MUSORO WO KUJIJA WO 15
Ngozvapi Zvatinojija ngo Mushamaiso Jakaithwa ndi Jesu?
“Iyena wakafamba mu ndharaundha eciita zvakanaka no kurapa vandhu vese.”—MABASA O VAPOSTORI 10:38.
NDUMBO 13 Kristu, Muezaniso Wedu
ZVATICAJIJA a
1. Sumuranyi zvakaitika Jesu paakaita mushamaiso wake wo kutanga.
AMBORANGARIRANYI zvakaitika mu kupera ko njiku 29 Kristu Aviya, Jesu paakatanga basa. Jesu na mai wake Mariya no vamweni vo vajiji vake, vakakokwa kuenda ku mabuso o mucadho ku Kanani, ndharaundha iri kakusi ko dhorobha rakabarihwa Jesu ku Nazareta. Mariya wainga shamwari yo mbhuri iyi, zvinovonekazve kuti iyena waibesera pakuashira vakokwi vo mbhuri iyi pamukuvo wovaiguma. Mabuso paainga eciizwa pakaitika zviro zvimweni zvaizonyoweja mbhuri iya no varovorani vaicadharo. Zvakaitika ngo zvokuti vhinyu yakapera. b Mutengo wo vandhu vakakokwa wakazopindirija kupinda zvaivetehwa. Mariya ngo kukasika wakaenda kovhunja mwana wake kuti: “Ivona avacina vhinyu.” (Johani 2:1-3) Waro Jesu wakaitenyi? Iyena wakaita ciro cinoshamaisa, wakacinja kumwa kuita “vhinyu inonaka.”—Johani 2:9, 10.
2-3. (a) Jesu wakashandisa kudini simba rake kuti aite mushamaiso? (b) Tingabeserekesa kudini ngo kujija ngo mushamaiso jakaithwa ndi Jesu?
2 Jesu waizoita mushamaiso jakawanda paaizoenderera mberi eciita mushando wake. c Iyena wakashandisa simba rake kuti aite mushamaiso kuitira kubesera mazana no mazana o zviuru zvo vandhu. Inga muezaniso, pamushamaiso jake muviri jaakaita, wakapa zvokuha vanarume vanokwana kuita 5.000, pa mukuvo wakazotevera wakazopazve zvokuha vanarume vanokwana kuita 4.000. Kubatanija vese mutengo wakona unokwana kuita 27.000 zvo vandhu, kubatanijavo no vanakaji no vana vadoko vainga varipo. (Mateu 14:15-21; 15:32-38) Pa zviitiko zvaperari kunangwa, Jesu wakarapavo vandhu vakawanda vaihwaja. (Mateu 14:14; 15:30, 31) Amborangariranyi kushamaisika kwakava no vandhu vakapuwaya zvokuha ndi Jesu no kuraphwa kwavakaithwa!
3 Mushamaiso ja Jesu jino revo yakakura maningi kwatiri nyamasi uno. Mu cijijo cino, tinozobhuya ngo zviro zvimweni zvinovangisa rutendo hwedu kuvha ku zvatinojija ngo mushamaiso jakaizwa ndi Jesu. Perapo, tinozovona kuti tingaitisa kudini kuti titevejere kujidodokesa ka Jesu no unyasha hwake hwaakakhombija paakaita mushamaiso jake.
NGOZVAPI ZVATINOJIJA NGO PAMUSORO PA JEHOVHA NA JESU?
4. Mushamaiso ja Jesu jinotijijisa kuti tivangise rutendo hwedu kuna ani?
4 Mushamaiso ja Jesu jinotijijisa kuti tivangise rutendo hwedu haiwa basi ngo pamusoro pake asi ngo pamusoro pa Baba wakevo. Zvokadi Jehovha ndiyena Cinyuke co mushamaiso jese. Mabasa o Vapostori 10:38, inoti: “Jesu wakavha Nazareta no kuzojwa ndi Mwari ngo mujimu mucena no simba. Iyena wakafamba mu ndharaundha eciita zvakanaka no kurapa vandhu vese vainga vakabatwa ndi Dhiyabhu, ngokuti Mwari wainga na iyena.” Ceukijanyi kuti zvese zvakanangwa ndi Jesu no kuithwa kubatanijavo no mushamaiso jaakaita, zvinovonesa kuti iyena waitevejera mazwiro a Baba wake no murangariro. (Johani 14:9) Vonanyi zviro zvitatu zvatingajija ngo pamusoro po mushamaiso jakaithwa ndi Jesu.
5. Ngozvapi zvakaitisa kuti Jesu aite mushamaiso? (Mateu 20:30-34)
5 Cokutanga, Jesu na Baba wake vanotida maningi. Paainga pasi pano, Jesu wakakhombija kuti iyena waida vandhu ngo kushandisa simba rake pakuita mushamaiso kuti apungure zvineso zvainga no vandhu. Vhaza imweni mapofu maviri akakumbira kuti Jesu amabesere. (Verenganyi Mateu 20:30-34.) Vonanyi kuti Jesu ‘wakava no pena’ perapo ovarapa. Gama rakashandiswari apa ro Cigiriki rokuti ‘wakava no pena’ rinonangira mazwiro o mukatikati anova no mundhu. Njira iyi inovonesari rudo, yakaita kuti Jesu apekeje zvokuha vandhu vainga no njara no kurapa nyamapere. (Mateu 15:32; Marko 1:41) Tingava no cokwadi cokuti Jehovha Mwari wo ‘pena’ no mwana wake Jesu vanotida maningi, vanohwajihwa maningi no kuneseka ngo matambujiko atinosonganari nawo. (Ruka 1:78; 1 Pedhru 5:7) Ivona vanoda kupeja zvineso zvese zviri kutambujari vandhu.
6. Jehovha wakapekeja simba rapi kuna Jesu?
6 Cocipiri, Mwari wakapekeja Jesu simba rokupeja zvineso zvo vandhu vese. Ecishandisa mushamaiso, Jesu anoshandisa simba rake kuti apeje zvineso zvese zvatinosongana nazvo zvokuti aticaizozvikwanisa kuzvipeja. Inga muezaniso, iyena anosimba ro kutisujunura kuvha ku ushaishi watakagara utaka kubatanijavo no zviro zvinobahwa ngo ndava yo ushaishi uhu zvakadari inga izvi, kuhwaja no kufa. (Mateu 9:1-6; Varoma 5:12, 18, 19) Basa rake rokuita mushamaiso rinovonesa kuti iyena angarapa “mushovo wese” wo ndhendha no kumusa vandhu vakafa. (Mateu 4:23; Johani 11:43, 44) Kusiyapo zvondhozvo, iyena ano simba ro kuimisa mbhepo yakavanga no kunyisa mujimu yakavanga. (Marko 4:37-39; Ruka 8:2) Zvinodakajisa maningi kuziva kuti Jehovha wakapekeja simba rakadari kuno mwana wake.
7-8. (a) Mushamaiso ja Jesu jinotiita kuti tithembenyi? (b) Ngowapi mushamaiso wamuri kuvetera no cidakadaka cese mu nyika imbza?
7 Cocitatu, tingava no cokwadi cokuti zvigondiso zvese zvinogondeswa ndi Mwari kuitira kumbejiyo zvinozokwanirisika. Mushamaiso jakaithwa ndi Jesu pasi pano jinotijijisa kuti iyena anozoita zvakawanda maningi inga Mambo wo Umambo hwa Mwari. Vonanyi zvinozoitika Kristu paanozonga ecitonga pasi pano inga Mambo wo Umambo hwa Mwari. Tinozova no uhomi hwa ushoni ngo kuti iyena anozopeja ndhendha jese jinoita kuti itusu titambujike. (Isaia 33:24; 35:5, 6; Apokaripsi 21:3, 4) Atizovi no njara kana kusuruvara ngo ndava yo ngozi jinoitika jega. (Isaia 25:6; Marko 4:41) Tinozodakara maningi ngo kuashira vadiwa vedu vese vari mu “makuva anoceukijwa.” (Johani 5:28, 29) Ngo wapi mushamaiso wa muri kuvetera no cidakadaka cese kuzouvona wecikwanirisika mu nyika imbza iri kuviyari?
8 Pa mushamaiso jake, Jesu wakakhombija kujidodokesa no pena. Zvinosisira maningi kutevejera mugariro iji. Ngativone muezaniso muviri, wokutanga wo mabuso o mucadho wakaithwa ku Kanani.
TINOJIJENYI NGO KUJIDODOKESA KA JESU?
9. Jesu wakaitenyi pamabuso o mucadho? (Johani 2:6-10)
9 Verenganyi Johani 2:6-10. Vhinyu payakapera pa mabuso o mucadho Jesu wakavangirijwa kuti aite ciri cese? Haiwa. Apana ciporofita cainanga kuti Mesiya waizoita vhinyu ngo mushamaiso. Amborangariranyi kuti maizojizwa kudini kudari vhinyu ikapera pa mucadho wenyu kamare? Kangaije Jesu wakaitira maningi pena ku mbhuri iyi maningi-ningi ku vaingari vecida kucadha, iyena aacaidepi kuti ivona vanyowejeke. Inga zvanangwaya pakutanga iyena wakazoita mushamaiso. Wakazocinja kumwa kuita vhinyu yakanakisisa yokwana kuita 390 yo maritro. Kangaije wakaita vhinyu yakawanda kuitira kuzobesera vandhu kana kuzotoitengesa kuitira kubesera vaya vaingaya vakacadha. Varovorani vaingari vavha kucadha vakadakara maningi ngo ndava yazvo!
Tevejeranyi Jesu ngo kutama kujikuja pa zviya zvamunokwanisa kuita (Vonanyi ndima 10-11) e
10. Ngoapi masoko amweni akanangwa mu cipauko 2 co bhuku ra Johani? (Vonanyi foto.)
10 Vonanyi masoko amweni akona mu cipauko 2 co bhuku ra Johani. Makwanisa kuvona kuti Jesu aazivi kuzaja majuvi maviri akaithwa ngo mapuwe ngo kumwa? Kunja ko kuzviita ega basi wakavhunjavo vandhu vamweni kuti vaviye kozaja majuvi aya. (Vonanyi vhesi 6, 7) Jesu paakapera kucinja kumwa kuita vhinyu aazivi kuitora ega koopekeja mutungamiriri wo mabuso. Kunja ko kuita zvondhozvo, iyena wakavhunja vamweni kuti vazviite. (Vonanyi vhesi 8) Jesu aazivivo kutora kopo imwe yo vhinyu omwa perapo ovhunja vakokwi kuti, ‘vonanyi raviranyi vhinyu yondaitari!’
11. Tinojijenyi ngo mushamaiso wa Jesu?
11 Ngozvapi zvatinojija ngo mushamaiso wa Jesu wo kucinja kumwa kuita vhinyu? Tinojija kuti tinodikana kuva vandhu vanojidodokesa. Jesu aazivi kujikuja ngo mushamaiso waakaitari nee aazivi kumbojikuja pamushamaiso jese jaakaita. Mukusiyana, ngo kujidodokesa kwese kuphinda no kuphinda iyena aazivi kumbojikuja waindopa rukujo Baba wake. (Johani 5:19, 30; 8:28) Kudari tikatevejera Jesu ngo kuva anojidodokesa atizogumi pakujikuja ngo ndava yo zviro zvatinonga taita. Azvinenyi ngo zvapi zvatiri kuita pakushandira Jehovha atijikuji pacedu, asi tinojikuja ngo ndava yo makomborero atinawo o kumushandira. (Jeremia 9:23, 24) Tinodikana kupekeja iyena rukujo hunomufanera. Zvokadi apana cotaizokwanisa kuita ticina besero ra Jehovha.—1 Vakorinte 1:26-31.
12. Ngoyapi njira imweni yatingatevejera kujidodokesa ka Jesu? Ezanisanyi.
12 Vonanyi njira imweni yatingatevejera ndiyona kujidodokesa ka Jesu. Amborangariranyi ngo ciitiko ici: Umwe mukuru anopeja nguva yakareba ecibesera hama yo mujaha iri mubeseri wo ungano kuti inasirire hurukuro yayo yokutanga. Inga muviyo, hama yo mujaha iyi inoita ushoni hurukuro yayo, yovangisa hama jo mu ungano. Pakupera ko musongano, ariwese anoenda kobhuya no mukuru wiya o muvhunja kudari: ‘Hama ngana vaita ushoni hurukuro yavo andizvopi?’ Kureva kuti mukuru uwu anodavira kudari: ‘Hina ndakapeja mukuvo wakawanda maningi ndecimubesera.’ Kana kuti iyena waizonanga no kujidodokesa kwese kudari: ‘Hina waita ushoni kamare, inini ndinodada ndiyena.’ Patinova vanojidodokesa atizovi vandhu vanojikuja ngo zviro zvatinonga taita kuitira kubesera vandhu vamweni. (Ezanisanyi na Mateu 6:2-4; Vahebheru 13:16) Zvokadi kamare tinodakajisa Jehovha patinotevejera Jesu ngo kuva vandhu vanojidodokesa.—1 Pedhru 5:6.
TINOJIJENYI NGO PENA YAKAKHOMBIJWA NDI JESU?
13. Jesu wakavonenyi paakanghwina mu dhorobha ro Naini, iyena wakaitenyi? (Ruka 7:11-15)
13 Verenganyi Ruka 7:11-15. Amborangariranyi zvakaitika Jesu paainga eciita mushando wake. Iyena wakaita hwendo kuenda Naini dhorobha ro Garireya phedo no Shunami. Kondhoyo muporofita Erizeu wakamusa mwana wo noni ko makore anodarika 900. (2 Majimambo 4:32-37) Paakaguma pamusuvo wo dhorobha, Jesu wakavona vandhu vakathwara mutembo. Mugariro wainga unosuruvarisa maningi, noni iyi yainga yafihwa ngo mwana wayo umwe ega. Asi noni yakafihwari yainga ino vandhu vakawanda vaiiperekeja, aicainga yega. Jesu wakaimisa vandhu ava oita ciro cinodakajisa maningi kuna mai vaingari vakasuruvara, omusa mwana wavo. Uhwu i rumuko hwokutanga pa rumuko rutatu hwakaithwa ndi Jesu hunonangwa mu mavhangeri.
Tevejeranyi Jesu ngo kutanga kukhombija pena kuna vaya vakafihwa (Vonanyi ndima 14-16)
14. Ngozvapi zviro zvimweni zvinonangwa mu cipauko 7 co bhuku ra Ruka? (Vonanyi foto.)
14 Vonanyi zviro zvimweni zvinowanika mu cipauko 7 co bhuku ra Ruka. Mavona kuti Jesu ‘wakavona’ mai vaingari vakasuruvara perapo ‘wovazwira pena?’ (Vonanyi vhesi 13) Ngo kudaro paakavona mwanakaji uwu manera aaicema eciima pa mberi po mutembo wo mwana wake iyena wakamuitira pena. Jesu aazivi basi kuzwira pena mai ava, asi wakavakhombijira usizi. Iyena wakabhuya navo, wovanyaraja ngo izwi rinotondhoja, iyena wakati: “Mucacema.” Ngo kudaro wakaita zviri zvese kuti avabesere. Iyena wakamusa mwana wiya “womupekeja mai wake.”—Vonanyi vhesi 14, 15.
15. Tingajijenyi ngo mushamaiso wa Jesu?
15 Ngozvapi zvatinojija ngo mushamaiso wakaizwa ndi Jesu wo kumusa mwana wo noni? Tinojija kukhombijira pena kuna vaya vari kutambujika. Zvokadi, atingakwanisi kumusa vandhu vakafa inga ndi Jesu. Asi inga ndi iyena, tingakwanisa kukhombijira pena ku vandhu vafihwa ngo kusotesesa mazwiro avo. Tingatema civaringo cokukhombija pena nga zviya zvatinonanga kana kuita kuti tibesere no kuembezera. d (Mazwi Akangwara 17:17; 2 Vakorinte 1:3, 4; 1 Pedhru 3:8) Pikija magama akareruka no zviro zvidokowani zvingabesera maningi.
16. Inga zvamuri kuvona pa foto, ngozvapi zvamajija kuvha kuna mai vakafihwa ngo mwana wavo?
16 Vonanyi basi muezaniso uwu. Pa makore manganani adarika, hambzaji imweni yakavona mai vamweni vaigara ngo divi rimweni vecicema pakati po musongano, pa mukuvo wo kuti painga peciimbhwa ndumbo yo Umambo. Ndumbo iyi yainga yecibhuya ngo vetero yo rumuko. Mai ava vainga vafihwa ngo mwana wavo. Zvecivoneka kuti hambzaji iyi yaiziva zvese zvainga zvaitika, yakaenda kodira mukono mu mapfuji ma mai vayani vaicemaya vopejisa kuimba ndumbo iya. Pakupera mukuvo wakatikuti, mai vaya vakananga kudari: “Ndakakwanisa kuvona rudo uno hama no hambzaji.” Ivona vakadakara maningi ngo kuenda kwavo kumusongano. Ivona vakatizve: “Ku Nyumba yo Umambo tinokwanisa kuashira besero.” Tingava no cokwadi cokuti Jehovha anozwisisa no kureremeja pikija zviro zvidoko zvatinoita kuti tikhombijire pena kuna vaya vakafihwa kana “vakapera simba.”—Nduyo 34:19.
URONGWA UNOVANGISA RUTENDO
17. Ngozvapi zvatajija mu cijijo cino?
17 Tinovangiswa maningi patinoverenga Mavhangeri ngo pamusoro po mushamaiso jakaithwa ndi Jesu. Iwona anotijijisa kuti Jehovha na Jesu vanotida maningi nokutizve vano simba ro kuzopeja zvineso zvatinosongana nazvo nyamasi uno. Cimwenizve, tingathemba kuti Umambo hwa Mwari unozokwanirisa zvigondiso zvese. Patinonga tecisotesesa zviitiko izvi tingakwanisa kurangarijisisa ngo manera atinotevejera mugariro ja Jesu. Ngenyi amuiti urongwa wo jijo yo mundhu ega kana kuita jijo yo mbhuri mecinasa kusotesesa mugariro jimweni ja Jesu? Vonanyi kuti ngozvapi zvatinojija no kuti tingaitisa kudinivo kuti tivhunje vamweni zvatinonga tajija. Ivanyi no cokwadi co kuti mungava no mabhuyo akawanda no anovangisa maningi.—Varoma 1:11, 12.
18. Ngozvapi zvatinozovona pa cijijo cinotevera?
18 Kumbhiri ko mushando wake, Jesu wakaita rumuko wo citatu pa rumuko mutatu jiya jakatahwaya. Asi uwu wakava wakasiyana, ngokuti iyena wakamusa shamwari yake yaaida maningi. Izvi wakazviita mu njira yakasiyana no rumuko jese jaakaperaya kuita. Tinojijenyi mu mavhangeri ngo pamusoro po mushamaiso wakaithwari ndi Jesu? Tingavangisisa kudini rutendo hwedu ngo vetero yo rumuko? Mu cijijo cinotevera tinozobhuisana ngo pamusoro po muvhunjo uwu.
NDUMBO 20 Makapa Mwana Wenyu Anosisira
a Zvinodakajisa maningi kuverenga ngo pamusoro po mushamaiso jakaithwa ndi Jesu. Inga muezaniso, iyena wakanyaraja mbhepo yaivhunguza maningi, orapa vaihwaja no kumusa vakafa. Zviitiko izvi zvinowanikari mu Bhaibheri asipi kuti tibungaije ndizvona basi, asi kuitira kuti zvitijijise. Tinozovona zviitiko zvinganani no kuvona kuti zvinotijijisenyi ngo pamusoro pa Jehovha na Jesu no kuvona mugariro munganani jo umwari jatinodikana kusakurira.
b Mwanarume umweni anojija ngo zvo Bhaibheri wakananga kudari: “Munguva jakatahwa Bhaibheri vandhu vairangarira kuti kuashira varendo wainga mutoro wavo. Mundhu waiashiraro varendo waidikana kuva no cokwadi cokuti varendovo vana zvese zvavanoda. Mundhu waiashira varendo maningi-ningi pa mabuso o mucadho, waidikana kuva no cokwadi cokuti vakokwi vano zvokuha no zvokumwa zvakawanda.”
c Mavhangeri anonanga kuti kuno mutengo unopindirija 30 wo mushamaiso jakaithwa ndi Jesu. Asi mukuvo umweni, Bhaibheri rinonanga mushamaiso iji jakabatana pamwepo. Pa vhaza imweni, “vandhu vese vo mudhorobha” vakaenda kosongana naye. Iyena “wakarapa vandhu vakawanda vaihwaja.”—Marko 1:32-34.
d Kuti muwane masoko angamubesera kuti muzive zvokuita kana kunanga kuna vaya vakasuruvara, vonanyi musoro unoti: “Nyarajanyi vakafihwa inga zvakaithwa ndi Jesu,” pa Murindiri wo 1 wa Novembro wo 2010, mu Cishona.
e KUDURUJIHWA KO FOTO: Jesu paanonga ecivoneka ngo ndhambo, varovorani no vakokwi vari kudakara ngo kumwa vhinyu inonaka.
