Jesu acito afa, ngenyi wakananga magama a Dhavhidhi anowanika pana Nduyo 22:2?

Pakati po magama okupejisira akananga Jesu acito afa, aripovo amweni anowanika pana Mateu 27:46, okuti: “Mwari wangu, Mwari wangu, makandisia ngenyi?” Ngo kunanga magama aya, Jesu wainga ecikwanirisa zvakatara Dhavhidhi pana Nduyo 22:2. (Marco 15:34) Zvaizova zvakashata kuguma pa mbhejiso yokuti Jesu wakananga magama aya, ngokuti wainga akanyangajwa kana kuti wainga acikanazve rutendo kuna Jehovha. Jesu wainasa kuziva kamare kuti ngenyi waidikana kufa i wainga ano cido cokuita zvondhozvo. (Mateu 16:21; 20:28) Iyena waizivazve kuti pamukuvo waizoviya, Jehovha ‘acaizomungwarira.’ (Jobe 1:10) Ngo kudaro, Jehovha waida kuti Jesu akhombije kugondeka kwake, azvinenyi no manera aizofa.—Marco 14:35, 36.

Waro ngenyi Jesu wakananga magama anowanika pana Nduyo? Pikija atinasi kuzviziva, ngatende tivone mathangwe manganani angabesera. *

Ngo kunanga magama aya, kureva kuti Jesu wainga ecigogomejera kuti Jehovha aacaizomujivirira? Jesu waidikana kupa muripo acikabesehwi ndi Jehovha. Iyena wainga mundhu wakakwana, i waidikana kufa ngo “ndava yo vese.”—Vaheberi 2:9.

Ngo kunanga magama anowanika pa vhesi iyi, kureva kuti Jesu waida kuti vandhu varangarire zvese zviri kunangwaro mu cipaukoco? Mu njiku jondhojo, Vajudha vainga no cirovejeso co kuviga mavhesi akawanda o bhuku ra  nduyo mu musoro. Pavaizwa vhesi imwe yo bhuku ra nduyo, ivona vaikwanisa kuceujika cipaukoco cese. Kudari ndizvona zvairangarira Jesu, izvona zvakabesera Vajudha vazinji vaimubeseraya, kuti vaceukije zviporofita zvizinji zvinowanika mu cipauko ici co bhuku ra nduyo caibhuya ngo pamusoro po kufa kwake. (Nduyo 22:8, 9, 16, 17, 19, 25) Mavhesi okupejisira o cipauko ici, anosimba Jehovha ngo kumusanangura inga mambo wo zvese.—Nduyo 22:28-32.

Ngo kunanga magama aya a Dhavhidhi, kureva kuti Jesu wainga ecinanga kuti iyena wainga acikana ndava? Jesu acito auraiwa, sinedhriyo yakaumba dare riciripi ro pamutemo i vopumbha Jesu kuti wainga watuka Mwari. (Mateu 26:65, 66) Sinedhriyo yakaita zvondhozvo ngo kukasika cousiku i vakazviita vacikazwiri mutemo. (Mateu 26:59; Marco 14:56-59) Ngo kuita muvhunjo wokuti: “Mwari wangu Mwari wangu mandisiya ngenyi?” Jesu waida kuvonesa kuti iyena acaingepi waita ciro cakashata kuti afanere kufa mu njira yondhoyo.

Zvecivoneka kuti Jesu wainga eciceukija vamweni kuti pikija Dhavhidhi wakatararo nduyo iyi wakaregehwa kuti atambujike, izvi zvaireva kuti Dhavhidhi wainga acikatendehwi ndi Jehovha here? Muvhunjo wa Dhavhidhi aucaivonesa kuti iyena wainga acikana rutendo. Pakupera kuita muvhunjo uwu, iyena wakavonesa kuthemba kwaainga nako kuti Jehovha waizoponesa vandhu vake i waizoenderera mberi ecimukomborera. (Nduyo 22:24, 25, 28) Mukufananavo, pikija Jesu “Mwana wa Davidi,” wainga ecitambujika pa mutanda wo kutambujikira, izvi azvicaireva kuti iyena wainga acikatendehwizve ndi Jehovha.—Mateu 21:9.

Kureva kuti Jesu wakananga magama aya kuitira kuvonesa kuti Jehovha wainga wavhisa jiviriro Yake, kuti iyena avonese kugondeka kwake here? Acicaingepi cinangwa ca Jehovha cokuti Mwana wake atambujike perapo ofa. Asi izvi zvakazodikana kuitwa ngo ndava yo kutama kuzwira ka Adhamu na Evha. Jesu apana caakashaisha, asi waidikana kutambujika no kufa kuti akwanise kudavira shwiro yakamuswaya ndi Sathana kana kuti vandhu vawanezve vetero yo kupona kwenda no kwenda. (Marco 8:31; 1 Pedru 2:21-24) Izvi zvakakwanirisika basi Jehovha paakavhisa jiviriro yake pa mukuvo mushomani mu upenyu wa Jesu.

Kureva kuti Jesu wakaeja kubesera vateveri vake kuti varangarire kuti ngenyi Jehovha wakatendera kuti iyena afe pa mutanda wo kutambujikira? * Jesu waizviziva kuti kufa inga mushaishi pa mutanda wo kutambujikira zvaizokhugunya vandhu vazinji. (1 VaKorinto 1:23) Kudari vateveri va Jesu vaizwisisa kuti ngenyi Jesu wakafa, izvi zvaizovabesera maningi. (VaGalàsia 3:13, 14) Ivona vaizokwanisa kumuvona inga muponesi wavo haiwa inga mushaishi.

Azvinenyi kuti ngenyi Jesu wakananga magama aya, iyena waizviziva kuti kufa kwake pa mutanda wo kutambujikira, wainga eciita kuda ka Jehovha. Pakupera kunanga magama anowanika pa Nduyo iyi, Jesu wakati: “Bzese bzapera.” (Johani 19:30; Luka 22:37) Ciro cakaita kuti Jehovha atame kubesera Jesu pa mukuvo mushoma, ngo cokuti iyena waida kuti Jesu akwanirise zvese zvaakaviya kuzoita pasi pano. Izvi zvakaitazve kuti Jesu akwanirise zvese zvakatahwa “mu buku ra Mosi no ro Vaporofeti no ro Ndumbo.”—Luka 24:44.