1-2. Mukuzwirana na Nduyo 34:9, tingazivisa kudini unaki wa Jehovha?

RANGARIRANYI kuti muri kupuwa zvokuha zvamucito mahazve. Imwimwi maizopsanga kuziva ngo pamusoro pazvo ngo kuzvisota, kuzvinuhija no kupsaka kuziva zviro zvadihwemo kana kuvhunjisa vandhu kuti vanozvivona kudini zvokuhezvo. Asi njira imwe basi yo mungazviziva ushoni ngo yo kuzviravira mwega.

² Itusu tingaziva ngo pamusoro po unaki wa Jehovha patinoverenga Bhaibheri, mabhuku edu kubatanijavo ngo kuzwa vamweni vecinanga kukomborehwa kwavakaitwa ndi Jehovha. Asi tinonasa kuzwisisa ‘patinoeja’ tega unaki hwake. (Verenganyi Nduyo 34:9.) Ngatiezanisire njira imwe yatingazviita ndiyona. Ngatiti tiri kuda kughwina mu divi ririrese ro basa ro nguva yakazara asi kuti tigumire cido ici, tinodikana kupungura zviro zvimweni mu upenyu hwedu. Kangaije taverenga kazinji cigondiso ca Jesu co kuti kudari tikadira Umambo pakutanga, Jehovha anozotipa zvatinotama, asi atito tavona tega kukwanirisika ko cigondiso ici. (Mateu 6:33) Asi tecigonda cigondiso ca Jesu, aticamoshi maningi mare, tinopungura nguva jataishanda tobatikana pa basa ro kucumaera. Tikaita kudaro, tinozoziva tega kuti Jehovha, anozotipekejesa kudini zvatinotama. Toeja “unaki” wa Jehovha tega.

3. Inga zvatinovona pana Nduyo 16:1, 2, ndiyani anoitihwa zvakanaka ndi Jehovha?

³ Jehovha anoitira zvakanaka “vandhu vese,” pikija no vaya vacikamuzivi. (Nduyo 145:9; Mateu 5:45) Asi maningi-ningi vaya vanoda Jehovha no kumushandira mu upenyu hwavo hwese vanokomborehwa maningi ndiyena. (Verenganyi Nduyo  16:1, 2.) Ngativone njira jimweni jatingabesereka ngo unaki wa Jehovha.

4. Jehovha anoitisa kudini zvakanaka kuna vaya vanotanga kukhwedera kwaari?

⁴ Nguva yese yatinoshandisa zvatinojijiswa ndi Jehovha tinovona muviyo jakanaka jatinowana mu upenyu hwedu. Patinojija ngo pamusoro pake no kumuda, iyena anotibesera kuti tinyise murangariro no zviito zvinotiparajanisa naye. (Vakorose 1:21) Patinojipira kuna Jehovha no kubhabhatijwa, tinovona maningi unaki wa Jehovha, wotipa hana yakacena no kuita kuti tive shamwari yake yo phedo.—1 Pedhru 3:21.

5. Tiri kuvonesa kudini unaki wa Jehovha mu basa ro kucumaera?

⁵ Itusu tinoenderera mberi tecivona unaki wa Jehovha patinoita basa ro kucumaera. Kunanga kuti muri mundhu anonyowa? Vashandiri vazinji va Jehovha vanavo nyowa. Kangaije kareko mucito maamushandiri wa Jehovha, amucaijirangarira mecitaka musuvo wo mundhu wo mucikazivi, kuti mumuvhunje ngo pamusoro po Bhaibheri. Asi nyamasi uno maakuzviita mukuvo wese. Jehovha wakamubesera kuti mudakajihwe ngo basa iri ro kucumaera. Imwimwi makavona kuti Jehovha wakamubeserazve mu njira jimweni. Iyena wakamubesera kuti mugare makathiva pomakasongana no vandhu vanotishora. Iyena wakamubeserazve kuti muceuje, mavhesi amunoda kushandisa ku vandhu vamuri kubhuya navo. Iyena wakamupazve simba kuti muenderere mberi mecicumaera vandhu pavanoramba kumupurukira.—Jeremia 20:7-9.

6. Kujijiswa kwatinoitwa ndi Jehovha kunovonesa kudini unaki hwake?

⁶ Jehovha anotiitirazve zvakanaka ngo kutijijisa kuti tiite basa ro kucumaera. (Johani 6:45) Pa musongano wedu wo pakati po sumana, tinopurukira kubhuisana ko kuezanisira kwakarangarihwa ushoni tovangiswa kuti tikushandise mu basa redu ro kucumaera. Pakutanga tinodikana kupsaka kuziva kuti tingaitisa kudini macumairiro mapsa aya. Asi patinozviita, tinovona kuti macumairire mapsa aya anodakarihwa maningi ngo vandhu vari mundharaundha mwedu. Tinovangiswazve pa musongano no mumagungano kuti tiite njira jimweni jo kucumaera jaticito takaita kareko. Izvi zvingatiitazve kuti tibude ku ndharaundha kwatinogara, toenda kumweni. Asi patinozviita, tiri kupekeja mukana Jehovha kuti atikomborere. Waro ngativone makomborero amweni atinowana patinoshandisa njira imbza jatinopuwari kuti tishandire Jehovha mbhera patinokwanisa, pacinenyi no mugariro wedu. Tinozovonazve njira jatingaengejera ndijona basa redu ro kucumaera.

7. Makomborero api otinowana kudari tikavangisira kuti tiengejere basa redu ro kucumaera?

⁷ Tinokhwedera maningi phedo na Jehovha. Vonanyi muezaniso wo mukuru umweni anodanwa Samuweri, * waishanda no mukaji wake mu nyika yo Korombiya. Hama Samuweri no mukaji wavo vainga vakadakara ngo kushanda inga mapiyona mu ungano yavo, asi vakada kuengejera basa ravo ro kucumaera ngo kwenda kobesera ungano yaidiwa maningi vacumaeri. Kuti vakwanirise cido cavo ivona vakadikana kusiya zvimweni sure. Hama Samuweri vakati: “Itusu takashandisa Mateu 6:33, toregera kutenga zviro zvaticaida maningi. Asi cineso cikuru cainga co kusiya nyumba yedu sure, iyona yakaitihwa itusu kamare atina zigava ririrese ngo pamusoro payo.” Kwavakaendaro koshandira, ivona vakavona kuti vanokwanisa kupona ngo mare shoma kupinda  yavaipona ndiyona kare. Hama Samuweri vakatizve: “Takavona kuti Jehovha ari kutitungamirira no kudavira mukumbiro jedu. Tiri kuvona kuti Jehovha ari kudakara ndisu no kutida kupinda zvaiita kare.” Kunanga kuti munokwanisavo kuengejera basa renyu ro kucumaera ngo njira iri yese? Kudari munokwanisa, ivanyi no cokwadi co kuti munozokhwedera phedo na Jehovha, wozomupa zvese zvamunotama.—Nduyo 18:26.

8. Majijenyi ngo zvakanangwa ndi hama Ivhani na hambzaji Vhitoriya?

⁸ Tinodakara ngo basa ratinoita. Vonanyi zvakanangwa ndi hama Ivhani na hambzaji Vhitoriya, vari mukaji no mwamuna vanoshanda inga mapiyona ku nyika yo Kirgistau. Ivona avazivi kuda kuva no zviro zvakawanda mu upenyu kuti vakwanise kujipira pa basa riri rese, kubatanijavo pa basa ro kuvaka nyumba jo umwari. Hama Ivhani vakati: “Itusu takavangisira maningi pa basa rese ro kuvaka nyumba jo umwari. Pikija tairemba pa kupera ko njiku, taidakara ngo kuziva kuti tashandisa simba redu mu basa ra Jehovha. Takadakarazve maningi ngo kuva no shamwari jimweni no zviitiko zvinodakajisa zvoticikakanganwi.”—Marko 10:29, 30.

9. Hambzaji ino mugariro unonesa ingaitenyi kuti iengejere basa rayo ro kucumaira? Ngowapi wakava muviyo wakona?

⁹ Tinodakara maningi ngo kushandira Jehovha, pikija patinonga pa mugariro jinonesa. Inga muezaniso, hambzaji Mire, noni yainga yaamusharuka yo Kumavhazuva ko Afrika, yakasiya basa royaiita ro kurapa, yotanga kushanda inga piyona. Iyona yainga no dhendha yakakura yaiita kuti vanesehwe kufamba. Iyona yaipeja nguva imwe basi yecicumaera nyumba ngo nyumba. Asi, yaikwanisa kupeja nguva jakawanda iri mu ucapupu hwo pambhene. Yaingazve no hwiririro no jijo jo Bhaibheri jakawanda. Vandhu vamweni vaibhuya navo ngo foni. Zvicinyi zvakaita kuti hambzaji Mire vavangisire pa kushandira kwavo Jehovha? Ivona vakati: “Inini ndinoda maningi Jehovha na Jesu Kristu. Ndaiita mukumbiro mukuvo wese kuti Jehovha andibesere kuti ndiengejere maningi kumushandira kondinomuita.”—Mateu 22:36, 37.

10. Mukuzwirana na 1 Pedhru 5:10, vaya vanovangisira pa kushandira Jehovha vanozoitihwenyi?

¹⁰ Tinojijiswa ndi Jehovha. Piyona umweni anoshanda ku nyika yo Maurisiyo anodanijwa kuti Kheni, wakavona kuti izvi ndizvonadi kamare. Paakajija cokwadi, wakabuda ku univhersidhadhi, wobhabhatijwa no kughwina mu nguva yakazara. Iyena wakati: “Ndakavangisira kuti ndipone mukuzwirana no masoko a Isaya, okuti: ‘Ndiri pano, nditumirenyi!’” (Isaia 6:8) Iyena wakabesera pa kuvaka nyumba jakawanda jo umwari, wakabeserazve pa kusanduja mabhuku edu mu ndumi yake. Iyena wakati: “Kujijiswa kondakaitwa kwakandibesera kuti ndiite zvandaidikana kuita mu basa ro ndakagajwa.” Iyena wakajija maitihwe aro basero kamare. Wakaengejera eciti: “Ndakajija ngo pamusoro po zvandicikakwanisi kuita no mugariro jondaidikana kuvangisira kuti ndive najo kuti ndive mushandiri waushoni wa Jehovha.” (Verenganyi 1 Pedhru 5:10.) Waro ngenyi amujipopori kuti muvone dangani munokwanisa kuita zvizinji kuna Jehovha?

11. Kuvangisira kwapi kwakaitwa ngo hambzaji ndhatu jo ku Koreya dhu Suri kuti jibatikane mu basa ro kucumaera? Ngowapi wakava muviyo wakona? (Vonanyi foto yo pa kapa.)

¹¹ Pikija hama jaanouzivi jinobesereka ngo jijiso iyi pajinoeja kuita manera mapsa o kucumaera. Mukati mo mutungu uwu wo koronavhiru, vakuru vo Koreya dhu Suri vakatara kudari: “Pikija mundhu wairangarira kuti aakwanisi kuita basa ro kucumaera ngo ndava yo zvineso zvo uhomi, wari uno ari kukwanisa kucumaera  ecishandisa foni. Hambzaji ndhatu jinomakore anopindirija makumasere jakajija manera mapsa aya o kucumaera ngo foni, jakatanga kucumaeara ngo manera mapsa aya njiku jese.” (Nduyo 92:15, 16) Kunanga kuti munodavo kuengejera basa renyu ro kucumaera no kuengejera kueja kwamunoita kunaka kwa Jehovha? Ngativone zviro zvitatu zvamungaita zvingamubesera kuti mukwanirise zviro izvi.

12. Jehovha anogondesenyi kuna vaya vanomuthemba?

¹² Jijiranyi kuthemba Jehovha. Jehovha anotikomborera maningi patinomuthemba no kumushandira ngo simba redu rese. (Malakia 3:10) Hambzaji imweni yo ku Korombiya inodanwa Fabhiyora, yakavona Jehovha acikwanirisa cigondiso ici kwairi. Iyona yaida kuita piyona wo nguva jese payakandopera kubhabhatijwa. Asi mwamuna wayo no vana vayo vatatu, vainyinda mare yayaipocera. Payakandoregera kubata basa, iyona yakakumbira maningi Jehovha kuti aibesere. Iyona yakati: “Kazinji mundhu paanoreformahwi zvinotora mukuvo wakareba maningi kuti apocehwe, asi inini ndakapocehwa mare iyi mukati mo mweji umwe basi. Zvakaita inga mushamaiso kwandiri.” Pa mweji muviri jakatevera, yakatanga kushanda inga piyona. Hambzaji iyi, wari iri mukati mo makumanomwe o makore, iyona yaapiyona ko makumaviri o makore. Mukati mo nguva iyi yakakwanisa kubesera vandhu vasere kuti vabhabhatijwe. Iyona yakati: “Pikija kuti ndinojizwa ndakaremba mukuvo umweni, Jehovha anondibesera kuti ndienderere mberi ndecicumaera njiku jese.”

13-14. Muezaniso japi jingamubesera kuti muthembe Jehovha no kukwanirisa zvido zvenyu?

 ¹³ Beserekanyi ngo muezaniso jo vaya vakathemba Jehovha. Mu Bhaibheri makazara ngo muezaniso jo vandhu vakavangisira mu basa ra Jehovha. Inga muezaniso, vashandiri va Jehovha ava, vakaita mudanyu jo kutanga vacito vatokomborehwa maningi ndi Jehovha. Inga muezaniso, Abhirahama wakazokomborehwa ndi Jehovha pasure po kusiya nyumba yake “pikija aacaikuziva kwaaienda.” (Vahebheru 11:8) Jakobe paakapera kuhwisana no ngirozi, ngo paakazokomborehwa maningi ndi Jehovha. (Genesi 32:25-31) Jinja ro Vaizraeri pavaida kughwina mu Nyika yo Cipikihwa, vapiri povakaima mu mbhiripiri wo Murambo wa Jordhani, ngo povakadarika murambo uu.—Joxwa 3:14-16.

¹⁴ Imwimwi mungabeserekavo ngo muezaniso wo hama no hambzaji jo njiku jino jakathemba Jehovha, jopsaka kukwanirisa zvido zvajo. Inga muezaniso, hama inodanwa Phaitoni no mukaji wayo Dhiyana, vakaverenga ngo pamusoro po hama no hambzaji, jakaengejera basa rajo pa kushandira Jehovha, jakadari inga jinobhuiwa pa musoro jinoti: “Vakazvipa Nemwoyo Unoda.” * Hama Phaitoni vakati: “Pandakaverenga zvakaitikirari hama iji, ndakajizwa inga ndiri kutovona mundhu arikuha zviro zvinonaka maningi. Pandaijivona, ndakadavo maningi kuravira kuti ndivone ‘unaki hwa Tenji Mwari.’” Pa kufamba ko nguva, hama Phaitoni na hambzaji Dhiyana, vakaenda kucumaera kunodiwa maningi vacumaeri. Makaverengavo musoro iji here? Makavonavo vhidhiyo jino musoro unoti: Kuparidza Kunzvimbo Iri Kwayo Yoga—Australia—no unoti Kuparidza Kunzvimbo Iri Kwayo Yoga—Ireland, jinowanika mu jw.org? Izvi zvakabudiswari zvingamubesera kuti mupsake manera amungaengejera ndiwona basa renyu.

15. Shamwari jaushoni jingatibeseresa kudini?

¹⁵ Sananyi shamwari jaushoni. Itusu takapeamira pa kuda kuravira zvokuha kudari tikapeja mukuvo no vandhu vanozvidakarira. Mukuezana, kudari tikashamwarijana no vandhu vanopeja mukuvo wakareba vacishandira Jehovha mu upenyu hwavo, itusu tingapsakavo manera okuengejera basa redu kuna Jehovha. Izvi wari zvakaitikira hama imweni inodanwa Kraudhiyo no mukaji wayo Vheronika. Hama Kraudhiyo vakati: “Hama jedu no shamwari vakativangisa kuti tieje manera amweni okushandira Jehovha. Itusu takaziva kuti ngo kushamwarijana no vandhu vanodira Umambo pakutanga, zvakaita kuti tithembe kuti tingaejavo manera mapsa.” Wari hama Kraudhiyo na hambzaji Vheronika vari kushanda inga mapiyona anosirira ku nyika yo Servhiya.

16. Inga zvinovoneswa ngo muezaniso wa Jesu uri pana Ruka 12:16-21, ngenyi tinodikana kutendera kusiya zviro zvimweni?

¹⁶ Siyanyi zvimweni kuti mubatire Jehovha. Atidikani kusiya zviro zvese zvatinodakarira kuti tishandire Jehovha. (Mucumaeri 5:18, 19) Asi kudari tikakheta kutama kuita zvakawanda pa kushandira kwedu Jehovha ngokuti atidi kusiya zviro zvimweni zvatinodakarira, taizoposavo inga zvakaita mwanarume wo pa muezaniso wa Jesu. Uwo wakajipsakira mare yakawanda, wotama kurangarira zvinoda Mwari. (Verenganyi Ruka 12:16-21.) Hama imweni inodanwa Kristiano inogara ku nyika yo Fransa, yakati: “Inini andicaishandisa ushoni nguva yangu no simba rangu kuti ndishandire Jehovha no mbhuri yangu.” Hama iyi no mukaji wayo, vakatema civaringo co kuva mapiyona. Asi kuti vakwanirise  cido ici, vakadikana kusiya mabasa ovaiita. Ngo kudaro, vakatanga kuita cibasa co kucenesa-cenesa no kujijira kudakara ngo mare shoma yovaiwana. Kunanga kuti vakadakara ngo kusiya zvimweni kuti vave mapiyona? Hama Kristiano vakati: “Takadakara maningi ngo kucumaera ushoni no kuvona vajiji vedu vo Bhaibheri no vataihwiririra vacijija ngo pamusoro pa Jehovha.”

17. Ngozvapi zvingatiitisa kuti tienderere mberi tecieja macumairiro mapsa?

¹⁷ Ivanyi no cido co kueja macumairiro mapsa. (Mabasa o Vapostori 17:16, 17; 20:20, 21) Hambzaji Shirei inogara Estadhus Unidhus, inoshanda inga piyona, yakadikana kucinja manera ayo okucumaera ngo ndava yo mutungu uwu wo koronavhiru. Pakutanga iyona yaijivhunjisa dangani yaizokwanisa kucumaera ngo foni. Asi poyakapera kujijiswa poyaifambihwa ngo muvonereri wo ndharaudha, iyona yakatanga kucumaera ngo njira iyi mukuvo wese. Iyona yakati: “Pokutanga zvaithyisa, asi wari ndiri kudakara maningi ndizvona. Tiri kuwana vandhu vakawanda kupinda vataiwana potaicumaera nyumba ngo nyumba.”

18. Ngocapi cingatibesera kuti tihwisane no zvineso patinovangisira kuti tiengejere mushando wedu?

¹⁸ Itanyi urongwa, movangisira kuti muukwanirise. Patinowanana no zvineso, tinoita mukumbiro tovangisira kuti tishandise murangariro wedu kuti tiwane zvo kuita. (Mazwi Akangwara 3:21) Hambzaji Sonia vari piyona wo nguva jese mu cikwata co ndimi yo Ciromeniya ku Europa, vakati: “Ndinodakarira kutara zvandinoda kuita pa phepha, ndoridira pa ndau inovoneka. Pa meza yangu ndakadira makwanja maviri anoenda ku ndau jakasiyana. Pandinoda kutema zvivaringo, ndinosota makwanja maviri aya, ndonasa kurangarira ngo pamusoro po kuti civaringo cangu cinobesera kuti ndikwanirise urongwa hwangu kana kuti haiwa.” Hambzaji Sonia vanovangisira kuti vave no mavonero aushoni ngo pamusoro po zvineso zvavo. Ivona vakati: “Mugariro umwe nga umwe wandinosongana nawo, ungaita inga mufimbiji unondiphinga kana mudandho unondibesa, zvecifira pa mavonero andinao.”

19. Tinodikana kutema civaringo co kuitenyi?

¹⁹ Jehovha anotikomborera mu njira jakawanda. Itusu tingakhombija kubonga kwedu ngo zviro zvaanotipa Jehovha no kuita zvese zvatinokwanisa kuti asimbwe. (Vahebheru 13:15) Itusu tingakwanisa kuita zviro zvakasiyana-siyana pa kushandira Jehovha. Perapo Jehovha anozotikomborera maningi. Pa njiku imwe nga imwe ngatipsake njira yo kuti ‘tieje, tizovone unaki hwa Tenji Mwari.’ Perapo tinozoita inga ndi Jesu wakanangaya kuti: “Zvokuha zvangu ndikona kuita kuda ka wiya wakandituma no kupeja basa rake.”—Johani 4:34.