1-2. Zvinokwanisika kudini kutevera soka ja Jesu? Ezanisiranyi.

RANGARIRANYI kuti imwimwi no vadoni venyu muri kufamba mu ndau ino musanga wakawanda. Mundhu umwe wakangwara ngaari kumbeji kwenyu. Paanofamba, soka yake inosara icivoneka mu musanga wiya. Paanoita mumango wakatikuti, amucakwanisi kuvona soka yake iya! Asi imwimwi amuthyi. Kusiyapo izvo, imwimwi no vadoni vomuri kufamba navo, munonasa kutevera soka iya mbhera pomunokwanisa!

² Inga Makristu o cokwadi, itusu tiri kufamba mu musanga unothyisa, kunangira nyika ino yakashatari. Zvinodakajisa ngo zvokuti Jehovha wakatipa mutungamiriri wakakwana, Mwana wake, Jesu Kristu, wotinganasa kutevera soka jake. (1 Pedru 2:21) Mukuzwirana no bhuku rimweni rinodurujira ngo zvo Bhaibheri, Pedhru wainga eciezanisa Jesu no mundhu anotungamira kufamba. Mukuezana no mundhu anotungamira wosiya soka, Jesu wakatisiira soka jake jotingatevera wari uno. Ngatidavire muvhunjo mutatu ngo pamusoro po kuteveja soka ja Jesu, jokuti: Zvinoda kunangenyi kutevera soka ja Jesu? Ngenyi tinodikana kujitevera? Tingajiteveresa kudini?

3. Zvinoda kunangenyi kutevera soka jo mundhu?

³ Zvinoda kunangenyi kutevera soka jo mundhu? Mu Bhaibheri, magama okuti “kufamba” pomwe no “soka,” nguva jimweni anoshandiswa pa kuda kureva maponero anoita mundhu. (Genesi 6:9; Mazwi Akangwara 4:26) Muezaniso unosiiwa ngo mundhu, ungaezaniswa no soka jinosiiwa ngo mundhu paanofamba. Ngo kudaro, kutevera soka jo mundhu, zvinoreva kutevejera muezaniso wake.

4. Zvinoda kunangenyi kutevera soka ja Jesu?

⁴ Waro zvinoda kunangenyi kutevera soka ja Jesu? Ngo kugurisira tingananga kuti, ikutevejera muezaniso wake. Pa vhesi  yakacijikira musoro uu, mupostori Pedhru wainanga ngo pamusoro po muezaniso wakanaka wakasiiwa ndi Jesu wo kucungirira paaitambujika. Asi kunazve manera amweni atingatevejera Jesu. (1 Pedru 2:18-25) Kunasa kunanga, upenyu hwese hwa Jesu, zvese zvaainanga no zvaaiita, imuezaniso wakanaka wotinodikana kutevejera.

5. Tingatevejeresa kudini muezaniso wakakwana wa Jesu? Durujiranyi.

⁵ Zvecivoneka kuti Jesu wainga mundhu wakakwana, tingakwanisadi kutevejera muezaniso wake? Hina, tingakwanisa. Ceukijanyi kuti Pedhru wakatingwaja kuti tinase ‘kutevera’ soka ja Jesu, kuciripi ngo njira yakakwana. Kudari tikanasa kutevera soka ja Jesu teciita zvese zvotinokwanisa inga vandhu vacikazivi kukwana, tinozokwanisa kuzwira masoko o mupostori Johani okuti, endereranyi mberi ‘mecifambavo ngo mafambiro aakaita yena.’—1 Johani 2:6.

6-7. Ngenyi tingananga kuti kutevera soka ja Jesu, kunozovangisa maningi ushamwari hwedu na Jehovha?

⁶ Kutevera soka ja Jesu kunotiita kuti tive shamwari ja Jehovha. Ngenyi tingananga kudaro? Cokutanga, Jesu wakatisiira muezaniso wakanaka maningi wo kupona mu njira inodakajisa Mwari. (Johani 8:29) Ngo kutevera soka ja Jesu, tinozodakajisavo Jehovha. Tinozothembavo kuti, Baba wedu vo mugore vanozokhwedera kuna wiya anovangisira kuti aite shamwari yavo.—Jakobo 4:8.

⁷ Cocipiri, Jesu wakatevejera Babake ngo njira yakakwana. Ngo zvinoita kuti Jesu anange kudari: “Ndiyani anondivona, anovonavo Baba.” (Johani 14:9) Itusu tinokwanisa kutevejera mugariro jakanaka ja Jesu no matajiro aaiita vamweni. Inga muezaniso, iyena wakazwira pena mundhu wainga no mapere, wakazwira pena mwanakaji waihwaja maningi  no kuitira unyasha vandhu vaifihwa ngo ukama hwavo. Patinotevejera Jesu, tinongavo tecitevejera Jehovha. (Marco 1:40, 41; 5:25-34; Johani 11:33-35) Patinonasa kutevejera mugariro ja Jehovha, ushamwari hwedu naye unoguma pa kuvanga maningi.

8. Durujiranyi kuti ngenyi kutevera soka ja Jesu kunozotibesera kuti ‘tinyise’ nyika.

⁸ Kutevera soka ja Jesu kunotibesera kuti titame kuphingaijwa ngo nyika ino yakashata. Pa usiku hwake hwo kupejisira pasi pano, Jesu wakakwanisa kunanga kudari: “Inini ndakanyisa nyika.” (Johani 16:33) Iyena wakananga kuti wakaramba kutendera kuti akwevejehwe ngo murangariro, zvido no zviito zvo nyika ino. Jesu aazivi kukanganwa zvakamuitisa kuti atumihwe pasi pano, kuti ainikire Jehovha. Tingativo kudini ngo pamusoro pedu? Mu nyika muno, munowanika zviro zvakawanda maningi zvingatiphingaija pa kushandira kwedu Jehovha. Asi kudari tikagara takasotesesa zvinoda Jehovha inga zvakaita Jesu, ‘tinozonyisavo’ nyika.—1 Johani 5:5.

9. Ngozvapi zvatinodikana kuita kuti tigare mu gwanja ro kuupenyu ucikaperi?

⁹ Kutevera soka ja Jesu kunoita kuti tiwane upenyu ucikaperi. Mujaha mukhupuki paakavhunjisa kuti ngozvapi zvaaidikana kuita kuti awane upenyu ucikaperi, Jesu wakati: “Viai konditevera.” (Mateu 19:16-21) Jesu ecivhunja Vajudha vamweni vacaitenda kuti iyena ndi Kristu, wakati: “Mabvuta angu . . . anonditevera. Inini ndinomapa uhomi hucingaperi.” (Johani 10:24-29) Jesu wakavhunja Nikodhemo umwe wo mundhu waiumba Sinedhriyo i wakazodakarira zvaaijijiswa ndiyena kuti, vaya “vanomutenda” vanozowana “uhomi hucingaperi.” (Johani 3:16) Itusu tinotenda Jesu ngo kuita zvaakajijisa, ngo magama ake no muezaniso wake. Kudari tikaita kudaro, tinogara mu gwanja ro kuupenyu ucikaperi.—Mateu 7:14.

10. Ngozvapi zvinobatanijwa pa kunasa ‘kuziva’ Jesu? (Johani 17:3)

¹⁰ Ticito tanasa kutevera Jesu, tinodikana kumuziva. (Verenganyi Johani 17:3.) ‘Kuziva’ Jesu izviro zvinoitwa mukuvo wese. Tinodikana kunasa kumuziva, ngo kuziva mugariro jake, murangariro no ndhungamiriro jake. Azvinenyi kuti taano makore mangana tiri mu cokwadi, tinodikana kuenderera mberi tecivangisira kuti ‘tizive’ Jehovha no Mwana wake.

11. Ngozvapi zvinowanika mu Mavhangeri marongomuna?

¹¹ Kuti atibesere kuziva Mwana wake, ngo rudo hwese, Jehovha wakadiravo Mavhangeri marongomuna mu Soko rake. Mavhangeri aya anobhuya ngo pamusoro po upenyu hwa Jesu no mushando wake. Iwona anotivhunja zvakabhuiwa ndi Jesu, otivonesa zvaakaita  no mazwiro ake. Mabhuku marongomuna aya anotibesera kunasa ‘kurangarira’ muezaniso wa Jesu. (Vaheberi 12:3) Ndizvonadi kuti mabhuku aya ano mudanyu jakasiiwa ndi Jesu. Ngo kujija ushoni Mavhangeri aya, tinonasa kuziva Jesu. Inga muviyo, tinozokwanisa kutevera ushoni soka jake.

12. Tingaitisa kudini kuti tinase kubesereka ngo kujija Mavhangeri?

¹² Kuti tinase kubesereka ngo Mavhangeri, atidikani kumaverenga basi. Tinodikana kupeja mukuvo tecinasa kumajija no kunasa kumarangarijisisa. (Ezanisanyi na Joxwa 1:8.) Ngativone mazano maviri anotibesera kurangarijisisa ngo Mavhangeri no kushandisa zvotaverengemo.

13. Mungaitisa kudini kuti muite inga muri kutozvivona zviri kunangwaro mu Vhangeri?

¹³ Rokutanga, itanyi kuti zviri kunangwaro mu vhangeriro, zviite inga muri kutozvivona. Shandisanyi kurangarijisisa kwenyu kuti muvone no kuzwa zvaingaro zveciitika. Kuti mukwanise kuita zvondhozvo, psakisisanyi mu mabhuku akabudiswa ngo sangano ra Jehovha. Pa zvamuriwaro kujija, vonanyi zviitiko zvakaitika pakutanga no zvakazotevera. Psakanyi masoko anodurujira ngo pamusoro po vandhu no ndau iri kunangwemowaro. Ezanisanyi zvomuri kujijaro no zvinonangwa mu bhuku ro Vhangeri rimweni. Nguva jimweni, mutari wo Vhangeri umwe wakatara masoko anosisira acikazivi kutahwa ngo umweni.

14-15. Ngozvapi zvatinodikana kuita kuti tishandise zvotinojija mu Vhangeri rimwe nga rimwe mu upenyu hwedu?

¹⁴ Rocipiri, shandisanyi mu upenyu hwenyu zvomunojija mu vhangeriro. (Johani 13:17) Pamunopera kujija ushoni zvinonangwa mu Vhangeri rimwe nga rimwe, jivhunjisenyi kudari: ‘Pano ciricese apa condingashandisa mu upenyu hwangu? Ndingacishandisa kudini kuti ndibesere mundhu umweni?’ Ejanyi kurangarira ngo mundhu ari wese, perapo pa nguva kwayo, momuvhunja  ngo manera aushoni, zvomakajijaro. Asi mozviita ngo rudo.

¹⁵ Ngativone muezaniso umwe wo mashandisihwe otingaita mazano maviri aya. Tinozovona ngo pamusoro po noni yainga murombo yakavoniwaya ndi Jesu mu themberi.

16. Sananguranyi zvomunorangarira kuti ngo zvaiitika pa Marco 12:41.

¹⁶ Itanyi inga kuti muri kutozvivona zviri kunangwaro. (Verenganyi Marco 12:41.) Rangariranyi zvaiitikaro. Yainga njiku 11 yo mweji wa Nisani wo gore ra 33 Kristu Aviya. Jesu anozofa mukati mo njiku nganani. Iyena wakapeja mukuvo muzinji ecijijisa mu themberi. Vatungamiriri vo zviara vaimuzonda maningi. Pakutanga vamweni vavo vakamuvhunjisa kuti unoita izvi ngo simba raani. Vamweni vaipsaka kumuitira muvhunjo jovaivona kuti aakwanisi kujidavira. (Marco 11:27-33; 12:13-34) Asi Jesu anoenda ku ndau imweni yo themberi. Kwaanoendari, kunoita inga ku ndau inodanijwa kuti Berere ro Vanakaji. Kondhoyo, iyena anokwanisa kuvona mabhokiso o mupiro akandandaniswa pa mapiravira o berere iri. Iyena anogara pasi, wotanga kusota vandhu pavanonga veciita mupiro mu mabhokiso aya. Iyena anovona vakhupuki vakawanda vacidira mangwenjere mazinji. Kangaije iyena ari phedo kamare no ndau iyi zvokuti anokwanisa kuzwa baruru ro mangwenjere paanowira mu mabhokiso aya.

17. Zvicinyi zvakaitwa ngo noni yomurombo inonangwa pana Marco 12:42?

¹⁷ Verenganyi Marco 12:42. Pasure po cimukuvo, Jesu anovona mwanakaji umweni. Iyena i “noni yomurombo.” (Luka 21:2) Upenyu hwayo hwainesa maningi; kangaije aicainga no mare inokwana kuti itenge zvainoda mu upenyu. Asi, iyona inoenda pa bhokiso rimwe ro mupiro, yodira ngo kungwarira zvimangwenjere zviviri zvo mutengo mushoma, kangaije azvicaiita musindo pozvaiwira mu bhokiso. Jesu anoziva zvoyadiremo, iyona yadira zvimangwenjere zviviri zvo marepitoni, zvimangwenjere zvo mutengo mushoma kamare zvaishandiswa pa mukuvo wondhowo. Kangaije mare iyi aicaitokwana kutenga ndaka imwe, zvishiri zvidoko maningi zvaitengeswa kuti zvihiwe pa mukuvowo.

18. Mukuzwirana na Marco 12:43, 44, Jesu wakanangenyi ngo pamusoro po mupiro wo noni?

¹⁸ Verenganyi Marco 12:43, 44. Jesu wakashamiswa maningi ngo noni iyi. Ngo kudaro, iyena wakadanija vajiji vake, wovatatija noni iyi, wonanga kudari: “Mwanakaji uu wakafihwa, wadira mu civigiro, mare zinji kupinda vese.” Perapo anodurujira kuti: “Vese [maningi-ningi vakhupuki] vakadira bzaivawandira, kaveta yena, mu utami hwake, wadira bzese bzaainga nabzo, bzaairarama ndibzona.” Noni yo kugondeka iyi payakapa mare yese yo yainga nayo, yakadira upenyu hwayo mu nyara ja Jehovha kuti anozoikorondha.—Nduyo 26:3.

19. Tajijenyi ngo masoko a Jesu ngo pamusoro po noni iri murombo?

¹⁹ Shandisanyi zvinonangwaro mu upenyu hwenyu. Jivhunjisenyi kudari: ‘Ndajijenyi ngo masoko a Jesu ngo pamusoro po noni iri murombo?’ Rangariranyi ngo pamusoro po noni iyi. Pacina kukana-kana, iyona yaida kupekeja Jehovha zvizinji. Asi, yakaita zvoyaikwanisa; yakapa Jehovha mbhera panoperera simba rayo. Jesu waiziva kuti mupiro wayo wainga no mutengo mukuru maningi pa meso pa Babake. Apa wari, tinowana cijijo cinosisira maningi cokuti: Jehovha anodakara patinoita zvese zvatinokwanisa mu basa ratinomuitira ngo mwoyo wese no simba rese. (Mateu 22:37; VaKolosi 3:23) Jehovha anodakara  maningi kamare paanotivona teciita zvese zvotinokwanisa! Ndhungamiriro iyi inoshanda pa zvese zvatinoita pa kushandira kwedu Jehovha, kubatanijavo kuenda kocumaira no kumusongano.

20. Mungashandisa kudini cijijo cinowanika pa masoko ari mu Bhaibheri ngo pamusoro po noni? Ipanyi muezaniso.

²⁰ Mungashandisa kudini cijijo ici? Ejanyi kurangarira ngo kuvangisira kuri kuitwa ngo vamweni. Vaceukijenyi kuti Jehovha anodakara maningi ngo kuvangisira kwavo kuti vaende ku musongano no kucumaera. Inga muezaniso, munoziva hambzaji yaamusharuka kangaije inojizwa kuti ino ndava kana kuti aicashandi ngokuti aicina uhomi hwaushoni kana simba kuti iite zvakawanda mu basa ro kucumaira here? Kana kuti munorangarira ngo pamusoro po hama ino ndhendha icikarapiki, iri kuinesa maningi zvoiita kuti irembe ngokuti aicakwanisi kuenda ku musongano jese here? Beseranyi vandhu vakadari ngo kuvabhuira masoko ‘anovaka.’ (VaEfeso 4:29) Vavhunjenyi ngo mwoyo wese zvatinojija ngo zvinonangwa mu Bhaibheri ngo pamusoro po noni iri murombo. Masoko enyu anovangisa anovathembesa kuti Jehovha anodakara maningi patinovangisira mu basa rake. (Mazwi Akangwara 15:23; 1 VaTesalònika 5:11) Pamunosimba vamweni ngokuti vari kuitira Jehovha mbhera panoperera simba ravo, pikija zvavari kuitaro zvinovoneka inga zvidoko maningi, imwimwi munonga mecinasa kutevera soka ja Jesu.

21. Masunga kuitenyi.

²¹ Tinobonga maningi ngokuti Mavhangeri ese, anotivhunja masoko mazinji ngo pamusoro po upenyu hwa Jesu. Oita kuti tikwanise kumutevejera no kunasa kutevera soka jake! Ngo kudaro, itanyi urongwa hwo jijo yo mundhu ega kana hwo Kumamata ko Mbhuri, mecibatikana ngo zvinowanika mu Mavhangeri ese. Ticakanganwa kuti tinase kubesereka ngo jijo yakadaro, tinodikana kuita inga kuti tiri kuvona zviri kuitikaro no kuzvishandisa mu upenyu hwedu. Itusu tinodikana kutevejera zvakaitwa ndi Jesu no kupurukira zvaakananga. Pa musoro unotevera, tinozovona kuti ngozvapi zvatingajija ngo magama o kupejisira a Jesu, acito wafa.