1. Kuvangisira kwapi kuri kuita vandhu mu basa ra Jehovha?

 ITUSU TINO basa rakawanda maningi nyika painokwedera kumagumo. (Mateu 24:14; Ruka 10:2; 1 Pedhru 5:2) Itusu tese tinoda kushandira Jehovha mukuperera mbhera patinokwanisa. Vamweni vari kuengejera mabasa avo. Vamweni vari kutovetera kuva mapiyona. Vamwenivo, vari kutovetera kwenda koshanda ku Bheteri kana koita basa ro kuvaka nyumba jo umwari. Hama jakawanda jiri kuvangisira kuti jive no zvikwaniriso kuti jishande inga vabeseri vo ungano no vakuru. (1 Timoti 3:1, 8) Jehovha anodakara maningi ngo kuvona vandhu vake vano cido co kuzvipira.—Nduyo 110:3, Shanduro yeNyika Itsva; Isaia 6:8.

2. Tingaitenyi kudari atikwanisi kukwanirisa zvido zvimweni pa kushandira Jehovha?

² Itusu tingaremba kudari tikavona kuti pakufamba ko nguva, atizivi kukwanirisa zvido zvedu pa kushandira Jehovha. Tingaremba ngo ndava yo ndanga yedu, mugariro jimweni kana ngo dava yo kuti azviitiki kuti tikwanirise cidoco. (Mazwi Akangwara 13:12) Izvi ndizvona zvakaitika na hambzaji Merisa. * Ivona vaida kwenda koshandira ku Bheteri kana kwenda ku Shikora co Vavhangeri vo Umambo. Ivona vakati: “Ndaaharahwa andicakwanisi kuita mabasa aya. Mukuvo umweni, izvi zvinondirembesa.”

3. Vamweni vangaita mudanyu japi kuti vakwanise kugajwa mabasa amweni?

³ Vamweni vaciri majaha vano uhomi waushoni, vanodikana kukhombija mugariro jimweni vacito vakwanirisa kuti vawane  mabasa amweni. Inga muezaniso, vamweni vangatova vandhu vakangwara, vanotema zvivaringo ngo kukasika no vano cido co kuita basa. Asi vanodikana kuita zviro ngo kusengerera, ngo kubhasopa no kuva vandhu vanoreremejwa ngo vamweni. Kudari mukavangisira kuti muve no mugariro iji, basa riya munozoripuwa pa mukuvo wamucikaveteri. Ngativone muezaniso wa hama Niki. Pavainga no makumaviri o makore, ivona vakanyangajwa maningi ngokuti avacaigajwa inga mubeseri wo ungano. Ivona vakati: “Ndaijizwa inga ndaita ciricese cakashata.” Asi hama Niki avazivi kuremba. Ivona vakavangisira maningi mu ungano no mu basa ro kucumaera. Nyamasi uno, hama Niki ndi umwe wo Komisau yo Cine.

4. Ngozvapi zvatiri kuda kujija pa musoro uno?

⁴ Imwimwi makacamwa ngokuti amuzivi kukwanirisa zvido zvenyu? Kudari ndizvona, itanyi mukumbiro mecivhunja Jehovha mazwiro enyu. (Nduyo 37:5-7) Mukuengejera, mungakumbira mazano hama jakaivha ku zvo umwari, kuti mungaitisa kudini nane mu basa ra Mwari, no kuvangisira kuti mumashandise mazanoo. Mukaita kudaro, muzogajwa basa riya kana kukwanirisa cido cenyu. Asi inga hambzaji Merisa vanangwaya pakutanga, zvingaita kuti basa ramunodaro amucakwanisi kuriita. Waro mungaitenyi? Ngozvapi zvamungaita kuti murambe no mudakaro? Kuti tidavire muvhunjo uwu, musoro uwu unozobhuya (1) tingapsakirepi mudakaro, (2) tingaitenyi kuti tiengejere mudakaro wedu no (3) zvido zvapi zvatingagaja kuti tiengejere mudakaro wedu.

5. Tinodikana kurangarirenyi kuti tive takadakara? (Mucumaeri 6:9)

⁵ Inga zvinonangwa pana Mucumaeri 6:9, tingawana mudakaro kudari tikaupsaka ku ndau kwayo. (Verenganyi.) Mundhu anobatikana ngo “kuvona ngo majiso” anodakara ngo zvaanazvo inga mugariro waanawo wari uno. Mukusiyana, mundhu anombhembhezuka ngo zviemuro, anoenderera mberi acida zviro zvaacikakwanisi kuwana. Ngozvapi zvatinojija? Kuti tiwane mudakaro, tinodikana kubatikana pa zviya zvatinazvo, kuciripi pa zvido zvaticikakwanisi kugumira.

6. Muezaniso wapi watiri kuda kuvona, tinozojijenyi ndiwona?

⁶ Zvinokwanisikadi kudakara ngo zvatinazvo? Vandhu vazinji vanorangarira kuti azvikwanisiki ngokuti tinoda kuenderera mberi tecijija zviro zvipsa. Asi izvona zvinokwanisika. Itusu tingadakara ngo zviya zvatinazvo wari uno. Tingazvitisa kudini? Kuti tiwane mupinguro, ngativoneyi muezaniso wa Jesu ngo pamusoro po matarenta unowanika pana Mateu 25:14-30. Tinozojija kuti tingaitisa kudini kuti tiwane mudakaro no kutoengejera mudakaro wedu pa mugariro watinawo.

7. Sananguranyi ngo kukasika muezaniso wa Jesu wo matarenta.

⁷ Pa muezaniso uu, mwanarume umweni wainga acida kuita hwendo. Asi acito waenda, wakadaninja varanda vake ovapa matarenta kuti vaite nyagoso ndiwona. * Ecirangarira ngo zvinokwaniswa ngo muranda umwe na umwe, mwanarume wiya wakapa matarenta mashanu ku muranda umwe, wopa matarenta maviri ku muranda umweni, wopavo tarenta rimwe ku muranda wo citatu. Varanda vaviri vo kutanga, vakabarisa mare ya patrau wavo. Asi muranda wo citatu, apana caakaita no mare yaakapuwaya, iyena wakazobudiswa basa.

8. Ngenyi muranda wokutanga waizodakara maningi?

 ⁸ Muranda wokutanga wakadakara maningi paakapuwa matarenta mashanu ndi patrau wake. Yainga mare yakawanda, kupuwa kwake mare iyi, zvaivonesa kuti wathembwa maningi ndi patrau wake. Waro tingati kudini ngo muranda wo cipiri? Iyena waizonyagajwa ngo kuvona kuti waashira matarenta mashoma, kupinda muranda wokutanga. Waro wakazoitenyi?

9. Ngozvapi zvicikazivi kunanga Jesu ngo pamusoro po muranda wo cipiri? (Mateu 25:22, 23)

⁹ Verenganyi Mateu 25:22, 23. Jesu aazivi kunanga kuti muranda wo cipiri wakanyagajwa no kuva no bundu ngo kuashira matarenta maviri basi. Jesu aazivi kunanga kuti muranda uu waingunguta ecinanga kuti: ‘Nga izvi basi zvandapuwa? Ngenyi vaita kudaro, inini ndinoshandavo ngo simba inga muranda waashiraya matarenta mashanu. Kudari patrau wangu vanorangarira kuti andishandi ngo simba, ndinoenda kofushira mare iyi ndoita basa rangu ndosiya basa rake.’

10. Muranda wo cipiri wakaitenyi no materenta aakapuwa?

¹⁰ Mukuezana no muranda wokutanga, muranda wo cipiri wakabata ngo nyara mbiri basa raakapuwa, woshandira patrau wake ngo simba. Inga muviyo, iyena wakaengejera matarenta maviri iya oita marongomuna. Muranda uu wakakomborehwa maningi ngo kushanda kwake ngo simba no kushandisa uzivi hwake. Iyena aazivi kudakajisa patrau wake basi, asi ivona vakamuvona kuti anofanera kupuwa mabasa amweni.

11. Tingaengejeresa kudini mudakaro wedu?

¹¹ Mu njira yakaezana, itusu tingaengejera mudakaro wedu patinoshanda ngo simba, mbhera patinokwanisa mu basa ririrese rotakagajwa pa kushandira Jehovha. Munodikana “kubatikana” mu basa ro kucumaera no kuvangisira mu mabasa o ungano. (Mabasa o Vapostori 18:5; Vahebheru 10:24, 25) Nasiriranyi ushoni musongano kuti mupe mupinguro jinovangisa. Kugajwa kurikwese kwamunoitwa pa musongano wo pakati po sumana, kuvonenyi inga kunosisira maningi. Kudari mukakumbihwa kuti muite basa ririrese pa ungano, gumanyi sedho mova mundhu anothembeka. Mucavona kuti basa ririrese ramunopuwa, arisisiri no kuvona kuti imwimwi amudikani kupeja nguva meciriita. Vangisiranyi kuti mukwanise ushoni kuita basero. (Mazwi Akangwara 22:29) Mukashandira Jehovha ngo simba rese, ushamwari hwenyu naye unozovanga, imwimwi munozodakara maningi. (Vagaratiya 6:4) Imwimwi munozodakarazve maningi kudari vandhu vamweni vakagajwa mabasa amaidakariraya kuita.—Varoma 12:15; Vagaratiya 5:26.

12. Zvicinyi zvakabesera hambzaji Merisa na hama Niki kuti vaengejere mudakaro wavo?

 ¹² Munoceukija hambzaji Merisa, vaingaya no cido co kushandira ku Bheteri kana co kwenda ku Shikora co Vavhangeri vo Umambo? Pikija kuti avaicaizokwanirisa zvido zvavo, ivona vakati: “Ndinobatikana mu basa ro upiyona no kucumaera mu njira jakasiyana-siyana. Izvi zvinondidakajisa maningi.” Waro hama Niki vakahwisanavo kudini no kucamwa kwavo, pavakatama kugajwa kuva mubeseri wo ungano? Ivona vakati: “Ndakabatikana pa zviya zvandaikwanisa kuita, inga kucumaera no kupa mupinguro jinovangisa pa musongano. Ndakatara petisau yo kwenda ku Bheteri, pa gore rakazotevera ndakazodaninjwa.”

13. Ngozvapi zvinozoitika kudari mukavangisira kuti muite basa ro makagajwa wari uno? (Mucumaeri 2:24)

¹³ Mukabatikana mu basa romakagajwa wari, munozogajwazve mabasa akakura maningi kumbejiyo. Izvi zvingaitika inga zvakaitikavo na hama Niki. Zvikatama kuitika inga zvakaitika na hambzaji Merisa, mudakaro wenyu unozoengejeka mozodakarazve maningi ngo zvamuri kuitira Jehovha. (Verenganyi Mucumaeri 2:24.) Kusiyapo izvo, munozodakara maningi ngo kuziva kuti kuvangisira kwenyu kuri kudakajisa Mambo wedu Jesu Kristu.

14. Tinodikana kurangarirenyi ngo pamusoro po kuva no zvido?

¹⁴ Waro kubatikana mu mabasa atinawo nyamasi uno, zvinoreva kuti atidikani kupsaka manera amweni o kuengejera basa redu kuna Jehovha? Andizvopi. Itusu tinodikana kuva no zvido zvinozotibesera kuti tienderere mberi tecicumaera, kujijisa no kunasa kubesera hama no hambzaji jedu. Itusu tinobudirira patinobesera vamweni ngo uzivi no kuzvidodokesa kuciripi kuzvisotesesa pacedu.—Mazwi Akangwara 11:2; Mabasa o Vapostori 20:35.

15. Ngozvapi zvido zvimweni zvingaengejera mudakaro wenyu?

¹⁵ Zvido zvapi zvamungagaja? Kumbiranyi Jehovha kuti amubesere kuziva kuti zvido zvapi zvamunozokwanirisa. (Mazwi Akangwara 16:3; Jakobo 1:5) Imwimwi munokwanisa kuita zvanangwaya pa  ndima yokutanga pa musoro uu, zvakadari inga kuita piyona wo besero, piyona wo nguva jese, kushandira ku Bheteri kana kubesera kuvaka nyumba jo umwari here? Kangaije mungakwanisa kujijira ndumi imweni kuti muengejere kucumaera kwenyu masoko akanaka kana  kutocumaera nyika imweni. Imwimwi mungaziva zvinobatanijwepo, ngo kuverengazve bhuku Takarongwa kuti Tiite Kuda ka Jehovha, cipauko co cigumi no kubhuya no vakuru vo ungano yenyu. * Pamunovangisira kuti mukwanirise zvido izvi, kubudirira kwenyu kunozovoneka ngo vamweni, mudakaro wenyu unozoengejekavo.

16. Mungaitenyi kudari amukwanisi kudadamira zvido zvanangwaya pakutanga?

¹⁶ Tingati kudini kudari imwimwi amukwanisi kudadamira zvido zvanangwaya pakutanga? Psakanyi zvido zvimweni zvamunozokwanisa kudadamira. Vonanyi mazano anotevera.

17. Mukuzwirana no 1 Timoti 4:13, 15, hama ingavangisirisa kudini kuti ive mujijisi waushoni?

¹⁷ Verenganyi 1 Timoti 4:13, 15. Kudari muri hama yakabhabhatijwa, vangisiranyi kuti muitise nane kuvereketa no kujijisa. Ngenyi? Ngokuti mukava mundhu anoverenga ushoni, kuvereketa no kujijisa, munozokwanisa ushoni kubesera vapurutani venyu. Ejanyi kugaja cido co kujija no kushandisa mugariro umwe na umwe unowanika pa bhurushura Itisanyi Nane pa Kuverenga no Kujijisa. Jijanyi mugariro umwe pa vhaza imwe, ujijirenyi muri pa muzi penyu no kuvangisira kuti muushandise pamunonga meciita hurukuro yenyu. Kumbiranyi mazano ku mupi wo mazano kana ku vakuru vamweni “vanoshanda ngo simba pa kuvereketa ngo pamusoro po soko ra Mwari no kujijisa.” * (1 Timoti 5:17) Mucabatikana basi ngo kushandisa zvamajijaro. Asi batikananyivo pa kubesera vapurutani venyu kuti  vavangise rutendo hwavo no kuvabesera kuti vashandise zvavajijaro. Mukaita kudaro, munozoengejera mudakaro wenyu no kuengejeravo mudakaro wo vapurutani venyu.

18. Ngozvapi zvingatibesera kuti tiwane zvido zvedu mu basa ro kucumaera?

¹⁸ Tese takapuwa basa ro kucumaera no kujijisa. (Mateu 28:19, 20; Varoma 10:14) Maidakarira kuitisa nane basa iri rinosisira? Jijanyi bhurushura Kujijisa, perapo mova no cido co kushandisa zviyana zvamajija. Mungawana mazano amweni mu Co Kutarira Zvo Musongano Upenyu Hwedu hwo ciKristu no Mushando no mavhidhiyo o kubhuisana ko kuezanisira anotatijwa pa musongano wo pakati po sumana. Ejanyi kushandisa mazano akasiyana-siyana kuti muvone kuti ngo api anoshanda ushoni. Ngo kushandisa mazano aya, imwimwi munozowana mudakaro ucikaezaniswi wo kuva Mukristu anoita ushoni basa rake.—2 Timoti 4:5.

19. Mungaitenyi kuti muve no mugariro jo Cikristu?

¹⁹ Mucakanganwa kuti cido cinosisira maningi camungagaja, ngo co kuva no mugariro jo Cikristu. (Vagaratiya 5:22, 23; Vakorose 3:12; 2 Pedhru 1:5-8) Mungacikwanirisa kudini cido ici? Inga muezaniso, ngatiti imwimwi, muri kupsaka kuda kuvangisa rutendo hwenyu. Mugaverenga musoro jinowanika mu mabhuku edu, jinopa mazano anosisira kuti muvangise rutendo hwenyu. Imwimwi mungabeserekazve maningi ngo kwenda kovona mavhidhiyo o JW Broadcasting^®, anovonesa hama no hambzaji, jakakhombija rutendo pajaisongana no zvineso zvakasiyana-siyana. Perapo, psakanyi manera o kutevejera muezaniso wavo wo rutendo mu upenyu hwenyu.

20. Tingaengejeresa kudini mudakaro wedu no kupungura kucamwa kwedu?

²⁰ Pacina kukana-kana, itusu tinoda kuita zviro zvizinji kuna Jehovha kupinda zvatiri kuita wari. Mu nyika imbza ya Mwari, itusu tinozonasa kumushandira. Izvi zvicito zvaitika, ngatiite zvese zvatinokwanisa pa zviya zvatiri kuita wari, kuti tiengejere mudakaro wedu no kupungura kucamwa kwedu. Cinosisirazve maningi ngo cokuti itusu tinozokuja no kusimba Jehovha “Mwari [wedu] wakadakara.” (1 Timoti 1:11) Ngo kudaro, ngatidakare ngo mabasa atiri kuitaro wari.