Berere iri raishanda inga ndau yo kufamba ndiyona kwenda ku ndau yakacenesesa yo themberi. Mukuzwirana no Sandujo yo Nyika Imbza yakabudiswa mugore ra 2023, “berere ro pambeji raireba makumaviri o mukono, ngo kuteveja upambhi hwo nyumba; kukhwira kwaro kwainga zana no makumaviri o mukono.” (2 Kronika 3:4) Sandujo jimweni, jinonangavo kuti berere iri rainga no “zana no makumaviri o mukono” jo kureba, zvoita kuti rive no 53 o mametro kana (175 jo soka.)

Ngo kudaro, Sandujo yo Nyika Imbza yo gore ra 2023 inonangavo kuti berere ro themberi ya Soromona: “Raireba makumaviri o mukono,” zvingareva 9 o mametro kana (30 jo soka) pa kureba. a Ngativone mathangwe manganani ngo pamusoro po swiro iyi.

Kureba ko berere iri akunangwi mu bhuku ra 1 Majimambo 6:3. Pa vhesi iyi, Jeremiya wakatara ngo upambhi no ujiki hwo berere haiwa kureba kwaro. Ngo kudaro, cipauko cinotevera cinobhuya ngo pamusoro po zviro zvakawanda maningi zvicikakanganwiki zvainga muthemberi, kubatanijavo no bahari ro utare, gumi ro kovhadho no njiki mbiri jo utare jaigara ngo ku divi ro kunja ko berere. (1 Majimambo 7:​15-37) Waro kudari berere iri rainga no mametro anokwana kuita 50 okureba, nokutizve rainga rakareba kupinda themberi, ngenyi Jeremiya aazivi kuzvinanga? Pikija pa makore akazotevera, vatari vo Cijudha vakatara kuti berere aricairebepi kupinda mativi amweni o themberi ya Soromona.

Vapsakisisi vanokana-kana kuti mapiravira o themberi acaizokwanisepi kucijikira kudari berere rainga no 120 o makovhadho o kureba. Mapuwe no zvidhina zvo mu nguva yo kare zvaireba maningi inga musuvo jo themberi jo ku Ejipita ijo jainga jakapambhama no kusota mudenga. Asi themberi ya Soromona yainga yakasiyana. Vapsakisisi vanonanga kuti mapiravira ayo acaingepi no makovhadho anopindirija matandhatu kana kuti mametro anokwana kuita 2,7 (kana 9 jo soka). Mupsakisisi umweni anozwi Teodhori Bhusiki, wakananga kudari: “Mukuzwirana no manera akareba mapiravira o [manghwiniro o themberi], berere aricaizova no makovhadho anokwana kuita 120 [o kureba].”

Vhesi yo bhuku ra 2 Kronika 3:4 zvingaita kuti aizivi kukhopwa ngo njira kwayo. Pikija matahwa amweni o mu nguva yo kare akatahwa “120 o makovhadho” pa vhesi iyi, mavhesi amweni akaatuwarizahwi akatahwa “20 o makovhadho.” Ngenyi vatari vamweni vakatara “120”? Gama rokuti “zana” no rokuti “kovhadho” mu Cihebheru akafanana. Ngo kudaro, mutari angatara gama rokuti “zana” kusiyapo rokuti “kovhadho.”

Zvakajeka kuti pikija tecivangisira kuti tizwisise mavhesi aya no shwiro yo themberi ya Soromona, tinobatikana maningi pa zvakaithwa ngo themberi iyi—themberi yo kumujimu. Tinobongesera maningi Jehovha ngo kutikoka kwake kuti timunamate mu thembheri yo kumujimu.—Vahebheru 9:​11-14; Apokaripsi 3:12; 7:​9-17.