MUSORO WO KUJIJA WO 19
Tingaitisa Kudini Kuti Tivangise Rutendo Hwedu pa Cigondiso ca Jehovha co Nyika Imbza?
“Zvinonangwa [ndi Jehovha] abziitiki here?”—BZIVERENGO 23:19.
NDUMBO 142 Ngatibatisise Vetero Yedu
ZVATICAJIJA a
1-2. Ngozvapi zvatinodikana kuita patinonga tecivetera nyika imbza?
ITUSU tinoreremeja cigondiso ca Jehovha cokufakeya nyika ino ngo nyika imbza. (2 Pedhru 3:13) Pikija atizivi kamare kuti nyika imbza inozoviya rini, mugariro wo nyika uri kukhombija kamare kuti atina mukuvo wakareba tecivetera.—Mateu 24:32-34, 36; Mabasa o Vapostori 1:7.
2 Azvinenyi tino mukuvo wakadini tiri mu cokwadi, tese tinodikana kuvangisa rutendo hwedu pa cigondiso ici. Ngenyi? Ngokuti pikija rutendo hwakavanga maningi hungagumira pa kuremba. Mupostori pauro wakadanija kutama rutendo inga “cishaishi cinotisunga ngo kukasika.” (Vahebheru 12:1) Kuti titame kurembesa rutendo hwedu, mukuvo wese tinodikana kupsaka zviro zvinobesera kuti tikwanise kuvona kamare kuti nyika imbza inozoviyadi sambiri pano.—Vahebheru 11:1.
3. Ngozvapi zvatinozovona mu cijijo ici?
3 Mu cijijo ici, tinozovona njira ndhatu jinovangisa rutendo hwedu pa cigondiso ca Jehovha co nyika imbza. Cokutanga, kurangarijisisa ngo pamusoro po muripo. Cocipiri, tinodikana kurangarijisisa ngo simba rina Jehovha no cocitatu, kupeja mukuvo teciita zviro zvo umwari. Perapo, tinozovona kuti kuitisa kudini masoko a Jehovha aakavhunja Abhakuki anovangisa rutendo hwedu nyamasi uno. Pokutanga, ngatende tivone zvineso zvinganani zvatingadikana kuhwisana nazvo wari uno zvokuti zvinoda kuvangisira kuti tivangise rutendo hwedu pa cigondiso co nyika imbza iri kuviyari.
ZVINESO ZVINODA RUTENDO HWAKAVANGA
4. Ngozvapi zvivaringo zvinoda rutendo hwakavanga?
4 Njiku jese tinotema zvivaringo zvinoda rutendo hwakavanga. Inga muezaniso, tinotema zvivaringo zvakawanda zvakadari inga manera atinosana mabungaijo, basa ro ku nyika, kujija, mucadho no vana. Tingajivhunjisa kudari: ‘Zvivaringo zvandinotema zvinokhombija kuti ndinothemba kuti nyika ino asipi yo kuenda no kuenda inozofakeiwa ngo nyika imbza? Kana kuti zvivaringo zvandinotema zvinokwevehwa nga vaya vanonangaya kuti kufa i kupera ko zvese?’ (Mateu 6:19, 20; Ruka 12:16-21) Tinozotema zvivaringo zvaushoni tikavangisa rutendo hwedu pakuti nyika imbza yaaphedo.
5-6. Ngenyi tinodikana kuva no rutendo wakavanga pa mukuvo wo zvineso? Ezanisanyi.
5 Tinosonganazve no zvineso zvimweni zvinoda rutendo hwakavanga. Tingahwisana no kuteverehwa, ndhendha icikarapiki kana zviro zvimweni zvingatirembesa. Pakutanga tingatojizwa kuti itusu tinokwanisa kucungirira zvinesozvo. Kudari zvineso izvi zvikavanga inga manera azvinoanja kuita, tinodikana kucungirira zvinesozvo no kuenderera mberi tecishandira Jehovha no mudakaro.—Varoma 12:12; 1 Pedhru 1:6, 7.
6 Patinonga tecihwisana no zvineso, tingatoguma pakujizwa kuti nyika imbza aicaripi kuviya. Kudari zvikaitika zvinoda kureva kuti rutendo hwedu hwakaremba? Haiwa. Vonanyi muezaniso uwu basi. Mukuvo wo cipepo mbhepo painonga yecitaka maningi tingatoguma pakujizwa kuti aizogumi nguva yo kupisa. Asi iyona inoguma. Munjira yakaezana, patinojizwa takaremba tingatoguma pakurangarira kuti nyika imbza aizoviyi. Ngo kudaro, kudari rutendo hwedu hukavanga tinozoziva kuti zvigondiso zva Mwari zvese zvinozokwanirisika. (Nduyo 94:3, 14, 15; Vahebheru 6:17-19) Tecithemba izvi, itusu tinokwanisa kudira kunamata Jehovha pakutanga mu upenyu hwedu.
7. Tinodikana kujingwarira pacinyi?
7 Patinonga tiri mu basa ro kucumaera tinodikana kuva no rutendo hwakavanga. Vandhu vakawanda vatinocumaera vanovona kuti “masoko akanaka” ngo pamusoro po nyika imbza ya Mwari, aazokwanirisiki. (Mateu 24:14; Ezekieli 33:32) Tinodikana kungwarira kuti titame kukana-kana ngo zvatinojijiswa ndi Jehovha inga zvavanoita. Kuti izvi zvitame kuitika, tinodikana kuenderera mberi tecivangisa rutendo hwedu. Ngatende tivone njira ndhatu jatingaita ndijona izvi.
RANGARIJISISANYI NGO MURIPO
8-9. Kuitisa kudini kurangarijisisa ngo pamusoro po muripo kwakavangisa rutendo hwedu?
8 Njira imwe yo kuvangisa rutendo hwedu ngo yo kurangarijisisa ngo muripo. Muripo ndi ciro cinotigondesa kuti zvigondiso zva Jehovha ngo zvokadi. Patinorangarijisisa no kungwarira kwese ngo pamusoro po muripo uwu, tinozovangisa rutendo hwedu pa cigondiso ca Mwari co upenyu ucikaperi no nyika yakanakisisa. Ngenyi tinonanga kudaro?
9 Ngozvapi zvinobatanija muripo? Jehovha wakatumira Mwana wake anodiwa wo dangwe, shamwari yake yo phedo kuvha kudenga kuviya kobahwa pasi pano inga mundhu wakakwana. Paainga pasi pano, Jesu wakacungirira mushovo wese wo zvineso. Iyena wakatambujika no kufa mu njira inosuruvarisa. Jehovha wakaripa mutengo wakakura maningi! Mwari wedu ano rudo aacaizotendera kuti Mwana wake atambujike no kufa kuitira kuti tive no upenyu hwaushoni ko mukuvo mushoma basi. (Johani 3:16; 1 Pedhru 1:18, 19) Zvecivoneka kuti Jehovha wakatipa Mwana wake anodiwa kuitira kutibesera, iyena anotigondesa kuti tinozokwanisa kurarama no kucingaperi mu nyika imbza.
KURANGARIJISISA NGO SIMBA RINA JEHOVHA
10. Mukuzwirana no bhuku ra Vaefeso 3:20, Jehovha anokwanisa kuitenyi?
10 Njira yocipiri yatingavangisa ndiyona rutendo hwedu, ngo yo kurangarijisisa ngo simba rina Jehovha. Iyena ano simba rokukwanirisa zvese zvaakagondesa. Vandhu vazinji vanorangarira kuti azvikwanisiki kuva no upenyu ucikaperi mu nyika imbza. Asi Jehovha nguva jese anogondesa zviro zvokuti vandhu avakwanisi kuzviita. Iyena anokwanisa kuzviita, ngokuti ndi Mwari wo Masimba Ese. (Jobe 42:2; Marko 10:27) Ngo kudaro, atikahamari paanotigondesa zviro zvinoshamaisa.—Verenganyi Vaefeso 3:20.
11. Ipanyi muezaniso wo zvigondiso zvinoshamaisa zva Mwari. (Vonanyi bhokiso rinoti: “ Zvigondiso Zvinganani Zvinoshamaisa Zvakakwanirisika.”)
11 Vonanyi zviro zvinganani zvinovoneka inga kuti azvikwanisiki zvokuti Jehovha wakazvigondesa ku vashandiri vake vo kare. Iyena wakagondesa Abhirahama na Sara kuti vaizova no mwana pikija vainga vavasharuka. (Genesi 17:15-17) Iyena wakagondesazve Abhirahama kuti waizopekeja mubarihwana wake nyika yo Kanani. Vaiziraeri avo vainga mubarihwana wa Abhirahama pavakapeja makore akawanda vari kuuranda ku Ejipita, zvaiita inga kuti cigondiso ici acicaizokwanirisika. Asi zvakazoitika. Pakufamba ko nguva, Jehovha wakananga kuti Erizabheti waizova no mwana pikija wainga wa musharuka. Iyena wakagondesazve Mariya, uwo wainga mbhandwe kuti waizobara Mwana wake kamare. Jehovha wainga wakagondesa izvi ko makore akawanda mu munda wo Edheni. Izvi zvakakwanirisika!—Genesi 3:15.
12. Bhuku ra Joxwa 23:14 na Isaia 55:10, 11 rinotigondesenyi ngo simba rina Jehovha?
12 Tinovangisa rutendo hwedu ngo kuziva kuti Jehovha ano simba rokuviisa nyika imbza ngo kurangarijisisa zvaakananga no kukwanirisa kareko. (Verenganyi Joxwa 23:14; Isaia 55:10, 11.) Izvi zvinotiita kuti tive takanasiririka kuitira kubesera vamweni kuti vazwisise kuti cigondiso co nyika imbza ngo cokadi kamare. Jehovha ambhwine wakananga kudari ecinangira denga ibza no pasi papsa: “Ngokuti masoko aya anogondeka no ocokwadi.”—Apokaripsi 21:1, 5.
ITANYI ZVIRO ZVINOMUITA KUTI MUKHWEDERE PHEDO NA JEHOVHA
MUSONGANO JO UNGANO
Zviro zvitatu izvi zvingamubeseresa kudini kuti muvangise rutendo hwenyu? (Vonanyi ndima 13)
13. Musongano jo ungano jingavangisa kudini rutendo hwedu? Sananguranyi.
13 Njira yocitatu ingavangisa rutendo hwedu, ngo yo kupeja mukuvo wakareba teciita mabasa o Umwari. Inga muezaniso, vonanyi manera tinobesereka ngo kwenda ku musongano jo ungano. Hambzaji Ana, vakapeja mukuvo wakareba vecishanda mu nguva yakazara vakati: “Musongano jinondibesera kuti ndienderere mberi ndino rutendo hwakavanga. Pikija kuti mundhu anoitisaro diviro aakwanisi maningi kujijisa kana kutonangavo zviro zvipsa, kazinji ndinonasa kuzwisisa zvokadi zvo Bhaibheri no kuvangisa rutendo hwangu.” b Rutendo hwedu hunovanga maningi patinozwa hama no hambzaji jecipa mupinguro javo pa musongano.—Varoma 1:11, 12; 10:17.
BASA RO KUCUMAERA
Zviro zvitatu izvi zvingamubeseresa kudini kuti muvangise rutendo hwenyu? (Vonanyi ndima 14)
14. Basa ro kucumaera rinovangisa kudini rutendo hwedu?
14 Patinoita basa ro kucumaera tinovangisazve rutendo hwedu. (Vahebheru 10:23) Hambzaji Bharbhara, avo vanoshandira Jehovha ko makore anokwana kuita 70, ivona vakati: “Mukuvo wese ndinovona basa ro kucumaera recivangisa rutendo. Pandinobhuya no vamweni ngo pamusoro po zvigondiso zvinoshamaisa zva Jehovha, rutendo hwangu hunovanga maningi.”
JIJO YO MUNDHU EGA
Zviro zvitatu izvi zvingamubeseresa kudini kuti muvangise rutendo hwenyu? (Vonanyi ndima 15)
15. Jijo yo mundhu ega inovangisa kudini rutendo hwedu? (Vonanyi foto.)
15 Jijo yo mundhu ega ndi zviro zvimweni zvinovangisa rutendo hwedu. Hambzaji Suzana vanovona kuti zvaushoni maningi kuita urongwa wo zviro zvavanoda kujija. Ivona vakati: “Ngo mudimingu, ndinojija musoro wo Murindiri kuitira sumana inotevera. Ngo muciposa no mucipiri ndinonasirira musongano wo pakati po sumana. Njiku jasararo ndinoita urongwa wo jijo yo mundhu ega.” Zvecivoneka kuti hambzaji Suzana vanoteverera urongwa hwavo wo kujija, vari kuenderera mberi vano rutendo hwakavanga. Hambzaji Irene, avo vakashanda ko makore akawanda ku cine ro pasi pese, vakavangisa rutendo hwavo ngo kujija zviporofita zvo Bhaibheri. Iyona yakati: “Zvinondishamaisa maningi kuvona zviporofita zva Jehovha zvecikwanirisika.” c
“CINOZOKWANIRISIKA KAMARE”
16. Ngenyi zvakananga Jehovha kuna Abhakuki zvinotibeseravo nyamasi uno? (Vahebheru 10:36, 37)
16 Vashandiri vazinji va Jehovha, vari kuvetera kupera ko nyika ino ko mukuvo wakareba. Vandhu vazinji vari kuvona kuti cigondiso ca Jehovha ciri kunonoka kukwanirisika. Jehovha wakabhuya ngo pamusoro po zviro izvi paakabhuyaya no muporofita Abhakuki paakati: “Ngokuti civoniso ici, cinozokwanirisika pa nguva yakagajwa, icona cinozokwanirisika, asipi cokunyepa. Pikija cikaita inga ciri kunonoka, endererai mberi wakaciimira! Ngokuti cinozokwanirisika kamare. Acizononoki!” (Abhakuki 2:3) Kureva kuti Jehovha wakananga basi magama aya kuti abesere Abhakuki? Kana kuti iwona anotibeseravo nyamasi uno? Mupostori Pauro wakafemehwa kuti anange masoko aya kuno Makristu ari kuvetera nyika imbza. (Verenganyi Vahebheru 10:36, 37.) Hina, tingava no cokwadi cokuti pikija cigondiso cedu co kwenda mu nyika imbza ceciita inga ciri kunonoka, icona “cinozokwanirisika kamare acizononoki!”
17. Hambzaji imweni yakashandisisa kudini mbhangiro yakapuwa Abhakuki ndi Jehovha?
17 Vashandiri vazinji va Jehovha vari kushandisa zvaakananga kuna Abhakuki paakati: “Endererai mberi wakaciimira.” Vamweni vavo vari kuita izvi ko makore akawanda. Inga muezaniso, hambzaji Ruiza vakatanga kushandira Jehovha mu gore ra 1939. Ivona vakati: “Pamukuvo uwu, ndairangarira kuti Armagedhoni yaizoviya ndicito ndapeja kujija cikora sekundariya. Asi izvi andizvopi zvakaitika. Ko makore akawanda, ndakadikana kuverenga ngo muezaniso jo vashandiri va Jehovha vakadikana kuvetera kukwanirisika ko zvigondiso zva Jehovha ko makore akawanda. Vakadari inga ava: Nowa, Abhirahama, Josefa no vamwenivo. Kuenderera mberi ndecivetera, kwakabesera inini no vamweni kuti tive no cokwadi cokuti nyika imbza yaaphedo kamare.” Vashandiri vazinji va Jehovha vo mu nguva yo kare vanotenderana nazvo!
18. Kusotesesa zvakasikwa kungavangisa kudini kuthemba kwatinoita kuti nyika imbza inozoviyadi?
18 Ngo zvokadi kamare kuti nyika imbza aito yaguma. Asi rangariranyi ngo zviro zvatinazvo zvakadari iga ndhondho, muti, zvinyama no vandhu. Apana anokana-kana kuti izvi zviriyodi pikija pakava no mukuvo wokuti zviro izvi azvicaingepo. Izvona zviripo ngokuti ndi Jehovha wakazvisika. (Genesi 1:1, 26, 27) Mwari wedu wakatigondesa kuti anozoviisa nyika imbza. Iyena anozokwanirisa cigondiso ici. Mu nyika imbza, vandhu vanozobusa upenyu ucikaperi pacina cineso ciri cese. Tingava no cokwadi cokuti nyika imbza inozoviya mu nguva yakagajwa ndi Mwari.—Isaia 65:17; Apokaripsi 21:3, 4.
19. Mungavangisa kudini rutendo hwenyu?
19 Pamunonga mucivetera izvi, shandisanyi mukana jese jamunajo kuti muvangise rutendo hwenyu. Ivanyi mundhu anobonga ngo muripo. Rangarijisisanyi ngo simba rina Jehovha. Itanyi zviro zvinomukhwedeja phedo na Jehovha. Mukaita izvo munozova na “vaya vanogara utaka ku zviro zvakagondeswa ngo rutendo no kusengerera.”—Vahebheru 6:11, 12; Varoma 5:5.
NDUMBO 139 Jivonenyi Mwega Zvese Zviri Zvipsa
a Vandhu vazinji nyamasi uno avathembi cigondiso co Bhaibheri co nyika imbza. Ivona vanorangarira kuti i kurotavo hako kana kuti i ngano. Asi tino cokwadi cokuti zvigondiso zvese zva Jehovha zvinozokwanirisika. Pikija zvakadaro, kuti rutendo hwedu huenderere mberi hwakavanga tinodikana kundouvangisa. Kuitisa kudini? Musoro uwu unozosanangura izvi.
b Mazina amweni akacinjwa.
c Musoro muzinji jinobhuya ngo pamusoro po zviporofita zvo Bhaibheri jinowanika pa cimusoro cinoti: “Zviporofita” mu bhuku Índice das Publicações da Torre de Vigia. Inga muezaniso, vonanyi musoro unoti: “Zvinonangwa ndi Jehovha Zvinoitika” unowanika mu Murindiri wo 1 wa Janeiro wo 2008, mu Cishona.
