandiswa pakurija mumbo jaidakaja maningi. Cimwenizve, wakaita kuti pave no muimbi waizorija mumbo mu themberi ya Jehovha. (2 Kronika 7:6; Amosi 6:5) Mambo Soromona wainga no vanarume no vanakaji vaiimba mukati mo themberi.—Mucumaeri 2:8.

Mumbo pa kunamata. Zvaisisira maningi ku Vaiziraeri kushandisa mumbo pa kunamata kwavo Jehovha. Kunasa kunanga, vaimbi vaikwana kuita 4.000 vakarija mumbo muthemberi ku Jerusarema. (1 Kronika 23:5) Ivona vairija vecishandisa madangari, mbira no mazambe. (2 Kronika 5:12) Asi vaimbi ava avacaingepi vega basi vaishandisa mumbo pa kunamata kwavo Jehovha. Vazinji vo Vaiziraeri vaiimba Mumbo pavaiita hwendo kwenda ku Jerusarema kumabuso. Mumbo iji jaidanijwa kuti Ndumbo yo Kukhwira. (Nduyo 120–134) Mukuzwirana no matahwa o Cijudha, Vaiziraeri vakaimba ndumbo jimweni jo Nduyo a pavaiita Phasika.

Nyamasi unovo mumbo iciro cinosisira maningi ku vandhu va Jehovha. (Jakobo 5:13) Tinoimba ndumbo kuti tikuje Jehovha. (Vaefeso 5:19) Itusu tinojizwa tiri phedo no hama no hambzaji jedu patinonga teciimba ndumbo. (Vakorose 3:16) Izvi zvinotivangisa maningi patinonga tecihwisana no zvineso. (Mabasa o Vapostori 16:25) Kuimba mumbo ndi njira yaushoni yo kuvonesa rutendo hwedu kuna Jehovha, no kutovonesazve kuti tinomuda.