1-2. Muripo icinyi, ngenyi itusu tinouda?

ADHAMU inga mundhu wakakwana, paakashaisha wakaruza mukana wo kupona kwenda no kwenda. Asi izvi azvizivi kuitikira iyena basi, zvakabatanijavo no vana vaakazobara. Adhamu aacaingepi no thangwe ro kushaisha. Iyena wakazviita ngo cabomo. Asi vana vake keni? Ivona avazivi kuita ciri cese cakashata, avazivizve kuvangirija Adhamu kuti azviite. (VaRoma 5:12, 14) Adhamu waifanera kufa ngo zvaakaitari. Waro kunanga kuti Jehovha waizoita ciri cese, kuti akwanise kuponesa vana va Adhamu? Hina! Adhamu paakapera kushaisha, Jehovha padoko ngo padoko wakatanga kuvonesa kuti zvicinyi zvaaizoita kuti aponese vana va Adhamu, ku ushaishi no rufu. (Genesi 3:15) Mukuvo powakazoguma, Jehovha wakatumira Mwana wake kuvha mugore kuti ape “uhomi hwake kuti aponese vazinji.”—Marco 10:45; Johani 6:51.

² Muripo icinyi? Mu Matahwa o Cikristu o Cigiriki, muripo unonangwa inga mutengo wakapa Jesu kuti tikwanise kuwanazve zvakaruzwa ndi Adhamu. (1 VaKorinto 15:22) Waro ngenyi itusu tinoda muripo? Ngokuti mutemo wakarungama wa Jehovha waida kuti upenyu huripwe ngo upenyu. (Exodo 21:23, 24) Adhamu wakaruza upenyu hwake hwakakwana. Kuti Mwari aite zviro mu njira yakarurama, Jesu waidikana kupira upenyu hwake hwakakwana. (VaRoma 5:17) Iyena anova “Baba acikaperi” kuna vese vanotenda muripo.—Isaia 9:5; VaRoma 3:23, 24.

3. Mukuzwirana na Johani 14:31; na 15:13, ngenyi Jesu waida kupira upenyu hwake hwakakwana?

³ Jesu waida kupira upenyu hwake ngokuti waida Baba wake vo mugore, kubatanijavo na itusu. (Verenganyi Johani 14:31; 15:13.) Ngo ndava yo rudo hwondhohwo, iyena wakatema civaringo co kugara wakagondeka mbhera kumagumo  no kukwanirisa kuda ka Babake. Ngo kuita kwake zvondhozvo, cidisiso cokutanga ca Jehovha ku vandhu vese no nyika ino, zvakazokwanirisika. Pa jijo iyi, tinozovona kuti ngenyi Jehovha wakatendera kuti Jesu atambujike maningi acito afa. Tinozohwirijirazve ngo kukasika muezaniso wo mutari umweni wo Bhaibheri wakakhombija kuti waibongesera maningi ngo muripo. Pejisire tinozovonavo kuti itusu tingakhombijisa kudini kubongesera kwedu ngo muripo no kuvona kuti tingaengejeresa kudini kubongesera kwedu ngo muripo wotakapuwa ndi Jehovha na Jesu.

4. Jesu wakafisa kudini?

⁴ Amborangariranyi basi zvakaitika pa njiku yo kupejisira ya Jesu pasi pano. Pikija kuti waikwanisa kukumbira besero ro ngirozi kuti jimujivirire, iyena aazivi kuzviita, asi wakatendera kuti masoca o Ciroma amusunge no kumutaka. (Mateu 26:52-54; Johani 18:3; 19:1) Iwona akamutaka ngo mushakwe wakaita kuti ave no mavonje akawanda maningi. Perapo, vakamuthwarisa zimiti kuti aende naro kwaakazofiraya. Jesu paakatanga kuthwara mutanda wiya kuti aende ku ndau yaaidaro kuuraihwa, masoca o Ciroma akavhunja mwanarume umweni wainga ecidarika ngo pondhopo kuti authware. “Novabuda, vakasongana no mundhu wo Sirene wo zina ra Simoni, vomuvangirija kuthwara [mutanda wiya].” (Mateu 27:32) Jesu paakaguma pa ndau yaaidaya kuuraihwa, masoca akakohomera soka jake no mukono. Kurema ko muviri wa Jesu kunocacura munongaya makakohomehwa. Shamwari jake jinosuruvara, mai wake vanorira, asi vatongi vo Cijudha vanoshora Jesu. (Luka 23:32-38; Johani 19:25) Jesu wakatambujika pa mukuvo wakareba kamare. Ngo ndava yo manera aainga akakohomehwa, zvakaita kuti mwoyo wake no mazazu ahwaje maningi, wogumira pa kunesehwa kufema. Jesu waizviziva kuti waizofa wakagondeka. Asi acito afa wakaita mukumbiro wo kupejisira kuna Jehovha. Iyena wakakotamisa musoro wake, wofa. (Marco 15:37; Luka 23:46; Johani 10:17, 18; 19:30) Hwakava rufu hunosuruvarisa maningi!

5. Kuna Jesu, icinyi cakamuhwaja maningi kupinda mafiro aakaita?

⁵ Kuna Jesu, manera aakafa andiopi akamuhwaja maningi. Iyena wakahwajihwa maningi ngo thangwe rakamuitisaro kuti aurawe. Iyena wakapumbhwa kuti wainga mundhu acikareremeji Mwari. (Mateu 26:64-66) Kuvona vandhu vacimupumbha kuti aacaireremeja Mwari, zvakamuhwaja maningi. Ngo kudaro, iyena waivetera kuti Babake vaizoita zviri zvese kuti atame kunyowejwa ngo njira iyi. (Mateu 26:38, 39, 42) Waro ngenyi Jehovha wakatendera kuti Mwana wake waanoda atambujike no kufa? Ngatende tivone mathangwe matatu.

6. Ngenyi Jesu wakakohomehwa pa mutanda wo kutambujikira?

⁶ Rokutanga, Jesu wakadikana kukohomehwa pa mutanda kuti akwanise kusujunura Vajudha ku khombo rovainga naro. (VaGalàsia 3:10, 13) Ivona vainga vakagondesa kuti vaizozwira mutemo jese ja Mwari, asi avazivi kukwanirisa zvavakagondesaro. Inga muviyo, khombo iri rakazoengejeka pavakawana utaka ku cishaishi ca Adhamu. (VaRoma 5:12) Mwari wakapa Vaiziraeri Mutemo wo kuti mundhu paaishaisha waidikana kuraiwa. Pasure pazvo, muviri wake waidikana kukohomehwa pa mutanda. * (Deuteronòmio 21:22, 23; 27:26) Ngokudaro, Jesu ngo kuva kwake ecikohomehwa, wakaita kuti jinja rakamurambaya ribesereke ngo muripo wake.

7. Ngorapi thangwe rocipiri rakaita kuti Mwari atendere kuti Mwana wake atambujike?

 ⁷ Ngatende tivone thangwe rocipiri rakaita kuti Mwari atendere kuti Mwana wake atambujike. Iyena wainga ecimujijisa kuitira basa raaizoita kumbejiyo, ro kuva Mupiri Mukuru wedu. Jesu wakakwanisa kuvona kamare kuti zvinonesa kuzwira Mwari mundhu paanonga ecitambujika. Iyena wakatambujika maningi zvokuti wakaita mukumbiro ecikumbira besero ‘ecikhuwisisa no kubuda musoji.’ Zvecivoneka kuti wakasuruvara maningi ngo mugariro waainga nawo, iyena anozwisisa zvatinoda i ‘anokwanisa kutibesa patinoejwa.’ Tinobonga maningi Jehovha ngo kutipa Mupiri Mukuru “anokwanisa kuzwira unyaxa kurembejeka kwedu.”—Vaheberi 2:17, 18; 4:14-16; 5:7-10.

8. Ngorapi thangwe rocitatu rakaitisa kuti Jehovha atendere kuti Jesu aejwe?

⁸ Thangwe rocitatu, Jehovha wakatendera kuti Jesu atambujike maningi kuti akwanise kudavira muvhunjo unosisira maningi, wo kuti: Kureva kuti vandhu vangakwanisa kuramba vakagondeka kuna Jehovha pikija vecitambujika? Sathana wakananga kuti akuna! Iyena wakananga kuti vandhu vanoshandira Jehovha ngokuti vanoda kupuwa zviro ndiyena. Iyena anotenda kuti, inga zvakaitika na Adhamu, vandhu vondhovo avadi Jehovha. (Jobe 1:9-11; 2:4, 5) Ecithemba kugondeka ko Mwana wake, Jehovha wakatendera kuti Mwana wake aejwe mbhera paanokwanisa kucungirira. Jesu wakaramba wakagondeka i wakakhombija kuti Sathana munyepi.

9. Mupostori Johani wakatigajira muezaniso wapi?

⁹ Makristu mazinji akavangiswa ngo kujija ngo pamusoro po muripo. Ivona vakakwanisa kuenderera mberi vecicumaera pikija pavainga veciteverehwa i vakacungirira zvineso zvakasiyana-siyana ngo ndava yo kuva vasharuka. Vonanyi basi muezaniso wo mupostori Johani. Iyena wakacumaera ngo kugondeka kwese ngo pamusoro pa Kristu no muripo pa makore anopindirija makumatandhatu. Iyena wainga no makore anokwedera kuita 100, asi utongi wo Ciroma wairangarira kuti iyena aacainga mundhu waushoni. Ngo kudaro, vakamufungira ku cirundu co Patimosi. Ngenyi wainga akafungihwa? “Ngo ndava yo kucumaera Izwi ra Mwari no kumuitira Jesu ufakazi.” (Apokalipsi 1:9) Muezaniso wakanaka maningi wo mundhu wakakhombija rutendo no kucungirira!

10. Zvakatara Johani zvinokhombijisa kudini kuti tinobongesera ngo muripo?

¹⁰ Mu mabhuku akatara mupostori Johani wakabhuya maningi ngo kuda kwaaita Jesu no kubongesera kwaainga nako ngo muripo. Iyena wakatara vhaza jinokwana kuita 100 ngo pamusoro po muripo kana ngo zviro zvinokwanisika ngo ndava yo muripo. Inga muezaniso, Johani wakatara kudari: “Kudari ariwese akaxaixa, tinae anotiimirira kuna Baba: Jesu Kristu mururami.” (1 Johani 2:1, 2) Johani wakatara maningi ngo kusisira ko ‘kuitira Jesu ufakazi.’ (Apokalipsi 19:10) Zvakajeka kamare kuti Johani waibongesera maningi ngo muripo. Waro itusu tingakhombijavo kudini kuti tinobongesera ngo muripo?

11. Zvicinyi zvingatibesera kuti titame kucengejwa?

¹¹ Vangisiranyi kuti mutame kushaisha. Kudari imwimwi munobongesera ngo muripo, amuzorangariri kudari: ‘Apana dikano yo kuvangisira kuti nditame kushaisha pandinoejwa, kudari ndikashaisha ndinozokumbira kuregerehwa.’ Kusiyapo kurangarira ngo njira iyi patinoejwa kuti tiite ciri cese cakashata, zvaizova zvaushoni kunanga kudari: ‘Nadha!  Ndingaitisa kudini zviro zvakadari no zvese zvandakaitihwari ndi Jehovha na Jesu?’ Tecirangarira ngo njira iyi, zvaizova zvaushoni kukumbira Jehovha kuti atipe simba, ngo kumuvhunja kudari: ‘Mucadotiregera ticicengejwa.’—Mateu 6:13.

12. Tingashandisa kudini mbhangiro inowanika pana 1 Johani 3:16-18?

¹² Idanyi hama no hambzaji jenyu. Patinokhombija rudo wakadari, tinokhombijavo kuti tinobongesera ngo muripo. Ngenyi? Ngokuti Jesu aazivi kufira itusu basi, asi wakafiravo hama no hambzaji jedu. Kudari iyena wakatendera kuti avafire, zvakajeka kamare kuti ivona vanosisira maningi kwaari. (Verenganyi 1 Johani 3:16-18.) Itusu tinokhombija kuti tinoda hama no hambzaji jedu, ngo manera atinovataja. (VaEfeso 4:29, 31–5:2) Inga muezaniso, tingavabesera pavanonga vecihwaja kana pavanosongana no zvineso zvakasiyana-siyana, kubatanijavo ngozi jinoitika jega. Asi zvicinyi zvatinodikana kuita kudari hama kana hambzaji yaita kana yananga ciri cese catinyangajisa?

13. Ngenyi tinodikana kuregerera?

¹³ Kunanga kuti munovona zvecimunesera kuregerera hama no hambzaji jenyu? (VaLevi 19:18) Kudari zvinomunesera zvaizova zvaushoni kutevera mbhangiro iyi: “Cijikiranyi ngocenyu ngo rudo, mecikungurirana. Kudari aripo ana ciricese no mudoni wake. Regererananyi inga bzaakamuregerera Tenji.” (VaKolosi 3:13) Vhaza jese jatinoregerera hama no hambzaji jedu, tinokhombija kuna Baba wedu vo mugore kuti tinobongesera maningi ngo muripo. Waro tingaitisa kudini kuti tiengejere kubongesera kwedu ngo muripo?

14. Ngoyapi njira imwe yatingakhombija kubongesera kwedu ngo muripo?

¹⁴ Bonganyi Jehovha ngo muripo. Hambzaji Jhowana vano makore anokwana kuita makumasere na matatu, vanogara Indiya, vakati: “Ndinovona kuti zvinosisira maningi kunanga ngo pamusoro po muripo pa vhaza jese jandinoita mukumbiro no kubonga Jehovha ngo pamusoro pao.” Pa vhaza jese jamunoita mukumbiro wenyu kuna Jehovha, muvhunjenyi zvese zvomaposa pa njiku yondhoyo no kukumbira kuregerehwa. Zvokadi kamare, kudari mukaita cishaishi cikuru munodikana kukumbira besero ro vakuru. Ivona vanozomupa mbhangiro icivha mu Soko ra Mwari no kuita mukumbiro na imwimwi vecikumbira kuti Jehovha  aenderere mberi ecishandisa muripo wa Jesu “kuti murapwe [ku divi ro umwari].”—Jakobo 5:14-16.

15. Ngenyi tinodikana kupsaka nguva kuti tiverenge no kurangarijisisa ngo pamusoro po muripo?

¹⁵ Rangarijisisanyi ngo pamusoro po muripo. Hambzaji Rajamani vano makore anokwana kuita makumanomwe na matatu, vakati: “Pandinoverenga ngo pamusoro po kutambujika ka Jesu, majiso angu anozara ngo musoji.” Imwimwi mungatambujikavo ngo kuvona matambujikire akaita Mwana wa Mwari. Asi pamunorangarijisisa ngo pamusoro po muripo wakaitwa ndi Jesu, rudo hwenyu kwaari no kuno Baba wake unoengejekavo. Ngokudaro, psakanyi nguva yo kujija zvakawanda ngo pamusoro pa Jesu.

16. Ngenyi kujijisa vamweni ngo pamusoro po muripo kunotibesera? (Vonanyi pikica yo pa kapa.)

¹⁶ Jijisanyi vamweni ngo pamusoro po muripo. Pa vhaza jese jatinobhuya no vamweni ngo pamusoro po muripo, kubongesera kwedu ngo pamusoro pawo kunoengejekavo. Itusu tino mabhuku no mavhidhiyo kuti tikwanise kubesera vamweni kuti vazwisise kuti ngenyi Jesu wakatifira. Inga muezaniso, itusu tingashandisa cijijo co cirongomuna co bhurushura Masoko Akanaka Anobva Kuna Mwari! Cijijo condhoco cino musoro unoti: “Ndiani Jesu Kristu?” Kana tingatoshandisa cipauko co cishanu co bhuku Bhaibheri Ringatijijisenyi? Cipauko condhoco cino musoro unoti: “Muripo—Cipo Cikuru ca Mwari.” I makore ese, itusu tinoengejera kubongesera kwedu ngo pamusoro po muripo ngo kwenda ku Cirangarijo co kufa ka Jesu no kuvangisira kuti tikoke vamweni kuti vaviyevo ku Cirangarijo. Jehovha wakatipa cidakajiso cikuru co kujijisa vamweni ngo pamusoro po Mwana wake!

17. Ngenyi muripo i cipo cikuru ca Mwari kuitira vandhu vese?

¹⁷ Itusu tino thangwe rakanaka kuti tienderere mberi tecibonga ngo pamusoro po muripo. Ngokuti muripo unoita kuti tikwanise kuva no ushamwari na Jehovha pikija atizivi kukwana. Ngo ndava yo muripo, mabasa ese a Dhiyabhu anozofujuhwa mukuperera. (1 Johani 3:8) Ngo ndava yo muripo, cidisiso ca Mwari ngo ndava yo pasi pano cinozokwanirisika. Nyika yese inozova paradhiso. Vandhu vese vamunozosongana navo, vanozoda Jehovha no kumushandira. Ngo kudaro, njiku jese ngatipsake manera o kukhombija kuti tinobongesera ngo muripo, cipo cikuru ca Mwari kuitira vandhu vese!