MUSORO WO KUJIJA WO 16
“Hama Yako Inozomuka ku Vakafa”!
“Jesu wakapingura [Marita] kuti: ‘Hama yako inozomuka ku vakafa.’”—JOHANI 11:23.
NDUMBO 151 Anozodanija
ZVATICAJIJA a
1. Mujaha umweni waivona kudini vetero yo rumuko?
MUJAHA umweni anodanwa Mateu, wainga no ndhendha inonesa maningi yaida kuti iyena agare eciithwa operasau. Paainga no makore manomwe, iyena no mbhuri yake vainga vecivona urongwa wo mweji ngo mweji wo JW Bhrodhikastingi®. Kumbhiri ko urongwa uwu, ivona vakavona vhidhiyo yo mumbo, yaivonesa vandhu veciashira vadiwa vavo. b Pakupera kuvona urongwa uhu, Mateu wakakhwederera vabari vake, wovabata nyara no kuvavhunja kudari: “Vonanyi papaa na mamaa, pikija ndikafa ndinozomuswa. Zvese zvinozofamba ushoni, mazvizwa!” Munorangarira manera vabari ava vakadakara ngo kuziva kuti mwana wavo ano rutendo hwakavanga ngo pamusoro po vetero yo rumuko?
2-3. Ngenyi zvinosisira maningi kurangarijisisa ngo pamusoro po vetero yo rumuko?
2 Zvaushoni maningi kurangarijijisa ngo pamusoro po cigondiso co Bhaibheri co rumuko, nguva no nguva. (Johani 5:28, 29) Ngenyi? Ngokuti atizvizivi kuti ndi rini tinozohwisana no ndhendha inonesa ciriporipoco toguma pa kuruza mundhu watinoda. (Mucumaeri 9:11; Jakobo 4:13, 14) Vetero yo rumuko inotibesera kuti tikwanise kucungirira zvineso zvatinosongana nazvo. (1 Vatesaronika 4:13) Bhaibheri rinotigondesa kuti Baba wedu vokudenga vanotiziva no kutida maningi. (Ruka 12:7) Nasanyi kurangarira manera Jehovha anodikana kunasa kutiziva ushoni kuti akwanise kutimusa no undhu pomwe no murangariro jondhojo. Jehovha anotida maningi, iyena wakaita kuti zvikwanisike kurarama no kucingaperi. Pikija tikafa, anozotimusa.
3 Mu cijijo cino, tinozotanga ngo kubhuisana kuti tingaitisa kudini tithembe cigondiso co rumuko. Perapo tinozovona zviitiko zvimweni zvo mu Bhaibheri zvinovangisa rutendo hwedu, zvinobatanija masoko o vhesi akacijikira musoro uwu. Anoti: “Hama yako inozomuka ku vakafa.” (Johani 11:23) Pakupejisira tinozovonazve kuti vetero yo rumuko inosisira maningi kwatiri.
NGENYI TINODIKANA KUTHEMBA CIGONDISO CO RUMUKO?
4. Zvicinyi zvingamubesera kuti muthembe zviro zvamagondeswa? Ezanisanyi.
4 Kuti tikwanise kuthemba cigondiso ici, tinodikana kuziva kuti wiya anocigondesaro ano cido no simba kuti acikwanirise. Ezanisanyi basi: Ngatiti nyumba yenyu yaphwanyika maningi ngo dutu. Shamwari yenyu yoviya kwamuri yomugondesa kudari, ‘Inini ndinozokubesera pa kuvakisa nyumba yako.’ Iyena wakagondeka, imwimwi muno cokwadi co kuti anoda kumubesera. Kudari iyena ndi muvaki waushoni no ano zvese zvinodikana kuitira kuvaka, munozova no cokwadi co kuti anozomubeseradi kamare. Ngo kudaro, munothemba kamare zvaakamugondesaro. Ngozvapi zvinoita kuti imwimwi muthembe cigondiso ca Jehovha co rumuko? Kureva kuti iyena ano cido no simba ro kuita izvi?
5-6. Ngenyi tingava no cokwadi cokuti Jehovha ano cido co kumusa vandhu vakafa?
5 Kunanga kuti Jehovha ano cido co kumusa vakafa? Pacina kukana-kana, hina. Iyena wakafemera vanarume vakawanda kuti vatare mu Bhaibheri ngo pamusoro po cigondiso cake co rumuko. (Isaia 26:19; Hoseya 13:14; Apokaripsi 20:11-13) Jehovha paanogondesa zviri zvese, nguva jese anozvikwanirisa. (Joxwa 23:14) Iyena ano cidaka-daka co kumusa vese vakafa. Ngenyi tingananga zvondhozvo?
6 Amborangariranyi basi zvakanangwa ndi Jobe. Iyena wainga no cokwadi co kuti pikija akafa, Jehovha waizomumusa. (Jobe 14:14, 15) Jehovha ano mazwiro ondhoo ku vanamati vake vakafaya. Iyena anoda kamare kumusa vandhu no upenyu hwaushoni no vakadakara. Tingativo kudini kuno zviuru no zviuru zvo vandhu vakafa vacizivi kuwana mukana wo kujija ngo pamusoro pa Jehovha? Mwari wedu ano rudo anodavo kuvamusa. (Mabasa o Vapostori 24:15) Iyena anoda kuvapa mukana kuti vakwanise kuva shamwari jake no kukwanisa kupona no kucingaperi pa nyika pano. (Johani 3:16) Zvakajeka kamare kuti Jehovha ano cido cokuzomusa vandhu vakafa.
7-8. Ngenyi tingava no cokwadi cokuti Jehovha ano simba ro kumusa vandhu vakafa?
7 Kureva kuti Jehovha ano simba ro kumusa vandhu vakafa? Hina. Iyena ngo wo “Masimba Ese.” (Apokaripsi 1:8) Ngo kudaro, zvecivoneka kuti iyena ano simba, anokwanisavo kunyisa muvengi uri wese, kubatanijavo no rufu. (1 Vakorinte 15:26) Tinovangiswa maningi ngo kuziva zvondhozvo. Ngatende tivone basi zvakaitika no hambzaji imweni inodanwa Emma Arnold. Ivona no mbhuri yavo, vakasongana no zvineso zvakakura maningi pa Hondo yo Cipiri yo Nyika Yese. Hambzaji Emma vakatondhoja mwana wavo ngokuti vainga varuza hama javo jovaida mu ndau yaidihwa vasungwi ku Nazista. Ivona vakananga kudari: “Kudari vandhu vakafa avazoraramizve, izvi zvinoreva kuti muvengi wedu rufu wakavanga maningi kupinda Mwari.” Izvi asipi zvokadi, Akuna ano simba kupinda Jehovha. Mwari wo Masimba Ese uwo wakasika upenyu hwo vandhu anokwanisa kumusijirazve upenyu hwo vandhu vakafa.
8 Thangwe rimweni rinotiita kuti tithembe kamare kuti Jehovha anozomusa vandhu vakafa, ngo ro kuti iyena aakanganwi. Iyena anoziva zina ro ndhondho imwe nga imwe. (Isaia 40:26) Cimwenizve, anoceukija vaya vakafa. (Jobe 14:13; Ruka 20:37, 38) Zvakareruka maningi kwaari kuceukija zvaiithwa ngo mundhu waanodaro kumusa, kubatanijavo mavonekero ake, no undhu hwake.
9. Ngenyi tingathemba cigondiso ca Jehovha co rumuko cinozoithwa kumbejiyo?
9 Ndizvona kuti tingathemba cigondiso ca Jehovha co kuzomusa vandhu vakafa ngokuti tinoziva kuti iyena ano cido no simba ro kuzviita. Ngativone mathangwe amweni anotiita kuti tithembe cigondiso ca Mwari co rumuko: Jehovha wakambomusazve vandhu vakafa. Mu nguva jokare, iyena wakapa simba vanarume vakagondeka, kubatanijavo Jesu, kuti vamuse vakafa. Ngatende tivone rumuko wakaithwa ndi Jesu, unowanika mu cipauko 11 co bhuku ra Johani.
SHAMWARI YO PHEDO YA JESU YAKAFA
10. Ngozvapi zvakaitika Jesu paainga ecicumaera ngo divi rimweni ro Jordhani ro Bhetaniya? Zvicinyi zvaakaita? (Johani 11:1-3)
10 Verenganyi Johani 11:1-3. Amborangariranyi zvakaitika ku Bhetaniya, mukutanga ko gore ra 32 Kristu Aviya. Jesu ano shamwari jake jaanoda maningi mu mutundhu uwu, Razaro no hambzaji jake mbiri, Mariya na Marita. (Ruka 10:38-42) Asi Razaro wakahwaja, hambzaji jake jotanga kuneseka. Ivona vakatumira masoko kuna Jesu, iyena wainga ngo divi rimweni ro Jordhani, kuti agumeyo waidikana kufamba njiku mbiri. (Johani 10:40) Zvinosuruvarisa ngo zvokuti vatumwi vaya povakaguma kuna Jesu, Razaro wainga afa. Pikija Jesu wainga azvizwa kuti shamwari yake yafa, iyena wakaenderera mberi ari kwaaengari ko njiku mbiri. Perapo wakazoita hwendo kwenda Bhetaniya. Ngo kudaro, Jesu wakazogumeyo Razaro wainga waano njiku murongomuna naafa. Jesu waida kuita zviro zvaizobesera shamwari jake no kukuja Jehovha.—Johani 11:4, 6, 11, 17.
11. Ngozvapi zvatinojija ngo pamusoro po ushamwari kuvha pa ciitiko ici?
11 Tinojija zviro zvimweni ngo pamusoro po ushamwari kuvha ku ciitiko ici. Vonanyi: Mariya na Marita povakatumira masoko kuna Jesu, ivona avazivi kumumbira kuti iyena aviye ku Bhetaniya. Ivona vakamuvhunja basi kuti shamwari yamunodaya iri kuhwaja. (Johani 11:3) Razaro paakafa, Jesu waizokwanisa kumumusa ngo ndhambo. Mukusiyana, Jesu wakakheta kwenda Bhetaniya kuti avonane no shamwari jake, Mariya na Marita. Imwimwi muno shamwari ingamubesera mucizivi kuikumbira? Imwimwi munoziva kuti mungamuthemba pa mukuvo wo “bonezi.” (Mazwi Akangwara 17:17) Inga ndi Jesu, tingavavo shamwari yaushoni ku vamweni. Asi wari ngatimbohwirire sure kuti tivone zvakazoitika.
12. Ngocapi cigondiso cakapuwa Marita ndi Jesu, ngenyi iyena wakathemba cigondiso condhoco? (Johani 11:23-26)
12 Verenganyi Johani 11:23-26. Marita anoziva kuti Jesu ari phedo no Bhetaniya. Iyena wakagogoma kuti asongane naye, womuvhunja kudari: “Mambo, kudari nomainga pano hama yangu aicaizofepi.” (Johani 11:21) Ngo zvokadi kuti iyena waizorapa Razaro. Asi Jesu waida kuita zviro zvinopinda izvi. Iyena wakamugondesa kudari: “Hama yako inozomuka.” Anopekeja Marita thangwe rimweni kuti athembe ngo pamusoro po cigondiso cake. Iyena anomuvhunja kudari: “Ndini rumuko no upenyu.” Hina, Mwari wakapa Jesu simba ro kumusa vandhu vakafa. Izvi zvicito zvaitika, iyena wakamusa cimusikane cainga cavha kufa no kumusazve cimujaha cimweni caingavo cafa, kangaije pa njiku yondhoyo. (Ruka 7:11-15; 8:49-55) Waro kunanga kuti Jesu waizokwanisa kumusa mundhu wafa ko njiku murongomuna zvokuti muviri wake wainga wotanga kunuha?
“RAZARO, BUDAI KUNJA!”
Jesu wakazwira pena shamwari jake jaingari jafihwa (Vonanyi ndima 13-14)
13. Mukuzwirana na Johani 11:32-35, Jesu wakaitenyi paakavona Mariya no vamweni vecicema? (Vonanyi foto.)
13 Verenganyi Johani 11:32-35. Rangariranyi basi zvakazoitika. Mariya, hambzaji imweni ya Razaro, yakaviya kosongana na Jesu. Iyona yakanangavo magama akafanana no akanangwa ndi Marita: “Mambo, kudari nomainga pano hama yangu aicaizofepi.” Iyena no vamweni vainga vakasuruvara. Jesu paaivona vandhu vecicema, wakasuruvara maningi. Zvecivoneka kuti iyena waizwira pena shamwari jake, wakatangavo kucema. Iyena anoziva kuhwajihwa kunoita mundhu paanonga afihwa ngo ukama hwake. Anoda kupeja zvese zvinoitisa kuti vandhu vaceme.
14. Tinojijenyi ngo pamusoro pa Jehovha ngo zvakaithwa ndi Jesu paakavona kucema kwakaita Mariya?
14 Zvakaithwari ndi Jesu ngo kucema kwakaita Mariya zvinotijijisa kuti Jehovha ndi Mwari ano unyasha. Ngenyi tingananga zvondhozvo? Inga zvatakavona mu cijijo cakapera, Jesu anonasa kutevejera mazwiro no murangariro ja Baba wake. (Johani 12:45) Ngo kudaro, patinovona kuti Jesu wakazwira unyasha shamwari jake, wocemavo, tingaguma pa mbhejiso yokuti Jehovha anohwajihwa maningi paanotivona tecicema ngo matambujiko atinosongana nao. (Nduyo 56:9) Izvi azvimuiti kuti mude kukhwedera phedo na Mwari ano unyasha here?
Jesu wakakhombija kuti ano simba ro kumusa vakafa (Vonanyi ndima 15-16)
15. Mukuzwirana na Johani 11:41-44, sananguranyi zviro zvakaitika pa guva ra Razaro. (Vonanyi foto.)
15 Verenganyi Johani 11:41-44. Jesu anoguma pa guva ra Razaro, wokumbira kuti buwe raifunga guvero rivhiswe. Marita anomurambisa ngo kunanga kuti muviri wake wonuha wari. Jesu wakati: “Andizivi kukuvhunja kuti kudari ukatenda, unozovona ukuru hwa Mwari?” (Johani 11:39, 40) Jesu anosota kudenga no kuita mukumbiro pondhopo. Iyena anoda kupa rukujo hwese kuna Jehovha ngo zvaidari kuitika. Jesu wakamima kudari: “Razaro, budai kunja!” Razaro wakabuda ecifamba. Jesu wakaita zviro zvairangarihwa ngo vandhu kuti azvicaizoitikepi.—Johani 11:17.
16. Zvinonangwa pa cipauko 11 co bhuku ra Johani zvinovangisa kudini rutendo hwedu ku vetero yo rumuko?
16 Zvinowanika pa cipauko 11 co bhuku ra Johani zvinovangisa rutendo hwedu ku vetero yo rumuko. Kuitisa kudini? Ceukijanyi cigondiso ca Jesu kuna Marita: “Hama yako inozomuka.” (Johani 11:23) Inga ndi Baba wake, Jesu ano simba no cido co kukwanirisa cigondiso ici. Musoji jake jinovonesa kuti iyena ano cido kamare co kupeja rufu no kusuruvara no zvinoitisaro kuti vandhu vahwajihwe. Pa mukuvo wakabuda Razaro mu guva, Jesu wakavonesazve kuti iyena ano simba ro kumusa vakafa. Cimwenizve, rangariranyi zvakaceukijwa Marita ndi Jesu, paakati: “Andizivi kukuvhunja kuti kudari ukatenda, unozovona ukuru hwa Mwari?” (Johani 11:40) Tino mathangwe anotiita kuti titende kuti cigondiso ca Mwari co rumuko ngo cokadi. Ngozvapi zvatingaita kuti vetero iyi ive yokadi kwatiri?
TINGAITISA KUDINI KUTI VETERO YO RUMUKO IVE YOKADI KWATIRI?
17. Ngozvapi zvatinodikana kurangarira patinonga teciverenga zviitiko zvo rumuko zviri mu Bhaibheri?
17 Verenganyi no kurangarijisisa ngo rumuko hwakaitika kare. Bhaibheri rinobhuya ngo rumuko hunokwana kuita husere hwakaithwa kareko pasi pano. c Jijanyi ngo pamusoro po zviitiko izvi ngo kungwarira kwese. Pamunonga meciita izvi, ceukijanyi kuti vandhu ava vainga vokadi. Ivona vainga vanarume, vanakaji no vana. Ejanyi kuvona zviri zvese zvamungajija. Rangariranyi kuti muezaniso umwe nga umwe unokhombijisa kudini cido no simba rina Mwari pa kumusa vakafa. Kusiyapo zvondhozvo, rangarijisisanyi ngo rumuko unosisira maningi, rumuko hwa Jesu. Ceukijanyi kuti rumuko hwa Jesu hwakavoneka ngo vandhu vakawanda maningi. Cimwenizve, iwona unovangisa rutendo hwedu.—1 Vakorinte 15:3-6, 20-22.
18. Mungaitisa kudini kuti munase kushandisa mumbo jedu jinobhuya ngo vetero yo rumuko? (Vonanyi masoko o pasi.)
18 Nasanyi kushandisa “mumbo jo umwari” jinobhuya ngo vetero yo rumuko. d (Vaefeso 5:19) Mumbo iji jinoita kuti rumuko uve wokadi kwatiri no kuvangisa rutendo hwedu pa vetero iyi inosisira. Jipurukirenyi no kunasa kujiimba kuti mujizive ushoni, no kubhuisana ngo zvajinoreva pa kunamata kwenyu ko mbhuri. Diranyi mu musoro masoko ari kunangwaro mu vhidhiyomo no kurangarijisisa ngo pamusoro pao kuti zvikwanise kubaya mwoyo wenyu. Perapo, kudari mukasongana no mugariro unonesa kana kutofihwa ngo mundhu wamunoda, mujimu wa Jehovha unozomubesera kuti muceukije mumbo iji kuti jimuembejere no kumupa simba.
19. Ngozvapi zvamungarangarira ngo pamusoro po rumuko? (Vonanyi bhokiso rinoti: “ Ngojapi Muvhunjo Jamunozovaita?”)
19 Shandisanyi kurangarira kwenyu. Jehovha wakatipa cidakajiso co kukwanisa kurangarijira tiri mu nyika imbza. Hambzaji imweni yakananga kudari: “Ndinopeja mukuvo wakareba ndecirangarira ndiri mu nyika imbza, zvoita kuti ndikwanise kuzwa kunuhira ko mafirori ari kutumbuka mu Paradhiso.” Rangariranyi mecizivana no vanarume no vanakaji vo rutendo vanonangwa mu Bhaibheri. Ndiyani wamaidakarira kuzivana naye? Muvhunjo japi jamaidakarira kuzoitira mundhuwo? Rangariranyi mecisongana no vandhu vamunoda vakafaya. Rangariranyizve ngo zvese zvinozoitika ponapo, zvamunoda kuzobhuya, kukumbatirana kwamunozoita no kucema ngo mudakaro.
20. Ngocapi cinodikana kuva civaringo cedu?
20 Tinodakara maningi ngo cigondiso ca Jehovha co kuzomusa vandhu vakafa. Tingava no cokwadi co kuti cigondiso ici cinozokwanirisika, ngokuti Jehovha ano cido no simba ro kuzozviita. Ngatiteme civaringo co kwenderera mberi tecivangisa rutendo hwedu ku vetero yo rumuko. Ngo kuita izvi, tinozokhwedera phedo na Mwari wedu, anogondesari kudari: ‘Vadiwa venyu vakafaya vanozomuka!’
NDUMBO 147 Upenyu Hucikaperi Hwakagondeswa
a Kudari imwimwi mafihwa ngo ari wese, pacina kukana-kana cigondiso co rumuko cinomuvangisa maningi. Maizoitisa kudini kuti muvhunje vamweni zvinomuitisaro kuti muthembe kuti kunozova no rumuko? Mungaitisa kudini kuti vetero yo rumuko ive yokadi kamare kwamuri? Cinangwa co jijo iyi, ngo cokubesera tese kuti tivangise rutendo hwedu ku vetero yo rumuko.
b Vhidhiyo yavakavonari yainga no musoro unoti: Yatoguma yakabudiswa mu bhrodhikastingi ro mweji wa novembro wo 2016.
c Vonanyi bhokiso rinoti: “Rumuko Husere Hwakatahwa mu Bhaibheri?” mu Murindiri wo 1 wa Agosto wo 2015 pheji 4, mu Cishona.
d Vonanyi ndumbo jinotevera jiri mu bhuku redu ro ndumbo, “Ngatiimbire Jehovha no Mudakaro Wese”: “Jivonenyi Mwega Zvese Zviri Zvipsa” (Ndumbo 139), “Rambanyi Makasotesesa Mupfupo!” (Ndumbo 144), no “Anozodanija” (Ndumbo 151). Vonanyizve mumbo jedu jinowanika mu saiti jw.org: “Yatoguma,” “Nyika Imbza Iri Kuzari” no “Viyanyi Muvone.”
