1. Jehovha anovonenyi ku vandhu vake?

JEHOVHA MWARI “anoda vandhu vake.” (Nduyo 149:4) Kuziva izvi, zvinodakajisa maningi! Jehovha anovona mugariro jedu jakanaka, anovona zvatinokwanisa kuita i anotibesera kuti tive shamwari jake. Kudari tikaenderera mberi takagondeka kwaari, iyena anova shamwari yedu yo kwenda no kwenda!—Johani 6:44.

2. Ngenyi vamweni vanonesehwa kutenda kuti Jehovha anovada?

² Vamweni kangaije vangananga kudari: ‘Ndinozviziva kuti Jehovha anoda vashandiri vake vese, asi ndingaitisa kudini kuti nditende kuti iyena anondida?’ Ngenyi vamweni vanoita muvhunjo uwu? Hambzaji Okisana *, vakatambujika maningi pavainga mwana mudoko, vakati: “Ndakadakara maningi pandakabhabhatijwa. Perapo, ndakatanga kushanda inga piyona. Asi no papera gumi na mashanu o makore, ndakatanga kuceukija zviro zvakashata zvakandiitikira pandainga mwana mudoko. Ndakaguma pakurangarira kuti Jehovha aacainditenderazve i andicainga mundhu anofanera kudiwa ndiyena.” Hambzaji Madharena vari kushanda inga piyona, vakasonganavo no zvineso zvizinji pavainga mwana mudoko, vakananga kudari: “Zvakaita kuti ndipire upenyu hwangu kuna Jehovha ngo zvokuti ndaida kumudakajisa. Asi ndainga ndicina cokwadi cokuti iyena waindidavo.”

3. Zvicinyi zvaticajija pamusoro uno?

³ Kudari inga Makristu akagondeka ataperari kuvona, imwimwi munoda maningi Jehovha. Asi kangaije nguva jimweni, munokana-kana kuti iyena anomuda kana haiwa. Ngenyi munodikana kukhohwa kuti iyena anomukorondha? Zvicinyi zvingamubesera pamunogumihwa ngo murangariro wo kuti Jehovha aamudi? Ngatende tivone mupinguro jo muvhunjo iji.

4. Ngenyi zvakashata kurangarira kuti Jehovha aatidi?

⁴ Rudo uno simba maningi. Patinova no cokwadi cokuti Jehovha anotida, tinoita zvese zvatinokwanisa kuti timushandire pikija paya patinosongana no muejo. Asi kudari tikakana-kana kuti Jehovha anotida, ‘simba [redu rinozova] doko.’ (Mazwi Akangwara 24:10) Patinoremba, torangarira kuti Mwari aatidi, atizocijikiri patinozoejwa ndi Sathana.—VaEfeso 6:16.

5. Hama jimweni jinopsaswa kudini ngo kurangarira kuti Mwari aavadi?

⁵ Hama no hambzaji jimweni jakarangarira kuti ajidiwi i nee ajitotajwi ndi Jehovha, jakazogumira pakurembejeka pa kumunamata. Mukuru umweni anozwi Jhemusi wakati: “Pikija ndaishandira ku Bheteri, ndecidakajihwa ngo kubesera ungano inobhuya ndumi imweni, ndaikana-kana dangani Jehovha waidakaravo no zvese zvandaiitari. Ndakaguma pa kujivhunjisa dangani Jehovha waizwa mukumbiro jandinoita.” Hambzaji Evha vanoshandavo mu nguva yakazara, vakananga kudari: “Ndakavona kuti zvakashata maningi kurangarira kuti Jehovha aatidi. Ngokuti izvi zvinopsasa zvese zvatinomuitira. I zvinotiita kuti titame kuda kuita ciri cese kuna Jehovha, totogumira pakuruza mudakaro wedu.” Hama Mishaeri avo vanoshanda inga piyona wo nguva jese i vanoshandazve inga mukuru, vakati: “Kudari mukatama kutenda kuti Mwari anomutaja, ushamwari hwenyu naye, auzovi wakavanga.”

6. Zvicinyi zvatinodikana kuita patinotanga kurangarira kuti Mwari aatidi?

⁶ Muezaniso iji jinovonesa kuti kurangarira kuti Jehovha aatidi, zvinorembesa rutendo hwedu. Waro patinotanga kurangarira kuti Mwari aatidi, zvicinyi zvatinodikana kuita? Tinodikana kuvhisa murangariro wondhowo ngo kukasika. Kumbiranyi Jehovha amubesere kufakeya murangariro jicikabeseri ngo “rugarisiko hwa Mwari hunopinda uzivi hwese, hunozorinda mwoyo yenyu no murangariro yenyu.” (Nduyo 139:23; VaFilipi 4:6, 7) Ceukijanyi kuti amuripi mwega. Hama no hambzaji jimweni jakagondeka, jiri kuhwisanavo no murangariro jondhojo. Vashandiri vakagondeka va Mwari vo kare, vakavavo no zvineso zvondhozvo. Ngatende tivone zvatingajija ngo muezaniso wo Mupostori Pauro.

7. Ngozvapi zvineso zvakasongana na Pauro?

⁷ Nguva jimweni munojivona kuti muno mabasa akawanda o kuti muri kunesehwa kuda kumaita ese here? Kudari ndizvona, munozozwisisa zvakaitika na Pauro. Iyena waithimwa-thimwa maningi ngo ndava yo “magungano ese,” kuciripi ngo ungano imwe basi. (2 VaKorinto 11:23-28) Muno ndhendha iri kunesa kurapika yoita kuti mutame kudakara here? Pauro wainga no “muzwa mu muviri,” kangaije yainga ndhendha yaaida kuti irapwe. (2 VaKorinto 12:7-10) Nguva jimweni munojizwa makasuruvara ngo ndava yo kutama kukwana kwenyu? Nguva jimweni Pauro waijizwavo kudaro. Iyena wakatojidanija inga “mundhu wo khombo” ngokuti nguva jese waidikana kuvangisira kuti aite zvakanaka.—VaRoma 7:21-24.

8. Zvicinyi zvakabesera Pauro kuti ahwisane no zvineso zvaaisongana nazvo?

⁸ Pikija wakasongana no zvineso zvakasiyana-siyana no mugariro jinorembesa, Pauro wakaenderera mberi ecishandira Jehovha. Zvicinyi zvakamuvangisa kuti aite zvondhozvo? Pikija kuti wainga mundhu acizivi kukwana, iyena waithemba muripo, iyena waiziva cigondiso ca Jesu cokuti ‘vese vanotenda [Jesu] . . . vanova no uhomi hucingaperi.’ (Johani 3:16; VaRoma 6:23) Pauro wainga umwe wo vaya vaitenda muripo. Iyena waithemba kuti Jehovha anoregerera vaya vakaita zvishaishi zvikuru asi vokhauya.—Nduyo 86:5.

9. Tinojijenyi ngo magama a Pauro anowanika pana VaGalàsia 2:20?

⁹ Pauro waitenda kuti Mwari waimuda maningi ngokuti wakatumira Jesu kuti amufire. (Verenganyi VaGalàsia 2:20.) Vonanyi magama anovangisa kumbhiri ko vhesi iyi. Pauro wakati: “Mwana wa Mwari, wakandidisa no kujipira ega, ngo ndava yangu.” Pauro aacaijivona inga mushaishi maningi zvokuti Mwari acaizomuda. Iyena acairangarira kudari: ‘Ndinozviziva kuti Mwari anoda hama jangu asi andingazvitendi kuti iyena angatodavo inini.’ Pauro wakavhunja Varoma kudari: “Mukuvo wo tainga vaxaixi, Kristu wakatifira.” (VaRoma 5:8) Izvi zvinovonesa kuti apana cingaita kuti Mwari atame kutida.

10. Tinojijenyi ngo zvinowanika pana VaRoma 8:38, 39?

¹⁰ Verenganyi VaRoma 8:38, 39. Pauro wainasa kuziva kamare kuti Mwari waimuda. Iyena wakatara kuti apana cinokwanisa “kutiparajanisa ku rudo hwa Mwari.” Pauro waizviziva kuti Jehovha, wakava mundhu anosengerera maningi no jinja ro Iziraeri. Iyena waizivazve kuti Jehovha wakakhombija maningi usizi kwaari. Ngo magama amweni, Pauro wainga ecinanga kudari: ‘Zvecivoneka kuti Jehovha wainga wakatumira, Mwana wake kuti afire inini, ngenyi ndinodikana kurangarira kuti iyena aandidi?’—VaRoma 8:32.

11. Pikija kuti Pauro wainga wakaita zvishaishi inga zvinonangwa pana 1 Timoti 1:12-15, ngenyi iyena wainga no cokwadi co kuti Mwari waimuda?

 ¹¹ Verenganyi 1 Timoti 1:12-15. Kangaije Pauro wainyangajwa maningi ngo kurangarira zviro zvese zvakashata zvaakaita acito ava Mukristu. Azvitishamaisi kuvona kuti iyena wakatojidanija inga “wokutungamira” pa vashaishi vese acito wajija cokwadi, iyena waiteverera Makristu kuvha ku dhorobha rimwe kwenda ku rimweni no kudira vamweni mukadheya no kutotendera kuti vamweni vatouraiwe. (Maitiro o Vapostori 26:10, 11) Zvokadi kamare, Pauro waisuruvara maningi paaisongana no majaha o kuti iyena wakabesera pa kuuraya vabari vavo. Iyena waizvidemba maningi ngo zvishaishi zvese zvaakaitaro, waizviziva kuti aakwanisi kucinja zvakaitikaro. Ngo kudaro, iyena waithemba kuti Jesu wainga wakamufira. No kuthemba kwese iyena wakatara kudari: “Ndiri bzondiri wari, ngo unyaxa hwa Mwari.” (1 VaKorinto 15:3, 10) Tinojijenyi ngo muezaniso wa Pauro? Tinodikana kuva no cokwadi co kuti Jesu wakatifira no kuita kuti tikwanise kuva no ushamwari wo phedo na Jehovha. (Maitiro o Vapostori 3:19) Zvinosisira maningi kuna Mwari i zviya zvatiri kuita wari no zvatinozoita kumbejiyo kuciripi zvishaishi zvatakaita kare, azvinenyi kuti tainga Capupu ca Jehovha kana kuti haiwa.—Isaia 1:18.

12. Magama atinowana pana 1 Johani 3:19, 20, angatibeseresa kudini patinojizwa kuti atidiwi kana atisisiri?

 ¹² Zvingaita kuti pamunorangarira kuti Jesu wakafa ngo ndava yo zvishaishi zvenyu imwimwi mungatogumira pa kunanga kuti, andifaneri kuizihwa zviro zvakadari. Asi ngenyi imwimwi munojizwa kudaro? Mwoyo wedu ucikazivi kukwana ungaticengeja wotiita kuti tijizwe inga atisisiri kana atifaneri kudiwa ndiyena. (Verenganyi 1 Johani 3:19, 20.) Pa nguva yondhoyo zvaushoni maningi kuceukija kuti, “Mwari mukuru kupinda mwoyo yedu.” Pikija patinojizwa kuti Jehovha aatidi kana aazotiregereri, Baba vedu vo mugore vanoenderera mberi vecitida no kutiregerera. Itusu tinodikana kuva no cokwadi cokuti Jehovha anotida. Kuti tiite zvondhozvo, tinodikana kujija Soko rake, kuita mukumbiro nguva jese no kupeja nguva yakawanda no vashandiri vake. Ngenyi kuita zviro izvi kunosisira?

13. Patinojija Bhaibheri, tinobesereka kudini? (Vonanyi bhokiso rinoti: “ Soko ra Mwari Rakavabeseresa kudini?”)

¹³ Kujija Bhaibheri njiku jese, kunozomubesera kuti muvone mugariro jakanaka jina Jehovha. Munozovona kuti anomuda maningi. Pamunorangarijisisa zvamaverenga mu Bhaibheri njiku jese, zvinomubesera kuti murangarire zviro zvaushoni no “kufujura unyepi” uri mu murangariro no mu mwoyo wenyu. (2 Timoti 3:16) Mukuru umweni anozwi Khevhini, uwo waijizwa inga aasisiri, wakati: “Kuverenga Nduyo 103 no kuirangarijisisa, kwandibesera kuti ndicinje zvandairangarira no kuzwisisa kuti Jehovha, anondida maningi.” Hambzaji Evha vanangwaya pakutanga, vakati: “Pakupera ko njiku, ndaipsaka cinguva kuti ndirangarire ngo pamusoro po mazwiro a Jehovha. Izvi zvaiita kuti ndive no runyararo mu murangariro mwangu, i zvaivangisa rutendo hwangu.”

14. Mukumbiro unotibeseresa kudini?

¹⁴ Itanyi mukumbiro mukuvo wese. (1 VaTesalònika 5:17) Pamunoda kuita ushamwari no mundhu, imwimwi munobhuya naye pa vhaza jakawanda mecimuvhunja mazwiro enyu. Izvi ndizvona zvinoitikavo no ushamwari wedu na Jehovha. Patinomuvhunja ngo mukumbiro mazwiro edu, zvatinorangarira no zvineso zvatinosongana nazvo, tinonga tecivonesa kuti tinomuthemba no kuziva kuti iyena, anotida. (Nduyo 94:17-19; 1 Johani 5:14, 15) Hambzaji Madharena vanangwaya pakutanga, vakati: “Pandinoita mukumbiro, andivhunji basi Jehovha zviro zvandiitikira, ndinomuvhunja zvese zvandiri kurangarira no mazwiro andinawo. Padoko ngo padoko, zvinondiita kuti nditame kuvona Jehovha  inga mutungamiriri wo empereza, asi ndimuvone inga Baba vanoda vana vavo.”—Vonanyizve bhokiso rinoti: “ Makapera Kuverenga Bhuku Iri Here?”

15. Jehovha anokhombijisa kudini kuti anotida?

¹⁵ Shamwari jakagondeka, i cipo cinovha kuna Jehovha. (Jakobo 1:17) Baba vedu vanokhombija kuti vanotida ngo kutipa hama no hambzaji jinotida “mukuvo wese.” (Mazwi Akangwara 17:17) Mu karata yake ku Vakorose, Pauro wakabhuya ngo Makristu amweni akamubesera, ecinanga kuti ivona ‘vakamunyaraja kukuru.’ (VaKolosi 4:10, 11) Atee Jesu waibongesera maningi ngo kubesehwa kwaiitwa ngo shamwari jake, ngirozi no vandhu kamare.—Luka 22:28, 43.

16. Shamwari jakagondeka jinotibesera kudini kuti tive phedo na Jehovha?

¹⁶ Muri kubesereka ngo shamwari jakagondeka jamakapuwa ndi Jehovha? Patinovhunja zvineso zvedu hama yakaivha ku divi ro umwari, zvinozotijivirira. Hama Jhemusi vanangwaya pakutanga vakati: “Shamwari jakaivha ku zvo umwari, jinobesera maningi. Murangariro jakashata pajinondigumira, shamwari iji jinondipurukira ngo kusengerera kwese vecindivhunja kuti vanondida maningi. Pavonoita zvondhozvo, ndinoguma pakuvona kuti Jehovha anondida i anonditaja.” Izvi zvinovonesa kuti zvinosisira maningi kuva no ushamwari no hama no hambzaji jedu.

17-18. Tinodikana kupurukira ani? I ngenyi?

¹⁷ Sathana anoda kuti tirembe pakuita zvakanaka. Cimwenizve, iyena anoda kuti titende kuti Jehovha aatidi i atifaneri kuzoponeswa. Inga zvataperari kuvona zvinodari Sathana asipi zvokadi.

¹⁸ Jehovha anomuda maningi. Imwimwi munosisira maningi kwaari, kudari imwimwi mukamuzwira ‘munozogara mu rudo hwake’ kwenda no kwenda inga zvakaita Jesu. (Johani 15:10) Mucapurukira Sathana nee mwoyo wenyu ucikazivi wari kukwana, purukiranyi Jehovha uwo anopsaka zvakanaka kuna umwe nga umwe wedu. Ivanyi no cokwadi cokuti Jehovha ‘anoda vandhu vake’ kubatanijavo na imwimwi.