1. Icinyi paradhiso yo kumujimu, tinodikana kutema civaringo cokuitenyi?

 NYAMASI uno tino paradhiso imwe pasi pano, yokuti zviuru no zviuru zvo vandhu zviri kupona mu runyararo no mabasa mazinji okuita. Vandhu vari mu paradhiso iyi vatema civaringo cokuti narini avazobudimo. Ivona vanodavo kuti vandhu vakawanda vabatane na ivona mu paradhiso iyi. Paradhiso iyi ngoyapi? I paradhiso yo kumujimu. a

2. Ngozvapi zvinoshamaisa patinobhuya ngo pamusoro po paradhiso yo kumujimu?

² Zvinoshamaisa kuvona manera Jehovha akasika ndau yakanyarara pakati po nyika yakacinjwa ndi Sathana kuti iite ndau yakazara ngo ushati, cizondo no inothyisa. (1 Johani 5:19; Apokaripsi 12:12) Mwari wedu ano rudo anonasa kuziva kuti kupona mu mugariro wakadari zvinonyangajisa maningi. Ndiyo ndava iyena anotipa jiviriro yatinoda kuti tikwanise kwenderera mberi tecimushandira no takadakara. Bhaibheri rinobhuya ngo paradhiso yo kumujimu inga “citiziro” no “ndhonve inowana kumwa yakakwana.” (Isaia 4:6; 58:11) Ngo makomborero a Jehovha, vaya vanoita divi ro paradhiso iyi, vangajizwa vakadakara no kujiviririka pikija mu njiku jino jokupejisira jinonesa.—Isaia 54:14; 2 Timoti 3:1.

3. Ciporofita ciri pana Isaya 65 cakatanga kukwanirisika rini?

³ Jehovha wakashandisa muporofita Isaya kuti asanangure manera waizova upenyu mu paradhiso yo kumujimu. Mungakwanisa kuvona kusananguhwa uku mu cipauko 65 co bhuku ra Isaya. Ciporofita ici cakatanga kukwanirisika mu gore ra 537 Kristu  Acito Aviya. Pamukuvo wakasujunuhwaya Vajudha kuvha ku uranda ku Bhabhironiya kuhwirira ku nyika yavo yavakabarihwa. Jehovha wakakomborera vandhu vake no kuvabesera kuti vavakise dhorobha ravo ro Jerusarema rainga rakaparajwa. Vajudha vaizoita kuti Jerusarema rive ndau yakaseja, vagaremo, cimwenizve vaizovakisa themberi kuti ive ndau yokunamatira Jehovha ku Iziraeri.—Isaia 51:11; Zakaria 8:3.

4. Ngokwapi kukwanirisika kocipiri ko masoko anowanika pana Isaya 65?

⁴ Kukwanirisika ko cipiri ko ciporofita ca Isaya kwakatanga mu gore ro 1919. Mu gore iri vanamati va Jehovha va nyamasi uno vakasujunuhwa kuvha ku maitiro o Bhabhironiya Guru. Ndipona pakatangira paradhiso yo kumujimu. Cimwenizve, kwakaumbhwa ungano jakawanda mu nyika yese. Vanarume no vanakaji vokuti kareko vaiita zviro zvicikazivi kucena pomwe no uphanga vakatanga kukhombija mugariro jo Cikristu no “kusimira undhu hupsa hwakasikwa mukuzwirana no kuda ka Mwari.” (Vaefeso 4:24) Zvakajeka kamare kuti amwe o makomborero akanangwa ndi Isaya anozokwanirisika kumbejiyo mu nyika imbza. Pikija wari uno vaya vari mu paradhiso yo kumujimu, vari kubusa makomborero akawanda. Ngatende tivone kuti ngenyi ngozvaushoni kugara mu paradhiso yo kumujimu nokutama kubudemo.

MUNOJIZWA KUDINI NGOKUVA MU PARADHISO YO KUMUJIMU?

5. Mukuzwirana na Isaia 65:​13, ngoapi makomborero atinawo ngokuita divi ro paradhiso yo kumujimu?

⁵ Kuva no uhomi hwakanaka no kujizwa ushoni. Ciporofita ca Isaya cinovonesa musiyano wakakura kuna vaya vari mu paradhiso yo kumujimu na vaya vaciripi mukatimo. (Verenganyi Isaia 65:13.) Jehovha anopa zvese kuno vashandiri vake kupinda zviya zvavaitoda kuti vaenderere mberi vecimunamata. Iyena anotipa mujimu wake mucena, Soko rake Bhaibheri no zvokuha zvizinji zvokumujimu kuti tikwanise “kuha . . . kumwa . . . no kudakara.” (Ezanisiranyi na Apokaripsi 22:17) Mugariro wedu wari wakasiyana maningi no mugariro wo vari kunja ko paradhiso yo kumujimu. Vandhu ava vano “njara . . . , nyota, no kupseruka.” Ivona vanovona kuti kuri kuvacotera ciro mu upenyu hwavo ngokuti avana ushamwari na Jehovha.—Amosi 8:11.

6. Joweri 2:​21-24, inosanangurisa kudini zvatinopuwa ndi Jehovha, tingabesereka kudini ndizvona?

⁶ Umwe muporofeta anozwi Joeri, wakashandisa zviro zvimweni zvo njiku no njiku zvakadari inga zvokuha, vhinyu no mafuta kuti avonese kuti Jehovha ndi Mwari anokova, ndiyo ndava iyena anotipa zvese zvatinoda ku divi ro kumujimu. (Joweri 2:​21-24) Jehovha anoita zvese izvi ecishandisa Bhaibheri, mabhuku akacijikira mu Bhaibheri, saite, musongano jedu no magungano. Kudari tikanasa kushandisa zvatinopuwari njiku no njiku, tinozogara ushoni no kuva no uhomi hwakanaka.

7. Zvicinyi zvinotipa ‘mwoyo wakanasa kugajana’? (Isaia 65:14)

⁷ Dakaranyi ngo zvamunazvo. Vandhu va Mwari vari “kumima ngo kudakara” ngokuti mwoyo wavo wakazara ngokuda kubongesera ngo zvese zvavari kuitihwa. (Verenganyi Isaia 65:14.) Cokwadi no zvigondiso zvinonyaraja zvinowanika mu Bhaibheri no vetero yedu yakacijikira pa muripo wa Jesu, zvinotiita kuti tive no ‘mwoyo wakagajana.’ Kuciripi zvondhozvo, kubhuya no hama no hambzaji ngo pamusoro po zviro izvi zvinoshamisa, zvinotiita kuti tidakare.—Nduyo 34:9; 133:​1-3.

8. Ngojapi mugariro muviri jinosisira jo mu paradhiso yo kumujimu?

⁸ Rudo no rubatano uno vandhu va Jehovha, ndi mugariro muviri jinosisira maningi jo mu paradhiso yo kumujimu. “Rubatano uhu” unovonesa manera unozova upenyu mu paradhiso,  vandhu va Mwari pavanozova no rubatano no rudo kupinda nyamasi uno. (Vakorose 3:14) Hambzaji imweni inosanangura zvayakazwisisa pa vandhu va Jehovha payakavavona pa vhaza yokutanga, iyona inoti: “Inini andicaizviziva kuti ndingaitisa kudini kuti ndive no mudakaro pikija pa mbhuri pangu. Pakutanga pandakavona vandhu vaitajana ngo rudo, vainga vari Zvapupu zva Jehovha.” Asi wese anoda kuva no mudakaro anodikana kuziva paradhiso yo kumujimu. Vandhu vangananga havo zvavanoda ngo pamusoro po Zvapupu zva Jehovha, asi itusu tinoziva kuti tino zina rakanaka no mufambiro wakanaka pamberi pa Jehovha no hama no hambzaji jedu.—Isaia 65:15.

9. Mukuzwirana na Isaia 65:​16, 17, zvicinyi zvinozoitika no zviro zvinobara matambujiko?

⁹ Kuva makasujunuka no kugajana. Pana Isaia 65:14 tinoverenga ngo mugariro ja vaya vanosana kugara kunja ko paradhiso yo kumujimu ivona “vanokhuwa ngo kuhwajihwa mwoyo, vozocema ngo ndava yo kutambujika.” Zvakajeka kuti vandhu va Mwari vano hwisanavo no zvineso zvakawanda. Zviro izvi sambiri pano ‘zvinozokanganika; izvona zvinozogara zvakavigika pamberi pangu.’ (Verenganyi Isaia 65:​16, 17.) Jehovha anozoita kuti zviro izvi zvingare-ngare, pakufamba ko nguva murangariro jicikaripi jaushoni jinotiita kuti tiite zvakashata ajizowanikizve.

10. Ngocapi camunovona inga makomborero ngokuva pamwepo no hama no hambzaji? (Vonanyi foto.)

¹⁰ Pikija nyamasi uno, patinoenda kumusongano tinojizwa takagajana nokutizve patinonga tiri konayo tinogarisika no kusiya sure zviro zvese zvakashata zvinoithwari ngo nyika ino. Patinokhombija mugariro jinoita divi ro mucero jo mujimu mucena wa Mwari inga rudo, mudakaro, runyararo, kusengerera no kunaka mwoyo tinonga teciita divi redu ro kugajana no rusujunuko zviri mu paradhiso yo kumujimu. (Vagaratiya 5:​22, 23) Kwatiri i makomborero makuru kuita divi ro sangano ra Jehovha. Vaya vanoenderera mberi vari mu paradhiso yo kumujimu sambiri pano vanozovona kukwanirisika ko cigondiso ca Mwari co “matenga mapsa no nyika imbza.”

11. Mukuzwirana na Isaia 65:​18, 19, munozwa kudini pamunoziva kuti Jehovha wakasika paradhiso yo kumujimu?

¹¹ Kubongesera no kudakara. Vhesi ya Isaya inotipekeja mathangwe okudakara no “kutamba” mu paradhio yo kumujimu. Cokwadi ngo cokuti paradhiso iyi yakasikwa ndi Mwari. (Verenganyi Isaia 65:​18, 19.) Masangano akaithwa ngo nyika iyi aajijisi vandhu ngo pamusoro pa Mwari, zvinozwisisika kuti ngenyi Jehovha anotituma kuti tivhise vandhu mu masangano ondhowo nokuvaita kuti vaite divi ro paradhiso iyi inoshamaisa yo kumujimu. Itusu tinodakara  maningi ngo makomborero atiri kuashira ngokuva mu cokwadi nokutizve tinoda kuverengera vese ngo pamusoro po makomborero aya anoshamaisa.—Jeremia 31:12.

12. Munozwa kudini pamunoverenga zvigondiso zviri pana Isaia 65:​20-24, ngenyi?

¹² Imwimwi amudakari no kubongesera pamunorangarira vetero yamunayo ngokuva kwenyu mu paradhiso yo kumujimu? Imanyi padoko mumborangarira manera aunozova upenyu mu paradhiso. Bhaibheri rinogondesa kudari: “Amuzovi no mwana mudoko anopona njiku shoma, nee harahwa icikazoponi njiku jayo jese.” ‘Tinonozovaka nyumba tozogaremo, tosima muuvha tozoha mucero jayo.’ ‘Atizoshandi ngo simba mahara’ ngokuti ‘tinozokomborehwa ndi Jehovha.’ Iyena anogondesa kutipa upenyu hwakangwaririka no cinangwa cokadi. ‘Pikija vacito vamudaninja’ iyena anonga ecizviziva zvinonga zvecidiwa ngo mundhu umwe nga umwe ‘anozogutisisa bzese bzinorarama.’—Isaia 65:​20-24; Nduyo 145:16.

13. Isaia 65:​25, inosanangurisa kudini cinjo jinoithwa ngo vandhu pavanojija cokwadi?

¹³ Kungwaririka no runyararo. Ngo besero ro mujimu mucena wa Jehovha vandhu vokuti kareko vainga maphanga, vanohasha no vacikajidodokesi, vakaita cinjo jinoshamaisa maningi mu upenyu hwavo. (Verenganyi Isaia 65:25.) Ivona vakashanda ngo simba kuti vasiye mugariro javo jakashata. (Varoma 12:2; Vaefeso 4:​22-24) Zvakajeka kuti ngokutama kukwana kwedu tinondoenderera mberi teciposa. Jehovha wakabatanija “vandhu vese” vanomuda nokudavo vamweni, inga muviyo tino runyararo hwokadi no rubatano. (Tito 2:11) Uwu ndi mushamaiso basi ungaithwa ndi Mwari wo masimba ese.

14. Muezaniso wo hama imweni unokhombijisa kudini kuti magama ari pana Isaia 65:25 ngo okadi?

¹⁴ Kureva kuti mundhu angacinja undhu hwake? Vonanyi muezaniso wo mujaha umweni wokuti paainga ano makore anokwana kuita 20, wainga aenda mukadheya ko vhaza jakawanda. Iyena waiita zvouphanga no zviro zvimweni zvicizivi kucena. Iyena wakafungihwa ngo ndava yokuba karu, kuphwanya nyumba no krimi jimweni jaakaita. Nguva jese iyena wainga akanasiririka kuti ahwisane no ari wese. Asi pakutanga paakazwa cokwadi wakatanga kwenda kumusongano jo Zvapupu zva Jehovha, ova no cokwadi cokuti wainga awana ciro caizomuita kuti ave no upenyu hwaushoni mu paradhiso yo kumujimu. Paakapera kubhabhatijwa, iyena wairangarijisisa maningi ngo magama anowanika pana Isaia 65:​25, manera aaishanda kwaari. Iyena wakasiya kuva wakadari inga mbhondoro no anoita zvouphanga, ova mundhu ano runyararo oezana no vhuta.

15. Ngenyi tiri kukoka vamweni kuti vabatane na itusu mu paradhiso yo kumujimu, tingazviitisa kudini?

¹⁵ Isaia 65:​13, inotanga ngokunanga kudari: “Mambo Mukuru-kuru Jehovha anonanga kudari.” Vhesi ya 25 inopejisira ngokunanga kudari “izvi ndizvona zvinonanga Jehovha.” Itusu tinoziva kuti zvigondiso zva Jehovha nguva jese zvinokwanisika. (Isaia 55:​10, 11) Kana kuti paradhiso yo kumujimu ngo yokadi. Jehovha wapera kubatanija mbhuri yo vanamati vake icikaezanisihwi. Pakati po vandhu vake tingava no runyararo inga tiri ku ndau imweni icikaiti divi ro nyika ino uphanga. (Nduyo 72:7) Ndiyo ndava tinoda kubesera vandhu vakawanda kuti vabatane na itusu mu mbhuri yo mu nyika yese. Itusu tingakwanisa kuita izvi ngokubatikana pa basa rokuita vajiji.—Mateu 28:​19, 20.

KUBESERA VAMWENI KUTI VADE KUNGHWINA MU PARADHISO YO KUMUJIMU

16. Ngozvapi zvingabesera vamweni kuti vade kuita divi ro paradhiso yo kumujimu?

¹⁶ Umwe na umwe wedu angaita ciro cinosisira kuti abesere vamweni vade kunghwina mu paradhiso yo kumujimu. Itusu tingaita izvi  patinotevejera Jehovha. Jehovha aavangiriji mundhu kuti aite divi ro sangano rake. Kunja kwa zvondhozvo, iyena anokwevera vandhu kwaari ngokunaka mwoyo. (Johani 6:44; Jeremia 31:3) Ndiyo ndava, patinopera kujija ngo pamusoro po mugariro ja Jehovha no undhu hwake azviitiki kuti mundhu wakanaka atame kuda kuva shamwari yake. Kuitisa kudini? Mugariro jedu no mufambiro wedu zvingakwevera vandhu kuti vade kunghwina mu paradhiso yo kumujimu.

17. Tingaitisa kudini kuti tikwevere vamweni mu paradhiso yo kumujimu?

¹⁷ Njira imweni yokukwevera vandhu mu paradhiso yo kumujimu, ngo yokutaja hama no hambzaji jedu ngo rudo no kunaka mwoyo. Vandhu pavanoviya pa vhaza yokutanga pa musongano, itusu tinoda kuti vajizwe inga manera akajizwaya vaya vokuti kangaije vakavona musongano ku ungano yo Korinte yokare. Ivona vakakhohwa nokunanga kudari: “Mwari zvokadi, ari pakati penyu.” (1 Vakorinte 14:​24, 25; Zakaria 8:23) Kuti izvi zvikwanirisike tinodikana kwenderera mberi tecizwira mbhangiro yokuti “ivanyi no runyararo ngocenyu.”—1 Vatesaronika 5:13.

18. Ngozvapi zvingakwevera vamweni ku sangano redu?

¹⁸ Mukuvo wese tinodikana kuvona hama no hambzaji jedu ngo manera Jehovha anovavona. Tinokwanisa kuita kudaro kudari tikabatikana pamugariro javo jaushoni haiwa pakutama kwavo kukwana. Ngokuti kutama kukwana kwavo uku sambiri pano kunozopera. Tingatonga cineso ciri cese haco cingamuka pakati pedu ngo rudo no ‘kunaka mwoyo umwe kuno umweni, teciitirana pena, teciregererana ngo mwoyo wese.’ (Vaefeso 4:32) Ngo kudaro, vandhu vanodaro kutajwa ngo njira iyi yo rudo vanozodavo kuita divi ro paradhiso yo kumujimu. b

 ENDERERANYI MBERI MURI MU PARADHISO YO KUMUJIMU

19. (a) Mukuzwirana no bhokiso rino musoro unoti: “ Ivona Vakabuda Perapo Voviyazve,” ngozvapi zvakanangwa ngo vamweni pavakaviyazve muparadhiso yo kumujimu? (b) Tinodikana kutema civaringo cokuitenyi? (Vonanyi foto.)

¹⁹ Itusu tinodakara maningi ngokuita divi ro paradhiso yo kumujimu. Nyamasi uno paradhiso yo kumujimu yakanyara maningi. Cimwenizve, ino vandhu vakawanda maningi. Itusu tinoenderera mberi tecibongesera ngo pamusoo po paradhiso iyi yo kumujimu yakasikwa ndi Jehovha. Kudari mundhu anoda kujizwa ushoni, akadakara, akagajana, no kungwaririka, anodikana kunghwina mu paradhiso yo kumujimu no kutama kubudemo. Ngwariranyi ngokuti Sathana ari kuita zviro zvaanokwanisa kuti aticengeje nokutivhisa mu paradhiso yo kumujimu. (1 Pedhru 5:8; Apokaripsi 12:9) Narini amudikadi kumutendera kuti iyena aite izvi. Tinoita zvese zvatinokwanisa kuti tijivirire kuseja, kucena no runyararo, izvo zviri mukati mo paradhiso yo kumujimu.