Maizviziva Here?
Ngenyi vanarume vokuti avacainga Vaiziraeri vakashandira mucikwata co masoca a Dhavhidhi?
VANARUME vainga pa cikwata co masoca a Dhavhidhi vokuti avacainga Vaiziraeri nga ava, Zereki mu Amoni, Uriya mu Hitita na Itima mu Moabhi. a (1 Kronike 11:39, 41, 46) Masoca a Dhavhidhi aibatanijavo “Vakereti no Vapereti vese, no vaGati.” (2 Samueli 15:18) Zvinovoneka inga kuti Vakereti no Vapereti vainga no ukama hwo phedo no Vafiristi. (Ezekieli 25:16) Vagati zvingaita kuti vaivha ku dhorobha ro Vafiristi ku Gati.—Joxwa 13:2, 3; 1 Samueli 6:17, 18.
Ngenyi Dhavhidhi wakatendera kuti vanarume ava vaite divi ro masoca ake? Ngokuti iyena waithemba kuti ivona vainga vakagondeka kwaari nokutizve vaisisira kuna Jehovha. Inga muezaniso, mukuzwirana no Vakereti no Vapereti, bhuku rimweni rinozwi Intérprete da Bíblia rakananga kudari: “Ivona vakaenderera mberi vakagondeka kuna Dhavhidhi pikija pa mugariro jiya jakanesa maningi mu Umambo hwake.” Kuitisa kudini? Paya pokuti “VaIsraeli vese vakasia Dhavidhi, voenda na Xeba” Vakereti no Vapereti vakaenderera mberi vakagondeka kuna Dhavhidhi no kumubesera pakuimisa kupandukira kwainga kwatanga kuithwa ndi Sebha. (2 Samueli 20:1, 2, 7) Pa vhaza jimweni mwana wa Mambo Dhavhidhi, Adhoniya wakaeja kujiita mambo kunja kwa Soromona. Mukusiyana, Vakereti no Vapereti vakaenderera mberi vakagondeka kuna Dhavhidhi no kubesera Soromona kuti azova mambo, ngokuti ndiyena wainga akakhethwa ndi Jehovha.—1 Majimambo 1:24-27, 38, 39.
Munyikanja umweni wakaenderera mberi akagondeka kuna Dhavhidhi ndi Itai Mugati. Munyikanja uwu no vanarume vake vanokwana kuita 600, vakabesera Mambo Dhavhidhi paya pokuti mwana wake Abhusaromi wakapandukira ecibata mwoyo yo Vaiziraeri vese kuti vacazwirazve Dhavhidhi. Dhavhidhi wakavhunja Itai kuti ngokuti wainga munyikanja aacaidikana kubesera Dhavhidhi. Asi Itai wakati: “Ngo kupona ka Tenji Mwari, ngo kuponavo ka tenji mambo wangu, paripese paanozogara tenji mambo wangu, ndipona paanozogaravo muranda wenyu: tirarame nokuti tife pamwepo.”—2 Samueli 15:6, 18-21.
Itai wakava akagondeka kuna Dhavhidhi mambo wakazojwa ndi Jehovha
Pikija Vakereti, Vapereti no Vagati vainga vonyikanja, ivona vakaziva Jehovha inga Mwari wo cokwadi no kuziva Dhavhidhi inga wakazojwa wa Jehovha. Dhavhidhi wakabongesera maningi ngokuva no vanarume vakagondeka ku divi rake.
a Mutemo wa Mwari wakatahwa pana Deuteronòmio 23:3-6, wakarambisa Vaamoni no Vamowabhi kuti vacanghwina mu musongano wo Vaiziraeri. Mukusiyana, zvinoita inga kuti mutemo uwu wairevera kubatana pamwepo pamusongano javo, asi aucairambisa kuti vonyikanja vatame kushwamarijana kana kugara pakati po vandhu va Mwari. Vonanyi Perspicaz vhorume 1 pheji 95.
